Nabindikar ang Pagmando ni Jehova!
Nabindikar ang Pagmando ni Jehova!
“Ang Labing Hataas maoy Magmamando sa gingharian sa mga tawo.”—DAN. 4:17.
1, 2. Unsa ang pipila ka hinungdan kon nganong pakyas ang pagmando sa tawo?
ANG pagmando sa tawo napakyas! Kana dili kaduhaduhaan. Ang pangunang hinungdan niana mao nga ang tawo kulag kaalam sa pagmando nga malamposon. Ang kapakyasan sa pagmando sa tawo ilabinang nadayag sa atong panahon diin daghan kaayong magmamando ang ‘mahigugmaon sa kaugalingon, mahigugmaon sa salapi, mapagawalon, mapahitas-on, dili-maunongon, dili-ikasabot, tigbutangbutang, walay pagpugong-sa-kaugalingon, mabangis, walay gugma sa pagkamaayo, mabudhion, ug nangburot sa garbo.’—2 Tim. 3:2-4.
2 Dugay na kanhi, gisalikway sa atong unang ginikanan ang pagmando sa Diyos. Sa pagbuhat niana, sila tingali nagtuo nga mahimo silang independente. Apan sa pagkatinuod, sila nagpasakop sa pagmando ni Satanas. Ang unom ka libo ka tuig nga sayop nga pagdumala sa tawo—nga giimpluwensiyahan pag-ayo sa “magmamando niining kalibotana,” si Satanas—miresulta sa makaguol kaayong kahimtang karon. (Juan 12:31) Sa pagkomento bahin sa kahimtang sa tawo karon, ang The Oxford History of the Twentieth Century nag-ingon nga walay kapuslanan ang “pagpangita sa usa ka hingpit nga kalibotan.” Kini nagpatin-aw: “Gawas nga kini dili makaplagan, ang pagpaningkamot sa pagpatungha niini mitultol sa katalagman, totalitaryanismo, ug ngilngig nga mga gubat.” Kana maoy klarong pag-admiter nga pakyas gayod ang pagmando sa tawo.
3. Unsay atong ikasulti bahin sa paagi sa pagmando sa Diyos kon wala pa makasala si Adan ug Eva?
3 Nan, makapasubo gayod nga gisalikway sa atong unang ginikanan ang bugtong pagmando nga molampos—ang pagmando sa Diyos! Siyempre, wala kita mahibalo kon unsa gayoy paagi ni Jehova sa pagmando sa yuta kon si Adan ug Eva nagmatinumanon pa kaniya. Apan, makaseguro kita nga ang iyang pagmando nga pasakopan sa tanang katawhan maoy pinasukad sa gugma ug pagkadili-mapihigon. (Buh. 10:34; 1 Juan 4:8) Tungod sa dili-hitupngang kaalam sa Diyos, makaseguro usab kita nga kon ang katawhan nagpadayon pa sa pagpasakop sa pagmando ni Jehova, malikayan unta ang tanang kasaypanan nga nahimo sa mga tigpasiugda sa tawhanong pagmando. Ang pagmando sa Diyos, o teokrasya, milampos unta sa ‘pagtagbaw sa tinguha sa tanang buhing butang.’ (Sal. 145:16) Sa laktod, hingpit kadto nga pagmando. (Deut. 32:4) Pagkamakapasubo nga gisalikway kana sa tawo!
4. Sa unsang gilapdon nga si Satanas gitugotan sa pagmando?
4 Bisan pa niana, angay natong hinumdoman nga bisag gitugotan ni Jehova ang mga tawo sa pagmando, wala gayod niya buhii ang iyang katungod sa pagmando ibabaw sa iyang mga linalang. Gani, ang gamhanang hari sa Babilonya napugos sa pag-ila nga “ang Labing Hataas maoy Magmamando sa gingharian sa mga tawo.” (Dan. 4:17) Sa ngadtongadto, ang kabubut-on sa Diyos matuman pinaagi sa iyang Gingharian. (Mat. 6:10) Tinuod, sulod sa mubong panahon, gitugotan ni Jehova si Satanas nga mahimong “diyos niini nga sistema sa mga butang” aron sa pagtaganag makapakombinsir nga tubag sa mga isyu nga gipatungha sa maong magsusupak. (2 Cor. 4:4; 1 Juan 5:19) Bisan pa niana, si Satanas wala gayod makahimo ug labaw pa kay sa gitugot ni Jehova. (2 Cron. 20:6; itandi ang Job 1:11, 12; 2:3-6.) Ug duna gayoy mga tawo nga mipili sa pagpasakop sa Diyos, bisan pag nagkinabuhi sila sa kalibotan nga gimandoan sa pangunang Kaaway sa Diyos.
