Pagpabilin Diha sa Pag-uyon sa Diyos Bisan pa sa mga Kausaban

NAG-ATUBANG ka bag mga kausaban sa imong kinabuhi? Nalisdan ka ba sa pagdawat niana? Kadaghanan kanato nakasinati na o makasinati pa lang niana. Ang pipila ka tinuod-kinabuhing mga pananglitan sa Bibliya makatabang kanato nga mahibaloan ang mga hiyas nga mapuslanon kanato.

Pananglitan, tagda si David ug ang daghang kausaban nga iyang nasinati. Siya usa lamang ka batan-ong magbalantay sa dihang gidihogan siya ni Samuel ingong umaabot nga hari. Sa dihang batan-on pa, miboluntaryo siya nga makig-away sa Filistehanong higante nga si Goliat. (1 Sam. 17:26-32, 42) Ang batan-ong si David gidapit ni Haring Saul sa pagpuyo sa palasyo ug gitudlo ingong pangulo sa kasundalohan. Si David wala gayod maghunahuna nga mahitabo kini nga mga kausaban sa iyang kinabuhi; ni magdahom sa sunod nga mahitabo.

Ang relasyon ni David ug Saul dili na maayo. (1 Sam. 18:8, 9; 19:9, 10) Aron maluwas ang iyang kinabuhi, si David kinahanglang magtagotago sulod sa daghang katuigan. Bisan sa dihang naghari na siya sa Israel, nahitabo ang dakong kausaban sa iyang kinabuhi, ilabina human siya makapanapaw ug, agig pagtabon sa iyang sala, iyang gipapatay ang bana sa babaye. Ingong sangpotanan sa iyang sala, nahitabo ang kagubot sa iyang panimalay. Pananglitan, mirebelde ang iyang anak nga si Absalom. (2 Sam. 12:10-12; 15:1-14) Bisan pa niana, human maghinulsol si David sa iyang sala nga pagpanapaw ug pagpatay, gipasaylo siya ni Jehova ug naangkon niya pag-usab ang pag-uyon sa Diyos.

Mahimong makasinati ka usab ug kausaban. Ang suliran sa panglawas, kalisod sa panginabuhi, o problema sa pamilya—bisan ang atong binuhatan—magpahinabog kausaban sa atong kinabuhi. Unsa nga mga hiyas ang makatabang kanato sa pagsagubang niana?

Ang Pagkamapainubsanon Motabang Kanato

Ang pagkamapainubsanon naglangkit ug pagkamapinasakopon. Ang tinuod nga pagkamapainubsanon motabang kanato sa pag-ila sa atong tinuod nga pagkatawo ug nianang sa uban. Pinaagi sa pag-ila sa mga hiyas ug kalamposan sa uban, mas masabtan ug  mas mapabilhan nato ang ilang pagkatawo ug ang ilang ginabuhat. Sa susama, ang pagkamapainubsanon makatabang kanato sa pagsabot kon nganong nahitabo ang kausaban ug kon unsaon pagsagubang niana.

Si Jonatan, nga anak ni Saul, maoy maayong panig-ingnan. Ang iyang kahimtang nausab tungod sa mga hitabo nga dili niya mapugngan. Sa dihang giingnan ni Samuel si Saul nga kuhaon ni Jehova ang iyang gingharian, wala siya moingon nga si Jonatan ang mopuli sa paghari. (1 Sam. 15:28; 16:1, 12, 13) Si David ang gipili sa Diyos, dili si Jonatan. Sa pipila ka paagi, naapektohan si Jonatan sa pagkamasinupakon sa iyang amahan. Bisan tuod dili siya ang manubag sa nahimo ni Saul, si Jonatan dili mopuli sa iyang amahan. (1 Sam. 20:30, 31) Unsay reaksiyon ni Jonatan? Naghambin ba siyag kayugot tungod kay siya nawad-an sa maong oportunidad ug nasina kang David? Wala. Bisan tuod si Jonatan magulang ug edad ug mas taas ug kasinatian, maunongon niyang gipaluyohan si David. (1 Sam. 23:16-18) Ang pagkamapainubsanon nakatabang kaniya nga maila kon kinsay giuyonan sa Diyos, ug siya ‘wala maghunahuna ug labaw bahin sa iyang kaugalingon kay sa angay nga hunahunaon.’ (Roma 12:3) Nasabtan ni Jonatan kon unsay gidahom ni Jehova kaniya ug gidawat niya ang Iyang desisyon labot niana.

