Pagpakitag Maayong Pamatasan Ingong mga Ministro sa Diyos

“Mahimong mga tigsundog sa Diyos.”—EFE. 5:1.

1, 2. (a) Nganong hinungdanon ang maayong pamatasan? (b) Unsay hisgotan niining artikuloha?

 MAYLABOT sa matinahorong panggawi, ang awtor nga si Sue Fox misulat nga kita kinahanglang magpakita kanunay ug maayong pamatasan. Siya midugang: “Kini adunay maayong resulta bisan asa ug sa tanang panahon.” Kon nabatasan na sa mga tawo ang pagkamatinahoron, ang panagbingkil mamenosan ug sagad malikayan. Sa laing bahin, ang dili-matinahorong pagtratar nato sa uban moresulta sa panagbangi, kayugot, ug kasubo.

² Sa katibuk-an, ang Kristohanong kongregasyon gilangkoban sa mga tawo nga dunay maayong pamatasan. Bisan pa niana, kita kinahanglang magbantay aron dili nato masundog ang dili maayong pamatasan nga komon sa kalibotan karon. Atong susihon kon sa unsang paagi ang pagpadapat sa mga prinsipyo sa Bibliya maylabot sa maayong pamatasan makapanalipod kanato niining  bahina ug makadani sa mga tawo sa matuod nga pagsimba. Aron masabtan kon unsay nalangkit sa pagpasundayag ug maayong pamatasan, tagda ang ehemplo ni Jehova ug sa iyang Anak.

Si Jehova ug ang Iyang Anak—Ehemplo sa Maayong Pamatasan

3. Unsang ehemplo sa maayong pamatasan ang gipakita ni Jehova nga Diyos?

³ Si Jehova nga Diyos nagpakitag hingpit nga ehemplo sa maayong pamatasan. Bisan pa sa iyang hataas nga posisyon ingong Soberano sa uniberso, iya gayong gitratar ang mga tawo sa maluloton ug matinahorong paagi. Sa pagpakigsulti kang Abraham ug Moises, si Jehova migamit sa Hebreohanong pulong nga sagad hubaron ug “palihog.” (Gen. 13:14; Ex. 4:6) Sa dihang masayop ang iyang mga alagad, si Jehova “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatinud-anon.” (Sal. 86:15) Siya lahi kaayo sa pipila ka tawo nga mosilaob sa kasuko kon ang uban mapakyas sa pagbuhat sa ilang gidahom.

4. Sa unsang paagi atong masundog si Jehova sa dihang ang uban makigsulti kanato?

⁴ Ang maayong pamatasan sa Diyos dayag usab sa paagi nga siya mamati sa mga tawo. Sa dihang si Abraham nagpatunghag mga pangutana bahin sa mga tawo sa Sodoma, si Jehova mapailobong mitubag sa matag usa niana. (Gen. 18:23-32) Wala niya isipa nga ang pagpaminaw sa kahingawa ni Abraham makalangan Kaniya. Si Jehova maminaw sa pag-ampo sa iyang mga alagad ug sa pagtuaw sa mahinulsolong mga makasasala. (Basaha ang Salmo 51:11, 17.) Dili ba angay sab natong sundogon si Jehova pinaagi sa pagpaminaw sa dihang ang uban makigsulti kanato?

5. Sa unsang paagi ang pagsundog sa maayong pamatasan ni Jesus makapauswag sa atong relasyon sa uban?

⁵ Lakip sa daghang butang nga nakat-onan ni Jesu-Kristo sa iyang Amahan mao ang maayong pamatasan. Bisan tuod may mga higayon nga kinahanglan siyang mogugol ug dakong panahon ug kusog diha sa iyang ministeryo, si Jesus kanunayng nagpakitag pailob ug kalulot. Si Jesus andam ug kinabubut-ong nagtabang sa mga sanlahon, mga buta nga nagpakilimos, ug sa uban nga nanginahanglan. Siya wala magsalikway kanila, bisan pag miduol sila kaniya sa dili-kombenyenteng panahon. Sagad mohunong siya sa iyang gibuhat aron sa pagtabang sa nagmagul-anon. Si Jesus masinaboton kaayo niadtong nagtuo kaniya. (Mar. 5:30-34; Luc. 18:35-41) Ingong mga Kristohanon, atong sundogon ang ehemplo ni Jesus pinaagi sa pagkahimong maluloton ug matinabangon. Ang maong panggawi mamatikdan sa atong mga paryente, silingan, ug sa uban. Dugang pa, ang maong panggawi maghimaya kang Jehova ug maghatag kanatog kalipay.