Pagmando sa Diyos Ibabaw sa Israel
5. Unsay gisaad sa Israel ngadto sa Diyos?
5 Sukad sa panahon ni Abel hangtod sa mga patriarka, daghang matinumanong tawo ang nagsimba kang Jehova ug nagtuman sa iyang mga sugo. (Heb. 11:4-22) Sa adlaw ni Moises, si Jehova mihimog pakigsaad uban sa mga kaliwat sa patriarkang si Jacob, ug kini sila nahimong nasod sa Israel. Niadtong 1513 W.K.P., ang mga Israelinhon ug ang ilang mga kaliwat misaad nga ilang dawaton si Jehova ingong Magmamando, nga nag-ingon: “Andam kami sa pagbuhat sa tanan nga gisulti ni Jehova.”—Ex. 19:8.
6, 7. Unsay imong ikasulti bahin sa pagmando sa Diyos ibabaw sa Israel?
6 Si Jehova adunay katuyoan sa pagpili sa mga Israelinhon nga mahimong iyang katawhan. (Basaha ang Deuteronomio 7:7, 8.) Ang maong pagpili naglangkit ug labaw pa kay sa kaayohan sa mga Israelinhon. Naglangkit usab kana sa ngalan ug pagkasoberano sa Diyos, ug kini maoy labawng hinungdanon. Ang Israel magsilbing saksi nga si Jehova mao ang bugtong matuod nga Diyos. (Isa. 43:10; 44:6-8) Busa, giingnan ni Jehova ang maong nasod: “Ikaw usa ka katawhan nga balaan alang kang Jehova nga imong Diyos, ug si Jehova nagpili kanimo nga mahimong iyang katawhan, usa ka linaing katigayonan, gikan sa tanang mga katawhan nga anaa sa ibabaw sa nawong sa yuta.”—Deut. 14:2.
7 Ang pagmando sa Diyos sa mga Israelinhon nagkonsiderar sa ilang pagkadili-hingpit. Sa samang higayon, ang iyang mga balaod maoy hingpit ug nagbanaag sa iyang mga hiyas. Ang mga sugo nga gihatag ni Jehova pinaagi kang Moises tin-awng nagpasiugda sa pagkabalaan sa Diyos, sa iyang gugma sa hustisya, sa iyang pagkaandam nga mopasaylo, ug sa iyang pailob. Sa ulahi, sa tanang adlaw ni Josue ug sa iyang henerasyon, gisunod sa nasod ang mga sugo ni Jehova ug ilang natagamtam ang kalinaw ug espirituwal nga mga panalangin. (Jos. 24:21, 22, 31) Ang maong yugto sa kasaysayan sa Israel nagpakita nga malamposon ang paagi sa pagmando ni Jehova.
Adunay Bugti ang Pagmando sa Tawo
8, 9. Unsay dili-maalamong gipangayo sa Israel, ug unsay resulta niana?
8 Apan, paglabay sa panahon, ang mga Israelinhon subsob nga nagsalikway sa pagmando sa Diyos ug nawad-an sa iyang proteksiyon. Sa ulahi, pinaagi kang manalagnang Samuel, ang Israel nangayog usa ka makita, tawhanong hari. Giingnan ni Jehova si Samuel nga ihatag ang ilang gipangayo. Apan, si Jehova midugang: “Dili ikaw ang ilang gisalikway, kondili ako ang ilang gisalikway ingon nga hari sa ibabaw nila.” (1 Sam. 8:7) Bisan tuod gitugotan ni Jehova ang Israel nga makabaton ug makita nga hari, siya nagpasidaan kanila nga adunay bugti ang pagbaton ug tawhanong hari.—Basaha ang 1 Samuel 8:9-18.
9 Gipakita sa kasaysayan nga tinuod ang pasidaan ni Jehova. Kay gimandoan ug tawhanong hari, ang Israel nasugamak sa seryosong mga problema, ilabina sa dihang ang maong hari nahimong dili-matinumanon. Sa pagkonsiderar sa naagoman sa Israel, dili ikatingala nga latas sa katuigan, ang pagmando sa mga tawong wala makaila kang Jehova wala makapatunghag dumalayong kaayohan. Tinuod, ang pipila ka politiko nangamuyo nga panalanginan sa Diyos ang ilang mga paningkamot sa pagpatunghag kalinaw ug kasegurohan, apan panalanginan ba gayod sa Diyos kadtong wala magpasakop sa iyang pagmando?—Sal. 2:10-12.
