Lakaw Pinaagi sa Espiritu ug Tumana ang Imong Pahinungod
Lakaw Pinaagi sa Espiritu ug Tumana ang Imong Pahinungod
“Magpadayon sa paglakaw pinaagi sa espiritu ug kamo dili gayod makahimo ug unodnong tinguha.”—GAL. 5:16.
1. Unsang mga bawtismo ang gihimo sa adlaw sa Pentekostes?
SA ADLAW sa Pentekostes 33 K.P., ang mga sumusunod ni Jesus nakasultig lainlaing pinulongan human sila mabawtismohi sa balaang espiritu. Ilang gipasundayag ang milagrosong gasa sa espiritu. (1 Cor. 12:4-10) Unsay epekto sa maong gasa ug sa pakigpulong ni apostol Pedro? Daghan ang ‘nasamdan sa kasingkasing.’ Sa awhag ni Pedro, sila naghinulsol ug nagpabawtismo. Ang rekord nag-ingon: “Kadtong kinasingkasing nga misagop sa iyang pulong nabawtismohan, ug nianang adlawa mga tulo ka libong kalag ang nadugang.” (Buh. 2:22, 36-41) Ingon sa gisugo ni Jesus, sila nabawtismohan sa tubig sa ngalan sa Amahan, sa Anak, ug sa balaang espiritu.—Mat. 28:19.
2, 3. (a) Ipatin-aw ang kalainan tali sa pagkanabawtismohan sa balaang espiritu ug sa pagkanabawtismohan sa ngalan sa balaang espiritu. (b) Nganong ang pagpabawtismo sa tubig angayng himoon sa tanan nga mahimong matuod nga mga Kristohanon?
2 Apan, duna bay kalainan tali sa pagkanabawtismohan sa balaang espiritu ug sa pagkanabawtismohan sa ngalan sa balaang espiritu? Oo. Kadtong nabawtismohan sa balaang espiritu gipanganak pag-usab ingong inanak-sa-espiritu nga mga anak sa Diyos. (Juan 3:3) Sila gidihogan aron mahimong umaabot nga kaubang mga hari ug luyoluyong mga saserdote sa langitnong Gingharian sa Diyos, ug sila maoy bahin sa espirituwal nga lawas ni Kristo. (1 Cor. 12:13; Gal. 3:27; Pin. 20:6) Busa kini nga bawtismo—pagkanabawtismohan sa balaang espiritu—ang gihimo ni Jehova sa dihang mipili siyag mga indibiduwal nga mahimong kaubang mga manununod ni Kristo sa adlaw sa Pentekostes ug human niana. (Roma 8:15-17) Apan komosta ang pagpabawtismo sa tubig sa ngalan sa balaang espiritu, nga kanunayng ginahimo karon diha sa mga asembliya ug kombensiyon sa katawhan ni Jehova?
3 Ang pagpabawtismo sa tubig angayng himoon sa matuod nga mga Kristohanon ingong simbolo sa ilang bug-os nga pagpahinungod kang Jehova nga Diyos. Angay kining himoon niadtong dunay langitnong pagkatinawag. Apan kinahanglan usab kining himoon sa milyonmilyong lalaki ug babaye sa modernong panahon nga adunay paglaom nga mabuhi sa yuta sa walay kataposan. Bisan unsa pay paglaom sa usa, ang pagpabawtismo sa tubig sa ngalan sa Amahan ug sa Anak ug sa balaang espiritu maoy usa ka kinahanglanon aron mahimong dalawaton sa Diyos. Busa ang tanang Kristohanon nga nabawtismohan niining paagiha angayng “magpadayon sa paglakaw pinaagi sa espiritu.” (Basaha ang Galacia 5:16.) Ikaw ba nagalakaw pinaagi sa espiritu ug sa ingon nagatuman sa imong pahinungod?
