Gamita sa Hanas nga Paagi ang “Espada sa Espiritu”

“Dawata . . . ang espada sa espiritu, nga mao, ang pulong sa Diyos.”—EFE. 6:17.

1, 2. Unsay angay natong sanong sa panginahanglan alang sa dugang magmamantala sa Gingharian?

 SA PAGKAKITA ni Jesus sa espirituwal nga panginahanglan sa mga tawo, siya miingon sa iyang mga tinun-an: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” Si Jesus mihimog labaw pa kay sa pagsulti lamang niana. “Gipatawag niya ang iyang napulog-duha ka tinun-an” ug gipadala sila aron sa pagsangyaw, o “pagpangani.” (Mat. 9:35-38; 10:1, 5) Sa ulahi, si Jesus ‘nagtudlo ug kapitoan pa ug nagpadala kanila nga tinagurha’ sa paghimo sa mao gihapong buluhaton.—Luc. 10:1, 2.

² Karong adlawa, dako usab ang panginahanglan alang sa dugang magmamantala sa Gingharian. Ang mitambong sa Memoryal sa tibuok kalibotan sa 2009 nga tuig sa pag-alagad miabot ug 18,168,323. Labaw kini ug kapin sa napulo ka milyon sa gidaghanon sa mga Saksi ni Jehova. Hinog na gayod ang anihon. (Juan 4:34, 35) Busa, angay kitang mangamuyo alang sa dugang pang mamumuo. Apan sa unsang paagi kita molihok uyon sa maong pangamuyo? Mahimo nato kana pinaagi sa pagkahimong mas epektibong mga ministro samtang kita masibotong nakigbahin sa pagsangyaw sa Gingharian ug paghimog mga tinun-an.—Mat. 28:19, 20; Mar. 13:10.

3. Sa unsang paagi ang espiritu sa Diyos makatabang kanato sa pagkahimong mas epektibong mga ministro?

³ Ang nag-unang artikulo naghisgot kon sa unsang paagi ang pagkahimong giniyahan sa espiritu sa Diyos makatabang kanato sa ‘pagsulti sa pulong sa Diyos uban ang kaisog.’ (Buh. 4:31) Kana nga espiritu makatabang usab kanato nga mahimong hanas nga mga ministro. Ang usa ka paagi nga mahimo kitang mas epektibo diha sa ministeryo mao ang hanas nga paggamit sa labing maayong himan nga gitagana ni Jehova nga Diyos—ang iyang sinulat nga Pulong, ang Bibliya. Gisulat kini sa tabang sa balaang espiritu. (2 Tim. 3:16) Ang mensahe niini inspirado sa Diyos. Busa, ang hanas nga pagpatin-aw sa kamatuoran sa Kasulatan diha sa atong ministeryo nagpaila nga kita giniyahan sa balaang espiritu. Sa dili pa nato hisgotan kon sa unsang paagi nato mahimo kana, atong tagdon kon unsa ka gamhanan ang Pulong sa Diyos.

‘Ang Pulong sa Diyos Gamhanan’

4. Unsang kausaban ang ipahinabo sa mensahe sa Diyos nganha sa usa ka tawo?

⁴ Pagkagamhanan gayod sa pulong, o mensahe, sa Diyos! (Heb. 4:12) Sa mahulagwayong diwa, ang mensahe gikan sa Bibliya mas hait pa kay sa literal nga espada, kay kini modulot hangtod sa mga lutahan ug sa uyok niini. Ang kamatuoran sa Kasulatan makatandog sa kahiladman sa tawo ug makatugkad sa iyang hunahuna ug emosyon, nga magpaila sa iyang tinuod nga pagkatawo. Ang maong kamatuoran adunay gahom ug makapahinabog dakong kausaban diha sa usa ka tawo. (Basaha ang Colosas 3:10.) Oo, ang Pulong sa Diyos makapabag-o gayod sa kinabuhi!

