Sunda ang Labing Maayong Paagi sa Pagkinabuhi!
Sunda ang Labing Maayong Paagi sa Pagkinabuhi!
“Kon kita mabuhi ug kon kita mamatay, kita iya ni Jehova.”—ROMA 14:8.
1. Unsay gitudlo ni Jesus bahin sa labing maayong paagi sa pagkinabuhi?
BUOT ni Jehova nga atong matagamtam ang labing maayong paagi sa pagkinabuhi. Ang mga tawo mahimong magkinabuhi sa lainlaing paagi, apan usa lamang ang labing maayo. Wala nay mas maayo pa kay sa pagkinabuhi nga kaharmonya sa Pulong sa Diyos ug pagkat-on gikan sa iyang Anak, si Jesu-Kristo. Gitudloan ni Jesus ang iyang mga sumusunod sa pagsimba sa Diyos sa espiritu ug kamatuoran, ug gisugo niya sila sa paghimog mga tinun-an. (Mat. 28:19, 20; Juan 4:24) Pinaagi sa pagkinabuhi nga kaharmonya sa mga instruksiyon ni Jesus, atong mapahimut-an si Jehova ug matagamtam ang Iyang panalangin.
2. Unsay sanong sa daghan sa mensahe sa Gingharian niadtong unang siglo, ug unsay kahulogan sa pagkahimong sakop sa “Dalan”?
2 Sa dihang mahimong magtutuo ug mabawtismohan kadtong “hustong nakiling alang sa kinabuhing walay kataposan,” kita adunay maayong katarongan sa pagsulti kanila, “Sunda ang labing maayong paagi sa pagkinabuhi!” (Buh. 13:48) Sa unang siglo Komong Panahon, linibo ka tawo gikan sa lainlaing nasod ang midawat sa kamatuoran ug naghatag ug publikong pamatuod sa ilang debosyon sa Diyos pinaagi sa pagpabawtismo. (Buh. 2:41) Kadtong unang mga tinun-an maoy sakop sa “Dalan.” (Buh. 9:2; 19:23) Haom kining pulonga kay kadtong nahimong mga sumusunod ni Kristo nagsentro sa ilang kinabuhi diha sa pagtuo kang Jesu-Kristo ug sa pagsundog sa iyang ehemplo.—1 Ped. 2:21.
3. Nganong magpabawtismo ang katawhan ni Jehova, ug pilay nabawtismohan sa milabayng napulo ka tuig?
3 Ang buluhatong paghimog mga tinun-an miuswag pag-ayo niining kataposang mga adlaw ug ginahimo na karon sa kapig 230 ka kayutaan. Sa milabayng napulo ka tuig, kapin sa 2,700,000 ka tawo ang nakadesisyon sa pag-alagad kang Jehova ug nagpabawtismo ingong simbolo sa ilang pagpahinungod. Nag-aberids kana ug kapin sa 5,000 ka indibiduwal kada semana! Ang desisyon nga magpabawtismo gipasukad sa gugma sa Diyos, kahibalo sa Kasulatan, ug pagtuo sa ilang gitudlo. Ang bawtismo maoy hinungdanong yugto sa atong kinabuhi, kay mao kanay sinugdanan sa atong suod nga relasyon kang Jehova. Nagpasundayag usab kana sa atong pagsalig nga siya motabang kanato sa pag-alagad kaniya nga matinumanon, maingon nga siya nagtabang sa iyang mga alagad kaniadto sa paglakaw sa iyang dalan.—Isa. 30:21.
Nganong Kinahanglang Magpabawtismo?
4, 5. Hisgoti ang pipila sa mga panalangin ug kaayohan sa pagpabawtismo.
4 Tingali ikaw aduna nay kahibalo sa Diyos, nagbag-o na sa imong kinabuhi, ug usa na ka di-bawtismadong magmamantala. Dalayegon kana nga pag-uswag. Apan ikaw ba nagpahinungod na sa imong kaugalingon sa Diyos pinaagi sa pag-ampo, ug nagplanong magpabawtismo? Sa imong pagtuon sa Bibliya, lagmit gayod nga imo nang nahibaloan nga angay nimong isentro ang imong kinabuhi sa pagdayeg kang Jehova, dili lamang sa pagpahimuot sa imong kaugalingon o sa pagbaton ug materyal nga mga butang. (Basaha ang Salmo 148:11-13; Luc. 12:15) Busa, unsa ang pipila sa mga panalangin ug kaayohan sa pagpabawtismo?
