Tabangi ang Inyong mga Anak sa Pag-atubang sa mga Hagit

ANG atong mga batan-on nailalom sa grabeng pagpit-os. Sila naladlad sa espiritu sa daotang kalibotan ni Satanas, ug sila kinahanglang makigbisog sa “mga tinguha nga iya sa pagkabatan-on.” (2 Tim. 2:22; 1 Juan 5:19) Ug tungod kay sila naningkamot sa ‘paghinumdom sa ilang Dakong Maglalalang,’ sila gibiaybiay—gisamoksamok pa gani—niadtong supak sa ilang pagtuo. (Eccl. 12:1) Sa paghinumdom sa panahon nga siya bata pa, ang usa ka brader nga ginganlag Vincent miingon: “Aduna gayoy magsamoksamok nako, magdaogdaog nako, o manghagit nakog away tungod kay ako Saksi. Sagad mograbe ang mga pagpit-os mao nga dili na ko ganahang moeskuyla.” *

Gawas pa sa mga pagpit-os sa kalibotan, ang atong mga anak mahimong nakigbisog usab sa ilang tinguha nga mahisama sa ilang mga isigkaingon. “Dili sayon nga isipong lahi,” miingon si Cathleen, usa ka sister nga wala pay bayente anyos.  Ang usa ka batan-ong brader nga ginganlag Alan miadmitir, “Pirme kong hagdon sa akong mga eskolmet nga manuroy sa hinapos sa semana, ug gusto kaayo kong mouban nila.” Dugang pa, ang mga batan-on ganahan kaayong moapil sa mga esport sa eskuylahan, nga dali rang mosangpot sa daotang panagkauban. “Hilig ko ug esport,” miingon ang usa ka batan-ong sister nga ginganlag Tanya. “Kanunay kong kombinsihon sa mga coach nga paapilon sa ilang tem. Lisod kaayong mobalibad.”

Sa unsang paagi matabangan ninyo ang inyong mga anak sa pag-atubang sa mga hagit? Si Jehova nagsugo sa mga ginikanan sa paggiya sa ilang mga anak. (Prov. 22:6; Efe. 6:4) Ang tumong sa mahinadlokon-sa-Diyos nga mga ginikanan mao ang pag-ugmad diha sa kasingkasing sa ilang mga anak sa tinguha nga sugton si Jehova. (Prov. 6:20-23) Nianang paagiha, ang mga anak mapalihok sa pagsukol sa mga pagpit-os sa kalibotan bisag wala ang ilang mga ginikanan.

Alang sa mga ginikanan, usa ka hagit ang pagpangitag pangabuhian, pagtagana sa pamilya, ug pag-atiman sa mga buluhaton sa kongregasyon—sa samang higayon. Kinahanglan kanang himoon sa pipila ingong nag-inusarang ginikanan o samtang nag-atubag pagsupak gikan sa dili-magtutuong kapikas. Bisan pa niana, si Jehova nagsugo nga ang mga ginikanan maggahin ug panahon sa pagtudlo ug pagtabang sa ilang mga anak. Busa, unsay inyong mahimo sa pagtabang sa inyong mga anak nga mapanalipdan ang ilang kaugalingon batok sa pagpit-os sa isigkaingon, tentasyon, ug pagsamoksamok nga ilang giatubang adlaw-adlaw?

Suod nga Relasyon Kang Jehova

Una sa tanan, ang atong mga batan-on kinahanglang makaila kang Jehova ingong tinuod nga Persona. Sila kinahanglang tabangan nga ‘makita ang Usa nga dili-makita.’ (Heb. 11:27) Si Vincent, nga gihisgotan ganina, nahinumdom kon sa unsang paagi ang iyang ginikanan nagtabang kaniya sa pag-ugmad ug suod nga relasyon kang Jehova. Siya miingon: “Ila kong gitudloan sa kahinungdanon sa pag-ampo. Nahinumdom ko nga sukad sa linghod nga panuigon, ako mag-ampo kang Jehova sa dili pa matulog. Si Jehova tinuod gayod alang nako.” Nag-ampo ba kamo uban sa inyong mga anak? Nganong dili ninyo  pamation kon unsay ilang gisulti kang Jehova diha sa ilang mga pag-ampo? Sila ba naggamit ug mao rang mga pulong? O sila ba nagpahayag kon unsa gayoy ilang pagbati kang Jehova? Pinaagi sa pagpamati sa ilang mga pag-ampo, inyong masuta kon ila ba gayong ginaugmad ang suod nga relasyon kang Jehova.