5. Sa unsang mga paagi ang Bibliya makagiya kanato, ug unsay resulta niana?

⁵ Dugang pa, ang Bibliya naundag dili-hitupngang kaalam. Kini adunay mapuslanong impormasyon nga makatabang sa mga tawo sa pagkinabuhi niining gubot ug malisod nga panahon. Ang Pulong sa Diyos maglamdag dili lamang sa atong mga lakang kondili sa atong alagianan usab. (Sal. 119:105) Kini dako kaayog ikatabang sa dihang kita magsagubang ug mga suliran o magpilig mga higala, kalingawan, trabaho, sinina, ug uban pa. (Sal. 37:25; Prov. 13:20; Juan 15:14; 1 Tim. 2:9) Kon atong ipadapat ang mga prinsipyo nga makaplagan sa Pulong sa Diyos, kita makabatog maayong relasyon sa uban. (Mat. 7:12; Filip. 2:3, 4) Kay nalamdagan pag-ayo ang atong alagianan, atong makita kon sa unsang  paagi ang atong mga desisyon mag-apektar kanato sa umaabot. (1 Tim. 6:9) Ang Kasulatan nagtagna usab bahin sa katuyoan sa Diyos alang sa umaabot, nga nagtabang kanato sa pagkinabuhi uyon sa maong katuyoan. (Mat. 6:33; 1 Juan 2:17, 18) Makahuloganon gayod ang kinabuhi sa usa ka tawo kon magpagiya siya sa mga prinsipyo sa Diyos!

6. Unsa ka gamhanan nga hinagiban ang Bibliya diha sa atong espirituwal nga pagpakiggubat?

⁶ Hunahunaa usab kon unsa ka gamhanang hinagiban ang Bibliya diha sa atong espirituwal nga pagpakiggubat. Si Pablo nagtawag sa pulong sa Diyos nga “espada sa espiritu.” (Basaha ang Efeso 6:12, 17.) Kon ipresentar sa epektibong paagi, ang mensahe sa Bibliya makapahigawas sa mga tawo gikan sa espirituwal nga pagkaulipon kang Satanas. Usa kana ka espada nga magaluwas ug kinabuhi inay nga magalaglag niana. Dili ba nga angay kitang maningkamot sa paggamit niana sa hanas nga paagi?

Gamita Kana sa Hustong Paagi

7. Nganong hinungdanon nga mahimo kitang hanas sa paggamit sa “espada sa espiritu”?

⁷ Epektibo lamang nga magamit sa usa ka sundalo ang iyang mga hinagiban sa pagpakiggubat kon siya nagbansay ug nahimong hanas sa paggamit niana. Mao man usab ang paggamit sa “espada sa espiritu” diha sa atong espirituwal nga pagpakiggubat. “Buhata ang kutob sa imong maarangan nga itanyag ang imong kaugalingon sa Diyos ingong inuyonan,” misulat si Pablo, “usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”—2 Tim. 2:15.

8, 9. Unsay motabang kanato sa pagsabot sa giingon sa Bibliya? Paghatag ug pananglitan.

⁸ Unsay motabang kanato sa ‘paggamit sa pulong sa kamatuoran sa hustong paagi’ diha sa atong ministeryo? Sa dili pa nato tin-awng ikapaambit sa uban ang giingon sa Bibliya, kinahanglan nga ato unang masabtan ang kahulogan niana. Nagpasabot kana nga atong hatagag pagtagad ang konteksto sa usa ka bersikulo. Sumala sa usa ka diksiyonaryo, “ang konteksto sa usa ka pulong, tudling-pulong, o bersikulo mao ang mga pulong, mga tudling-pulong, o mga bersikulo nga gisundan ug nagsunod niana ug motabang sa pagpatin-aw sa kahulogan niana.”

⁹ Aron husto ang atong pagsabot sa usa ka teksto, kinahanglan nga atong tagdon ang konteksto. Ang gipamulong ni Pablo sa Galacia 5:13 nag-ilustrar niana. Siya misulat: “Kamo, dayag, gitawag alang sa kagawasan, mga igsoon; lamang ayaw gamita kini nga kagawasan ingon nga panghaylo alang sa unod, apan pinaagi sa gugma magpaulipon sa usag usa.” Unsa nga kagawasan ang gihisgotan ni Pablo dinhi? Nagtumong ba siya sa kagawasan gikan sa sala ug kamatayon, pagkaulipon sa bakak nga mga pagtulon-an, o sa lain pa? Ang konteksto nagpakita nga si Pablo naghisgot bahin sa kagawasan nga miresulta sa ‘pagkagawas gikan sa tunglo sa Balaod.’ (Gal. 3:13, 19-24; 4:1-5) Siya nagtumong sa Kristohanong kagawasan. Kadtong nagpabili sa maong kagawasan nagpaulipon sa usag usa tungod sa gugma. Kadtong wala magpakitag gugma, nagdinaotay ug nag-awayay.—Gal. 5:15.