6. Unsang ehemplo sa pagkamahigalaon ang gipakita ni Jesus?

⁶ Si Jesus nagpakita usab ug pagtahod sa mga tawo pinaagi sa paggamit sa ilang ngalan. Gibuhat ba usab kana sa Hudiyong mga lider sa relihiyon? Wala. Ilang giisip ug gitratar kadtong wala mahibalo sa Balaod ingong “tinunglong katawhan.” (Juan 7:49) Dili ingon niana ang Anak sa Diyos. Si Marta, Maria, ug Zaqueo, ug ang uban pa nakadungog kaniya nga nagtawag kanila sa ilang ngalan. (Luc. 10:41, 42; 19:5) Bisan tuod nagdepende sa kultura ug sirkumstansiya kon sa unsang paagi atong tawgon ang mga tawo karon, ang mga alagad ni Jehova naningkamot nga mahimong mahigalaon sa uban. a Wala nila tugoti nga ang kalainan sa kahimtang sa kinabuhi magpugong kanila sa pagtahod sa ilang mga isigkamagtutuo ug sa uban.—Basaha ang Santiago 2:1-4.

7. Sa unsang paagi ang mga prinsipyo sa Bibliya motabang kanato sa pagpakitag maayong pamatasan sa atong isigkatawo sa bisan asang dapit?

⁷ Ang pagkamapuangoron sa Diyos ug sa iyang Anak diha sa ilang pagtratar sa mga tawo sa tanang kanasoran ug rasa nagpakitag pagtahod sa maong mga indibiduwal ug nagdani niadtong nangita sa kamatuoran. Siyempre, ang mga buhat nga giisip nga maayong pamatasan dili managsama sa lainlaing dapit. Busa, wala kita magsunod ug estriktong mga lagda maylabot sa pamatasan. Hinunoa, atong gisunod ang mga prinsipyo sa Bibliya sa pagpakitag pagtahod sa mga tawo sa bisan asang dapit. Atong susihon kon sa unsang paagi ang pagpakitag maayong pamatasan makatabang kanato  nga mahimong mas mabungahon sa atong ministeryo.

Pagtimbaya ug Pagpakigsulti sa mga Tawo

8, 9. (a) Unsang batasan ang isipong dili maayo? (b) Nganong atong tugotan ang gipamulong ni Jesus sa Mateo 5:47 nga mag-apektar sa atong pagtratar sa mga tawo?

⁸ Diha sa nagdali-kanunay nga kinabuhi nga komon sa daghang dapit karon, ang mga tawo sagad dili na magkomostahay sa dihang magtagbo. Siyempre, wala kana magpasabot nga atong estoryahon ang tanan nga molabay diha sa dalan. Apan, adunay daghang kahimtang diin haom ug gikinahanglan ang pagtimbaya sa uban. Nabatasan ba nimo ang pagtimbaya sa mga tawo? O sagad molabay ka lang nga dili mopahiyom o mangomosta? Bisag walay daotang tuyo, mahimong maugmad sa usa ka tawo ang dili-maayong pamatasan.

⁹ Si Jesus nagpahinumdom kanato: “Kon inyong komostahon ang inyong mga igsoon lamang, unsang talagsaong butang ang inyong ginabuhat? Dili ba ang katawhan sa kanasoran nagabuhat man usab sa samang butang?” (Mat. 5:47) Niining bahina, ang konsultant nga si Donald Weiss misulat: “Ang mga tawo maglagot kon dili sila tagdon. Wala gayoy maayong katarongan nga dili nimo panumbalingon ang uban. Simple lang ang solusyon: Timbayaha ang mga tawo. Pakigsulti kanila.” Kon dili nato tugotan ang atong pagkadili-matinagdanon o pagkadili-mahigalaon nga mag-apektar sa atong pagpakiglabot sa uban, atong mabatonan ang maayong resulta.

10. Sa unsang paagi ang maayong pamatasan makatabang kanato nga magmabungahon diha sa ministeryo? (Tan-awa ang kahon nga  “Sugdig Mainit nga Pahiyom.”)

