‘Isulti ang Pulong sa Diyos Uban ang Kaisog’
‘Isulti ang Pulong sa Diyos Uban ang Kaisog’
‘Sila napuno sa balaang espiritu ug nanagsulti sa pulong sa Diyos uban ang kaisog.’—BUH. 4:31.
1, 2. Nganong angay kitang maningkamot nga mahimong epektibo diha sa atong ministeryo?
TULO ka adlaw una sa iyang kamatayon, si Jesus miingon sa iyang mga tinun-an: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” Sa wala pa siya mokayab sa langit, ang nabanhawng si Jesus nagsugo sa iyang mga sumusunod sa ‘paghimog mga tinun-an sa katawhan sa tanang kanasoran, nga magatudlo kanila sa pagtuman sa tanang butang nga iyang gisugo kanila.’ Siya misaad nga siya magauban kanila “sa tanang adlaw hangtod sa kataposan sa sistema sa mga butang.”—Mat. 24:14; 26:1, 2; 28:19, 20.
2 Ingong mga Saksi ni Jehova, kita aktibong nakigbahin sa usa ka buluhaton nga gisugdan niadtong unang siglo. Wala nay laing buluhaton nga sama ka hinungdanon sa nagaluwas-ug-kinabuhing buluhaton nga pagsangyaw sa Gingharian ug paghimog mga tinun-an. Busa, hinungdanon gayod nga kita mahimong epektibo diha sa atong ministeryo! Niining artikuloha, atong susihon kon sa unsang paagi ang pagka-giniyahan sa balaang espiritu motabang kanato sa pagsulti nga maisogon diha sa kanataran. Ang mosunod nga duha ka artikulo maghisgot kon sa unsang paagi ang espiritu ni Jehova makagiya kanato sa pagtudlo nga may kahanas ug sa pagsangyaw nga makanunayon.
Nagkinahanglan Kitag Kaisog
3. Nganong nagkinahanglag kaisog ang pagsangyaw sa Gingharian?
3 Ang atong hinatag-sa-Diyos nga buluhatong pagmantala sa Gingharian maoy usa ka dakong pribilehiyo. Hinunoa, aduna kini mga hagit. Bisan tuod ang pipila modawat dayon sa maayong balita sa Gingharian sa Diyos, daghan ang sama niadtong nagkinabuhi sa mga adlaw ni Noe. “Wala sila magtagad hangtod nga miabot ang baha ug gibanlas silang tanan,” matod ni Jesus. (Mat. 24:38, 39) Unya anaa usay mga tawo nga magbiaybiay o mosupak kanato. (2 Ped. 3:3) Ang pagsupak mahimong maggikan niadtong anaa sa awtoridad, sa mga kauban sa eskuylahan o trabaho, o bisan sa atong pamilya. Gawas pa niana, kita usab makigbisog sa atong mga kahuyangan, sama sa pagkamaulawon ug sa kahadlok nga isalikway. Adunay daghang hinungdan kon nganong malisdan kita sa pagbatog “kagawasan sa pagsulti” ug sa pagsangyaw sa pulong sa Diyos uban ang “kaisog.” (Efe. 6:19, 20) Apan aron makalahutay sa pagsulti sa pulong sa Diyos, gikinahanglan ang kaisog. Unsay makatabang kanato sa pagbaton niana?
4. (a) Unsa ang kaisog? (b) Sa unsang paagi si apostol Pablo nakabaton ug kaisog sa pagsangyaw ngadto sa mga taga-Tesalonica?