Kon Unsay Kahulogan sa “Paglakaw Pinaagi sa Espiritu”
4. Unsay buot ipasabot sa “paglakaw pinaagi sa espiritu”?
4 Ang “paglakaw pinaagi sa espiritu” nagpasabot nga imong tugotan ang balaang espiritu sa pag-impluwensiya kanimo. Sa ato pa, magpagiya ka sa balaang espiritu diha sa imong adlaw-adlawng pagkinabuhi. Gipakita sa Galacia kapitulo 5 ang kalainan tali sa pagkahimong nailalom sa impluwensiya sa balaang espiritu ug nianang sa impluwensiya sa unod.—Basaha ang Galacia 5:17, 18.
5. Unsang mga buhat ang angayng likayan niadtong nailalom sa impluwensiya sa balaang espiritu?
5 Kon nailalom ka sa impluwensiya sa balaang espiritu, imong likayan ang mga buhat sa unod. Naglakip kana sa “pakighilawas, kahugawan, malaw-ayng panggawi, idolatriya, pagbuhat sa espiritismo, mga pagdumtanay, panag-away, pangabugho, mga pagsinta sa kasuko, mga pakigtigi, mga pagkabahinbahin, mga sekta, mga kasina, mga paghuboghubog, mga hudyaka.” (Gal. 5:19-21) Sa ato pa, imong “gipatay ang mga binuhatan sa lawas pinaagi sa espiritu.” (Roma 8:5, 13) Motabang kana kanimo sa pagsentro sa imong hunahuna sa mga butang sa espiritu ug sa pagkooperar sa paggiya niini, inay tugotan ang imong kaugalingon nga makontrolar sa unodnong mga tinguha.
6. Iilustrar kon unsay kinahanglang buhaton aron mapasundayag ang bunga sa espiritu.
6 Samtang naglihok ang balaang espiritu diha kanimo, imong mapasundayag ang diyosnong mga hiyas, “ang bunga sa espiritu.” (Gal. 5:22, 23) Apan, nasayod ka nga nagkinahanglan kinig paningkamot. Sa pag-ilustrar: Ang usa ka mag-uuma nagtikad sa iyang uma. Siyempre, gikinahanglan niya ang sidlak sa adlaw ug tubig; kon wala kana, dili siya makadahom nga duna siyay maani. Mahimo natong itandi ang balaang espiritu sa sidlak sa adlaw. Ang balaang espiritu gikinahanglan aron atong mapasundayag ang bunga niana. Apan, unsa may anihon kon wala maghago ang mag-uuma? (Prov. 10:4) Oo, ang kalidad sa mga hiyas nga ipatungha sa balaang espiritu diha kanimo magdepende sa imong paningkamot sa pag-ugmad sa imong kasingkasing. Busa suknaa ang imong kaugalingon, ‘Ako bang gitugotan ang balaang espiritu nga magpatungha sa bunga niini pinaagi sa pagpagiya niini?’
7. Nganong hinungdanon kaayo ang pagtuon ug pagpamalandong diha sa imong pag-ugmad sa bunga sa balaang espiritu?
7 Aron makabatog maayong ani, kinahanglan usab nga bisbisan sa mag-uuma ang iyang tanom. Aron maugmad ang bunga sa espiritu, gikinahanglan nimo ang tubig sa kamatuoran nga makaplagan diha sa Bibliya ug mabatonan pinaagi sa Kristohanong kongregasyon. (Isa. 55:1) Lagmit imong gipakita sa mga tawo nga ang Balaang Kasulatan nasulat pinaagi sa balaang espiritu. (2 Tim. 3:16) Dugang pa, ang matinumanon ug maalamong ulipon nagtaganag gikinahanglan-kaayong pagsabot sa lunsayng tubig sa kamatuoran sa Bibliya. (Mat. 24:45-47) Busa, tin-aw nga aron mailalom sa impluwensiya sa balaang espiritu, kinahanglan natong basahon ug palandongon ang Pulong sa Diyos. Kon imo kanang ginabuhat, imong gisundog ang maayong panig-ingnan sa mga manalagna nga ‘makugihong nagpakisayod ug mainampingong nagtuki’ sa impormasyon nga gihatag kanila. Makaiikag nga bisan ang mga manulonda interesado kaayo sa espirituwal nga kamatuoran mahitungod sa gisaad nga Binhi ug sa kongregasyon sa dinihogang mga Kristohanon.—Basaha ang 1 Pedro 1:10-12.
