Magpabiling Malipayon Panahon sa Kalisdanan
Magpabiling Malipayon Panahon sa Kalisdanan
“Ang tanan nga modangop [kang Jehova] managmaya; sila managhugyaw sa kalipay hangtod sa panahong walay tino.”—SAL. 5:11.
1, 2. (a) Unsa ang pipila ka butang nga makapahinabog dakong kaguol karon? (b) Gawas pa sa mga katalagman nga sagad maagoman sa tanan, unsay kinahanglang antoson sa matuod nga mga Kristohanon?
ANG mga Saksi ni Jehova makasinati usab sa mga katalagman nga kasagarang maagoman sa katawhan. Daghan sa mga alagad sa Diyos ang nahimong biktima sa krimen, gubat, ug ubang mga inhustisya. Ang mga kalamidad, kakabos, sakit, ug kamatayon makapahinabog dakong kaguol. Haom ang gisulat ni apostol Pablo: “Kita nahibalo nga ang tibuok kalalangan duyog nga nagpadayon sa pag-agulo ug anaa sa kasakitan hangtod karon.” (Roma 8:22) Gawas pa niana, kita dili hingpit. Sama kang Haring David, kita tingali moingon: “Milapaw sa akong ulo ang akong kasaypanan; sama sa mabug-at nga luwan sila bug-at kaayo alang kanako.”—Sal. 38:4.
2 Gawas pa sa mga katalagman nga sagad maagoman sa tanang tawo, ang matuod nga mga Kristohanon nagpas-an ug mahulagwayong estaka sa pagsakit. (Luc. 14:27) Oo, sama kang Jesus, ang iyang mga tinun-an gidumtan ug gilutos. (Mat. 10:22, 23; Juan 15:20; 16:2) Busa, ang pagsunod kang Kristo nagkinahanglag pagpanglimbasog ug paglahutay samtang kita nagpaabot sa mga panalangin sa bag-ong kalibotan.—Mat. 7:13, 14; Luc. 13:24.
3. Nganong nahibalo kita nga ang pagpahimuot sa Diyos wala magpasabot nga ang mga Kristohanon kinahanglang mag-antos?
3 Nagpasabot ba kini nga dili malipayon ang matuod nga mga Kristohanon? Lunlon kaguol ug kasakit na lang ba ang atong masinati hangtod sa kataposan? Tataw nga gusto ni Jehova nga kita magmalipayon samtang nagpaabot sa katumanan sa iyang mga saad. Sa makadaghan, ang Bibliya naghubit sa matuod nga mga magsisimba ingong malipayong katawhan. (Basaha ang Isaias 65:13, 14.) “Ang tanan nga modangop [kang Jehova] managmaya; sila managhugyaw sa kalipay hangtod sa panahong walay tino,” nag-ingon ang Salmo 5:11. Oo, posibleng makasinatig kalipay, kalinaw sa hunahuna, ug katagbawan bisan pa sa mga katalagman. Atong susihon kon sa unsang paagi ang Bibliya makatabang kanato sa pagsagubang sa mga pagsulay ug sa gihapon magmalipayon.
Si Jehova—Ang “Malipayong Diyos”
4. Unsay gibati sa Diyos sa dihang gisalikway ang iyang awtoridad?
4 Tagda pananglitan si Jehova. Ingong Labing Gamhanang Diyos, ang tibuok uniberso nailalom sa iyang awtoridad. Anaa na kaniya ang tanan ug wala siya magkinahanglan kang bisan kinsa. Apan, bisan pa sa iyang dili-hitupngang gahom, lagmit gayod nga nahigawad si Jehova sa dihang usa sa iyang espirituhanong mga anak ang mirebelde ug nahimong Satanas. Hayan nga nasubo usab ang Diyos sa dihang sa ulahi may mga manulonda nga miduyog kang Satanas. Hunahunaa usab ang kasakit nga gibati sa Diyos sa dihang si Adan ug Eva, ang obra maestra sa iyang mga linalang sa yuta, mitalikod kaniya. Sukad niadto, bilyonbilyon sa ilang mga kaliwat ang nagsalikway sa awtoridad ni Jehova.—Roma 3:23.
