Puliki ug Malipayon Diha sa Pag-alagad sa Diyos

BUOT ni Jehova nga magmalipayon ka. (Sal. 100:2) Ingong iyang alagad, lagmit puliki ka usab. Tingali dili ka ingon niini ka puliki sa dihang imong gipahinungod ang imong kinabuhi sa Diyos, apan karon tungod sa imong sekular ug espirituwal nga mga responsibilidad hayan nabug-atan ka. Basin ganig nahasol ka sa dihang dili nimo mahimo ang tanan nimong giplanong buhaton. Sa unsang paagi nimo mahuptan ang pagkatimbang ug “ang kalipay ni Jehova”?—Neh. 8:10.

Nagkinabuhi ka sa malisod nga panahon ug naapektohan ka sa daghang kapit-os, busa kinahanglan nga maayo kang moorganisar sa imong mga buluhaton. Bahin niini, ang pipila sa inspiradong mga tambag ni apostol Pablo ilabinang makatabang: “Pagbantay pag-ayo nga ang inyong paglakaw dili ingon sa dili-­maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan.”—Efe. 5:15, 16.

Maylabot nianang maalamong tambag, sa unsang paagi makahimo kag realistikong mga tumong alang sa imong kaugalingon ug mahimong balanse sa personal nga pagtuon, pag-atiman sa pamilya, pagsangyaw sa kanataran, sekular nga trabaho, ug ubang hinungdanong mga kalihokan?

Nahinumdom ka ba sa kalipay nga imong gibati sa dihang nagpahinungod ka sa imong kinabuhi sa Diyos ug nagpabawtismo? Ang kahibalo bahin kang Jehova ug sa iyang mga katuyoan nakahatag kanimog kalipay. Tingali migugol kag ubay-ubayng mga bulan sa makugihong pagtuon una ka nakabaton sa maong kahibalo ug kalipay. Apan wala gayod makawang ang imong paningkamot. Ang imong kinabuhi nahimong mas makahuloganon.

Aron magpabilin ang imong kalipay, kinahanglang magpadayon ka sa pagkuhag kahibalo bahin sa Diyos. Kon naglisod ka sa pagpangitag panahon sa pagbasa ug pagtuon sa Bibliya, susiha ang imong eskedyul. Bisan ang pipila ka minutos nga pagtuon ug pagpamalandong kada adlaw motabang kanimo nga mas masuod kang Jehova, ug seguradong mosamot ang imong kalipay.

Kadaghanan sa mga alagad sa Diyos makakaplag ug panahon alang sa hinungdanong mga kalihokan pinaagi sa pag-iban sa panahon nga ilang gigugol sa dili kaayo hinungdanong mga butang. Pangutan-a ang imong kaugalingon, ‘Unsa ka taas ang panahon nga akong gigugol sa pagbasa ug sekular nga mga magasin o mantalaan, pagtan-awg TV, pagpamati sa musika, o paghimo sa mga butang nga akong gikalingawan?’ Ang maong mga kalihokan  makalingaw basta dili pasobraan. (1 Tim. 4:8) Kon imong naamgohan nga ang pagbahin sa panahon maoy imong problema, paghimog mga paagi nga maeskedyul ug maayo ang imong kalihokan.

Si Adam, nga usa ka bana, amahan sa tulo ka anak, ug ansiyano, nagsaysay kon unsay nakatabang kaniya: “Naningkamot ko sa pagkinabuhing simple. Akong gilikayan ang makahurot-ug-panahon nga mga pasatiempo ug ang pagpalit ug mga butang nga nagkinahanglag dakong panahon sa pagmentinar. Wala kana magpasabot nga akong gihikawan ang akong kaugalingon—mipili lang kog simpleng mga lulinghayaw.”

Pinaagi sa pagpamalandong sa maayong mga resulta sa imong desisyon imong mabatonan pag-usab ang kalipay, ug matabangan ka nga mahuptan ang positibong panglantaw. Pananglitan, si Mar­iusz, usa ka ansiyano nga dunay tulo ka anak, miingon: “Sa pagsugod nakog tuon ug Bibliya, nahimong positibo ang akong panglantaw. Matag karon ug unya, ako nag-atubang gihapon ug mga kalisdanan, nga daghan niana si Jehova lang ang nasayod. Apan tungod sa iyang tabang, ako malipayong nagalantaw sa umaabot.”

Sama sa kahimtang ni Mariusz, ang positibong tinamdan dili makapawala sa kabalaka. Apan makapaarang-arang kana sa imong gibati ug mas masagubang nimo ang mga suliran. Atong mabasa: “Ang tanang adlaw sa sinakit maoy daotan; apan ang malipayon ug kasingkasing may kombira sa kanunay.” (Prov. 15:15) Palandonga usab ang gugma nga gipakita sa Diyos kanimo. Makapalalom kana sa imong gugma kaniya ug makapasamot sa imong kalipay.—Mat. 22:37.

Ang pag-una kang Jehova ug sa iyang intereses makadugang sa kalipay sa pamilya. Ang pagpasundayag sa Kristohanong mga hiyas makapamenos sa kabingkilan ug moresulta sa mas suod ug mas malipayong pag-ubanay sa pamilya. Sa ingon, ang imong panimalay mahimong tinuod nga dapit sa kalinaw ug panaghiusa.—Sal. 133:1.

Ang pagpakigbahin sa espirituwal nga mga kalihokan ingong pamilya makadugang usab sa kalipay. Si Mariusz misaysay: “Akong gipabilhan ang panahon nga magkauban kami ingong pamilya. Ang akong asawa nagpaluyo gayod kanako. Kon posible, mag-uban mi sa pagsangyaw o kaha sa paglimpiyo sa estadyum una pa ang mga kombensiyon, ug mokuyog siya nako sa dihang mopakigpulong ko sa ubang mga kongregasyon. Kini nakapadasig kanako.”