Sa Unsang Paagi Mailalom sa Impluwensiya sa Espiritu?
8. Nganong hinungdanon nga pangayoon nimo kang Jehova ang iyang espiritu?
8 Dili pa igo ang basta pagtuon ug pagpamalandong sa Kasulatan. Kinahanglang magpadayon ka sa pagpangayo sa tabang ug giya ni Jehova. Siya “makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna.” (Efe. 3:20; Luc. 11:13) Apan, unsa may imong itubag kon dunay mangutana, “Nganong magpadayon man ko sa pagpangayo kon ang Diyos nahibalo na ‘sa mga butang nga akong gikinahanglan sa wala pa gani ko mangayo kaniya’?” (Mat. 6:8) Buweno, ang usa ka rason mao nga kon ikaw mag-ampo alang sa balaang espiritu, imong giila nga ikaw nagasalig kang Jehova. Pananglitan, kon dunay mangayo nimog tabang, buhaton nimo ang tanan sa pagtabang kaniya. Buhaton nimo kana tungod kay mihangyo siya nimo, nga nagpakita nga may pagsalig siya kanimo. (Itandi ang Proverbio 3:27.) Sa susama, malipay si Jehova kon imong pangayoon ang iyang espiritu, ug ihatag niya kana kanimo.—Prov. 15:8.
9. Sa unsang paagi ang pagtambong sa mga tigom makatabang kanimo nga mailalom sa impluwensiya sa espiritu sa Diyos?
9 Ikaw nahibalo nga ang laing paagi nga mailalom ka sa impluwensiya sa espiritu sa Diyos naglangkit sa atong mga tigom, asembliya, ug mga kombensiyon. Hinungdanon kaayo ang pagpaningkamot sa pagtambong ug pagpatalinghog sa programa. Ang pagbuhat niana motabang kanimo sa pagsabot sa “lawom nga mga butang sa Diyos.” (1 Cor. 2:10) Adunay mga kaayohan usab ang regular nga pagkomento. Hinumdomi kono ang mga tigom nga imong gitambongan sa milabayng upat ka semana. Kapila ka miisa sa imong kamot aron ipahayag ang imong pagtuo? Duna ka bay angayng pauswagon niining bahina? Kon duna, himoang tumong nga mahimo kana sa sunod nga mga semana. Makita ni Jehova ang imong paningkamot sa pagkomento ug hatagan ka niya sa iyang balaang espiritu, nga motabang kanimo nga mas makabenepisyo sa mga tigom.
10. Kon kita naglakaw pinaagi sa espiritu, unsang pagdapit ang atong itanyag sa uban?
10 Ang paglakaw pinaagi sa espiritu naglakip sa pagsanong sa pagdapit nga atong mabasa sa Pinadayag 22:17: “Ang espiritu ug ang pangasaw-onon nagpadayon sa pag-ingon: ‘Umari ka!’ Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” Ang maong espiritu, nga nagalihok pinaagi sa dinihogan nga pangasaw-onong matang, nagtanyag niini nga pagdapit sa pag-inom sa tubig sa kinabuhi. Kon imong gidawat ang maong pagdapit, determinado ka bang moingon usab sa uban, “umari ka!”? Pagkadakong pribilehiyo nga makigbahin niining nagaluwas-ug-kinabuhing buluhaton!
11, 12. Sa unsang paagi ang balaang espiritu nalangkit sa buluhatong pagsangyaw?
11 Kining hinungdanong buluhaton ginahimo karon ilalom sa paggiya sa balaang espiritu. Atong nabasa kon sa unsang paagi ang balaang espiritu nalangkit sa pagbukas ug bag-ong mga teritoryo alang sa mga misyonaryo sa unang siglo. Si apostol Pablo ug ang iyang mga kauban “gidid-an sa balaang espiritu nga isulti ang pulong didto sa distrito sa Asia”; wala usab sila tugti nga moadto sa Bitinia. Wala kita masayod kon sa unsang paagi sila gipugngan sa espiritu sa pag-adto nianang mga dapita, apan tin-aw nga ang espiritu nagtultol kang Pablo ngadto sa dakong teritoryo sa Uropa. Iyang nakita diha sa panan-awon ang usa ka tawong Macedonianhon nga nangayog tabang.—Buh. 16:6-10.