5. Unsay ilabinang nakapaguol kang Jehova?
5 Wala pa matapos ang pagrebelde ni Satanas. Sulod sa mga 6,000 ka tuig, nakita ni Jehova ang mga buhat sa idolatriya, kapintasan, pagpatay, ug seksuwal nga kahiwian. (Gen. 6:5, 6, 11, 12) Dugang pa, nadungog niya ang grabeng kabakakan ug pasipala. Usahay, bisan ang matuod nga mga magsisimba sa Diyos nakapasakit kaniya. Gihubit sa Bibliya ang usa niana nga higayon: “Pagkasubsob ang pagsukol nila batok kaniya didto sa kamingawan, ilang gipasakitan siya didto sa desyerto! Ug sublisubli nga ilang gisulayan ang Diyos, ug ilang gipasakitan bisan ang Balaang Usa sa Israel.” (Sal. 78:40, 41) Nasakitan gayod si Jehova sa dihang gisalikway siya sa iyang katawhan. (Jer. 3:1-10) Klaro nga mahitabo ang daotang mga butang, ug si Jehova maguol kaayo kon kana mahitabo.—Basaha ang Isaias 63:9, 10.
6. Giunsa pag-atubang sa Diyos ang makapaguol nga mga kahimtang?
6 Bisan pag si Jehova nasakitan ug nahigawad, wala kana makapugong kaniya sa paglihok. Sa dihang mitungha ang mga problema, si Jehova nangita dayog paagi nga mamenosan ang daotang sangpotanan sa nahitabo. Mihimo usab siyag dugang mga lakang aron sa ngadtongadto matuman ang iyang katuyoan. Tungod niana, si Jehova malipayong nagpaabot sa pagbindikar sa iyang pagkasoberano ug sa mga panalangin nga matagamtam sa iyang maunongong mga magsisimba. (Sal. 104:31) Oo, bisan pag gipasipalahan, si Jehova usa gihapon ka “malipayong Diyos.”—1 Tim. 1:11; Sal. 16:11.
7, 8. Kon motungha ang mga problema, sa unsang paagi atong masundog si Jehova?
7 Tinuod, dili nato ikatandi ang atong kaugalingon kang Jehova kon bahin sa atong katakos sa pagsulbad ug mga problema. Bisan pa niana, atong masundog si Jehova sa dihang kita mag-atubang ug mga kalisdanan. Natural lang nga kita mahigawad sa dihang motungha ang mga problema, apan wala kana magpasabot nga wala na kitay mahimo. Tungod kay kita gilalang sa larawan ni Jehova, kita adunay katakos sa paghunahuna ug praktikal nga kaalam, nga atong magamit sa pag-analisar sa atong mga problema ug sa paghimog positibong lakang kon gikinahanglan.
8 Ang usa ka importanteng butang nga makatabang kanato sa pagsagubang sa mga problema mao ang pag-ila nga adunay mga butang nga dili gayod nato mapugngan. Kon kanunay natong hunahunaon ang problema, mosamot ang atong kahigawad ug mawala ang atong kalipay sa pag-alagad sa Diyos. Human mohimog mga lakang sa pagsulbad sa problema, mas maayong dili na magsigeg hunahuna niana ug isentro ang pagtagad sa mas mabungahong mga buluhaton. Ang mosunod nga mga asoy sa Bibliya nag-ilustrar niining puntoha.
Ang Pagkamakataronganon Hinungdanon
9. Sa unsang paagi si Ana nagpakitag pagkamakataronganon?
9 Tagda ang pananglitan ni Ana, nga sa ulahi nahimong inahan ni manalagnang Samuel. Siya naguol kay wala siyay anak. Siya gibiaybiay tungod sa iyang pagkaapuli. Usahay, si Ana mahigawad pag-ayo nga siya mohilak ug dili mokaon. (1 Sam. 1:2-7) Sa usa sa mga higayon nga siya miduaw sa sangtuwaryo ni Jehova, si Ana mibatig “kapait sa kalag, ug miampo siya kang Jehova ug mihilak sa hilabihan.” (1 Sam. 1:10) Human isulti ni Ana kang Jehova ang iyang gibati, ang hataas nga saserdoteng si Eli miduol ug miingon: “Lakaw sa kalinaw, ug hinaot ang Diyos sa Israel maghatag kanimo sa imong gipangaliya kaniya.” (1 Sam. 1:17) Nianang tungora, seguradong naamgohan ni Ana nga nahimo na niya ang tanan niyang maarangan. Wala na siyay mahimo maylabot sa iyang pagkaapuli. Si Ana nagpakitag pagkamakataronganon. Dayon siya “milakaw ug mikaon, ug ang iyang nawong wala na magmabalak-on.”—1 Sam. 1:18.