10. Aron hustong masabtan ang kahulogan sa usa ka teksto, unsang matanga sa impormasyon ang angay natong tagdon, ug sa unsang paagi nato kana mabatonan?

¹⁰ Aduna pay laing kahulogan ang pulong  “konteksto.” Lakip sa kahulogan niini mao ang “nalangkit nga impormasyon, kahimtang, . . . situwasyon.” Aron hustong masabtan ang kahulogan sa usa ka teksto, angay natong tagdon ang nalangkit nga mga impormasyon, sama sa kon kinsay nagsulat sa basahon sa Bibliya ug kanus-a ug ilalom sa unsang mga kahimtang kini gisulat. Makatabang usab kon mahibaloan ang katuyoan sa pagsulat sa basahon ug, kon mahimo, ang mga tradisyon, panggawi ug mga prinsipyo, ug relihiyon sa mga tawo niadtong adlawa. a

11. Unsay angay natong ampingan sa dihang magpatin-aw ug mga teksto?

¹¹ Ang ‘paggamit sa pulong sa kamatuoran sa hustong paagi’ naglangkit ug labaw pa kay sa pagpatin-aw sa kamatuoran sa tukmang paagi. Angay kitang mag-amping nga dili gamiton ang Bibliya sa pagpanghadlok sa mga tawo. Bisan tuod magamit nato ang Kasulatan sa pagdepensa sa kamatuoran, sama sa gihimo ni Jesus sa dihang gitental siya sa Yawa, dili nato gamiton ang Bibliya aron pakaulawan ang uban o pugson sila sa pagdawat sa mensahe. (Deut. 6:16; 8:3; 10:20; Mat. 4:4, 7, 10) Kinahanglan natong patalinghogan ang tambag ni apostol Pedro: “Balaana si Kristo ingong Ginoo diha sa inyong mga kasingkasing, nga andam kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.”—1 Ped. 3:15.

12, 13. Unsang “lig-ong pagkatarok nga mga butang” ang mapukan sa Pulong sa Diyos? Paghatag ug pananglitan.

¹² Kon gamiton sa hustong paagi, unsay mahimo sa kamatuoran sa Pulong sa Diyos? (Basaha ang 2 Corinto 10:4, 5.) Ang kamatuoran sa Bibliya makapukan sa “lig-ong pagkatarok nga mga butang,” sa ato pa, magyagyag sa bakak nga mga doktrina, makadaot nga binuhatan, ug mga pilosopiya nga nagpakita sa dili-hingpit nga kaalam sa tawo. Atong magamit ang Bibliya sa pagwagtang sa bisan unsang mga ideya nga “gibangon batok sa kahibalo sa Diyos.” Ang pagtulon-an sa Bibliya magamit sa pagtabang sa uban nga mapahiuyon ang ilang hunahuna sa kamatuoran.

