Mga Pangutana Gikan sa mga Magbabasa

Angay bang magpandong ang usa ka sister sa dihang maghubad ug mga pakigpulong ngadto sa senyas nga pinulongan panahon sa mga tigom, asembliya, o mga kombensiyon?

Kasagaran, ang usa ka Kristohanong babaye kinahanglang magpandong sa dihang siya maghimo sa butang nga sa naandan maoy responsibilidad sa iyang bana o sa usa ka brader sa kongregasyon. Nahiuyon kini sa prinsipyo nga gisulti ni apostol Pablo nga “ang matag babaye nga nagaampo o nagapanagna nga walay pandong sa iyang ulo nagapakaulaw sa iyang ulo” tungod kay “ang ulo sa usa ka babaye mao ang lalaki.” (1 Cor. 11:3-10) Sa dihang ang usa ka sister mogamit ug makasaranganon ug nahiangay nga pandong sa maong mga kahimtang, timailhan kana sa iyang pagpasakop sa teokratikanhong kahikayan diha sa kongregasyon.—1 Tim. 2:11, 12. a

Apan, komosta ang mga kahimtang diin ang sister maghubad ngadto sa senyas nga pinulongan alang sa usa ka brader nga nagpakigpulong? Tinuod, ang sister naghubad lang sa gisulti sa mamumulong. Sa ato pa, dili siya ang nagtudlo kondili ang brader nga nagpakigpulong. Apan, ang paghubad ngadto sa senyas nga pinulongan lahi kaayo sa paghubad sa gisulting mga pinulongan. Sa gisulting mga pinulongan, ang pagtagad sa mamiminaw mahimong nasentro gihapon sa mamumulong samtang naminaw sila sa tighubad. Lain pa, ang mga sister nga naghubad sa gisulting pinulongan sagad anaa sa dapit diin dili masentro kanila ang pagtagad sa mamiminaw. Usahay, pwede silang  maglingkod o kon magtindog man, mag-atubang sila sa mamumulong inay sa mamiminaw. Busa dili na sila kinahanglang magpandong.

Sa laing bahin, tungod sa bag-ong teknolohiya nga gigamit sa dihang hubaron ang mga pakigpulong ngadto sa senyas nga pinulongan, sagad ang tighubad maoy tan-awon sa mamiminaw. Kasagaran ang tighubad maoy makita diha sa dako nga eskrin, samtang ang mamumulong basin dili na gani makita sa mamiminaw. Busa angayan lamang nga ilhon sa sister ang iyang segundaryong papel ingong tighubad pinaagi sa pagpandong.

Komosta man kon hubaron ngadto sa senyas nga pinulongan ang mga bahin sa Teokratikanhong Tunghaan sa Ministeryo, mga demonstrasyon, ug mga komento panahon sa Pagtuon sa Kongregasyon sa Bibliya, Tigom sa Pag-alagad, ug Pagtuon sa Bantayanang Torre? Magpandong ba usab ang sister nga maghubad niana ngadto sa senyas nga pinulongan? Sa pipila ka kahimtang, dili na siya kinahanglang magpandong, sanglit ang tanang nanambong nahibalo nga dili siya ang aktuwal nga nagdumala sa tigom. Ingon niini ang kahimtang, kon pananglitan naghubad siya sa mga komento sa mamiminaw, sa mga bahin sa mga sister, o sa mga demonstrasyon. Apan kon siya maghubad ug mga pakigpulong sa mga brader, maghubad alang sa nagdumala sa Pagtuon sa Bantayanang Torre o sa Pagtuon sa Kongregasyon sa Bibliya, o sa dihang manguna sa pagsenyas sa mga alawiton, kinahanglan siyang magpandong. Panahon sa tigom, ang usa ka sister mahimong maghubad alang sa mga brader, sister, bata, ug mga ansiyano. Tungod niini, mas praktikal nga magpandong siya sa enterong tigom.

[Footnote]