Unsay Gipadayag sa Imong mga Pag-ampo Bahin Kanimo?
Unsay Gipadayag sa Imong mga Pag-ampo Bahin Kanimo?
“Oh Tigpatalinghog sa pag-ampo, nganha kanimo moduol ang tanang matang sa katawhan.”—SAL. 65:2.
1, 2. Nganong ang mga alagad ni Jehova masaligong makaduol kaniya sa pag-ampo?
SI Jehova kanunayng mamati sa mga pangaliya sa iyang matinumanong mga alagad. Makasalig kita nga siya magpatalinghog kanato. Bisan pag milyonmilyon ka Saksi ni Jehova ang magdungan pag-ampo sa Diyos, madunggan gihapon niya sila.
2 Kay masaligon nga nadunggan sa Diyos ang iyang mga pangaliyupo, ang salmistang si David miawit: “Oh Tigpatalinghog sa pag-ampo, nganha kanimo moduol ang tanang matang sa katawhan.” (Sal. 65:2) Ang mga pag-ampo ni David gidungog tungod kay siya usa ka maunongong magsisimba ni Jehova. Angay natong suknaon ang atong kaugalingon: ‘Ang ako bang mga pangamuyo nagpakita nga ako nagasalig kang Jehova ug hinungdanon kaayo kanako ang putli nga pagsimba? Unsay gipadayag sa akong mga pag-ampo bahin kanako?’
Mapainubsanong Mag-ampo Kang Jehova
3, 4. (a) Unsay angay natong tinamdan sa dihang kita mag-ampo sa Diyos? (b) Unsay angay natong buhaton kon kita gihasol sa “makapatugaw nga mga hunahuna” maylabot sa usa ka seryosong sala?
3 Aron dunggon ang atong mga pag-ampo, kinahanglan nga mapainubsanon kitang moduol sa Diyos. (Sal. 138:6) Angay natong hangyoon si Jehova nga susihon niya kita, sama sa gibuhat ni David sa dihang siya miingon: “Oh Diyos, susiha ako, ug hibaloi ang akong kasingkasing. Susiha ako, ug hibaloi ang akong makapatugaw nga mga hunahuna, ug tan-awa kon aduna bay masakit nga dalan diha kanako, ug tultoli ako sa dalan nga hangtod sa panahong walay tino.” (Sal. 139:23, 24) Kita dili lamang moampo kondili magpasusi usab sa Diyos ug magpatambag sa iyang Pulong. Si Jehova makagiya kanato sa “dalan nga hangtod sa panahong walay tino,” nga motabang kanato sa pagsubay sa dalan paingon sa kinabuhing walay kataposan.
4 Komosta kon kita gihasol sa “makapatugaw nga mga hunahuna” maylabot sa usa ka seryosong sala? (Basaha ang Salmo 32:1-5.) Kon dili nato kana panumbalingon mahimong maluya kita sama sa kahoy nga nawad-an sa kaumog panahon sa ting-init. Tungod sa iyang sala, si David nawad-ag kalipay ug hayan nagmasakiton. Apan nahupayan gayod siya sa dihang gisugid niya kana sa Diyos! Handurawa ang kalipay ni David sa dihang iyang gibati nga ‘gipasaylo [ni Jehova] ang iyang kalapasan.’ Mahupayan ang usa kon itug-an niya sa Diyos ang iyang sala, ug ang mga ansiyano makatabang usab sa nakasala nga maulian sa iyang espirituwal nga kahimsog.—Prov. 28:13; Sant. 5:13-16.
Pangamuyo sa Diyos ug Pasalamati Siya
5. Unsay gipasabot sa pagpangamuyo kang Jehova?
5 Kon nabalaka kita pag-ayo, kinahanglang ipadapat nato ang tambag ni Pablo: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” (Filip. 4:6) Ang “pagpangamuyo” nagpasabot ug “paghimog mapainubsanong pangaliyupo.” Ilabina panahon sa peligro o paglutos nga angay kitang mangamuyo kang Jehova alang sa tabang ug giya.