Siyempre, daghang kausaban ang magpahinabog kalisdanan. Dihay panahon nga si Jonatan nakiglabot sa duha ka tawo nga suod kaniya. Ang usa mao si David, ang umaabot nga hari, nga iyang higala ug gitudlo ni Jehova. Ang lain mao si Saul, nga iyang amahan, kinsa gisalikway ni Jehova apan naghari pa. Kini nga kahimtang hayan nakapaguol gayod kang Jonatan samtang naningkamot siya nga magpabilin sa pag-uyon ni Jehova. Tungod sa mga kausaban nga kinahanglan natong atubangon, mahimong mobati kitag kabalaka ug kahadlok. Apan kon atong paningkamotan nga masabtan ang panglantaw ni Jehova, kita makapadayon sa pag-alagad kaniya nga maunongon samtang nagsagubang sa mga kausaban.

Kon Nganong Hinungdanon ang Pagkamakasaranganon

Ang pagkamakasaranganon naglangkit ug pag-ila sa atong mga limitasyon. Ang pagkamakasaranganon ug pagkamapainubsanon dili managsama. Ang tawong mapainubsanon mahimong wala mahibalo sa tanan niyang limitasyon.

Si David makasaranganon. Bisan tuod gipili na siya ni Jehova nga mahimong hari, wala gihapon siya makalingkod sa trono sulod sa daghang katuigan. Ang Bibliya wala mag-ingon nga gisultian siya ni Jehova sa rason nganong wala dayon siya makapuli sa trono. Hinunoa, bisan ug morag makapahigawad ang maong kahimtang, wala siya matugaw niana. Siya nahibalo sa iyang mga limitasyon, ug nakasabot nga bisag gitugotan ni Jehova nga mahitabo kana, kontrolado gihapon Niya ang mga butang. Busa, bisag aron sa pagluwas sa iyang kinabuhi, wala patya ni David si Saul, ug gipugngan niya ang iyang kauban nga si Abisai sa pagbuhat niana.—1 Sam. 26:6-9.

Usahay motungha ang usa ka kahimtang sulod sa kongregasyon nga wala nato masabti o para nato, morag wala dumalaha sa labing maayo o organisadong paagi. Magpakita ba kitag pagkamakasaranganon pinaagi sa pag-ila nga si Jesus ang  Ulo sa kongregasyon ug gigamit niya ang lawas sa mga ansiyano sa pagpanguna niana? Magpasundayag ba kitag pagkamakasaranganon, kay nahibalo nga aron magpabilin sa pag-uyon ni Jehova kinahanglang maghulat kita sa iyang giya pinaagi kang Jesu-Kristo? Maghulat ba kita bisag lisod ang paghimo niana?—Prov. 11:2.

Ang Kaaghop Motabang Kanato nga Magmapositibo

Ang kaaghop maoy kalumo sa buot. Motabang kini kanato sa paglahutay nga mapailobon sa kadaot ug dili mapikal, mayugot, o manimalos. Ang kaaghop lisod ugmaron. Makaiikag nga diha sa usa ka teksto, ang ‘mga maaghop sa yuta’ giawhag sa ‘pagpangita sa kaaghop.’ (Sof. 2:3) Ang kaaghop adunay kalambigitan sa pagkamapainubsanon ug pagkamakasaranganon, apan naglakip usab kini sa ubang mga hiyas, sama sa pagkamaayo ug kalumo. Ang tawong maaghop mouswag sa espirituwal kay siya modawat ug pagbansay ug mga instruksiyon.

Sa unsang paagi ang kaaghop makatabang kanato sa pagsagubang sa mga kausaban sa atong kinabuhi? Tingali imong namatikdan nga daghan ang negatibog panglantaw sa mga kausaban. Apan sa pagkatinuod, kini maghatag kanatog kahigayonan nga mabansay pa ni Jehova. Gipakita kana sa kinabuhi ni Moises.