Ang Kasulatan nagsugo sa mga Kristohanon sa pagtagana sa materyal nga panginahanglan sa ilang pamilya. (1 Tim. 5:8) Apan kon halos mahurot na ang imong panahon ug kusog diha sa sekular nga trabaho, mahimong mawala ang imong kalipay sa pag-alagad sa Diyos. Iampo kana kang Jehova. (Sal. 55:22) Ang uban nangitag laing trabaho aron ilang mauna ang Gingharian sa Diyos. Dili angayng tugotan sa usa ka Kristohanon ang materyal nga bentaha sa usa ka trabahong makahurot sa iyang panahon ug kusog nga mopugong kaniya sa paghatag ug pagtagad sa espirituwal nga mga butang, nga maoy mas hinungdanon.—Prov. 22:3.

Mahimong makatabang kanimo ang pagsulat sa mga bentaha ug disbentaha sa umaabot o presenteng trabaho. Siyempre, gusto kag maayong suweldo ug makapatagbaw nga trabaho. Apan, ang imo bang trabaho karon nagtabang kanimo sa pagpauswag sa espirituwalidad sa imong pamilya? Timbangtimbanga kana pag-ayo ug paghimog mga desisyon nga nagpakita nga imong giuna ang imong relasyon kang Jehova.

Kon ang imong trabaho wala makatabang kanimo sa pag-uswag sa espirituwal, kinahanglan kang mohimog kausaban. Daghang Kristohanon ang nakahimog dagkong mga kausaban aron makagahin ug panahon alang sa espirituwal nga mga butang. Usa ka brader sa Polandia misulat: “Dihay panahon nga kinahanglan kong moluwat sa akong trabaho tungod kay kanunay kong ipadala sa kompaniya ngadto sa laing dapit. Halos wala na koy panahon sa pag-atiman sa espirituwal nga mga butang o sa akong pamilya.” Karon mipili siyag trabaho nga dili makahurot sa iyang panahon ug kusog.

Pagkaplag ug Kalipay sa Pagtabang sa Uban

Si Jesus miingon nga “adunay labaw nga kalipay sa paghatag kay sa pagdawat.” (Buh. 20:35) Adunay daghang kahigayonan nga makahimo niana ang mga Kristohanon. Usahay, ang mabinationg pahiyom, paglamano, o ang sinserong pagpasalamat sa paghago sa usa diha sa iyang teokratikanhong asaynment igo nang makahatag kaninyong duha ug kalipay.

 Si apostol Pablo nagdasig sa mga isigka-Kristohanon: “Hupaya ang magul-anong mga kalag, buligi ang mga maluya.” (1 Tes. 5:14) Ang nagmagul-anon mobati tingali nga dili nila masagubang ang ilang problema. Makatabang ka ba kanila? Kon imong namatikdan nga usa sa imong mga igsoon nawad-an nag kalipay sa pag-alagad kang Jehova, dasiga siya. Ang pagbuhat niana makadasig usab kanimo. Dunay mga problema nga dili masulbad sa tawo. Apan, ikaw makapakitag tiunay nga pagkamabination ug makadasig sa imong igsoon sa pagsalig kang Jehova. Kon buhaton nimo kana, dili ka gayod mahigawad.—Sal. 27:10; Isa. 59:1.

Ang laing praktikal nga lakang mao ang pagdapit sa usa nga morag nawad-an nag kalipay sa pag-uban kanimo diha sa ministeryo. Sa dihang gisugo ni Jesus ang 70 ka tinun-an, gipadala niya sila nga “tinagurha.” (Luc. 10:1) Dili ba nga ang gibuhat ni Jesus maoy paagi nga magdinasigay sila sa usag usa? Masundog ba nimo kana aron matabangan ang usa nga mahibalik ang iyang kalipay?

Karong adlawa adunay daghang butang nga makahatag kanatog kabalaka. Bisan pa niana, si Pablo nagtambag kanato: “Pagmaya kanunay diha sa Ginoo. Sa makausa pa ako magaingon, Pagmaya!” (Filip. 4:4) Tungod kay ikaw nahigugma sa Diyos, nagsunod kaniya, ug masibotong nagpadayon diha sa buluhaton nga iyang gisugo kanimo, ang imong kinabuhi adunay katuyoan. Kana makahatag kanimog kalipay. Dugang pa, si Jehova motabang kanimo sa pagsagubang sa mga kapit-os ug problema nga imong giatubang.—Roma 2:6, 7.

Pinaagi sa mata sa pagtuo, atong nakita nga haduol na gayod kita sa gisaad ni Jehova nga bag-ong kalibotan. Pagkadaghan sa panalangin ug hinungdan sa kalipay nga ipahinabo niana! (Sal. 37:34) Busa mahimo kitang magmalipayon, nga dili makalimot sa daghang panalangin nga gihatag ni Jehova kanato bisan karon. Sa ingon, ‘makaalagad kita kang Jehova uban ang pagmaya.’—Sal. 100:2.

[Diagram sa panid 8]

(Alang sa aktuwal nga porma, tan-awa ang publikasyon)

Kinahanglan tingali nimong ayohon pagbahin ang imong panahon aron magpabiling malipayon

LULINGHAYAW ug KALINGAWAN

PANIMALAY ug PAG-ATIMAN SA PAMILYA

TRABAHO

MGA TIGOM SA KONGREGASYON

PERSONAL NGA PAGTUON

PAGSANGYAW

[Mga hulagway sa panid 10]

Makatabang ka ba sa uban nga mahibalik ang ilang kalipay?