¹⁰ Tagda ang kahimtang sa usa ka Kristohanong magtiayon nga si Tom ug Carol, kinsa nagpuyo sa usa ka dakong siyudad sa amihanang bahin sa United States. Gihimo nilang bahin sa ilang ministeryo ang pagtimbaya sa ilang mga silingan. Giunsa nila kana paghimo? Nagtumong sa Santiago 3:18, si Tom miingon: “Kami maningkamot nga mahimong mahigalaon ug makigdaiton sa mga tawo. Among duolon kadtong naa sa gawas sa ilang balay ug kadtong nagtrabaho sa maong dapit. Kami mopahiyom ug motimbaya kanila. Among estoryahan kon unsay makapainteres kanila—ilang mga anak, iro, balay, ug ilang trabaho. Sa ngadtongadto, giisip nila kami nga ilang mga higala.” Si Carol midugang: “Sa sunod namong panag-estorya, makig-ilaila mi nila. Amo silang sultihan kon unsay among gibuhat diha sa silinganan apan dili mi magdugay sa pakig-estorya. Sa ngadtongadto, makasangyaw na mi nila.” Naangkon ni Tom ug  Carol ang pagsalig sa ilang mga silingan. Daghan ang midawat ug mga publikasyon nga binase sa Bibliya, ug ang pipila gustong makakat-on sa kamatuoran.

Pagpakitag Maayong Pamatasan sa Malisod nga mga Kahimtang

11, 12. Nganong angay natong dahomon nga kita makasinatig dili-maayong pagtratar samtang magsangyaw sa maayong balita, ug unsay angay natong buhaton?

¹¹ Usahay, pakitaan kitag dili maayong pamatasan samtang magsangyaw sa maayong balita. Ato na kining gidahom, kay si Kristo Jesus nagpasidaan sa iyang mga tinun-an: “Kon sila naglutos kanako, sila magalutos usab kaninyo.” (Juan 15:20) Apan kon mobalos kita sa dili maayong mga komento, dili kini mopatunghag maayong resulta. Unsay angay natong buhaton? Si apostol Pedro misulat: “Balaana si Kristo ingong Ginoo diha sa inyong mga kasingkasing, nga andam kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.” (1 Ped. 3:15) Ang atong pagpakitag maayong pamatasan—nga motubag sa malumo ug matinahorong paagi—mahimong makapausab sa tinamdan niadtong nanginsulto kanato.—Tito 2:7, 8.

¹² Makapangandam ba kita sa pag-atubang sa negatibong mga komento sa paagi nga giuyonan sa Diyos? Oo. Si Pablo nagsugyot: “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.” (Col. 4:6) Kon atong batasanon ang pagpakitag maayong pamatasan sa mga membro sa atong pamilya, eskolmet, kauban sa trabaho, mga igsoon sa kongregasyon, ug sa atong mga silingan, mas andam kitang moatubang sa pagbugalbugal ug panginsulto sa paagi nga nahiangay sa usa ka Kristohanon.—Basaha ang Roma 12:17-21.

13. Paghatag ug pananglitan kon sa unsang paagi ang pagpakitag maayong pamatasan mahimong makapausab sa tinamdan sa mga magsusupak.

¹³ Ang pagpakitag maayong pamatasan sa malisod nga mga kahimtang adunay maayong resulta. Pananglitan didto sa Japan, usa ka Saksi ang gibiaybiay sa tagbalay ug sa bisita niini. Ang brader mibiya nga matinahoron. Samtang siya nagpadayon sa pagsangyaw, iyang namatikdan nga ang bisita nagbantay kaniya. Sa dihang giduol siya sa brader, ang tawo miingon: “Pasensiya na sa nahitabo. Bisan tuod nga gibiaybiay ka namo, akong namatikdan nga mapahiyomon gihapon ka. Unsay akong buhaton aron mahisama kanimo?” Sanglit ang maong tawo nataktak sa trabaho ug  namatyag inahan, nawad-an siyag paglaom nga magmalipayon. Gitanyagan siya sa Saksi ug pagtuon sa Bibliya ug iya kining gidawat. Sa wala madugay, siya nagtuon kaduha sa usa ka semana.

Ang Labing Maayong Paagi sa Pag-ugmad ug Maayong Pamatasan

14, 15. Sa unsang paagi ang mga alagad ni Jehova sa panahon sa Bibliya nagbansay sa ilang mga anak?