4 Ang Gregong pulong nga gihubad ug “kaisog” nagkahulogag “walay-paglipodlipod, pagkaprangka, pagkamadayganon.” Kining pulonga nagpasabot usab ug “pagkamasaligon, . . . pagkawalay-kahadlok.” Ang kaisog wala magpasabot nga ang usa hait manulti o bastos. (Col. 4:6) Bisan tuod maisogon, kita usab maningkamot nga magmakigdaiton sa tanang tawo. (Roma 12:18) Dugang pa, sa dihang magsangyaw sa maayong balita sa Gingharian sa Diyos, dili lang kita magmaisogon kondili magmataktikanhon usab aron dili masuko ang atong gisangyawan. Sa pagkatinuod, aron maugmad ang hustong matang sa kaisog, kinahanglang maningkamot kita sa pag-ugmad sa uban pang mga hiyas. Apan aron maugmad kining matanga sa kaisog, dili kita mosalig sa atong kaugalingong katakos o kusog. Human nga si apostol Pablo ug ang iyang mga kauban ‘gipasipalahan sa Filipos,’ sa unsang paagi sila “nakabaton ug kaisog” sa pagsangyaw ngadto sa mga taga-Tesalonica? “Pinaagi sa atong Diyos,” misulat si Pablo. (Basaha ang 1 Tesalonica 2:2.) Si Jehova nga Diyos makawagtang sa atong kahadlok ug makahatag kanatog susamang kaisog.
5. Sa unsang paagi si Jehova naghatag ug kaisog kang Pedro, Juan, ug sa ubang mga tinun-an?
5 Sa dihang si apostol Pedro ug Juan gihagit sa “mga magmamando [sa katawhan] ug [sa] mga ansiyano ug mga eskriba,” sila miingon: “Kon matarong man sa panan-aw sa Diyos sa pagpamati kaninyo inay kay sa Diyos, kamo na ang mohukom. Apan alang kanamo, dili kami makahunong sa pagsulti sa mga butang nga among nakita ug nadungog.” Inay moampo sa Diyos nga pahunongon ang paglutos, sila ug ang ilang mga isigkamagtutuo nangamuyo, nga nag-ingon: “Jehova, hatagig pagtagad ang ilang mga hulga, ug itugot sa imong mga alagad ang pagpadayon pagsulti sa imong pulong uban ang bug-os nga kaisog.” (Buh. 4:5, 19, 20, 29) Unsay tubag ni Jehova sa ilang hangyo? (Basaha ang Buhat 4:31.) Gitabangan sila ni Jehova nga makabatog kaisog pinaagi sa iyang espiritu. Ang espiritu sa Diyos makahimo usab niana kanato. Nan, sa unsang paagi kita makadawat sa espiritu sa Diyos ug magiyahan niana diha sa atong ministeryo?
Kon sa Unsang Paagi Makabatog Kaisog
6, 7. Unsa ang labing dali nga paagi nga mabatonan ang balaang espiritu sa Diyos? Paghatag ug mga pananglitan.
6 Ang labing dali nga paagi nga mabatonan ang balaang espiritu sa Diyos mao ang pagpangayo niana. Giingnan ni Jesus ang iyang mamiminaw: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Luc. 11:13) Sa pagkatinuod, angay kitang mag-ampo kanunay nga hatagan kitag balaang espiritu. Kon kita magpanuko sa pagsangyaw diha sa kadalanan, sa dapit sa negosyo, o sa di-pormal nga paagi, kita makaampo kang Jehova alang sa iyang espiritu ug makapangayo kaniyag tabang aron makabatog kaisog.—1 Tes. 5:17.
7 Mao kanay gihimo sa usa ka Kristohanon nga ginganlag Rosa. a Usa ka adlaw niana, samtang didto si Rosa sa iyang trabahoan, nakita niya ang iyang kaubang maestra nga nagbasag report gikan sa laing eskuylahan bahin sa pagdagmal sa mga bata. Natugaw kaayo ang maestra sa iyang nabasa nga siya nakaingon, “Naunsa na man ning kalibotana?” Dili makaako si Rosa nga palabyon ang maong kahigayonan nga makasangyaw. Unsay iyang gihimo aron makabatog kaisog sa pagsulti? “Ako miampo kang Jehova ug nangayo sa iyang espiritu sa pagtabang kanako,” miingon si Rosa. Siya nakahatag ug maayong pamatuod ug misaad nga ipadayon ang ilang panaghisgot. Tagda usab ang kasinatian sa usa ka singko-anyos nga bata nga ginganlag Milane, kinsa nagpuyo sa New York City. Si Milane miingon: “Sa dili pa ko moadto sa eskuylahan, mag-ampo mi ni Mama kang Jehova.” Unsa may ilang iampo? Sila mag-ampo nga si Milane makabarog nga malig-on ug makabatog kaisog sa pagsulti bahin sa iyang Diyos! “Nakatabang kini kang Milane sa pagpatin-aw sa iyang baroganan bahin sa mga adlawng-natawhan ug pista opisyal ug sa dili pag-apil niini nga mga selebrasyon,” miingon ang iyang inahan. Dili ba nga gipakita niini nga mga kasinatian nga ang pag-ampo makatabang kanato sa pagbatog kaisog?
