Malipayong Paghatag nga Naggikan sa Kasingkasing

MAYLABOT sa paghatag, si apostol Pablo misulat: “Ipabuhat sa matag usa ang sumala sa iyang gihukom diha sa iyang kasingkasing,” ug siya midugang: “Dili nga kontragusto o pinugos, kay gihigugma sa Diyos ang malipayong maghahatag.” (2 Cor. 9:7) Si Jehova wala magpugos kang bisan kinsa sa pagsuportar sa putli nga pagsimba. Iyang gitugotan ang iyang mga alagad sa pagpakita sa ilang debosyon pinaagi sa ilang boluntaryo ug malipayong paghatag. Latas sa kasaysayan, ang iyang katawhan madasigong misanong. Tagda ang tulo ka pananglitan.

Human pagawsa ni Jehova ang mga Israelinhon gikan sa Ehipto, iyang gisugo sila sa pagtukod ug tabernakulo. Gikinahanglan ang mga materyales, busa ang mga Israelinhon giawhag sa pag-amot. Agig sanong, “ang matag usa kansang kasingkasing nagtukmod kaniya” nagdalag bulawan ug plata, alahas, ug ubang materyales. Manggihatagon kaayo ang mga tawo nga gihimo ang pahibalo  nga hunongon na ang paghatag.—Ex. 35:5, 21; 36:6, 7.

Sa pagtukod sa templo kasiglohan sa ulahi, ang katawhan sa Diyos may kahigayonan na usab sa pagsuportar sa putli nga pagsimba. Si Haring David dakog giamot sa maong proyekto ug iyang giawhag ang uban sa paghatag. Sila kinabubut-ong mihimo niana. Aw, ang bulawan ug plata lang gani mikantidad nag kapin sa 100 ka bilyong dolyar sa bili karon! Ang mga tawo nalipay sa paghatag ug boluntaryong mga amot ngadto kang Jehova.—1 Cron. 29:3-9; 2 Cron. 5:1.

Ang malipayong espiritu sa paghatag gipakita usab sa unang mga sumusunod ni Jesu-Kristo. Sa adlaw sa Pentekostes 33 K.P., mga 3,000 ang nabawtismohan, nga daghan kanila dili molupyo sa Jerusalem. Aron kadtong kabos nga mga igsoon makapabilin sa siyudad ug makakat-on ug dugang bahin sa ilang bag-ong pagtuo, dihay temporaryong pagtampohay ug salapi. Gibaligya sa mga igsoon ang ilang katigayonan ug gidala ang halin ngadto sa mga apostoles aron tabangan ang mga nanginahanglan. Nalipay gayod si Jehova nga makita ang maong pagpasundayag sa pagtuo ug gugma!—Buh. 2:41-47.

Karong adlawa, ang mga Kristohanon nagpadayon sa pagsuportar sa putli nga pagsimba pinaagi sa madagayaon ug malipayong paghatag sa ilang panahon, kusog, ug salapi. Ang kahon sa ubos naghatag ug pipila ka paagi nga mabuhat nimo kini.

[Kahon sa panid 18]

MGA PAAGI SA PAGHATAG NGA GIPILI SA UBAN

MGA AMOT ALANG SA TIBUOK-KALIBOTANG BULUHATON

Daghan ang naggahin o nagbadyet ug salapi nga ilang ihulog diha sa mga kahon sa kontribusyon nga gimarkahan ug “Worldwide Work.”

Matag bulan, ang mga kongregasyon magpadala niining maong salapi ngadto sa sangang buhatan sa mga Saksi ni Jehova nga nagdumala sa ilang nasod. Ang kinabubut-on nga mga donasyong salapi mahimong ipadala usab nga direkta sa Watchtower Bible and Tract Society of the Philippines, Inc., P.O. Box 2044, 1060 Manila, o sa sangang buhatan sa mga Saksi ni Jehova nga nagdumala sa nasod nga inyong gipuy-an. (Ang boluntaryong mga donasyon nga gihisgotan sa ubos mahimong ipadala usab sa sangang buhatan sa mga Saksi ni Jehova nga nagdumala sa nasod nga inyong gipuy-an.) Ang mga tseke nga ipadala sa adres sa ibabaw kinahanglang himoon nga payable to “Watch Tower Society.” Ang mga alahas o ubang mahalong mga butang mahimo usab nga idonar. Ang mubong sulat nga nagpahayag nga kana gidonar angayng ipasukip niana.