Ang regular nga pagbasa sa Pulong sa Diyos maoy laing importanteng paagi nga ang mga batan-on masuod kang Jehova. Si Cathleen, nga gihisgotan ganina, miingon: “Ang pagbasa sa tibuok Bibliya samtang bata pa nakatabang kanako. Tungod niana, ako masaligon nga bisan pag pit-oson ko, si Jehova motabang kanako.” Aduna bay eskedyul sa pagbasa sa Bibliya ang inyong mga anak?—Sal. 1:1-3; 77:12.

Tinuod, ang mga anak lainlaig reaksiyon sa paggiya sa ilang mga ginikanan. Lain pa, ang ilang espirituwal nga pag-uswag mahimong magdepende sa ilang edad. Apan, kon walay giya, malisdan ang mga batan-on sa pagkaila kang Jehova ingong tinuod nga Persona. Kinahanglang isilsil sa mga ginikanan ang Pulong sa Diyos diha sa ilang mga anak aron sila sama rag nakadungog kang Jehova nga nagsulti, bisan asa sila. (Deut. 6:6-9) Kinahanglang bation sa inyong mga anak nga si Jehova adunay kahingawa kanila.

Komunikasyon—Kon Unsaon Kana Paghimong Mapuslanon

Ang komunikasyon maoy laing hinungdanong paagi sa pagtabang sa inyong mga anak. Siyempre, ang maayong komunikasyon naglangkit ug labaw pa kay sa pagpakig-estorya sa inyong mga anak. Naglakip kana sa pagpatunghag mga pangutana ug mapailobong pagpamati sa ilang mga tubag—bisan pag lahi kana sa gusto ninyong madungog. “Ako mangutana hangtod nga masabtan nako kon unsay ilang gihunahuna ug kon unsay ilang gisagubang,” miingon si Anne, nga may duha ka anak nga lalaki. Gibati ba sa inyong mga anak nga kamo namati kanila? Si Tanya, nga gihisgotan ganina, miingon: “Ang akong ginikanan namati gayod kanako ug nahinumdom sa among giestoryahan. Nakaila sila sa akong mga klasmet. Sila mangutana bahin kanila ug sa ubang mga situwasyon  nga amo nang gihisgotan.” Ang pagpamati ug paghinumdom hinungdanon sa mapuslanong komunikasyon.

Nakaplagan sa daghang pamilya nga ang panahon sa pagpangaon maoy maayong kahigayonan alang sa mapuslanong komunikasyon. “Importante sa among pamilya ang pagdungag kaon,” matod ni Vincent. “Gidahom nga kami modungag kaon sa pamilya kon posible. Dili puwedeng motan-awg TV, maminaw sa radyo, o magbasa samtang nangaon. Sagad dili seryosong mga butang ang among estoryahan, mao nga panahon kini nga ako makarelaks ug sa ingon natabangan ako sa pagsagubang sa mga pagpit-os sa eskuylahan.” Siya midugang: “Kay naanad man ko sa pagpakig-estorya sa akong ginikanan panahon sa pagpangaon, dili na ko maglisod sa pagpakigsulti kanila sa dihang ako manginahanglag tabang sa mas bug-at nga mga problema.”

Suknaa ang imong kaugalingon, ‘Sa usa ka semana, kapila mi magdungag kaon ingong pamilya?’ Ang paghimo bag mga kausaban niining bahina maghatag kaninyog dugang kahigayonan sa pagpauswag sa inyong pagpakigkomunikar sa inyong mga anak?