¹⁴ Gipaneguro sa diyosnong mga ginikanan sa panahon sa Bibliya nga ang ilang mga anak makakat-on ug maayong pamatasan diha sa balay. Tagda ang matinahorong paagi nga si Abraham ug ang iyang anak nga si Isaac nagtawag sa usag usa sa Genesis 22:7. Makita usab kang Jose nga maayo siyang pagkabansay sa iyang ginikanan. Sa dihang nabilanggo, siya matinahoron bisan sa ubang mga piniriso. (Gen. 40:8, 14) Ang gipamulong niya kang Paraon nagpakita nga iyang nakat-onan ang hustong paagi sa pagtawag sa usa ka tawo nga adunay taas nga posisyon.—Gen. 41:16, 33, 34.

¹⁵ Ang Napulo ka Sugo nga gihatag ngadto sa mga anak sa Israel naglakip niini: “Pasidunggi ang imong amahan ug ang imong inahan aron molugway ang imong mga adlaw ibabaw sa yuta nga ihatag kanimo ni Jehova nga imong Diyos.” (Ex. 20:12) Ang pagpakitag maayong pamatasan diha sa balay maoy usa ka paagi nga ang mga anak makapasidungog sa ilang ginikanan. Ang anak nga babaye ni Jepte nagpakitag halalom nga pagtahod sa iyang amahan pinaagi sa pagtuman sa panaad niini bisan sa lisod kaayong kahimtang.—Maghu. 11:35-40.

16-18. (a) Sa unsang paagi matudloan ang mga bata ug maayong pamatasan? (b) Unsa ang pipila ka kaayohan sa pagtudlo sa mga bata ug maayong pamatasan?

¹⁶ Hinungdanon kaayo nga mabansay ang atong mga anak sa pagpakitag maayong pamatasan. Aron dali ra silang ikasinabot inigkahamtong na nila, ang mga bata kinahanglang makakat-on sa hustong paagi sa pag-abiabi sa mga bisita, pagtubag sa telepono, ug sa pagpangaon kauban ang ubang mga tawo. Kinahanglang tabangan sila sa pagsabot kon nganong angay nilang paunahog lingkod ang mga edaran, kon nganong hinungdanon ang pagpakitag kalulot sa mga tigulang ug masakiton ug ang pagtabang niadtong bug-at ug dala. Kinahanglang masabtan nila ang kahinungdanon sa sinserong pag-ingon ug “palihog,” “salamat,” “walay sapayan,” “makatabang ba ko nimo?,” ug “pasensiya na.”

¹⁷ Dili angayng isipon nga lisod ang pagbansay sa mga bata sa pagpakitag maayong pamatasan. Ang labing maayong paagi mao ang pagpakitag maayong panig-ingnan. Ang 25 anyos nga si Kurt naghisgot kon sa unsang paagi siya ug ang iyang tulo ka igsoong lalaki nakakat-on sa pagkahimong matinahoron: “Kami maniid ug mamati samtang si Mama ug Papa mosulti nga maluloton sa usag usa ug magtratar sa ubang mga tawo uban ang pailob ug pagkamahunahunaon. Sa Kingdom  Hall, ikuyog ko ni Papa sa pagpakig-estorya sa gulanggulang nga mga igsoon sa dili pa magsugod ang tigom ug inigkahuman niana. Akong nadungog ug nakita ang iyang pagtimbaya ug pagtahod kanila.” Si Kurt nagpadayon: “Sa ngadtongadto, nasundog nako ang iyang pamatasan. Natural na lang ang pagtratar sa mga tawo sa matinahorong paagi. Wala ko pugsa sa pagbuhat niana, kondili gusto gyod nakong buhaton kana.”

¹⁸ Unsay lagmit nga mahitabo kon tudloan sa mga ginikanan ang ilang mga anak ug maayong pamatasan? Ang mga anak makabatog mga higala ug mahimong makigdaiton sa uban. Sila masangkapan sa pagtrabaho uban sa mga amo ug kaubang mga empleyado. Dugang pa, ang mga bata nga maayog pamatasan ug buotan maghatag kalipay ug katagbawan sa mga ginikanan.—Basaha ang Proverbio 23:24, 25.

