“Ang Katungod sa Bata nga Mouswag sa Espirituwal”

NIADTONG Disyembre 9, 2008, ang Swedish Academy for the Rights of the Child nagpahigayon ug usa ka talagsaong seminar nga may temang “Ang Katungod sa Bata nga Mouswag sa Espirituwal.” Daghang opinyon ang gipresentar sa mga mamumulong nga naghawas sa Church of Sweden, ubang mga denominasyon sa Kakristiyanohan, Islam, ug sa mga ateyista.

Lakip sa mga mamumulong mao ang usa ka klerigo kinsa miingon nga hinungdanon gayod ang mga asoy sa Bibliya sa espirituwal nga pag-uswag sa mga bata. Sa unsang paagi ang mga asoy sa Kasulatan makatagbaw sa espirituwal nga panginahanglan sa mga bata?

Ang maong klerigo miingon nga kini nga mga asoy magamit sa mga bata sa ilang “pribadong pagpamalandong.” Iyang gihisgotan “ang estorya bahin ni Adan ug Eva, Cain ug Abel, David ug Goliat, bahin sa pagkatawo ni Jesus, sa maniningil ug buhis nga si Zaqueo, sa sambingay bahin sa mausikong anak, sa matinabangong Samarianhon.” Siya miingon nga kini maoy “pipila sa mga asoy nga maggiya sa hunahuna [sa usa ka bata] aron maatubang ang seryosong mga isyu sa kinabuhi, sama sa pagluib, pagpasaylo, pagtabon sa sala, pagdumot, kaulawan, pagtul-id sa kasaypanan, inigsoon ug dili-hakog nga gugma.” Siya midugang nga kini nga mga asoy mahimong sundon, ipadapat, ug mahimong mapuslanong kasinatian sa bata.

Tinuod nga maayong dasigon ang mga bata sa pagbasa sa Bibliya. Apan, sila ba makahimog “pribadong pagpamalandong” sa ilang nabasa sa Kasulatan ug makakab-ot ug hustong konklusyon?

Bisan ang mga hamtong nagkinahanglag tabang sa pagsabot sa Kasulatan. Pananglitan, ang Bibliya naghisgot bahin sa usa ka tawo nga wala makasabot sa Kasulatan pinaagi lamag “pribadong pagpamalandong.” Ang maong tawo maoy usa ka Etiopianhong opisyal. Siya nagbasa sa tagna ni Isaias apan wala makasabot niana. Sanglit gusto niyang masabtan ang giingon sa manalagna, siya namati sa pagpatin-aw sa tinun-ang si Felipe bahin niana. (Buh. 8:26-40) Dili lang ang maong Etiopianhon ang nagkinahanglag tabang sa pagsabot sa Kasulatan. Kitang tanan—ilabina ang mga bata— nagkinahanglan niana.

Ang Bibliya nagpasidaan kanato: “Ang mga binuang nabugkos sa kasingkasing sa usa ka bata.” (Prov. 22:15) Ang mga bata nagkinahanglag giya ug pagtultol, ug responsibilidad sa ilang mga ginikanan ang paghatag kanilag moral ug espirituwal nga edukasyon pinasukad sa Bibliya ug sa gitudlo diha sa Kristohanong kongregasyon. Sila may katungod nga makadawat sa maong pagbansay. Sukad sa linghod nga panuigon, sila nagkinahanglag tabang sa pagpahilunag lig-on nga Kasulatanhong pundasyon sa pag-uswag sa espirituwal aron sila mahimong “mga tawong hamtong . . . nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.”—Heb. 5:14.