6, 7. Unsay mga rason nga angay natong ilakip sa atong mga pag-ampo ang pagpasalamat?
6 Apan kon mag-ampo lamang kita sa dihang duna kitay gikinahanglan, unsay ipadayag niana bahin sa atong mga motibo? Si Pablo miingon nga kinahanglang ipahibalo nato sa Diyos ang atong mga pangaliya “uban ang pagpasalamat.” May katarongan gayod kitang magmapasalamaton sama kang David, kinsa miingon: “Imo, Oh Jehova, ang pagkadako ug ang pagkagamhanan ug ang katahom ug ang kahalangdon ug ang dignidad; tungod kay ang tanang butang sa mga langit ug sa yuta imo. Imo ang gingharian, Oh Jehova, ang Usa usab nga nagpataas sa imong kaugalingon ingong pangulo ibabaw sa tanan. . . . Oh among Diyos, kami nagapasalamat kanimo ug nagadayeg sa imong maanindot nga ngalan.”—1 Cron. 29:11-13.
7 Si Jesus nagpasalamat sa Diyos sa pagkaon ug sa tinapay ug bino nga gigamit sa Panihapon sa Ginoo. (Mat. 15:36; Mar. 14:22, 23) Gawas pa sa pagpasalamat sa pagkaon, angay kitang ‘magpasalamat kang Jehova’ tungod sa “iyang katingalahang mga buhat alang sa mga anak sa mga tawo,” sa iyang ‘matarong nga hudisyal nga mga hukom,’ ug sa iyang pulong, o mensahe, nga mabasa diha sa Bibliya.—Sal. 107:15; 119:62, 105.
Pag-ampo Alang sa Uban
8, 9. Nganong angay natong ilakip ang atong mga igsoon sa pag-ampo?
8 Sa walay duhaduha kita mag-ampo alang sa atong kaugalingon, apan angay usab natong ilakip ang uban—bisan ang mga Kristohanon nga wala nato mailhi. Bisan pag wala makaila si apostol Pablo sa tanang magtutuo sa Colosas, siya misulat: “Nagpasalamat kami kanunay sa Diyos nga Amahan sa atong Ginoong Jesu-Kristo sa dihang nagaampo kami alang kaninyo, sanglit among nadunggan ang inyong pagtuo labot kang Kristo Jesus ug ang gugma nga inyong nabatonan alang sa tanang balaan.” (Col. 1:3, 4) Si Pablo nag-ampo usab alang sa mga Kristohanon sa Tesalonica. (2 Tes. 1:11, 12) Ang mga pag-ampo nga sama niana nagpadayag ug daghang butang bahin kanato ug kon giunsa nato paglantaw ang atong mga igsoon sa pagtuo.
9 Ang atong mga pag-ampo alang sa dinihogang mga Kristohanon ug sa “ubang mga karnero” nagpamatuod sa atong kahingawa alang sa organisasyon sa Diyos. (Juan 10:16) Si Pablo naghangyo sa iyang mga isigkamagtutuo sa pag-ampo nga ang ‘katakos sa pagsulti ihatag kaniya aron iyang ipahibalo ang sagradong tinago sa maayong balita.’ (Efe. 6:17-20) Nag-ampo ba usab kita alang sa ubang mga Kristohanon?
10. Unsay epekto kanato kon atong ilakip ang uban sa atong pag-ampo?
10 Ang pag-ampo alang sa uban mahimong makapausab sa atong tinamdan kanila. Kon atong ilakip sa pag-ampo ang usa ka tawo nga dili nato ganahan, lagmit mausab ang atong tinamdan kaniya. (1 Juan 4:20, 21) Ang mga pag-ampo nga sama niini makapalig-on ug makapatunhay sa panaghiusa sa atong mga igsoon. Dugang pa, ang maong mga pag-ampo magpaila nga kita adunay samag-Kristo nga gugma. (Juan 13:34, 35) Kanang hiyasa maoy bahin sa bunga sa espiritu sa Diyos. Kita ba nag-ampo alang sa balaang espiritu, nga naghangyo kang Jehova nga tabangan kita sa pagpasundayag sa bunga niini nga mao ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon? (Luc. 11:13; Gal. 5:22, 23) Kon mao, ang atong pulong ug buhat magpakita nga kita nagalakaw ug nagkinabuhi pinaagi sa espiritu.—Basaha ang Galacia 5:16, 25.
