Giisip ba Nimo si Jehova nga Imong Amahan?

“GINOO, tudloi kami kon unsaon sa pag-ampo.” Sa dihang ang usa sa iyang mga tinun-an mihangyo niana, si Jesus miingon: “Sa dihang mag-ampo kamo, ingnon ninyo, ‘Amahan, balaana ang imong ngalan.’” (Luc. 11:1, 2) Mahimong tawgon ni Jesus si Jehova gamit ang halangdong mga titulo sama sa “Labing Gamhanan,” “Dakong Instruktor,” “Maglalalang,” “Karaan sa mga Adlaw,” ug “Hari nga walay kataposan.” (Gen. 49:25; Isa. 30:20; 40:28; Dan. 7:9; 1 Tim. 1:17) Hinunoa, gipili ni Jesus ang terminong “Amahan.” Ngano man? Tingali tungod kay buot niya nga moduol kita sa kinatas-ang Persona sa uniberso sama sa pagduol sa usa ka gamayng bata sa iyang mahigugmaong amahan.

Apan, ang pipila malisdan sa pag-isip sa Diyos nga ilang Amahan. Usa ka Kristohanon nga ginganlag Atsuko a miadmitir, “Sulod sa daghang katuigan human sa akong bawtismo, nalisdan ko sa pagpakigsuod kang Jehova ug sa pag-ampo kaniya ingong Amahan.” Iyang gisulti ang usa ka rason kon nganong nalisdan siya, “Wala ko mahinumdom nga ang akong amahan nagpakitag pagmahal kanako.”

Niining makuyaw nga kataposang mga adlaw, kulang kaayo ang “kinaiyanhong pagbati” nga angay untang ipakita sa usa ka amahan. (2 Tim. 3:1, 3) Busa dili ikatingala nga daghan ang mibatig sama nianang kang Atsuko. Apan makapadasig ang pagkahibalo nga aduna kitay maayong mga rason nga isipon si Jehova ingong atong mahigugmaong Amahan.

Si Jehova—Usa ka Mahigugmaong Magtatagana

Aron atong maisip si Jehova nga atong Amahan, kinahanglang makaila kita pag-ayo kaniya. “Walay usa nga bug-os nakaila sa Anak gawas sa Amahan,” miingon si Jesus, “ni may usa nga bug-os nakaila sa Amahan gawas sa Anak ug kaniya nga buot sa Anak nga ipadayag siya.” (Mat. 11:27) Ang labing maayong paagi sa pagkahibalo kon unsang matanga sa Amahan si Jehova mao ang pagpamalandong sa gipadayag ni Jesus bahin sa matuod nga Diyos. Busa, unsa may gisulti ni Jesus bahin sa Amahan?

Nag-ila kang Jehova ingong Tuboran sa iyang kinabuhi, si Jesus miingon: “Ako nabuhi tungod sa Amahan.” (Juan 6:57) Utang sab nato kang Jehova ang atong kinabuhi. (Sal. 36:9; Buh. 17:28) Unsa may nagtukmod kang Jehova sa paghatag ug kinabuhi sa uban? Dili ba ang gugma man? Tungod niana nga gasa, angay gayod nga higugmaon usab nato ang atong langitnong Amahan.

Ang kinadak-ang pasundayag sa gugma sa Diyos alang sa katawhan mao ang pagtagana niya sa halad lukat ni Jesus. Tungod niana, ang makasasalang katawhan mahimo nang makabaton ug suod nga relasyon kang Jehova pinaagi sa iyang hinigugmang Anak. (Roma 5:12; 1 Juan 4:9, 10) Ug sanglit ang atong langitnong Amahan mao ang Magtutuman sa iyang mga saad, makaseguro kita nga ang tanang nahigugma ug nagmasinugtanon kaniya sa ngadtongadto makatagamtam “sa mahimayaong kagawasan sa mga anak sa Diyos.”—Roma 8:21.