5 Ingong dedikado nga Kristohanon, ang imong kinabuhi adunay labing hamili nga katuyoan. Ikaw magmalipayon tungod kay imong gibuhat ang kabubut-on sa Diyos. (Roma 12:1, 2) Ang balaang espiritu ni Jehova magpatungha diha kanimo ug diyosnong mga hiyas sama sa pakigdait ug pagtuo. (Gal. 5:22, 23) Ang Diyos magpatalinghog sa imong mga pag-ampo ug magpanalangin sa imong mga paningkamot sa pagpahiuyon sa imong kinabuhi sa iyang Pulong. Ikaw magmalipayon sa imong ministeryo, ug ang imong pagkinabuhi sa paagi nga giuyonan sa Diyos magpalig-on sa imong paglaom nga mabuhi sa walay kataposan. Dugang pa, ang pagpahinungod ug pagpabawtismo magpakita nga buot gayod nimong mahimong Saksi ni Jehova.—Isa. 43:10-12.
6. Unsay gipahibalo sa atong bawtismo?
6 Pinaagi sa pagpahinungod sa atong kaugalingon sa Diyos ug sa pagpabawtismo, atong gipahibalo nga kita iya ni Jehova. “Walay usa kanato, sa pagkatinuod, ang mabuhi nga labot sa iyang kaugalingon lamang, ug walay usa nga mamatay nga labot sa iyang kaugalingon lamang,” misulat si apostol Pablo, “kay kon kita mabuhi, kita mabuhi alang kang Jehova, ug kon kita mamatay, kita mamatay alang kang Jehova. Busa kon kita mabuhi ug kon kita mamatay, kita iya ni Jehova.” (Roma 14:7, 8) Ang Diyos nagpasidungog kanato pinaagi sa paghatag kanatog kagawasan sa pagpili. Kon kita desididong mosubay niining dalana sa kinabuhi tungod kay atong gihigugma ang Diyos, atong malipay ang iyang kasingkasing. (Prov. 27:11) Ang atong bawtismo maoy simbolo sa atong pagpahinungod sa Diyos ug publikong pagpahayag nga si Jehova ang atong Magmamando. Nagpakita kana nga kita midapig kaniya sa isyu sa unibersohanong pagkasoberano. (Buh. 5:29, 32) Sa baylo, si Jehova dapig usab kanato. (Basaha ang Salmo 118:6.) Ang bawtismo magbukas usab sa kahigayonan nga madawat nato ang daghan pang espirituwal nga mga panalangin karon ug sa umaabot.
Gipanalanginan ug Mahigugmaong mga Igsoon
7-9. (a) Unsay gipasalig ni Jesus niadtong mibiya sa tanang butang ug misunod kaniya? (b) Sa unsang paagi natuman ang saad ni Jesus sa Marcos 10:29, 30?
7 Si apostol Pedro miingon kang Jesus: “Tan-awa! Gibiyaan namo ang tanang butang ug nagsunod kanimo; unsa man gayod unya ang among makuha niana?” (Mat. 19:27) Gustong mahibaloan ni Pedro kon unsay malaoman niya ug sa ubang mga tinun-an ni Jesus. Aron bug-os silang makapakigbahin sa pagsangyaw sa Gingharian, mihimo silag dagkong mga sakripisyo. (Mat. 4:18-22) Unsay gipasalig ni Jesus kanila?
8 Sumala sa susamang asoy ni Marcos, gipakita ni Jesus nga ang iyang mga tinun-an mahimong bahin sa usa ka espirituwal nga panag-igsoonay. Siya miingon: “Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod kanako ug tungod sa maayong balita nga dili makabaton ug usa ka gatos ka pilo karon niining yugtoa sa panahon, sa mga balay ug mga igsoong lalaki ug mga igsoong babaye ug mga inahan ug mga anak ug kaumahan, uban ang mga paglutos, ug sa umaabot nga sistema sa mga butang sa kinabuhing walay kataposan.” (Mar. 10:29, 30) Ang unang-siglong mga Kristohanon, sama kang Lydia, Aquila, Priscila, ug Gayo, maoy lakip niadtong nagtaganag “mga balay” ug nahimong “mga igsoong lalaki ug mga igsoong babaye ug mga inahan” sa ilang isigkamagtutuo, ingon sa gisaad ni Jesus.—Buh. 16:14, 15; 18:2-4; 3 Juan 1, 5-8.