11. Nganong haom nga mohangyo sa uban sa pag-ampo alang kanato?
11 Kon atong mahibaloan nga ang atong mga anak ginatental nga mangopya panahon sa eksamin sa eskuylahan, angay nato silang iampo ug hatagan usab sila ug Kasulatanhong tabang aron sila magmaminatud-on ug dili mobuhat ug daotan. Giingnan ni Pablo ang mga Kristohanon sa Corinto: “Kami nag-ampo sa Diyos nga unta kamo dili mobuhat ug sayop.” (2 Cor. 13:7) Ang mapainubsanong mga pag-ampo nga sama niana makapahimuot gayod kang Jehova. (Basaha ang Proverbio 15:8.) Makahangyo kita sa uban nga ilakip kita sa ilang pag-ampo, sama sa gibuhat ni apostol Pablo. “Ipadayon ang pag-ampo alang kanamo,” siya misulat, “kay kami masaligon nga kami may maminatud-ong tanlag, sanglit buot namong magmaminatud-on sa tanang butang.”—Heb. 13:18.
Ang Atong mga Pag-ampo Magpadayag ug Labaw Pa
12. Unsay angay natong hatagag pangunang pagtagad diha sa atong mga pag-ampo?
12 Ang ato bang mga pag-ampo nagpaila nga kita maoy malipayon ug masibotong mga Saksi ni Jehova? Ang ato bang mga pangamuyo nasentro sa pagtuman sa kabubut-on sa Diyos, sa pagsangyaw sa mensahe sa Gingharian, sa pagbindikar sa pagkasoberano ni Jehova, ug sa pagbalaan sa iyang ngalan? Angay nga kini maoy atong hatagag pangunang pagtagad diha sa atong mga pag-ampo, ingon sa gipakita sa modelong pag-ampo ni Jesus, nga nagsugod sa mga pulong: “Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mat. 6:9, 10.
13, 14. Unsay gipadayag sa atong mga pag-ampo bahin kanato?
13 Ang atong mga pag-ampo magpadayag sa atong mga motibo, gikaikagan, ug tinguha. Si Jehova nasayod kon unsang matanga kita sa pagkatawo. Ang Proverbio 17:3 nag-ingon: “Ang dalisayanan nga kulon maoy alang sa plata ug ang hudno alang sa bulawan, apan si Jehova mao ang tig-usisa sa mga kasingkasing.” Makita sa Diyos kon unsay anaa sa atong kasingkasing. (1 Sam. 16:7) Siya nahibalo kon unsay atong tinamdan sa atong mga tigom, ministeryo, ug sa atong mga igsoon sa pagtuo. Si Jehova nahibalo kon unsay atong hunahuna sa “mga igsoon” ni Kristo. (Mat. 25:40) Siya nasayod kon kinasingkasing ba ang atong pag-ampo o nagsumaysumay lang kita sa naandang mga pulong. Si Jesus miingon: “Sa dihang mag-ampo, ayaw balikbalika pagsulti ang samang mga butang, ingon sa ginahimo sa katawhan sa mga nasod, kay sila naghunahuna nga sila pagadunggon tungod sa ilang paggamit sa daghang pulong.”—Mat. 6:7.