Usa ka Bag-ong Nasod Ilalom sa Pagmando sa Diyos
10. Nganong gipulihan man ang Israel ingong piniling nasod sa Diyos?
10 Ang nasod sa Israel nahimong dili matinumanon kang Jehova. Sa ulahi, ilang gisalikway ang tinudlo sa Diyos nga Mesiyas, ug sila gisalikway ni Jehova ug gipulihag usa ka grupo sa mga tawo nga nahimong bag-ong nasod. Ingong resulta, niadtong 33 K.P. nahimugso ang Kristohanong kongregasyon sa dinihogang mga magsisimba ni Jehova. Sa diwa, ang maong kongregasyon maoy usa ka bag-ong nasod ilalom sa pagmando ni Jehova. Si Pablo nagtawag niana nga “Israel sa Diyos.”—Gal. 6:16.
11, 12. Maylabot sa pagdumala, unsay kasamahan tali sa karaang Israel ug sa “Israel sa Diyos”?
11 Adunay kalainan ug kasamahan ang unang nasod sa Israel ug ang bag-ong “Israel sa Diyos.” Dili sama sa karaang Israel, ang Kristohanong kongregasyon walay tawhanong hari ug wala magkinahanglag halad nga mga hayop alang sa mga makasasala. Ang usa ka kasamahan tali sa nasod sa Israel ug sa Kristohanong kongregasyon mao ang kahikayan maylabot sa mga ansiyano. (Ex. 19:3-8) Ang maong mga ansiyano dili magharihari sa panon. Hinunoa, sila magbantay sa kongregasyon ug makugihong manguna sa Kristohanong mga kalihokan. Sila mahigugmaong makiglabot sa matag indibiduwal sa kongregasyon, nga maghatag pasidungog ug dignidad sa tanan.—2 Cor. 1:24; 1 Ped. 5:2, 3.
12 Pinaagi sa pagpamalandong sa mga pakiglabot sa Diyos sa karaang Israel, ang mga membro sa “Israel sa Diyos” ug ang “ubang mga karnero” makaugmad ug dakong apresasyon alang kang Jehova ug sa iyang paagi sa pagmando. (Juan 10:16) Pananglitan, gipakita sa kasaysayan nga ang mga magmamando sa Israel dakog impluwensiya sa ilang mga ginsakpan, maayo man o daotan. Magpahinumdom kana niadtong nagapanguna sa kongregasyon nga, bisan tuod dili sila mga magmamando sama niadtong karaang mga hari, sila kinahanglang magpakita kanunay ug maayong panig-ingnan sa pagtuo.—Heb. 13:7.
Kon sa Unsang Paagi si Jehova Nagmando Karon
13. Unsay hinungdanong panghitabo niadtong 1914?
13 Ang mga Kristohanon karon nagmantala nga ang pagmando sa tawo hapit nang matapos. Niadtong 1914, gitukod ni Jehova sa langit ang iyang Gingharian ilalom sa iyang tinudlong Hari, si Jesu-Kristo. Nianang panahona, gihatagan niya si Jesus ug awtoridad sa ‘pagpangdaog ug sa pagtapos niana.’ (Pin. 6:2) Ang bag-ong naentronong Hari gisugo: “Magapangdaog ka taliwala sa imong mga kaaway.” (Sal. 110:2) Ikasubo, ang mga nasod kanunayng nagdumili sa pagpasakop sa pagmando ni Jehova. Sila nagpadayon sa paggawi nga daw “walay Jehova.”—Sal. 14:1.
14, 15. (a) Sa unsang paagi gimandoan kita karon sa Gingharian sa Diyos, ug unsang mga pangutana ang angay natong isukna sa atong kaugalingon? (b) Sa unsang paagi makita karong adlawa nga labaw ang paagi sa pagmando sa Diyos?
14 Aduna pay nahibilin nga pipila ka membro sa “Israel sa Diyos,” ug ingong mga igsoon ni Jesus, sila magsilbi gihapong “mga embahador kapuli ni Kristo.” (2 Cor. 5:20) Sila gitudlo ingong matinumanon ug maalamong ulipon nga matang nga maoy mag-atiman ug magtaganag espirituwal nga pagkaon sa mga dinihogan ug sa nagakadakong panon sa mga Kristohanon, nga naglakip karon sa milyonmilyon nga adunay paglaom nga mabuhi sa yuta sa walay kataposan. (Mat. 24:45-47; Pin. 7:9-15) Ang espirituwal nga kauswagan nga natagamtam sa matuod nga mga magsisimba karon nagpamatuod nga gipanalanginan ni Jehova ang maong kahikayan.
15 Angay natong pangutan-on ang atong kaugalingon: ‘Nahibalo ba ako sa tanang responsibilidad nga angay nakong abagahon sulod sa Kristohanong kongregasyon? Nagapaluyo ba ako sa pagmando ni Jehova? Mapasigarbohon ba ako sa pagkahimong sakop sa Gingharian sa Diyos? Determinado ba ako nga padayong makigsulti sa uban bahin sa Gingharian sa Diyos kutob sa akong maarangan?’ Ingong usa ka grupo, kita andam nga magpasakop sa paggiya sa Nagamandong Lawas ug mokooperar sa tinudlong mga ansiyano sa kongregasyon. Pinaagi niana, atong gipakita nga atong gidawat ang pagmando sa Diyos. (Basaha ang Hebreohanon 13:17.) Ang kinabubut-ong pagpasakop miresulta sa tibuok-kalibotang panaghiusa nga talagsaon niining nabahin nga kalibotan. Kini usab nagpatunghag kalinaw ug pagkamatarong ug naghimaya kang Jehova, nga nagpakita nga ang iyang paagi sa pagmando mao ang labing maayo.