¹³ Tagda pananglitan ang kasinatian sa usa ka 93-anyos nga babaye sa India. Sukad pa sa pagkabata, siya natudloan sa pagtulon-an sa reinkarnasyon. Sa dihang ang iyang anak nga lalaki nga nagpuyo sa laing nasod nagdumalag pagtuon sa Bibliya kaniya pinaagig sulat, siya midawat dayon sa iyang nakat-onan bahin kang Jehova ug sa iyang mga saad. Apan, ang pagtulon-an sa reinkarnasyon natisok na pag-ayo sa iyang hunahuna nga siya misupak sa gisulat sa iyang anak bahin sa kahimtang sa mga patay. Siya miingon: “Nalisdan ko sa pagsabot sa kamatuoran sa inyong Kasulatan. Ang tanang relihiyon nagtudlo nga adunay usa ka butang sa sulod nato nga dili mamatay. Sukad pa kaniadto, ako nang gituohan nga ang lawas mamatay ug dunay dili-makita nga bahin niini nga magbalhinbalhin sa lainlaing lawas sa mga 8,400,000 ka beses. Nganong dili man ni tinuod? Sayop ba diay ang halos tanang relihiyon?” Mapukan ba sa “espada sa espiritu” kanang lig-ong pagkatarok nga pagtulon-an?  Human sa dugang mga pamatuod gikan sa Kasulatan, siya misulat pipila ka semana sa ulahi: “Sa kataposan ako nang nasabtan ang tinuod nga kamatuoran bahin sa kamatayon. Naghatag nakog dakong kalipay ang pagkahibalo nga sa dihang mahitabo na ang pagkabanhaw, makita nato pag-usab ang atong namatay nang mga minahal. Maayo untag moabot na ang Gingharian sa Diyos.”

Gamita Kana sa Makapakombinsir nga Paagi

14. Unsay gipasabot sa pagkombinsir sa atong gisangyawan?

¹⁴ Ang epektibong paggamit sa Bibliya diha sa ministeryo wala lamang magpasabot ug pagkutlog mga teksto. Si Pablo misulti sa ‘makapakombinsir’ nga paagi, ug mao sab kanay angay natong buhaton. (Basaha ang Buhat 19:8, 9; 28:23.) Ang “pagkombinsir” nagpasabot ug “pagdani.” Ang usa nga nadani “nakombinsir pag-ayo sa usa ka butang mao nga [siya] misalig niana.” Sa dihang atong kombinsihon ang usa ka tawo sa pagdawat sa usa ka pagtulon-an sa Bibliya, ato siyang gidani nga mosalig niana. Aron mahimo kini, kinahanglang kombinsihon nato siya nga tinuod ang atong gisulti. Mahimo nato kini sa mosunod nga mga paagi.

15. Unsaon nimo pagpunting ang pagtagad sa tagbalay ngadto sa Bibliya sa paagi nga mapalihok siya sa pagtahod niana?

¹⁵ Ipunting ang pagtagad sa Pulong sa Diyos sa paagi nga mapalihok ang tagbalay sa pagtahod niana. Sa dili pa mobasag teksto, hatagig pagtagad ang pagkahinungdanon sa pagkahibalo sa hunahuna sa Diyos bahin sa ulohan nga gihisgotan. Human magpatunghag pangutana ug mahibaloan ang tubag sa tagbalay, mahimong mosulti kag sama niini, ‘Atong tan-awon kon unsay hunahuna sa Diyos niining butanga.’ O ikaw tingali mangutana, ‘Unsa kahay ikasulti sa Diyos bahin niini?’ Ang paghimo niini sa dili pa basahon ang teksto magpasiugda nga ang Bibliya gikan sa Diyos ug magpalihok sa tagbalay sa pagtahod niana. Ilabinang hinungdanon kini kon ang atong gisangyawan nagtuo sa Diyos apan wala mahibalo kon unsay gitudlo sa Bibliya.—Sal. 19:7-10.

16. Unsay motabang kanimo sa pagpatin-aw sa teksto sa hustong paagi?

¹⁶ Dili lang kay basahon ang mga teksto; ipatin-aw kana. Naandan na ni Pablo ang ‘pagpatin-aw ug pagpamatuod pinaagig mga pangutlo’ sa mga butang nga iyang gitudlo. (Buh. 17:3) Ang usa ka teksto sagad adunay kapin pa sa usa ka punto, ug kinahanglan tingali nimong ipasiugda ang espesipikong mga pulong nga mapadapat sa inyong gihisgotan. Mahimo nimo kana pinaagi sa pagsubli sa pangunang mga punto o sa pagpatunghag mga pangutana nga motabang sa tagbalay sa pag-ila niana. Dayon, ipatin-aw ang kahulogan nianang bahina sa teksto. Human niana, tabangi siya nga masabtan kon sa unsang paagi ang teksto mapadapat sa iyang kaugalingon.