10. Unsang realistikong panglantaw ang gipasundayag ni Pablo sa dihang nag-atubang ug problema nga dili niya masulbad?
10 Si apostol Pablo nagpasundayag ug susamang panglantaw sa dihang nag-atubang ug kalisdanan. Diha siyay balatian nga nakapahasol pag-ayo kaniya. Gitawag niya kana nga “tunok sa unod.” (2 Cor. 12:7) Kon unsa man ugaling kadto, gihimo ni Pablo ang tanan aron mawala ang maong balatian, nga nag-ampo kang Jehova alang sa kahupayan. Kapila mihangyo si Pablo kang Jehova bahin niana? Tulo ka beses. Human sa ikatulong higayon, gipadayag sa Diyos kang Pablo nga ang “tunok sa unod” dili mawala sa milagrosong paagi. Gidawat kadto ni Pablo ug gisentro ang iyang pagtagad sa bug-os nga pag-alagad kang Jehova.—Basaha ang 2 Corinto 12:8-10.
11. Unsay papel sa pag-ampo ug pangamuyo diha sa atong pagsagubang sa mga katalagman?
11 Ang maong mga pananglitan wala magpasabot nga mohunong na kita sa pag-ampo kang Jehova bahin sa mga butang nga makapaguol kanato. (Sal. 86:7) Sa kasukwahi, ang Pulong sa Diyos nag-awhag kanato: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” Unsay sanong ni Jehova sa maong mga pangamuyo ug pangaliya? Ang Bibliya midugang: “Ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filip. 4:6, 7) Oo, dili tingali kuhaon ni Jehova ang atong problema, apan mahimong dunggon niya ang atong pag-ampo pinaagi sa pagbantay sa atong gahom sa pangisip. Human mag-ampo bahin niana, mahimong atong maamgohan ang kapeligrohan sa sobrang pagkabalaka.
Magmalipayon sa Pagbuhat sa Kabubut-on sa Diyos
12. Nganong dili maayong pasumban ang atong kaguol?
12 Ang Proverbio 24:10 nag-ingon: “Naluya ka ba sa adlaw sa kasakit? Ang imong kusog diyutay ra.” Ang laing sanglitanan nag-ingon: “Tungod sa kasakit sa kasingkasing adunay nahugnong espiritu.” (Prov. 15:13) Tungod sa hilabihang kaguol, ang pipila ka Kristohanon mihunong na sa pagbasa sa Bibliya ug sa pagpamalandong niana. Ang ilang mga pag-ampo wala na sa buot, ug tingali magpalayo na sila sa mga isigkamagsisimba. Klaro nga kon atong pasumban ang atong kaguol, mahimong mosangpot kini sa kadaot.—Prov. 18:1, 14.
13. Unsa ang pipila ka buluhaton nga makatabang sa pagwagtang sa kahigawad ug makahatag kanatog kalipay?
13 Sa laing bahin, ang positibong panglantaw motabang kanato sa pagsentro sa atong pagtagad sa mga butang nga makahatag kanatog kalipay. Si David misulat: “Sa pagbuhat sa imong kabubut-on, Oh Diyos ko, ako nagakalipay.” (Sal. 40:8) Kon motungha ang mga problema, dili kita angayng mohunong sa atong maayong rutina sa pag-alagad. Sa pagkatinuod, ang usa ka tambal sa kaguol mao ang pagpakigbahin sa mga kalihokan nga makahatag ug kalipay. Si Jehova nag-ingon nga kita magmalipayon kon atong basahon ang iyang Pulong ug kanunay kanang palandongon. (Sal. 1:1, 2; Sant. 1:25) Gikan sa Balaang Kasulatan ug sa mga tigom, kita makakat-on ug “kahimut-anan nga mga pulong” nga makapadasig ug makapalipay kanato.—Prov. 12:25; 16:24.
14. Unsang pasalig ni Jehova ang naghatag kanatog kalipay karon?
14 Ang Diyos naghatag kanato ug daghang rason nga magmalipayon. Ang iyang gisaad nga kaluwasan mao gayoy pangunang tinubdan sa kalipay. (Sal. 13:5) Nahibalo kita nga bisag unsa pay atong kahimtang karon, sa ulahi ang Diyos magaganti niadtong matinuorong nagapangita kaniya. (Basaha ang Ecclesiastes 8:12.) Maanindot ang pagkapahayag ni Habacuc sa maong pagtuo: “Bisan ang kahoyng igos dili mamulak, ug walay bunga ang mga paras; ang buhat sa kahoyng olibo mapakyas, ug ang mga hinagdang uma dili mopatunghag pagkaon; ang panon sa karnero mahimulag sa toril, ug wala nay panon sa baka sa mga alad; apan, alang kanako, ako magasadya kang Jehova; magmalipayon ako sa Diyos sa akong kaluwasan.”—Hab. 3:17, 18.
“Malipayon ang Katawhan Kansang Diyos Mao si Jehova!”
15, 16. Paghisgot ug pipila ka gasa sa Diyos nga atong mapahimuslan samtang naghulat sa umaabot nga mga panalangin.