14 Ang atong gipahayag diha sa pag-ampo magpakita usab kon unsa ka dako ang atong pagsalig sa Diyos. “Ikaw [Jehova] nahimong akong dalangpanan,” miingon si David, “usa ka malig-ong torre sa atubangan sa kaaway. Ako mahimong usa ka dinapit sa imong tolda hangtod sa mga panahong walay tino; ako modangop sa tagoanan sa imong mga pako.” (Sal. 61:3, 4) Sa dihang ang Diyos masambingayong ‘magbuklad sa iyang tolda ibabaw kanato,’ atong matagamtam ang kasegurohan ug ang iyang panalipod. (Pin. 7:15) Pagkamakapahupay ang pagduol kang Jehova diha sa pag-ampo uban ang pagsalig nga siya ‘dapig kanato’ sa bisan unsang pagsulay sa atong pagtuo!—Basaha ang Salmo 118:5-9.
15, 16. Ang pag-ampo makatabang kanato sa pag-ila sa unsa bahin sa atong tinguha nga mokab-ot ug dugang mga pribilehiyo sa kongregasyon?
15 Ang matinud-anong pag-ampo kang Jehova mahitungod sa atong mga motibo makatabang kanato sa pag-ila kon unsa gayoy tinuod natong motibo. Pananglitan, ang ato bang kaikag nga moalagad ingong magtatan-aw sa katawhan sa Diyos maoy mapaubsanong tinguha sa pagtabang ug paghimo sa atong maarangan sa pagpauswag sa intereses sa Gingharian? O dili kaha nga gusto natong makabaton “sa unang dapit” o buot pa ganing ‘magharihari’ sa uban? Dili kana angayng mahitabo taliwala sa katawhan ni Jehova. (Basaha ang 3 Juan 9, 10; Lucas 22:24-27.) Kon duna kitay sayop nga mga tinguha, ang matinud-anong pag-ampo kang Jehova nga Diyos motabang kanato sa pag-ila ug pagsalikway niana sa dili pa kana makagamot.
16 Ang Kristohanong mga asawa hayan nagtinguha usab nga ang ilang mga bana matudlo ingong mga ministeryal nga alagad ug tingali sa ngadtongadto mahimong mga magtatan-aw, o mga ansiyano. Kini nga mga sister angayng molihok sumala sa ilang giampo pinaagi sa paggawi ingong mga sulondan. Hinungdanon kini, kay ang sinultihan ug panggawi sa pamilya sa usa ka brader makaapekto sa panglantaw sa kongregasyon kaniya.
Paghawas sa Uban Diha sa Publikong Pag-ampo
17. Nganong maayong mag-inusara kon kita pribadong mag-ampo?
17 Si Jesus subsob mobulag sa mga tawo aron pribadong mag-ampo sa iyang Amahan. (Mat. 14:13; Luc. 5:16; 6:12) Kinahanglang maggahin usab kitag panahon nga mag-inusara. Sa atong pag-ampo nga walay kabaldahan, lagmit makahimo kitag mga desisyon nga makapahimuot kang Jehova ug makatabang kanato sa pagpabiling lig-on sa espirituwal. Apan, si Jesus nag-ampo usab sa publiko, ug maayong tagdon kon sa unsang paagi angay kining himoon.
18. Unsa ang pipila ka butang nga angayng hinumdoman sa mga brader sa dihang maghawas sa kongregasyon sa publikong pag-ampo?
18 Sa atong mga tigom, ang maunongong mga lalaki maghawas sa kongregasyon diha sa publikong pag-ampo. (1 Tim. 2:8) Ang mga isigkamagtutuo kinahanglang makaingon ug “amen,” nga nagpasabot ug “hinaot unta,” sa kataposan sa maong pag-ampo. Apan aron mahimo nila kana, kinahanglang uyon sila sa giampo. Ang modelong pag-ampo ni Jesus dili makapatugaw o walay tahod. (Luc. 11:2-4) Dugang pa, wala niya idetalye ang tanang panginahanglan o problema sa matag usa sa iyang mamiminaw. Ang personal nga mga problema haom nga hisgotan diha sa pribado, dili sa publiko, nga pag-ampo. Ug sa dihang maghawas sa usa ka grupo diha sa pag-ampo, kinahanglang likayan ang paghisgot sa kompidensiyal nga mga butang.