8. Unsay atong makat-onan kang Jeremias bahin sa pagbatog kaisog?
8 Palandonga usab kon unsay nakatabang kang Jeremias sa pagbatog kaisog. Sa dihang si Jehova nagtudlo kaniya ingong manalagna sa kanasoran, si Jeremias miingon: “Ania, ako gayod dili mahibalo nga mosulti, kay ako usa ka bata lamang.” (Jer. 1:4-6) Apan sa ngadtongadto, si Jeremias nahimong malahutayon ug madasigon kaayo sa iyang pagsangyaw nga tungod niana daghan ang nag-isip kaniya ingong tigmantala sa katalagman. (Jer. 38:4) Sa kapig 65 ka tuig, siya maisogong nagmantala sa mga paghukom ni Jehova. Ilado kaayo siya sa Israel sa iyang walay-kokahadlok ug maisogong pagsangyaw nga mga 600 ka tuig sa ulahi sa dihang si Jesus nagsulti nga maisogon, ang pipila nagtuo nga siya si Jeremias nga nabanhaw. (Mat. 16:13, 14) Sa unsang paagi nabuntog ni Jeremias ang iyang pagkamaulawon? Siya miingon: “Sa akong kasingkasing [ang pulong sa Diyos] nahisama sa nagdilaab nga kalayo nga natakpan sulod sa akong kabukogan; ug ako gikapoyan sa pagpinugong.” (Jer. 20:9) Oo, ang pulong ni Jehova nagpalig-on kang Jeremias ug nagpalihok kaniya sa pagsulti.
9. Nganong ang pulong sa Diyos makaapektar kanato sama sa nahitabo kang Jeremias?
9 Sa iyang sulat sa mga Hebreohanon, si apostol Pablo miingon: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Heb. 4:12) Ang mensahe, o pulong, sa Diyos makaapektar kanato sama sa nahitabo kang Jeremias. Hinumdomi nga bisan tuod mga tawo ang gigamit sa pagsulat sa Bibliya, kini dili basahon nga naundag tawhanong kaalam, kay kini giinspirar sa Diyos. Sa 2 Pedro 1:21, atong mabasa: “Walay panagna bisan kanus-a nga midangat pinaagi sa kabubut-on sa tawo, hinunoa ang mga tawo nagsulti gikan sa Diyos samtang sila giagak sa balaang espiritu.” Kon mogahin kitag panahon sa pagtuon pag-ayo sa Bibliya, ang atong hunahuna mapuno sa mensahe nga giinspirar sa balaang espiritu. (Basaha ang 1 Corinto 2:10.) Ang maong mensahe mahisamag “nagdilaab nga kalayo” sa sulod nato, mao nga dili nato kapugngan nga ipaambit kini sa uban.
10, 11. (a) Sa unsang paagi nato tun-an ang Bibliya kon gusto natong makabatog kaisog sa pagsulti? (b) Unsay imong planong himoon aron mouswag ang kalidad sa imong personal nga pagtuon?
10 Aron adunay dakong epekto kanato ang pagtuon sa Bibliya, kinahanglang himoon nato kini sa paagi nga ang mensahe modulot sa atong kasingkasing, nga mag-impluwensiya sa atong pagkatawo. Pananglitan, si manalagnang Ezequiel gihatagag panan-awon diin gisugo siya sa pagkaon sa linukot nga basahon nga naundan sa bug-at nga mensahe alang sa dili-madinawatong katawhan. Kinahanglang sabton pag-ayo ni Ezequiel ang mensahe ug tugotan kini nga mag-apektar sa iyang pagbati. Kon iya kanang buhaton, ang pagpahayag sa mensahe makahatag kaniyag kalipay sama sa pagkaon ug dugos.—Basaha ang Ezequiel 2:8–3:4, 7-9.