15 Samtang kita nagpaabot sa maanindot nga kaugmaon nga giandam alang kanato, kabubut-on ni Jehova nga atong mapahimuslan ang maayong mga butang nga iyang gihatag kanato. Ang Bibliya nag-ingon: “Nasayran ko nga walay mas maayo alang [sa tawo] kay sa pagmaya ug sa pagbuhat ug maayo samtang buhi pa; ug usab nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.” (Eccl. 3:12, 13) Ang “pagbuhat ug maayo” naglakip sa paghimog maayong mga butang alang sa uban. Si Jesus miingon nga adunay labaw nga kalipay sa paghatag kay sa pagdawat. Ang atong pagkamaluloton sa atong kapikas, mga anak, ginikanan, ug mga paryente makahatag ug dakong katagbawan. (Prov. 3:27) Ang pagpakitag kalumo, pagkamaabiabihon, ug pagpasaylo sa atong mga igsoon sa pagtuo moresulta usab sa kalipay ug makapahimuot kang Jehova. (Gal. 6:10; Col. 3:12-14; 1 Ped. 4:8, 9) Ug ang pagtuman sa atong ministeryo uban ang pagsakripisyo-sa-kaugalingon makahatag gayod ug kalipay.
16 Ang gikutlo nga mga pulong sa Ecclesiastes naghisgot ug ordinaryong mga butang nga makahatag ug kalipay, sama sa pagkaon ug pag-inom. Oo, bisag nagsagubang ug mga pagsulay, kita makakaplag ug kalipay sa bisan unsang materyal nga gasa nga atong madawat gikan kang Jehova. Dugang pa, ang matahom nga pagsalop sa adlaw, maanindot nga talan-awon, kalaki sa gagmay pa nga mga mananap, ug ang uban pang maanindot nga mga butang sa kinaiyahan mahimong matagamtam nga walay bayad, apan kini makapahingangha kanato ug makahatag kalipay. Samtang atong pamalandongon ang maong mga butang, molalom ang atong gugma kang Jehova, kay siya ang Maghahatag sa tanang maayong mga butang.
17. Unsay maghatag kanato ug bug-os nga kahupayan gikan sa mga kalisdanan, ug sa kasamtangan, unsay makapahupay kanato?
17 Labaw sa tanan, ang atong gugma sa Diyos, pagsugot sa iyang mga sugo, ug pagpasundayag ug pagtuo sa halad lukat maghatag kanatog bug-os nga kahupayan gikan sa mga kalisdanan sa dili-hingpit nga kinabuhi ug motultol kanato sa walay-kataposang kalipay. (1 Juan 5:3) Sa kasamtangan, kita mahupayan sa pagkasayod nga si Jehova nahibalo sa tanang butang nga nagsakit kanato. Si David misulat: “Ako magmalipayon ug magmaya sa imong mahigugmaong-kalulot, sanglit nakita mo ang akong kasakitan; nasayran mo ang mga kagul-anan sa akong kalag.” (Sal. 31:7) Tungod kay gihigugma kita ni Jehova, siya magaluwas kanato gikan sa mga katalagman.—Sal. 34:19.
18. Nganong angayng magmalipayon ang katawhan sa Diyos?
18 Samtang kita nagpaabot sa katumanan sa iyang mga saad, hinaot nga atong sundogon si Jehova, ang malipayong Diyos. Hinaot nga dili nato tugotan ang negatibong mga pagbati nga mopahunong kanato sa pag-alagad sa Diyos. Kon motungha ang mga problema, hinaot nga ang katakos sa paghunahuna ug praktikal nga kaalam magagiya kanato. Si Jehova motabang kanato sa pagkontrolar sa atong emosyon ug sa paghimog mga lakang nga makapamenos sa daotang epekto sa mga katalagman. Magmalipayon kita sa maayong mga butang nga naggikan kaniya, sa materyal ug espirituwal. Kon kita magpabiling suod sa Diyos, kita magmaya tungod kay “malipayon ang katawhan kansang Diyos mao si Jehova!”—Sal. 144:15.
Unsay Imong Nakat-onan?
• Sa dihang magsagubang ug mga kalisdanan, sa unsang paagi atong masundog si Jehova?
• Sa unsang paagi ang pagkamakataronganon makatabang kanato sa pagsagubang sa mga kalisdanan?
• Panahon sa kagul-anan, sa unsang paagi kita magmalipayon sa pagbuhat sa kabubut-on sa Diyos?
[Mga Pangutana sa Pagtuon]
[Mga hulagway sa panid 16]
Si Jehova naguol sa daotang mga butang nga nagakahitabo
[Credit Line]
© G.M.B. Akash/Panos Pictures
[Mga hulagway sa panid 18]
Si Jehova naghatag kanatog mga tabang sa pagpabiling malipayon