Nagmadaogon ang Pagmando ni Jehova
16. Unsang desisyon ang angayng himoon sa mga tawo karon?
16 Haduol na kaayo ang panahon sa paghusay sa mga isyu nga gibangon didto sa Eden. Busa, panahon na nga ang mga tawo mohimog desisyon. Ang matag indibiduwal kinahanglang mopili kon iya bang dawaton ang pagmando ni Jehova o magpasakop gihapon siya sa pagmando sa tawo. Atong pribilehiyo ang pagtabang sa mga maaghop sa paghimog hustong desisyon. Sa dili madugay, sa Armagedon, ang pagmando ni Jehova mopuli sa tawhanong mga kagamhanan nga ilalom sa impluwensiya ni Satanas. (Dan. 2:44; Pin. 16:16) Ang pagmando sa tawo matapos, ug ang Gingharian sa Diyos magmando sa tibuok yuta. Sa bug-os nga diwa, ang pagmando ni Jehova mabindikar.—Basaha ang Pinadayag 21:3-5.
17. Maylabot sa pagmando, unsang mga kamatuoran ang makatabang sa mga maaghop sa paghimog hustong desisyon?
17 Kadtong wala pa makadesisyon sa pagdapig kang Jehova angay nga mainampoong magkonsiderar sa mga kaayohan nga mabatonan gikan sa pagmando sa Diyos. Ang pagmando sa tawo wala makasulbad sa krimen, lakip na sa terorismo. Ang pagmando sa Diyos magwagtang sa tanang daotan sa yuta. (Sal. 37:1, 2, 9) Ang pagmando sa tawo miresulta sa kanunayng paggubatay, apan ang pagmando sa Diyos ‘magpahunong sa mga gubat hangtod sa kinatumyan sa yuta.’ (Sal. 46:9) Aw, ipasig-uli pa gani niana ang pakigdait tali sa tawo ug mananap! (Isa. 11:6-9) Ang kakabos ug kagutom kanunayng naglungtad ilalom sa pagmando sa tawo, apan wagtangon kana sa pagmando sa Diyos. (Isa. 65:21) Bisan ang maayog-motibo nga tawhanong mga magmamando wala makawagtang sa sakit ug kamatayon, apan ilalom sa pagmando sa Diyos, ang mga tigulang ug masakiton mahibalik sa kabaskog sa ilang pagkabatan-on. (Job 33:25; Isa. 35:5, 6) Sa pagkatinuod, ang yuta mahimong usa ka paraiso diin banhawon pa gani ang mga patay.—Luc. 23:43; Buh. 24:15.
18. Sa unsang paagi atong ikapakita nga kita kombinsido nga ang pagmando sa Diyos mao ang labing maayo?
18 Oo, ang pagmando sa Diyos magwagtang sa tanang kadaot nga gipahinabo ni Satanas sa dihang iyang giimpluwensiyahan ang atong unang ginikanan sa pagtalikod sa ilang Maglalalang. Ug hunahunaa kini, si Satanas nagpahinabog kadaot sulod sa 6,000 ka tuig, apan ang Diyos, pinaagi ni Kristo, magwagtang nianang tanang kadaot sulod lamang sa 1,000 ka tuig! Hingpit gayod kana nga pamatuod sa pagkalabaw sa pagmando sa Diyos! Ingong mga Saksi sa atong Diyos, ato siyang gidawat ingong atong Magmamando. Busa, atong ipakita sa matag adlaw, sa pagkatinuod sa matag oras, sa atong kinabuhi nga kita mga magsisimba ni Jehova, mga sakop sa iyang Gingharian, ug mapasigarbohon nga kita iyang mga Saksi. Ug atong gamiton ang matag kahigayonan sa pagsulti kang bisan kinsa nga mamati nga ang pagmando ni Jehova mao ang labing maayo.
Maylabot sa Pagmando sa Diyos, Unsay Atong Nakat-onan Gikan sa . . .
[Mga Pangutana sa Pagtuon]
[Mga hulagway sa panid 29]
Wala gayod buhii ni Jehova ang iyang katungod sa pagmando
[Hulagway sa panid 31]
Ang kinabubut-ong pagpasakop sa pagmando ni Jehova magpatunghag tibuok-kalibotang panaghiusa