9 Ang gisulti ni Jesus adunay mas dakong katumanan sa atong adlaw. Ang “kaumahan” nga gibiyaan sa iyang mga sumusunod nagtumong sa panginabuhi nga kinabubut-ong gitalikdan sa daghan, lakip na sa mga misyonaryo, Bethelite, internasyonal nga mga alagad, ug uban pa, aron sa pagpauswag sa intereses sa Gingharian sa lainlaing kayutaan. Daghang igsoon ang mibiya sa ilang balay aron himoong simple ang ilang kinabuhi. Kita malipayng makadungog sa ilang mga eksperyensiya nga nagpakita kon sa unsang paagi si Jehova nag-atiman kanila ug kon sa unsang paagi ang pag-alagad kaniya nakahatag kanilag kalipay. (Buh. 20:35) Dugang pa, ang tanang bawtismadong alagad ni Jehova makatagamtam sa panalangin sa ‘pagpangita pag-una sa gingharian ug sa pagkamatarong sa Diyos’ ingong bahin sa tibuok-kalibotang panag-igsoonay.—Mat. 6:33.
Luwas Diha sa “Natago nga Dapit”
10, 11. Unsa ang “natago nga dapit sa Labing Hataas,” ug sa unsang paagi kita makasulod niana?
10 Ang pahinungod ug bawtismo adunay laing panalangin—ang pribilehiyo nga makapuyo sa “natago nga dapit sa Labing Hataas.” (Basaha ang Salmo 91:1.) Kini maoy mahulagwayong dapit nga luwas ug may kasegurohan—usa ka kahimtang diin ang usa mapanalipdan batok sa espirituwal nga kadaot. Kini maoy “natago nga dapit” tungod kay wala kini mahibaloi niadtong dili-samag panglantaw sa Diyos ug walay pagsalig kaniya. Pinaagi sa pagkinabuhi nga kaharmonya sa atong pagpahinungod ug sa pagpakitag bug-os nga pagsalig kang Jehova, sama rang miingon kita kaniya: “Ikaw mao ang akong dalangpanan ug akong salipdanan, akong Diyos, kang kinsa mosalig ako.” (Sal. 91:2) Si Jehova nga Diyos mahimong atong luwas nga puloy-anan. (Sal. 91:9) Aduna pa bay mas luwas nga dapit kay niana?
11 Ang pagsulod sa “natago nga dapit” ni Jehova nagpasabot usab nga kita gihatagag pribilehiyo nga makabatog personal nga relasyon uban kaniya. Magsugod kini sa pahinungod ug bawtismo. Human niana, mas masuod kita sa Diyos pinaagi sa pagtuon sa Bibliya, kinasingkasing nga pag-ampo, ug bug-os nga pagkamasinugtanon. (Sant. 4:8) Wala nay laing mas suod kang Jehova gawas kang Jesus, kinsa bug-os nga misalig sa Maglalalang. (Juan 8:29) Busa, dili gayod kita magduhaduha kang Jehova o sa iyang tinguha ug katakos nga motabang kanato sa pagtuman sa atong pahinungod. (Eccl. 5:4) Ang espirituwal nga mga tagana sa Diyos alang sa iyang katawhan maoy tin-awng ebidensiya nga siya nahigugma gayod kanato ug nagtinguha nga molampos kita sa pag-alagad kaniya.
Pabilhi ang Atong Espirituwal nga Paraiso
12, 13. (a) Unsa ang espirituwal nga paraiso? (b) Sa unsang paagi makatabang kita sa mga bag-ohan?
12 Ang pahinungod ug bawtismo maghatag usab kanatog kahigayonan nga makapuyo sa espirituwal nga paraiso. Kini maoy usa ka talagsaong espirituwal nga kahimtang nga atong mapahimuslan kauban sa mga isigkamagtutuo, nga may pakigdait uban kang Jehova nga Diyos ug sa usag usa. (Sal. 29:11; Isa. 54:13) Walay bisan unsa diha sa kalibotan nga ikatandi sa atong espirituwal nga paraiso. Dayag kaayo kini panahon sa internasyonal nga mga kombensiyon, diin ang atong mga igsoon nga gikan sa lainlaing nasod, pinulongan, ug mga tribo magkauban nga may pakigdait, panaghiusa, ug inigsoong gugma.