11 Ang atong kahimtang susama nianang kang Ezequiel. Karong adlawa, daghan ang dili gustong maminaw sa giingon sa Bibliya. Aron makalahutay kita sa pagsulti sa pulong sa Diyos, importante nga atong tun-an ang Kasulatan sa paagi nga atong masabtan pag-ayo ang mensahe niana. Ang atong pagtuon kinahanglang regular—dili tira-pasagad. Ang atong tinguha angayng mahisama nianang sa salmista nga miawit: “Hinaot nga ang mga pulong sa akong baba ug ang pagpamalandong sa akong kasingkasing mahimong kahimut-anan sa imong atubangan, Oh Jehova nga Bato ko ug Manunubos ko.” (Sal. 19:14) Hinungdanon gayod nga maggahin kitag panahon sa pagpamalandong sa atong gibasa, aron ang mga kamatuoran sa Bibliya modulot pag-ayo sa atong kasingkasing. Sa pagkatinuod, angay kitang maningkamot sa pagpauswag sa kalidad sa atong personal nga pagtuon. b
12. Nganong ang mga tigom makatabang kanato nga magiyahan sa balaang espiritu?
12 Ang laing paagi nga makakuhag kaayohan gikan sa balaang espiritu ni Jehova mao ang pagkahimong ‘mahunahunaon sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom.’ (Heb. 10:24, 25) Ang pagpaningkamot nga mahimong regular sa pagtambong sa mga tigom, pagpamati pag-ayo, ug pagpadapat sa atong nakat-onan maoy maayong mga paagi nga kita magiyahan sa espiritu. Kon buot hunahunaon, dili ba ang espiritu ni Jehova naghatag man ug giya pinaagi sa kongregasyon?—Basaha ang Pinadayag 3:6.
Mga Kaayohan sa Pagbatog Kaisog
13. Unsay atong makat-onan sa nalampos sa unang-siglong mga Kristohanon maylabot sa buluhatong pagsangyaw?
13 Ang balaang espiritu mao ang labing gamhanang puwersa sa uniberso, ug makapalihok kini sa mga tawo sa pagbuhat sa kabubut-on ni Jehova. Ilalom sa impluwensiya niini, milampos ang unang-siglong mga Kristohanon sa pagsangyaw sa maayong balita. Ila kanang nawali “sa tibuok kalalangan ilalom sa langit.” (Col. 1:23) Kadaghanan kanila “dili edukado ug ordinaryo,” busa dayag kaayo nga sila gipalihok sa usa ka gamhanang puwersa.—Buh. 4:13.
14. Unsay makatabang kanato aron “magmainiton sa espiritu”?
14 Kon kita magkinabuhi nga kaharmonya sa paggiya sa balaang espiritu, kita mapalihok sa pagsangyaw nga maisogon. Ang mga benepisyo sa kanunayng pag-ampo alang sa espiritu, makugihong personal nga pagtuon, mainampoong pagpamalandong sa atong nabasa, ug regular nga pagtambong sa mga tigom makatabang kanato nga “magmainiton sa espiritu.” (Roma 12:11) Mahitungod sa “usa ka Hudiyo nga ginganlag Apolos, usa ka lumad sa Alejandria, usa ka tawo nga larinong manulti, nga miabot sa Efeso,” ang Bibliya nag-ingon: “Sanglit siya mainiton sa espiritu, siya nagsulti ug nanudlo sa hustong paagi sa mga butang bahin kang Jesus.” (Buh. 18:24, 25) Kon kita “magmainiton sa espiritu,” kita mahimong mas maisogon sa pagsangyaw sa balaybalay ug sa di-pormal nga paagi.
15. Sa unsang paagi ang pagkahimong mas maisogon diha sa pagsangyaw makahatag kanatog kaayohan?
15 Ang pagkahimong mas maisogon diha sa pagsangyaw adunay positibong epekto kanato. Mahimong mas maayo ang atong tinamdan tungod kay mas tin-aw natong nasabtan ang kahinungdanon sa atong buluhaton ug ang mga kaayohan niana. Mosamot ang atong kadasig tungod kay kita mas malipayon man sa dihang kita epektibo diha sa ministeryo. Ug mosamot ang atong kasibot tungod kay mas nasabtan nato ang pagkadinalian sa buluhatong pagsangyaw.