Ang Maayong Pamatasan Makapalahi Kanato

19, 20. Nganong magmadeterminado kita sa pagsundog sa atong mapuangorong Diyos ug sa iyang Anak?

¹⁹ “Mahimong mga tigsundog sa Diyos, ingon nga hinigugmang mga anak,” misulat si Pablo. (Efe. 5:1) Ang pagsundog kang Jehova nga Diyos ug sa iyang Anak naglangkit ug pagpadapat sa mga prinsipyo sa Bibliya, sama sa gihisgotan niining artikuloha. Pinaagi sa pagbuhat niana, atong malikayan ang sinalingkapaw nga pagpakitag maayong pamatasan aron lang makaangkon ug pabor sa atong amo o makakuhag materyal nga bentaha.—Jud. 16.

²⁰ Sa kataposang mga adlaw sa iyang daotang pagmando, si Satanas determinadong wagtangon ang sukdanan sa maayong panggawi nga gihatag ni Jehova. Apan dili gayod molampos ang Yawa sa pagwagtang sa maayong pamatasan sa matuod nga mga Kristohanon. Hinaot nga ang matag usa kanato magmadeterminado sa pagsunod sa ehemplo sa atong mapuangorong Diyos ug sa iyang Anak. Dayon ang atong sinultihan ug panggawi mahimong lahi gayod niadtong sa dili maayog pamatasan. Kita maghatag kadayeganan sa ngalan sa atong Diyos nga si Jehova, kinsa nagpakitag hingpit nga ehemplo sa maayong pamatasan, ug magdani sa sinserong mga tawo ngadto sa matuod nga pagsimba.

[Footnote]

Nahinumdom Ka Ba?

• Unsay atong makat-onan kang Jehova ug sa iyang Anak maylabot sa pagpakitag maayong pamatasan?

• Nganong ang mainitong pagtimbaya sa mga tawo makapalahi kanatong mga Kristohanon?

• Sa unsang paagi ang maayong pamatasan makatabang nga magmabungahon sa ministeryo?

• Unsay papel sa mga ginikanan sa pagtudlo sa ilang mga anak ug maayong pamatasan?

[Mga Pangutana sa Pagtuon]

[Kahon sa panid 27]

 Sugdig Mainit nga Pahiyom

Daghang tawo ang magpanuko sa pagsugod ug kabildohay sa dili nila kaila. Apan tungod sa ilang gugma sa Diyos ug sa silingan, ang mga Saksi ni Jehova naningkamot gayod sa pagkat-on kon sa unsang paagi makigsulti aron ipaambit ang kamatuoran sa Bibliya ngadto sa uban. Unsay makatabang nimo aron mouswag niining bahina?

Ang usa ka hinungdanong prinsipyo mabasa diha sa Filipos 2:4: ‘Magtan-aw, dili lamang sa personal nga interes sa mga butang labot sa inyong kaugalingon, kondili sa personal nga interes usab sa uban.’ Hunahunaa kanang mga pulonga niining paagiha: Kon wala pa nimo sukad mahimamat ang usa ka tawo, isipon ka niya nga usa ka estranyo. Unsay imong buhaton aron dili siya magpanuko sa pagpakigsulti kanimo? Ang mainit nga pahiyom ug mahigalaong pagtimbaya mahimong makatabang. Apan, aduna pay laing tagdon.

Sa dihang mosugod ka sa pagpakig-estorya sa usa ka tawo, lagmit nakabalda ka sa iyang gihunahuna. Kon makig-estorya ka niya bahin sa imong gihunahuna nga walay pagpakabana sa iyang gihunahuna, lagmit dili siya motubay. Busa, kon makabantay ka kon unsay iyang gihunahuna, nganong dili nimo kana gamiton sa pagpakigsulti kaniya? Mao kanay gibuhat ni Jesus sa dihang nahibalag niya ang usa ka babaye diha sa usa ka atabay sa Samaria. (Juan 4:7-26) Ang babaye naghunahuna sa pagkalos ug tubig. Gisugdan ni Jesus ang iyang pagpakigkabildo kaniya base niana, ug dayon misangpot kana sa madasigong panaghisgot bahin sa espirituwal nga mga butang.

[Mga hulagway sa panid 26]

Ang pagkamahigalaon mosangpot sa paghatag ug maayong pamatuod

[Hulagway sa panid 28]

Haom gayod nga ipakita ang maayong pamatasan