Tabang sa mga Batan-on sa Paghinumdom sa Ilang Maglalalang

“HINUMDOMI ang imong Maglalalang samtang batan-on ka pa,” misulat ang maalamong tawo nga si Solomon mga 3,000 ka tuig na ang milabay. (Eccl. 12:1, Today’s English Version) Ang Kristohanong mga batan-on karon adunay laing basahon nga motabang kanila sa paghimo niana. Ang librong Mga Pangutanang Gisukna sa mga Batan-on—Mga Tubag nga Mosaler, Tomo 2, giluwatan panahon sa “Giniyahan sa Espiritu sa Diyos” nga Distritong mga Kombensiyon sa mga Saksi ni Jehova, nga gipahigayon sa tibuok kalibotan gikan sa Mayo 2008 hangtod sa Enero 2009.

Inigpakli nimo sa atubangang hapin sa libro adunay sulat ang Nagamandong Lawas alang sa mga batan-on. Sa bahin, kini nag-ingon: “Nanghinaot gayod kami nga ang impormasyon niining libroha makatabang kanimo sa pagsagubang sa mga problema ug mga tentasyon nga ginaatubang sa mga batan-on karon ug makatabang kanimo kon unsaon paghimog mga desisyon nga nahiuyon sa kabubut-on sa Diyos.”

Siyempre, gusto sa mga ginikanan nga matutoon ang ilang mga anak “sa disiplina ug sa pagdumala-sa-kaisipan ni Jehova.” (Efe. 6:4) Apan sa dihang matin-edyer na ang mga anak, daghan kanila ang walay kompiyansa sa kaugalingon ug nanginahanglag giya. Kon duna kay anak nga tin-edyer, sa unsang paagi makatabang ka kaniya nga makabenepisyo gayod niining publikasyona? Aniay pipila ka sugyot.

▪ Pagbatog imong kaugalingong kopya sa libro ug paningkamoti nga masinati pag-ayo niini. Kini naglangkit ug labaw pa kay sa pagbasa lamang. Matikdi usab kon sa unsang paagi gipahayag ang mga ideya. Inay nga sultihan lang ang mga batan-on kon unsay husto o sayop, maoy tumong niining libroha nga mabansay ang ilang “mga gahom sa pagsabot.” (Heb. 5:14) Naghatag usab kini kanilag praktikal nga mga sugyot kon sa unsang paagi mobarog dapig sa kon unsay husto. Pananglitan, ang Kapitulo 15 (“Unsaon Nako Pagbuntog ang Pagpamit-os sa Uban?”) wala lamang magtudlo sa mga batan-on sa pagdumili. Kini nagpatin-aw usab kon unsaon paggamit ang mga prinsipyo sa Bibliya sa pagsulbad sa mga problema ug kon unsaon ‘pagtubag ang matag usa’ nga nagpit-os kanila.—Col. 4:6.

 ▪ Gamita ang mga seksiyon sa libro nga magpalihok sa magbabasa sa pagpakigbahin. Bisan tuod kini nga mga seksiyon gidisenyo alang sa mga batan-on, sulayi usab sa pagsulat sa imong tubag diha sa imong libro. a Pananglitan, sa dihang konsiderahon ang duha ka pangutana bahin sa pagpakigdeyt diha sa panid 16, hinumdomi kon unsay imong gibati niadtong tin-edyer ka pa ug isulat kini. Dayon pangutan-a ang imong kaugalingon: ‘Unsa nay akong pagbati bahin niini karon? Unsa nay akong nakat-onan sukad sa akong pagkatin-edyer, ug sa unsang paagi nako masulti kini sa akong anak sa epektibong paagi?’

