Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Aw, sulayi kon makatubag ka ba sa mosunod nga mga pangutana:

• Sa unsang diwa nga ang Diyos makapadato kanimo?

Kaniadto, gipanalanginan ni Jehova ug materyal nga bahandi ang pipila ka tawo, sama kang Abraham ug Solomon. Apan ang mga bahandi nga labawng gikinahanglan sa mga Kristohanon naglakip sa pagtuo, kalinaw, katagbawan, ug kalipay. Ug ang Diyos makatabang kanimo sa pagkaplag niana.—9/1, panid 3-7.

• Unsay atong makat-onan gikan sa pagluwas ni Jesus kang Pedro sa dihang nagakaunlod na siya sa dagat? (Mat. 14:28-31)

Kon atong mamatikdan nga nakulangag pagtuo ang usa ka igsoon, mahimo natong ituy-od ang atong kamot, ingnon ta, ug tabangan siya nga makabatog dugang pagtuo.—9/15, panid 8.

• Unsay gisakripisyo ni Jehova alang sa atong kaluwasan?

Giantos ni Jehova nga ang iyang Anak gisakit ug gibiaybiay. Ug ingon sa gihulagwayan sa pagkaandam ni Abraham nga mohalad sa iyang anak, giantos ni Jehova nga makita ang iyang Anak nga gipatay samag kriminal.—9/15, panid 28-29.

• Nganong bililhon kaayo ang Vatican Codex?

Kana maoy usa ka Gregong manuskrito nga gisulat wala pay 300 ka tuig human makompleto ang Bibliya. Naundan kana sa halos kompletong basahon sa Hebreohanong Kasulatan ug sa Kristohanon Gregong Kasulatan. Usa kana sa gigamit sa mga eskolar sa pagtino kon unsa gayoy nahisulat sa orihinal nga teksto sa Bibliya.—10/1, panid 18-20.

• Unsang leksiyon ang gitudlo kanato sa Proverbio 24:27 bahin sa ‘paglig-on sa panimalay’?

Ang lalaki nga gustong magminyo kinahanglang mangandam alang sa maong responsibilidad. Naglakip kana sa pagpangandam sa pagtagana sa materyal nga panginahanglan sa pamilya ug sa pagpanguna diha sa espirituwal nga mga buluhaton.—10/15, panid 12.

• Nganong dili husto nga isipon ang mga Saksi ni Jehova ingong Protestanteng relihiyon?

Ang Protestantismo nagsugod sa Uropa sa ika-16 nga siglo sa tinguha nga mareporma ang Iglesya Romana Katolika. Ang pulong “Protestante” mapadapat niadtong nagsunod sa mga katuyoan sa Repormasyon. Ang mga Saksi ni Jehova dili motuo sa awtoridad sa papa ug bug-os nga midawat sa Bibliya ingong bugtong tinubdan sa kamatuoran, apan ilang gisalikway ang daghang dili-kasulatanhong mga pagtulon-an ug mga buhat nga komon diha sa Protestanteng mga relihiyon.—11/1, panid 19.

• Kinahanglan bang magtuon ug Hebreohanon ug Grego aron masabtan ang Bibliya?

Dili. Bisan pag ang usa adunay kahibalo sa maong mga pinulongan, wala kana magpasabot nga mas masabtan niya ang mensahe sa Bibliya. Ang usa nga nagtuon sa maong mga pinulongan magsalig gihapon sa mga diksiyonaryo ug mga libro bahin sa gramarya. Sanglit gipatipigan man sa Diyos ang mga pulong sa iyang labing bantogang Alagad diha sa hinubad nga pinulongan, nagpakita kana nga ang usa ka tawo makagamit ug makakat-on sa kamatuoran gikan sa mga hubad sa Bibliya karon.—11/1, panid 20-23.

• Sa unsang paagi si Jehova ug Jesus nagpakitag panig-ingnan sa maayong pamatasan?

Bisan pa sa taas nga posisyon ni Jehova, siya nagpakitag kalulot ug pagtahod sa mga tawo. Sa pagpakigsulti kang Abraham ug Moises, si Jehova migamit sa Hebreohanong pulong nga sagad hubaron ug “palihog.” (Gen. 13:14; Ex. 4:6) Ang Diyos mamati usab sa mga tawo. (Gen. 18:23-32) Mao usab kanay gibuhat ni Jesus, ug siya andam ug kinabubut-ong mitabang sa mga tawo, nga sagad naggamit sa ilang ngalan.—11/15, panid 25.

• Nganong dili magsaulog ug Chinese New Year ang matuod nga mga Kristohanon?

Ang Chinese New Year maoy hinungdanong selebrasyon sa Asia. Kini sagad gihimo aron suwertehon kono sila ug aron sa pagpakitag pagtahod sa mga espiritu. Ang mga Kristohanon nagpasidungog ug nagtahod sa ilang mga ginikanan, apan dili sila moapil sa mga kombira nga gihimo aron makabatog proteksiyon gikan sa namatay nang mga katigulangan o sa pagpangayog pabor gikan sa mga diyos sa panimalay.—12/1, panid 20-23.