16. Unsay atong buhaton kon dili na kaayo kita masiboton sa ministeryo?
16 Komosta kon nawala na ang atong kadasig sa ministeryo o dili na kaayo kita masiboton niana? Nan, kinahanglang matinud-anon natong susihon ang atong kaugalingon. Si Pablo misulat: “Padayong sulayi kon kamo anaa ba sa pagtuo, padayong pamatud-i kon unsa kamo sa inyong kaugalingon.” (2 Cor. 13:5) Pangutan-a ang imong kaugalingon: ‘Mainiton ba gihapon ako sa espiritu? Nag-ampo pa ba ako alang sa espiritu ni Jehova? Gipakita ba sa akong mga pag-ampo nga ako nagasalig kaniya sa pagbuhat sa iyang kabubut-on? Naundan ba kinig mga pulong sa pagpasalamat alang sa ministeryo nga gipiyal kanato? Komosta ang akong personal nga pagtuon? Regular ba akong naghimo niini? Unsa ka dako ang panahon nga akong gigahin sa pagpamalandong sa akong nabasa ug nadungog? Ako ba namati pag-ayo ug bug-os nga nakigbahin sa mga tigom?’ Ang pagpamalandong sa mga pangutana nga sama niini makatabang kanimo nga maila kon unsay angay nimong pauswagon.
Tugoti ang Espiritu sa Diyos nga Maghimo Kanimong Maisogon
17, 18. (a) Sa unsang gilapdon ginahimo karon ang buluhatong pagsangyaw? (b) Sa unsang paagi nato mapasundayag “ang labing dakong kagawasan sa pagsulti” diha sa pagmantala sa maayong balita sa Gingharian sa Diyos?
17 Ang nabanhawng si Jesus miingon sa iyang mga tinun-an: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buh. 1:8) Ang buluhaton nga gisugdan kaniadto ginahimo karon sa gilapdon nga wala pa sukad mahitabo. Kapin sa pito ka milyong Saksi ni Jehova ang nagamantala sa mensahe sa Gingharian diha sa kapig 230 ka kayutaan, nga naggugol ug halos 1.5 ka bilyong oras matag tuig sa ministeryo. Pagkamakalilipay nga makigbahin niining dili na gayod masubli nga buluhaton!
18 Sama sa unang siglo, ang tibuok-yuta nga buluhatong pagsangyaw karon ginahimo ubos sa paggiya sa espiritu sa Diyos. Kon atong sundon ang paggiya niana, mapasundayag nato “ang labing dakong kagawasan sa pagsulti” diha sa atong ministeryo. (Buh. 28:31) Nan, magpagiya kita sa espiritu samtang atong ginamantala ang maayong balita sa Gingharian sa Diyos.
[Mga footnote]
a Ang mga ngalan giusab.
b Aron makapahimulos ka pag-ayo sa imong pagbasa sa Bibliya ug personal nga pagtuon, tan-awa ang librong Pahimusli ang Edukasyon sa Teokratikanhong Tunghaan sa Ministeryo, sa mga kapitulo nga nag-ulohang “Magmakugihon sa Pagbasa” ug “Ang Pagtuon Adunay Balos,” sa panid 21-32.
Unsay Imong Nakat-onan?
• Nganong kinahanglan kitang magmaisogon sa pagsulti sa pulong sa Diyos?
• Unsay nakatabang sa unang mga tinun-an sa pagsulti nga maisogon?
• Sa unsang paagi kita makabatog kaisog?
• Sa unsang paagi ang pagbatog kaisog makahatag kanato ug kaayohan?
[Mga Pangutana sa Pagtuon]
[Hulagway sa panid 7]
Sa unsang paagi ang mga ginikanan makatabang sa ilang mga anak sa pagbatog kaisog?
[Mga hulagway sa panid 8]
Ang mubo nga pag-ampo makatabang kanimo sa pagbatog kaisog diha sa ministeryo