17. Unsaon nimo pagpangatarongan pinasukad sa Kasulatan sa makapakombinsir nga paagi?

¹⁷ Mangatarongan pinasukad sa Kasulatan sa makapakombinsir nga paagi. Gamit ang kinasingkasing nga pag-awhag ug maayong lohika, si Pablo ‘nangatarongan sa uban pinasukad sa Kasulatan’ sa makapakombinsir nga paagi. (Buh. 17:2, 4) Sama kaniya, paningkamoti nga maabot ang kasingkasing sa tagbalay. ‘Timbaa,’ ingnon ta, kon unsay anaa sa iyang kasingkasing pinaagi sa paggamit ug mga pangutana nga magpakitag tim-os nga interes sa maong indibiduwal. (Prov. 20:5) Likayi ang sobrang pagkaprangka. Ihatag ang mga rason sa tin-aw ug lohikal nga paagi. Angay kanang paluyohan ug makapakombinsir nga pamatuod. Ang imong isulti kinahanglang lig-ong gipasukad sa Pulong sa Diyos. Mas maayo ang paggamit ug usa ka teksto nga gipatin-aw pag-ayo ug gipadapat ang punto kay sa pagbasag sunodsunod nga mga teksto. Ang paghatag ug laing pamatuod ‘makadugang usab sa pagkamadanihon sa imong mga ngabil, o sa imong isulti.’ (Prov. 16:23) Usahay,  gikinahanglan tingali ang pagdukiduki ug paghatag ug dugang impormasyon. Ang 93-anyos nga babaye nga gihisgotan ganina kinahanglang mahibalo kon nganong kaylap kaayo ang pagtulon-an bahin sa dili-mamatay nga kalag (o espiritu). Aron makombinsir siya sa gitudlo sa Bibliya, kinahanglang masayran niya kon diin gikan ang maong doktrina ug kon sa unsang paagi nakayuhot kana sa kadaghanang relihiyon sa kalibotan. b

Padayong Gamita Kana sa Hanas nga Paagi

18, 19. Nganong angay kitang magpadayon sa paggamit sa “espada sa espiritu” sa hanas nga paagi?

¹⁸ “Ang talan-awon niining kalibotana nagakausab,” nag-ingon ang Bibliya. Ang mga tawong daotan misamot pa kangil-ad. (1 Cor. 7:31; 2 Tim. 3:13) Busa hinungdanon nga magpadayon kita sa pagpukan sa “lig-ong pagkatarok nga mga butang” pinaagi sa paggamit sa “espada sa espiritu, nga mao, ang pulong sa Diyos.”

¹⁹ Dako gayod ang atong kalipay nga atong nabatonan ang Pulong sa Diyos, ang Bibliya, ug magamit ang gamhanang mensahe niana sa pagluka sa bakak nga pagtulon-an ug sa pagtabang sa mga matinud-anog kasingkasing. Walay lig-ong pagkatarok nga mga butang nga dili mapukan sa maong mensahe. Busa, maningkamot kita pag-ayo sa paggamit sa “espada sa espiritu” sa hanas nga paagi diha sa atong hinatag-sa-Diyos nga buluhatong pagmantala sa Gingharian.

[Mga footnote]

Unsay Imong Nakat-onan?

• Unsa ka gamhanan ang Pulong sa Diyos?

• Sa unsang paagi atong ‘magamit ang pulong sa kamatuoran sa hustong paagi’?

• Unsay mahimo sa mensahe sa Bibliya batok sa “lig-ong pagkatarok nga mga butang”?

• Sa unsang paagi mahimong mas makapadani ang imong pagsangyaw?

[Mga Pangutana sa Pagtuon]

[Kahon/Hulagway sa panid 12]

Kon Unsaon Paggamit ang Pulong sa Diyos sa Makapakombinsir nga Paagi

▪ Paningkamoti nga mapalihok ang tagbalay sa pagtahod sa Bibliya

▪ Ipatin-aw ang Kasulatan

▪ Mangatarongan sa makapakombinsir nga paagi aron maabot ang kasingkasing

[Hulagway sa panid 11]

Kinahanglang makakat-on ka sa paggamit sa “espada sa espiritu” sa epektibong paagi