Ang atong langitnong Amahan kanunay usab nga ‘nagapasubang sa iyang adlaw.’ (Mat. 5:45) Tingali wala kita maghunahuna nga kinahanglan natong iampo ang pagsubang sa adlaw. Apan, gikinahanglan gayod nato ang adlaw ug ang kainit niana! Dugang pa, ang atong Amahan mao ang dili-hitupngang Magtatagana, kinsa nahibalo sa atong materyal nga panginahanglan bisan sa wala pa kita mangayo niana. Busa, dili ba nga angay kitang maggahin ug panahon sa pagsud-ong sa kalalangan sa Diyos ug sa pagpamalandong kon sa unsang paagi ang atong langitnong Amahan nag-atiman sa iyang mga linalang?—Mat. 6:8, 26.

 Si Jehova—Ang “Malumong Tigpanalipod”

Ang tagna ni Isaias nagpasalig sa karaang katawhan sa Diyos: “Ang kabukiran mangatumpag ug ang kabungtoran mangatay-og, apan ang akong pakighigala kanimo dili gayod mausab ni mabungkag ang akong pakigsaad sa pakigdait, nagaingon ang imong malumong tigpanalipod, si Jehova.” (Isa. 54:10, The Bible in Living English) Sa pagpasiugda niining puntoha, ang pag-ampo ni Jesus sa iyang kataposang gabii dinhi sa yuta nagpakita nga si Jehova usa gayod ka “malumong tigpanalipod.” Mahitungod sa iyang mga tinun-an, si Jesus miampo: “Sila ania sa kalibotan ug ako moanha kanimo. Amahan nga Balaan, bantayi sila tungod sa imong ngalan.” (Juan 17:11, 14) Gibantayan ug gipanalipdan gayod ni Jehova ang mga sumusunod ni Jesus.

Ang usa ka paagi nga gigamit sa Diyos sa pagpanalipod kanato batok sa mga taktika ni Satanas mao ang pagtaganag nunot-sa-panahon nga espirituwal nga pagkaon pinaagi sa “matinumanon ug maalamong ulipon.” (Mat. 24:45) Kinahanglan kitang mokaon nianang makapabaskog nga espirituwal nga pagkaon aron atong ‘masul-ob ang kompletong armadura gikan sa Diyos.’ Tagda pananglitan “ang dakong taming sa pagtuo,” nga pinaagi niini kita “makapalong sa tanang nagdilaab nga mga udyong sa daotan.” (Efe. 6:11, 16) Ang atong pagtuo manalipod kanato batok sa espirituwal nga kadaot ug nagpakita nga kita nagasalig sa katakos sa atong Amahan sa pagpanalipod kanato.

Daghan pa kitag makat-onan bahin sa kalumo sa atong langitnong Amahan pinaagi sa pagsusi pag-ayo sa panggawi sa Anak sa Diyos sa dinhi pa siya sa yuta. Matikdi ang asoy sa Marcos 10:13-16. Diha niana si Jesus miingon sa iyang mga tinun-an: “Pasagdi ang mga bata nga moduol kanako.” Samtang nag-alirong kaniya ang mga bata, si Jesus mahigugmaong mihalog ug nagpanalangin kanila. Segurado gayong nalipay sila pag-ayo! Ug kay miingon man si Jesus: “Siya nga nakakita kanako nakakita usab sa Amahan,” kita nahibalo nga buot sa matuod nga Diyos nga moduol kita kaniya.—Juan 14:9.

Si Jehova mao ang way-kinutobang Tuboran sa gugma. Siya mao ang di-hitupngang Magtatagana ug way-ikatanding Tigpanalipod, kinsa nagtinguha nga kita makigsuod kaniya. (Sant. 4:8) Busa si Jehova gayod ang labing maayong Amahan!

Makabenepisyo Gayod Kita!