Kon Nganong Hinungdanon Kaayo ang mga Praktis Sesyon

Ang paggahin ug usa ka gabii kada semana para sa Pamilyahanong Pagsimba maoy laing kahigayonan alang sa mapuslanong komunikasyon ug makatabang sa mga batan-on sa pag-atubang sa espesipikong mga problema. Si Alan, nga gihisgotan ganina, miingon: “Gigamit sa among ginikanan ang pagtuon sa pamilya sa pagsuta kon unsay anaa sa among hunahuna. Sila mopilig mga ulohan nga haom sa mga problema nga among gisagubang.” Ang inahan ni Alan miingon: “Sa among pagtuon sa pamilya kami maggahig panahon alang sa praktis sesyon. Kini nakatabang sa among mga anak sa pagkahibalo kon unsaon pagdepensa ug pagpamatuod sa ilang pagtuo. Tungod niana, nakabaton silag kompiyansa sa pag-atubang sa mga hagit.”

Sa pagkatinuod, sa dihang ang mga batan-on pit-oson sa ilang isigkaingon, sagad dili igo ang pagbalibad ug pagbiya. Kinahanglang matubag nila kon ngano ug kon nganong dili nila kana buhaton. Kinahanglan usab nga masayod sila kon unsay buhaton sa dihang biaybiayon tungod sa  ilang pagtuo. Kon dili sila makadepensa sa ilang pagtuo, malisdan sila sa pagbarog nga malig-on dapig sa matuod nga pagsimba. Ang mga praktis sesyon makatabang kanila sa pagkahibalo kon unsay angayng buhaton.

Ang  kahon sa panid 18 naghatag ug pipila ka kahimtang nga mahimo nilang gamiton sa ilang praktis sesyon. Himoa kanang realistiko pinaagi sa pagsupaksupak konohay sa isulti sa inyong mga anak. Sa maong mga praktis sesyon, hisgoti usab ang praktikal nga mga leksiyon gikan sa mga ehemplo nga narekord sa Bibliya. Sa walay duhaduha, ang maong pagbansay makatabang sa inyong mga anak sa pagsagubang sa mga hagit diha sa eskuylahan ug sa ubang dapit.

Malinawon ba nga Dapit ang Inyong Balay?

Ganahan bang mouli sa balay ang inyong mga anak gikan sa eskuylahan? Kon malinawon kini nga dapit, motabang kini sa inyong mga anak sa pag-atubang sa adlaw-adlawng mga hagit. Ang usa ka sister nga membro na karon sa pamilyang Bethel miingon: “Sa dihang ako nagdako, nakatabang kaayo kanako nga ang among balay maoy malinawon nga dapit. Bisag unsa pa ka ngil-ad ang situwasyon sa eskuylahan, ako nahibalo nga inig-uli nako, mamaayo ra ang tanan.” Unsa may kahimtang sa inyong balay? Usa ba kana ka dapit diin anaa kanunay ang “mga pagsinta sa kasuko, mga pakigtigi, [ug] mga pagkabahinbahin,” o usa kana ka dapit diin naglungtad ang “gugma, kalipay, [ug] pakigdait”? (Gal. 5:19-23) Kon subsob nga walay kalinaw sa inyong panimalay, kamo ba naningkamot pag-ayo sa pagsuta kon unsay angayng buhaton aron ang inyong balay mahimong malinawon nga dapit alang sa inyong mga anak?