13 Ang espirituwal nga paraiso nga atong napahimuslan lahi kaayo sa makaluluoy nga kahimtang sa kalibotan. (Basaha ang Isaias 65:13, 14.) Pinaagi sa pagmantala sa mensahe sa Gingharian, kita may pribilehiyo sa pagdapit sa uban sa pagsulod sa espirituwal nga paraiso. Usa ka pribilehiyo usab ang pagtabang sa mga bag-ohan, ug sila makabenepisyo sa pagbansay nga ilang madawat diha sa ministeryo. Ilalom sa pagtultol sa mga ansiyano, mahimong makapribilehiyo kita sa pagtabang sa pipila ka bag-ohan, maingon nga si Aquila ug Priscila ‘nagpatin-aw sa dalan sa Diyos sa mas husto nga paagi’ ngadto kang Apolos.—Buh. 18:24-26.
Padayon sa Pagkat-on Gikan Kang Jesus
14, 15. Nganong angay kitang magpadayon sa pagkat-on gikan kang Jesus?
14 Kita adunay maayong mga katarongan nga padayong mokat-on gikan kang Jesus. Sa wala pa siya moanhi sa yuta, si Jesus migugol ug linibong katuigan kauban sa iyang Amahan sa pagbuhat sa mga butang. (Prov. 8:22, 30) Nahibalo siya nga ang labing maayong paagi sa pagkinabuhi nasentro sa pag-alagad sa Diyos ug sa pagpamatuod sa kamatuoran. (Juan 18:37) Tin-aw kang Jesus nga ang bisan unsang paagi sa pagkinabuhi gawas niini maoy mahakogon ug dili-maalamon. Siya nasayod nga siya makaagom sa grabeng pagsulay ug kamatayon. (Mat. 20:18, 19; Heb. 4:15) Ingong atong Ehemplo, siya nagtudlo kanato kon sa unsang paagi makapabiling matinumanon.
15 Wala madugay human mabawtismohi si Jesus, si Satanas nagtental kaniya nga talikdan ang labing maayong paagi sa pagkinabuhi—apan napakyas. (Mat. 4:1-11) Kini nagtudlo kanato nga bisan unsa pay buhaton ni Satanas, kita makapabiling matinumanon. Lagmit gayong puntiryahon niya kadtong nagplanong magpabawtismo maingon man ang bag-ong nabawtismohan. (1 Ped. 5:8) Ang pagsupak maggikan tingali sa mga membro sa pamilya nga adunay sayop nga pagtuo sa mga Saksi. Gihimo nila kini sa tuyo nga protektahan kita. Hinunoa, ang maong mga pagsulay maghatag kanatog kahigayonan sa pagpakita sa Kristohanong mga hiyas, sama sa pagkamatinahoron ug pagkamataktikanhon, sa dihang motubag sa mga pangutana ug mohatag pamatuod. (1 Ped. 3:15) Ang mga kasinatian nga sama niana mahimong adunay positibong epekto niadtong mamati kanato.—1 Tim. 4:16.
Magpabilin sa Labing Maayong Paagi sa Pagkinabuhi!
16, 17. (a) Unsa ang tulo ka pangunang kinahanglanon sa kinabuhi nga makita sa Deuteronomio 30:19, 20? (b) Sa unsang paagi gipaluyohan ni Jesus, Juan, ug Pablo ang gisulat ni Moises?
16 Mga 1,500 ka tuig sa wala pa moanhi si Jesus sa yuta, giawhag ni Moises ang mga Israelinhon nga pilion ang labing maayong paagi sa pagkinabuhi. Siya miingon: “Himoon ko ang mga langit ug ang yuta ingong mga saksi batok kaninyo niining adlawa, nga gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat, pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya.” (Deut. 30:19, 20) Ang Israel wala magmatinumanon sa Diyos, apan ang tulo ka pangunang kinahanglanon sa kinabuhi nga gihisgotan ni Moises wala mausab. Kini gihisgotan pag-usab ni Jesus ug sa uban.