▪ Hatagig pribasiya ang imong anak. Ang mga seksiyon nga magpalihok sa magbabasa sa pagpakigbahin gidisenyo aron ang imong anak madasig sa pagpahayag sa iyang pagbati ug maaghat sa pagsulat niana sa iyang libro o sa paghunahuna bahin niana. Ang imong tumong mao ang pagsuta kon unsay anaa sa iyang kasingkasing, dili kon unsay iyang gisulat sa iyang libro. Sa panid 3 sa seksiyon nga nag-ulohang “Pahinumdom sa mga Ginikanan,” ang libro nagsugyot: “Aron madasig ang imong mga anak sa pagsulat diha sa ilang libro nga walay lipodlipod, hatagi silag pribasiya. Sa ngadto-ngadto dili na sila magpanuko sa pagpakigsulti kanimo bahin sa ilang gipanulat.”

Tabang sa Pamilyahanong Pagtuon sa Bibliya

Ang librong Gisukna sa mga Batan-on, Tomo 2, maayong gamiton sa inyong Pamilyahanong Pagsimba. Sanglit wala kini pangutana alang sa matag parapo, unsaon nimo kini paggamit? Makapili kag paagi sa pagtuon nga haom sa imong mga anak.

Pananglitan, ang pipila ka pamilya ganahan tingaling magpraktis sesyon sa dihang magkonsiderar sa seksiyong “Kon Unsay Himoon kon Pit-oson” sa panid 132 ug 133. Ang unang pangutana niana makatabang sa imong anak sa pag-ila kon unsa nga pagpit-os ang lisod kaayo niyang sagubangon. Ang ikaduhang pangutana magpaila sa situwasyon diin lagmit motungha ang maong pagpit-os. Human konsideraha ang mga sangpotanan sa pagpadaog o pagsukol sa pagpit-os, giawhag ang imong anak sa pag-andam ug mga tubag nga mopahiuyon, mobara, o kaha mobalitok sa pagpamit-os. Tabangi ang imong anak sa pagpangitag praktikal nga mga solusyon ug sa pag-andam ug mga tubag nga masulti niya nga may kompiyansa ug kombiksiyon.—Sal. 119:46.

Tabang sa Pagpakig-estorya

Ang librong Gisukna sa mga Batan-on, Tomo 2, nagdasig sa mga batan-on sa pagpakig-estorya sa ilang ginikanan. Pananglitan, ang mga kahong “Unsaon Nako Pagpakigsulti Kang Papa o Kang Mama Bahin sa Sekso?” (panid 63-64) ug “Pakigsulti sa Imong Ginikanan!” (panid 189) nagtaganag praktikal nga mga sugyot kon sa unsang paagi sugdan paghisgot ang sensitibong mga ulohan.  Ang usa ka 13-anyos nga dalagita misulat, “Kining libroha naghatag kanakog kaisog sa pagpakigsulti sa akong ginikanan mahitungod sa mga butang nga akong gihunahuna—bisan sa mga butang nga akong nahimo.”

Aduna pay laing mga seksiyon niining libroha nga magdasig sa mga anak sa pagpakig-estorya sa ilang ginikanan. Sa kataposan sa matag kapitulo dunay kahon nga nag-ulohang “Unsay Imong Hunahuna?” Dili lang kini magamit sa pagrepaso, kondili mahimo usab kining hisgotan sa pamilya. Sa hinapos sa matag kapitulo makita sab ang kahon nga nag-ulohang “Ang Akong Planong Himoon!” Diha niana, mahimong isulat sa mga batan-on kon unsay ilang himoon aron mapadapat nila ang ilang nakat-onan sa maong kapitulo. Sa kataposang bahin niana nga seksiyon mabasa kini: “Kon unsay akong gustong ipangutana sa akong ginikanan bahin niini . . . ” Makadasig kana sa mga batan-on sa pagpangayog mapuslanong tambag sa ilang mga ginikanan.

Abota ang Kasingkasing!

Ingong ginikanan, tumong nimo nga maabot ang kasingkasing sa imong anak. Ang librong Gisukna sa mga Batan-on, Tomo 2, makatabang kanimo sa pagbuhat niana. Tagda kon sa unsang paagi gigamit kini sa usa ka amahan sa pagbatog maayong komunikasyon sa iyang anak nga babaye.

“Dunay nindot nga mga lugar diin ganahan mi ni Rebekah nga magsuroysuroy, magbisikleta, o magdrayb. Niining mga higayona dali ra niyang masulti kon unsay naa sa iyang hunahuna.