CONDITIONAL-DONATION TRUST ARRANGEMENT

Ang salapi mahimong ibutang nga in trust with Watch Tower Society aron magamit kini sa tibuok kalibotan. Apan, kon ang nagdonar mohangyo sa maong salapi, kana ibalik kaniya. Alang sa dugang impormasyon, palihog kontaka ang Watch Tower Society sa adres nga gitala dinhi.

CHARITABLE PLANNING

Gawas sa direktang pagdonar ug salapi, adunay ubang mga paagi sa paghatag aron makatabang sa buluhaton sa Gingharian sa tibuok kalibotan. Kini naglakip sa:

Insurance: Ang Watch Tower Society mahimong himoon nga benepisyaryo sa usa ka polisa sa life insurance o sa pagretiro/pensiyon.

Bank Accounts: Ang mga pondo sa bangko, sertipiko sa deposito, o indibiduwal nga mga pondo sa pagretiro mahimong ibutang nga in trust for o himoong payable on death ngadto sa Watch Tower Society, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond, mahimo usab nga idonar ngadto sa Watch Tower Society o ang Watch Tower Society mahimong himoon nga Transfer on Death beneficiary.

Real Estate: Ang ikabaligya nga balay ug yuta mahimong idonar nga direkta. Kon kini gipuy-an pa, mahimo niya kining ireserba ug magpadayon sa pagpuyo diha niana samtang siya buhi pa. Kontaka ang sangang buhatan sa dili pa buhatag papeles ang bisan unsang balay o yuta.

Gift Annuity: Kini maoy usa ka kahikayan diin ibalhin sa usa ang iyang salapi o mga deposito ngadto sa korporasyon nga gigamit sa mga Saksi ni Jehova. Sa baylo, ang nagdonar, o ang usa nga iyang gitudlo, modawat ug usa ka tino nga bayad matag tuig sa tibuok niyang kinabuhi. Ang buhis sa kinitaan (income tax) sa nagdonar makunhoran sa tuig nga gisugdan ang gift annuity.

Wills and Trusts: Ang propiedad o salapi mahimong idonar ngadto sa Watch Tower Society pinaagig usa ka legal nga testamento, o ang Watch Tower Society mahimong himoon nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ang “charitable planning” o plano sa paghatag ug buhat sa kaluoy, maoy usa ka paagi sa pagdonar nga kinahanglang planohon daan. Aron maabagan ang mga indibiduwal nga gustong motabang sa tibuok-kalibotang buluhaton sa mga Saksi ni Jehova pinaagig charitable planning, gihimo ang brosyur nga Charitable Planning to Benefit Kingdom Service Worldwide nga mabatonan sa Iningles o Kinatsila. Kini nga brosyur naghatag ug impormasyon bahin sa mga paagi diin ikahatag ang mga gasa karon o inigkamatay sa nagdonar. Human mabasa ang maong brosyur ug makonsulta ang ilang mga magtatambag bahin sa legal nga mga butang o sa buhis, daghan ang nakatabang sa pagsuportar sa kalihokan sa mga Saksi ni Jehova sa tibuok kalibotan ug namenosan ug dako ang ilang bayranan sa buhis samtang nagbuhat niana. Kining brosyura mabatonan pinaagig direktang paghangyo niini sa Charitable Planning Office.

Alang sa dugang impormasyon, mahimong kontakon ang Charitable Planning Office pinaagig sulat o telepono, diha sa adres nga gilista sa ubos, o mahimong kontakon ang sangang buhatan sa mga Saksi ni Jehova nga nagdumala sa nasod nga inyong gipuy-an.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue,

San Francisco del Monte 1105 Quezon City

Telepono: (02) 411-6090