17 Una, ‘angay natong higugmaon si Jehova nga atong Diyos.’ Mapakita nato kana pinaagi sa pagsubay sa iyang matarong nga mga dalan. (Mat. 22:37) Ikaduha, ‘angay natong pamation ang tingog ni Jehova’ pinaagi sa pagtuon sa iyang Pulong ug pagsunod sa iyang mga sugo. (1 Juan 5:3) Nagkinahanglan kini nga regular kitang motambong sa mga tigom, diin ginahisgotan ang Bibliya. (Heb. 10:23-25) Ikatulo, ‘angay kitang mounong kang Jehova.’ Bisag unsa pay atong atubangon, magpakita gayod kitag pagtuo sa Diyos ug mosunod sa iyang Anak.—2 Cor. 4:16-18.
18. (a) Niadtong 1914, giunsa paghubit sa The Watch Tower ang kamatuoran? (b) Unsay angay natong tinamdan sa kahayag sa kamatuoran karong adlawa?
18 Pagkadakong panalangin ang pagkinabuhi nga kaharmonya sa kamatuoran sa Bibliya! Niadtong 1914, migula sa The Watch Tower kining makahuloganong komento: “Dili ba kita bulahan, malipayon nga katawhan? Dili ba matinumanon man ang atong Diyos? Kon adunay usa nga may nahibaloang mas maayo, ipadawat kana kaniya. Kon may si bisan kinsa kaninyo nga nakakaplag ug mas maayo, nagalaom kami nga isulti ninyo kana kanamo. Kami walay laing nasayran nga mas maayo pa o bisag nakatunga na lang sa pagkamaayo sa among nakaplagan diha sa Pulong sa Diyos. . . . Dili matukib ang kalinaw, kalipay, ug panalangin nga gihatag sa tin-awng kahibalo sa matuod nga Diyos sa among kasingkasing ug kinabuhi. Ang Sugilanon sa Kaalam, Hustisya, Gahom, ug Gugma sa Diyos bug-os nga nagtagbaw sa mga pangandoy sa among hunahuna ug kasingkasing. Dili na kami mangita pa. Wala kami laing gitinguha kondili nga matisok sa among hunahuna kining kahibulongang Sugilanon.” (The Watch Tower, Disyembre 15, 1914, panid 377-378) Ang atong pagpabili sa espirituwal nga kahayag ug kamatuoran wala gihapon mausab. Sa pagkatinuod, mas daghan pa gani kitag katarongan karon sa pagmaya nga kita ‘nagalakaw sa kahayag ni Jehova.’—Isa. 2:5; Sal. 43:3; Prov. 4:18.
19. Nganong kadtong kuwalipikado nang magpabawtismo dili maglangan sa pagbuhat niana?
19 Kon buot kang ‘molakaw sa kahayag ni Jehova’ apan dili ka pa dedikado ug bawtismadong Kristohanon, ayaw paglangan. Paningkamoti nga makab-ot ang mga kinahanglanon alang sa bawtismo—ang talagsaong paagi sa pagpasundayag sa atong pagpabili sa nahimo sa Diyos ug ni Kristo alang kanato. Ihatag kang Jehova ang imong labing bililhong kabtangan—ang imong kinabuhi. Ipakita nga gusto nimong buhaton ang kabubut-on sa Diyos pinaagi sa pagsunod sa iyang Anak. (2 Cor. 5:14, 15) Sa walay duhaduha, mao kana ang labing maayong paagi sa pagkinabuhi!
Unsay Imong Tubag?
• Unsay gisimbolohan sa atong bawtismo?
• Unsang mga panalangin ang mabatonan kon magpahinungod sa Diyos ug magpabawtismo?
• Nganong hinungdanon kaayo nga mokat-on gikan kang Jesus?
• Unsay motabang kanato sa pagpabilin diha sa labing maayong paagi sa pagkinabuhi?
[Mga Pangutana sa Pagtuon]
[Hulagway sa panid 25]
Ang imong bawtismo nagpakita nga imong gipili ang labing maayong paagi sa pagkinabuhi
[Mga hulagway sa panid 26]
Ikaw ba anaa na sa “natago nga dapit”?