“Ang una namong gihisgotan niining libroha mao ang sulat sa Nagamandong Lawas ug ang ‘Pahinumdom sa mga Ginikanan.’ Gusto nakong masayran sa akong anak nga ingon sa gipakita sa panid 3, dili siya angayng magpanuko sa pagsulat diha sa iyang libro kon unsay iyang gihunahuna ug gibati. Dili nako basahon ang iyang gipanulat.

“Akong papilion si Rebekah kon unsang mga kapituloha ang among hisgotan. Ang usa sa mga kapitulo nga iyang gipili mao ang ‘Angay ba Akong Magdulag Elektronikong mga Dula?’ Wala gyod ko magdahom nga mao nay iyang pilion! Apan, duna siyay rason. Daghan sa iyang mga higala ang nagdulag makalilisang kaayo nga dula. Wala ko magtuo nga daghan diay kanag mapintas nga mga esena ug mga balikas! Apan nahibaloan lamang nako kini sa dihang among gihisgotan ang seksiyong “Ang Akong Planong Himoon!” sa panid 251. Ang maong kahon nakatabang usab kang Rebekah sa pag-andam ug tubag kon dunay mamugos kaniya sa pagdula niana.

“Sa pagkakaron, dili na magpanuko si Rebekah sa pagsulti nako bahin sa iyang gipanulat sa iyang libro. Walay hunong ang among pag-estoryahanay panahon sa among pagtuon. Magpulipuli mig basa, ug dayon gusto niyang hisgotan ang tanan, hasta ang mga hulagway ug mga kahon. Kini naghatag nakog kahigayonan sa pagsulti kaniya kon unsay akong naagian niadtong batan-on pa ko, ug unya iya kong sultihan kon unsa nay kahimtang sa mga batan-on karon. Gusto niyang iestorya ang tanan!”

Kon ikaw usa ka ginikanan, sa walay duhaduha nalipay ka sa dihang giluwatan kining libroha. Karon aduna kay kahigayonan sa paggamit niini. Naglaom ang Nagamandong Lawas nga ang librong Mga Pangutanang Gisukna sa mga Batan-on—Mga Tubag nga Mosaler, Tomo 2, mahimong usa ka panalangin sa imong pamilya. Hinaot nga makatabang kini sa tanan—ilabina sa atong minahal nga mga batan-on—sa ‘pagpadayon sa paglakaw pinaagi sa balaang espiritu.’—Gal. 5:16.

[Footnote]

[Kahon sa panid 30]

Kon Unsay Gisulti sa Pipila ka Batan-on

“Kini maoy libro nga kinahanglan nimong lingkorag basa ug mahimong sulatan. Tungod kay gidisenyo kini nga samag diary, makahatag kinig kahigayonan sa pagpamalandong uban ang tumong nga mapahimuslan ang labing maayong pagkinabuhi.”—Nicola.

“Daghan ang nag-ingon, bisan ang mga tawong maayog intensiyon, nga puwede na kong makigdeyt. Ang unang seksiyon niining libroha nagkombinsir kanako nga bisan unsa pay isulti sa uban, dili pa ko andam makigdeyt.”—Katrina.

“Ang kahong ‘Nagplano Ka Bang Magpabawtismo?’ nakatabang kanako nga isipon ang akong bawtismo ingong seryoso kaayong butang. Nagtukmod kini kanako sa pagpauswag sa kalidad sa akong personal nga pagtuon ug pag-ampo.”—Ashley.

“Bisan tuod natudloan ko sa akong Kristohanong ginikanan sukad pa sa pagkabata, kining libroha nakatabang kanako sa pagpamalandong kon unsay angay nakong himoon sa akong kinabuhi. Nakatabang usab kini kanako nga dili magpanuko sa pagpakigsulti sa akong ginikanan.”—Zamira.

[Hulagway sa panid 31]

Mga ginikanan, paningkamoti nga masinati pag-ayo niining libroha

[Hulagway sa panid 32]

Himoang tumong nga maabot ang kasingkasing sa imong anak