12 Karong adlawa, ang espiritu ni Jehova nagatultol usab sa tibuok-kalibotang pagsangyaw. Si Jehova wala na mogamit ug mga panan-awon sa pagtultol sa mga dinihogan; hinunoa, siya naggiya kanila pinaagi sa balaang espiritu. Ug ang espiritu nagdasig sa mga igsoon sa pagbuhat sa tanan nilang maarangan diha sa pagsangyaw ug pagpanudlo. Sa walay duhaduha, nakigbahin ka niining hinungdanong buluhaton. Mapauswag ba nimo ang imong kalipay sa pagpakigbahin niining buluhatona?
13. Sa unsang paagi nimo ikapakita nga ikaw nagsunod sa pagtultol sa balaang espiritu? Iilustrar.
13 Imong ikapakita nga ikaw nagsunod sa pagtultol sa balaang espiritu pinaagi sa pagpadapat sa impormasyon nga gitagana alang sa katawhan sa Diyos. Tagda ang panig-ingnan sa batan-ong si Mihoko nga taga-Japan. Ingong bag-ong payunir, gibati niya nga wala siyay katakos sa paghimog mga balik-duaw; paminaw niya dili niya mapukaw ang interes sa tagbalay. Nianang panahona, gihisgotan sa Atong Ministeryo sa Gingharian ang praktikal nga mga sugyot kon unsaon paghimog mugbong balik-duaw. Dayon giluwatan ang brosyur nga Makapatagbaw nga Kinabuhi—Kon Unsaon Pag-angkon Niini. Mapuslanon kini ilabina sa ilang teritoryo. Gipadapat ni Mihoko ang mga sugyot kon unsaon pagtanyag ang maong brosyur, ilabina kon unsaon paghimog mugbong balik-duaw. Sa wala madugay, nasugdan niyag panagtuon sa Bibliya kadtong lagmit mobalibad kaniadto. Siya miingon, “Daghan kaayo kog gidumalahag pagtuon—usahay moabot ug 12—mao nga akong giingnan ang uban nga maghulat lang una sila.” Sa pagkatinuod, kon magalakaw ka pinaagi sa espiritu, nga magpadapat sa pagtultol ni Jehova, ikaw magaani nga madagayaon.
Salig sa Espiritu sa Diyos
14, 15. (a) Sa unsang paagi matuman sa dili-hingpit nga mga tawo ang ilang pahinungod? (b) Sa unsang paagi nimo makaplagan ang labing maayong mga higala?
14 Ingong ordinadong ministro, ikaw adunay ministeryo nga pagatumanon. (Roma 10:14) Tingali bation nimo nga kulang kag katakos sa pag-abaga sa maong responsibilidad. Apan, sama sa mga dinihogan, ang Diyos maoy maghatag kanimog katakos. (Basaha ang 2 Corinto 3:5.) Imong matuman ang imong pahinungod pinaagi sa paghimo sa imong maarangan ug pagsalig sa espiritu sa Diyos.
15 Tinuod, dili sayon alang kanatong mga dili-hingpit ang pagtuman sa atong pahinungod kang Jehova, ang atong hingpit nga Diyos. Ang usa ka problema mao nga ang pipila sa imong mga kauban kaniadto basin matingala sa imong bag-ong paagi sa pagkinabuhi ug tingali ‘mosulti nga mapasipalahon kanimo.’ (1 Ped. 4:4) Apan, hinumdomi nga duna ka nay bag-ong mga higala, nga ang labing bililhon kanila mao si Jehova ug si Jesu-Kristo. (Basaha ang Santiago 2:21-23.) Hinungdanon usab nga makigsuod ka sa mga igsoon sa kongregasyon, nga maoy bahin sa “kapunongan sa mga igsoon” sa tibuok kalibotan. (1 Ped. 2:17; Prov. 17:17) Si Jehova pinaagi sa iyang espiritu motabang kanimo nga makabatog mga higala nga padayong mohatag ug maayong impluwensiya kanimo.