Ang laing paagi nga matabangan ang inyong mga anak sa pag-atubang sa mga hagit mao ang pagpangitag mga paagi nga makabaton silag makapalig-ong panag-ubanay. Pananglitan, mahimo ba ninyong ikuyog sa paglingawlingaw ang pipila ka hamtong-sa-espirituwal nga mga igsoon sa inyong kongregasyon? Mahimo ba ninyong imbitahon ang nagapanawng magtatan-aw o ang uban nga anaa sa bug-os-panahong pag-alagad alang sa usa ka simpleng salosalo sa inyong balay? Duna ba moy kailang mga misyonaryo o Bethelite nga mahigala sa inyong mga anak, bisan pinaagig sulat, e-mail, o telepono? Ang maong mga panaghigalaay makatabang sa inyong mga anak sa pagtul-id sa ilang dalan ug sa pagbaton ug espirituwal nga mga tumong. Hunahunaa ang maayong impluwensiya ni apostol Pablo ngadto sa batan-ong si Timoteo. (2 Tim. 1:13; 3:10) Ang suod nga pakig-uban ni Pablo kaniya nakatabang kang Timoteo sa pagsentro sa iyang hunahuna sa espirituwal nga mga tumong.—1 Cor. 4:17.

Komendahi ang Inyong mga Anak

Si Jehova malipay nga makita ang mga batan-on nga mibarog dapig sa kon unsay matarong bisan pa sa mga pagpit-os gikan sa kalibotan ni Satanas. (Sal. 147:11; Prov. 27:11) Sa walay duhaduha, kamo malipay usab nga makita ang atong mga batan-on nga mihimog maalamong desisyon. (Prov. 10:1) Pahibaloa ang inyong mga anak kon unsay inyong pagbati kanila, ug magmadagayaon sa paghatag ug mahigugmaong komendasyon. Si Jehova naghatag ug maayong ehemplo alang sa mga ginikanan. Panahon sa bawtismo ni Jesus, si Jehova miingon: “Ikaw mao ang akong Anak, ang hinigugma; giuyonan ko ikaw.” (Mar. 1:11) Ang pasalig sa iyang Amahan seguradong nagpalig-on kang Jesus sa pag-atubang sa mga hagit nga anaa sa unahan. Sa susama, pahibaloa ang inyong mga anak nga gihigugma ninyo sila, ug komendahi sila sa ilang nalampos.

Tinuod, dili ninyo bug-os mapanalipdan ang inyong mga anak batok sa mga pagpit-os, pagsamoksamok, ug pagbiaybiay. Bisan pa niana, dako mog ikatabang kanila. Sa unsang mga paagi? Tabangi sila sa pag-ugmad ug suod nga relasyon kang Jehova. Pangitag kahigayonan alang sa mapuslanong kabildohay. Himoang praktikal ang Pamilyahanong Pagsimba, ug himoang malinawon nga dapit ang inyong balay. Ang pagbuhat niana makatabang gayod sa inyong mga anak sa pag-atubang sa mga hagit.

[Footnote]

[Kahon/Hulagway sa panid 18]

 ANG PRAKTIS SESYON MAKATABANG

Aniay pipila ka situwasyon nga mahimong atubangon sa atong mga batan-on. Nganong dili ninyo gamiton ang pipila niini sa inyong praktis sesyon atol sa Pamilyahanong Pagsimba?

▸ Ang usa ka coach nag-awhag sa inyong anak nga babaye sa pag-apil sa tem sa eskuylahan.

▸ Ang inyong anak nga lalaki gitunolag sigarilyo sa iyang pagpauli gikan sa eskuylahan.

▸ Ang pipila ka batan-ong lalaki nagbahad nga kulatahon ang inyong anak nga lalaki kon ilang makita siya nga nagsangyaw.

▸ Samtang namalaybalay ang inyong anak nga babaye, nakahibalag siyag eskolmet.

▸ Atubangan sa klase, gipangutana ang inyong anak nga babaye kon nganong dili siya mosaludar sa bandera.

▸ Ang usa ka batan-ong lalaki kanunayng magbiaybiay sa inyong anak nga lalaki tungod kay siya Saksi.

[Hulagway sa panid 17]

Aduna bay eskedyul sa pagbasa sa Bibliya ang inyong mga anak?

[Hulagway sa panid 19]

Ikuyog ba ninyo sa paglingawlingaw ang pipila ka hamtong-sa-espirituwal nga mga igsoon?