Mga Pangutana Gikan sa mga Magbabasa

Ubos sa unsang mga kahimtang nga mahimong hunahunaon sa usa ang pagpabawtismo pag-usab?

Ubos sa pipila ka kahimtang, ang usa ka bawtismadong indibiduwal magduhaduha tingali sa pagkabalido sa iyang bawtismo ug mahimong maghunahuna sa pagpabawtismo pag-usab. Pananglitan, panahon sa bawtismo, ang usa tingali sekretong nagabuhat gihapog sala nga mahimong mosangpot sa pagpalagpot kaniya kon siya bawtismado pa. Mahimo ba siyang magpahinungod sa Diyos ubos sa maong kahimtang? Siya makahimo lamang ug balidong pagpahinungod kang Jehova kon gihunong na niya ang di-kasulatanhong panggawi. Busa, ang usa ka tawo nga nabawtismohan samtang nagabuhat pag sala haom tingaling maghunahuna sa pagpabawtismo pag-usab.

Komosta ang usa ka indibiduwal nga wala na magbuhat ug sala panahon sa iyang bawtismo apan human niana nakahimog sala nga kinahanglang husayon sa hudisyal nga komite? Pananglitan moingon siya nga wala niya masabti pag-ayo kon unsay nalangkit sa pagpabawtismo ug busa dili kono balido ang iyang bawtismo. Sa dihang makig-atubang sa nakasala, dili angayng kuwestiyonon sa mga ansiyano ang pagkabalido sa iyang pahinungod ug bawtismo ni pangutan-on siya kon unsay iyang pagbati bahin niana. Kon buot hunahunaon, nadungog niya ang Kasulatanhong diskurso bahin sa kahulogan sa bawtismo. Mitubag siyag “Oo” sa mga pangutana mahitungod sa pahinungod ug bawtismo. Dayon siya nag-ilis ug gilusbog sa tubig. Busa, makataronganong maghunahuna nga nasabtan gyod niya ang pagkaseryoso sa iyang gibuhat. Sa ingon, isipon siya sa mga ansiyano ingong bawtismadong indibiduwal.

Kon magduhaduha siya sa pagkabalido sa iyang bawtismo, mahimong isugyot sa mga ansiyano nga basahon niya Ang Bantayanang Torre sa Nobyembre 1, 1960, panid 670-671 (w60-E 3/1, pp. 159-160), ug sa Oktubre 1, 1964, panid 602-605 (w64-E 2/15, pp. 123-126), diin detalyadong gihisgotan ang pagpabawtismo pag-usab. Ang pagpabawtismo pag-usab ubos sa pipila ka kahimtang (sama sa kakulag kahibalo sa Bibliya sa dihang ang usa nabawtismohan) maoy personal nga desisyon.

Unsang mga butanga ang angayng hatagag pagtagad sa mga Kristohanon maylabot sa pag-ipog puyo sa usa ka balay?

Ang tanan nagkinahanglag dapit nga kapuy-an. Apan karon, daghang tawo ang walay kaugalingong balay. Tungod sa kahimtang sa panalapi, panglawas, ug uban pa, kinahanglan tingaling mag-ipog puyo ang pamilya ug mga paryente. Sa pipila ka dapit, magpunsisok tingali sila sa usa lang ka lawak nga halos wala nay pribasiya.

Dili responsibilidad sa organisasyon ni Jehova ang paghatag ug taas nga listahan sa mga lagda kon unsay haom nga puy-an sa mga igsoon sa kongregasyon. Ang mga Kristohanon gidasig sa pagtimbangtimbang pinasukad sa Kasulatanhong mga prinsipyo kon ang ilang kahikayan sa pagpuyo dalawaton ba sa Diyos o  dili. Unsa man ang pipila niini nga mga prinsipyo?

Ang pangunang hatagag pagtagad mao ang epekto niana kanato ug sa atong espirituwalidad. Kinsa man ning imong kaubag puyo? Magsisimba ba sila ni Jehova? Nagkinabuhi ba sila nga kaharmonya sa mga sukdanan sa Bibliya? “Ayaw pagpahisalaag,” misulat si apostol Pablo. “Ang daotang pakig-uban makadaot sa mapuslanong pamatasan.”—1 Cor. 15:33.

Gipatin-aw sa Kasulatan nga gihukman ni Jehova ang pakighilawas ug panapaw. (Heb. 13:4) Busa ang bisan unsang kahikayan sa pagpuyo diin ang magkaatbang ug sekso magkauban sa usa ka lawak dili gayod dalawaton sa Diyos. Ang usa ka Kristohanon dili mopuyo sa usa ka dapit diin gikonsentir ang imoralidad.

Dugang pa, ang Bibliya nag-awhag sa tanang nagtinguha sa pag-uyon sa Diyos nga ‘mokalagiw gikan sa pakighilawas.’ (1 Cor. 6:18) Busa, maalamong likayan sa mga Kristohanon ang bisan unsang kahikayan sa pagpuyo nga mahimong moresulta sa pagbuhat ug imoralidad. Pananglitan, tagda ang situwasyon diin ubay-ubayng Kristohanon ang magpuyo sa usa ka balay. Ang mao bang kahikayan mosangpot sa makapakompromisong situwasyon? Komosta kon maatol nga ang magkaatbang ug sekso mao ray mabilin sa balay? Sa susama, dili sab maayo nga mag-ubag puyo ang ulitawo ug dalaga nga dunay gusto sa usag usa. Maalamong likayan ang mga situwasyon nga sama niana.

Dili usab angay nga mag-ubag puyo ang nagdiborsiyo na. Tungod sa ilang naandang seksuwal nga relasyon kaniadto, ang ilang pag-ubag puyo posibleng motultol sa imoral nga panggawi.—Prov. 22:3.

Ang lain pang butang nga angayng hatagag pagtagad mao ang panglantaw sa komunidad. Kon ang kahikayan sa pagpuyo nga giisip sa Kristohanon nga dalawaton makapatunghag dili maayong komento gikan sa komunidad, angay kanang likayan. Dili gayod nato gusto nga mapasipalahan ang ngalan ni Jehova tungod sa atong panggawi. Maylabot niini, si apostol Pablo miingon: “Likayi nga mahimong hinungdan sa pagkapandol sa mga Hudiyo ingon man sa mga Grego ug sa kongregasyon sa Diyos, ingon nga ako nagapahimuot sa tanang tawo sa tanang butang, nga wala magapangita sa akong kaugalingong kaayohan kondili nianang sa daghan, aron nga sila mangaluwas.”—1 Cor. 10:32, 33.

Dili tingali sayon alang niadtong gustong mangupot sa matarong nga mga sukdanan ni Jehova ang pagpilig haom nga kapuy-an ug kahikayan sa pagpuyo. Apan, ang mga Kristohanon kinahanglang “magpadayon sa pagtino kon unsa ang dalawaton sa Ginoo.” Angay nilang tinoon nga walay malaw-ayng panggawi nga mahitabo sa ilang panimalay. (Efe. 5:5, 10) Aron mahimo kana, kinahanglan silang mag-ampo alang sa giya sa Diyos ug buhaton ang tanan aron mapanalipdan ang matag usa batok sa pisikal ug moral nga kapeligrohan ug dili mapasipalahan ang ngalan ni Jehova.