16. Nganong ikaw, sama kang Pablo, mahimong ‘magakalipay sa kaluyahon’?
16 Bisan pag duna kay matinabangong mga higala sa kongregasyon, tingali malisdan ka gihapon sa pagsagubang sa adlaw-adlawng mga problema. Usahay mawad-an kag paglaom tungod sa kadaghan sa imong problema. Niining panahona nga ilabinang moduol ka kang Jehova, nga mangayo sa iyang balaang espiritu. Misulat si apostol Pablo: “Sa dihang ako maluya, ako gamhanan hinuon.” (Basaha ang 2 Corinto 4:7-10; 12:10.) Nahibalo si Pablo nga ang espiritu sa Diyos makapalig-on kanato bisag unsa pa kita kaluya. Busa, ang aktibong puwersa sa Diyos makahatag kanimog kusog sa dihang ikaw maluya ug manginahanglag tabang. Si Pablo misulat nga siya “nagakalipay sa kaluyahon.” Nakaingon siya niini kay sa dihang siya maluya iyang gibati nga ang espiritu nagalihok diha kaniya. Mahimong masinati usab nimo kini!—Roma 15:13.
17. Sa unsang paagi ang balaang espiritu makagiya kanimo sa hustong direksiyon?
17 Gikinahanglan nato ang espiritu sa Diyos aron makahimo kita sa pagkinabuhi alang kaniya. Hunahunaa nga ikaw usa ka kapitan sa sakayang-linayagan. Ang imong tumong mao ang pag-alagad kang Jehova sa walay kataposan. Ang balaang espiritu nahisama sa hangin nga imong gikinahanglan aron makaabot ka nga luwas sa imong destinasyon. Dili nimo buot nga madala ngadto-nganhi sa espiritu sa kalibotan ni Satanas. (1 Cor. 2:12) Angay nimong tinoon, ingnon ta, ang direksiyon sa hangin ug molayag nga pabor niana. Kana mao ang balaang espiritu. Pinaagi sa Pulong sa Diyos ug sa iyang tinultolan-sa-espiritu nga organisasyon, ang balaang espiritu mogiya kanimo sa hustong direksiyon.
18. Unsay imong determinasyon karon, ug ngano?
18 Kon ikaw nagtuon na uban sa mga Saksi ni Jehova, nga malipayong nakig-uban kanila, apan wala pa nimo mahimo ang hinungdanong mga lakang sa pagpahinungod ug pagpabawtismo, suknaa ang imong kaugalingon, ‘Nganong nagpanuko man ko?’ Kon imong giila ang papel sa balaang espiritu sa pagtuman sa kabubut-on ni Jehova sa atong adlaw ug gipabilhan ang paglihok niini, nan himoa ang mga lakang nga angay nimong himoon. Si Jehova magapanalangin gayod kanimo. Siya dagayang magatagana kanimo sa iyang balaang espiritu. Kon dugay ka nang nabawtismohan, segurado nga imong naeksperyensiyahan ang paggiya sa balaang espiritu. Imong nakita ug nasinati nga ang Diyos makapalig-on kanimo pinaagi sa iyang espiritu. Mahimo kanang magpadayon—oo, hangtod sa kahangtoran. Busa, magmadeterminado nga magpadayon sa paglakaw pinaagi sa balaang espiritu.
Nahinumdom Ka Ba?
• Unsay buot ipasabot sa “paglakaw pinaagi sa espiritu”?
• Unsay makatabang kanimo sa ‘pagpadayon sa paglakaw pinaagi sa espiritu’?
• Sa unsang paagi nimo matuman ang imong pahinungod?
[Mga Pangutana sa Pagtuon]
[Hulagway sa panid 15]
Ang pag-ugmad sa imong kasingkasing nagkinahanglag paningkamot
[Mga hulagway sa panid 16, 17]
Nailalom ka ba sa impluwensiya sa espiritu sa Diyos?