19. Unsay angay natong panggawi panahon sa publikong pag-ampo?
19 Sa dihang dunay mohawas kanato sa publikong pag-ampo, kita kinahanglang magpakita ug matahaong “kahadlok sa Diyos.” (1 Ped. 2:17) Tingali dunay hustong panahon ug dapit alang sa pipila ka panggawi nga dili haom sa Kristohanong panagkatigom. (Eccl. 3:1) Pananglitan, dunay usa nga mag-awhag nga ang tanan diha sa grupo magkinuptanay panahon sa pag-ampo. Basin makapasilo o makabalda kini sa pipila, lakip na sa mga bisita nga dili sama natog pagtuo. Ang pipila ka magtiayon magkinuptanay tingali samtang nag-ampo. Apan kon sila maggakos panahon sa publikong pag-ampo, kadtong makakita mahimong mapandol. Basin maghunahuna sila nga ang magtiayon nagsentro sa ilang pagtagad diha sa ilang romantikong relasyon inay sa pagtahod kang Jehova. Busa, tungod sa atong halalom nga pagtahod kaniya, atong ‘himoon ang tanang butang alang sa kahimayaan sa Diyos’ ug likayan ang panggawi nga makabalda, makatugaw, o makapandol kang bisan kinsa.—1 Cor. 10:31, 32; 2 Cor. 6:3.
Unsay Iampo?
20. Unsaon nimo pagpatin-aw ang Roma 8:26, 27?
20 Usahay, wala kita mahibalo kon unsay atong isulti diha sa atong pribadong mga pag-ampo. “Ang suliran kon unsay angay natong iampo sumala sa atong gikinahanglan wala nato mahibaloi,” misulat si Pablo, “apan ang [balaang] espiritu mangamuyo alang kanato uban ang mga pag-agulong wala mabungat. Apan siya [ang Diyos] nga nagasusi sa kasingkasing nahibalo kon unsa ang ipasabot sa espiritu.” (Roma 8:26, 27) Daghang pag-ampo ang gipasulat ni Jehova sa Kasulatan. Iyang dawaton kining inspiradong mga pangaliya nga daw kini gikan kanato ug busa dunggon niya kini. Ang Diyos nakaila kanato ug nahibalo sa kahulogan sa mga butang nga iyang gipasulti sa iyang espiritu pinaagi sa mga magsusulat sa Bibliya. Dunggon ni Jehova ang atong mga pag-ampo sa dihang ang espiritu “mangamuyo,” o mohangyo, alang kanato. Apan kon daghan na kitag mahibaloan sa Pulong sa Diyos, mas daling mosantop sa atong hunahuna ang mga butang nga angay natong iampo.
21. Unsay atong susihon sa sunod nga artikulo?
21 Sa ato nang nahisgotan, ang atong mga pag-ampo magpadayag ug daghang butang bahin kanato. Pananglitan, mahimong magpakita kini kon unsa kita kasuod kang Jehova ug kon unsa kalalom ang atong kahibalo sa iyang Pulong. (Sant. 4:8) Sa sunod nga artikulo, atong susihon ang pipila ka pag-ampo nga nasulat sa Bibliya. Unsay lagmit nga epekto sa maong pagsusi sa Kasulatan diha sa atong pagduol sa Diyos sa pag-ampo?
Unsay Imong Tubag?
• Unsay atong tinamdan sa dihang kita moampo kang Jehova?
• Nganong angay natong iampo ang atong mga isigkamagtutuo?
• Unsay mahimong ipadayag sa atong mga pag-ampo bahin kanato ug sa atong mga motibo?
• Unsay angay natong panggawi panahon sa publikong pag-ampo?
[Mga Pangutana sa Pagtuon]
[Hulagway sa panid 4]
Kanunay ka bang nagdayeg ug nagpasalamat kang Jehova?
[Hulagway sa panid 6]
Ang atong panggawi panahon sa publikong pag-ampo angayng magpasidungog kang Jehova