Makabenepisyo gayod kita kon mosalig kita kang Jehova ingong atong mahigugmaon ug malumo nga langitnong Amahan. (Prov. 3:5, 6) Si Jesus nakabenepisyo tungod sa iyang bug-os nga pagsalig sa iyang Amahan. “Wala ako mag-inusara,” siya miingon sa iyang mga tinun-an, “apan ang Amahan nga nagpadala kanako nagauban kanako.” (Juan 8:16) Segurado gayod si Jesus nga tabangan siya sa iyang Amahan. Pananglitan, sa iyang bawtismo, siya mahigugmaong gipasaligan sa iyang Amahan: “Kini mao ang akong Anak, ang hinigugma, nga akong giuyonan.” (Mat. 3:15-17) Ug pipila ka gutlo una siya mamatay, si Jesus mituaw: “Amahan, sa imong mga kamot itugyan ko ang akong espiritu.” (Luc. 23:46) Lig-on gihapon ang pagsalig ni Jesus sa iyang Amahan.

Mahimo usab nato kana. Kon si Jehova dapig kanato, unsa may angay natong kahadlokan? (Sal. 118:6) Si Atsuko, nga gihisgotan sa sinugdan, naanad na sa pagsalig sa iyang kaugalingon sa dihang nag-atubang ug mga problema. Apan iyang gitun-an ang kinabuhi ug ministeryo ni Jesus, ilabina ang suod nga relasyon ni Jesus sa iyang langitnong Amahan. Unsay resulta? “Akong nasayran kon sama sa unsa ang pagbatog usa ka Amahan ug pagsalig kaniya,” miingon si Atsuko. Siya midugang: “Akong nasinati ang tinuod nga kalinaw ug kalipay. Sa tinuoray lang, wala gyod kitay angayng kabalak-an.”

Unsa pay laing benepisyo sa pag-isip kang Jehova nga atong Amahan? Ang mga anak sagad nahigugma sa ilang ginikanan ug nagtinguha sa pagpahimuot kanila. Tungod sa gugma, ang Anak sa Diyos ‘kanunayng nagbuhat sa mga butang nga makapahimuot sa iyang Amahan.’ (Juan 8:29) Sa susama, ang atong gugma sa atong langitnong Amahan magtukmod kanato sa paglihok nga maalamon ug sa ‘pagdayeg [kaniya] sa dayag.’—Mat. 11:25; Juan 5:19.

 Ang Atong Amahan ‘Nagahawid sa Atong Tuong Kamot’

Ang atong langitnong Amahan nagtagana usab ug “magtatabang”—ang iyang balaang espiritu. Kini “magatultol kaninyo ngadto sa tibuok nga kamatuoran,” matod ni Jesus. (Juan 14:15-17; 16:12, 13) Ang balaang espiritu sa Diyos makatabang kanato nga mas makaila pa sa atong Amahan. Makatabang usab kini kanato sa pagpukan sa “lig-ong pagkatarok nga mga butang,” sa ato pa, sa mapihigong panghunahuna, sayop nga ideya, o hiwi nga panglantaw, sa ingon ‘nagbihag sa tanang hunahuna aron himoon kining masinugtanon kang Kristo.’ (2 Cor. 10:4, 5) Busa, atong iampo kang Jehova ang gisaad nga “magtatabang,” nga masaligon nga ang “Amahan sa langit mohatag ug balaang espiritu niadtong nagapangayo kaniya.” (Luc. 11:13) Haom usab natong iampo nga tabangan kita sa balaang espiritu nga mas masuod kang Jehova.

Ang usa ka bata mobating luwas ug dili mahadlok samtang nagalakaw nga naghawid sa kamot sa iyang amahan. Kon giisip gayod nimo si Jehova nga imong Amahan, makasalig ka niining makapahupayng mga pulong: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’” (Isa. 41:13) Mahimo nimong mabatonan ang talagsaong pribilehiyo sa “paglakaw” uban sa Diyos sa walay kataposan. (Miq. 6:8) Padayon sa pagbuhat sa iyang kabubut-on, ug imong masinati ang gugma, kalipay, ug kasegurohan nga nagsumikad sa pag-isip kang Jehova nga imong Amahan.

[Footnote]