Sa edad nga 40, si Moises aduna nay maayong mga hiyas. Siya mahunahunaon sa panginahanglan sa katawhan sa Diyos ug nagpakitag pagsakripisyo-sa-kaugalingon. (Heb. 11:24-26) Apan sa wala pa siya itudlo ni Jehova sa pagpagawas sa mga Israelinhon sa Ehipto, kinahanglang atubangon ni Moises ang mga kausaban nga naghimo kaniyang mas maaghop. Kinahanglan siyang mokalagiw sa Ehipto ug mopuyo sa Midian sulod sa 40 ka tuig, nga nagtrabaho ingong usa lamang ka magbalantay sa karnero. Unsay resulta? Kini nga kausaban naghimo kaniya nga mas maayong tawo. (Num. 12:3) Iyang nakat-onan ang pag-una sa espirituwal nga mga butang.

Ingong pananglitan sa kaaghop ni Moises, atong tagdon kon unsay nahitabo sa dihang miingon si Jehova nga buot Niyang isalikway ang masinupakong nasod ug himoon ang kaliwat ni Moises nga usa ka gamhanang nasod. (Num. 14:11-20) Si Moises nangatubang alang sa nasod. Ang iyang gipamulong nagpakita nga mas gikabalak-an niya ang kadungganan sa Diyos ug ang kaayohan sa iyang mga igsoon, dili ang iyang kaugalingon. Ang usa ka tawong maaghop nga sama kang Moises maoy gikinahanglan nga manguna sa nasod ug mahimong tigpataliwala. Si Miriam ug Aaron nagbagulbol batok kaniya, bisan pa niana ang Bibliya nag-ingon nga si Moises mao “ang labing maaghop sa tanang tawo.” (Num. 12:1-3, 9-15) Mopatim-aw nga giantos ni Moises ang ilang panginsulto. Unsa kahay nahitabo kon dili pa maaghop si Moises?

Sa laing higayon, gipahinabo sa espiritu ni Jehova nga ang pipila ka tawo managna. Si Josue, nga tig-alagad ni Moises, mibati nga wala silay katungod nga managna. Hinunoa, tungod kay si Moises maaghop, iyang gilantaw ang mga butang  sumala sa panglantaw ni Jehova ug wala siya mabalaka nga mawad-an sa iyang awtoridad. (Num. 11:26-29) Kon dili pa maaghop si Moises, dawaton kaha niya ang maong kausaban sa kahikayan ni Jehova?

Ang kaaghop nakatabang kang Moises nga gamiton sa hustong paagi ang dakong awtoridad nga gihatag kaniya ug ang katungdanan nga gipiyal kaniya sa Diyos. Gidapit siya ni Jehova nga motungas sa Bukid sa Horeb ug moatubang Kaniya alang sa katawhan. Ang Diyos nakigsulti kang Moises pinaagi sa usa ka manulonda ug nagtudlo kaniya ingong tigpataliwala sa pakigsaad. Ang kaaghop ni Moises nakatabang kaniya nga dawaton kining dakong awtoridad ug sa gihapon magpabilin sa pag-uyon sa Diyos.

Komosta kita? Ang kaaghop hinungdanon sa atong pag-uswag. Ang tanan nga gihatagag mga pribilehiyo ug awtoridad taliwala sa katawhan sa Diyos kinahanglang magpakitag kaaghop. Mopugong kana kanato sa pagpasigarbo sa dihang mag-atubag mga kausaban ug motabang kanato sa pag-atubang niana uban ang hustong tinamdan. Ang atong reaksiyon hinungdanon. Dawaton ba nato ang kausaban? Isipon ba nato kana ingong kahigayonan nga mouswag? Ang kausaban mahimong maghatag gani kanatog talagsaong kahigayonan nga maugmad ang kaaghop.

Kanunay kitang mag-atubang ug mga kausaban sa atong kinabuhi. Usahay dili dayon nato masabtan kon nganong nahitabo kini. Tungod sa atong limitasyon ug emosyon mahimong malisdan kita sa paglantaw sa mga butang sumala sa paglantaw ni Jehova niana. Bisan pa niana, ang mga hiyas sama sa pagkamapainubsanon, pagkamakasaranganon, ug kaaghop motabang kanato sa pagdawat sa mga kausaban ug sa pagpabilin diha sa pag-uyon sa Diyos.

[Blurb sa panid 4]

Ang tinuod nga pagkamapainubsanon motabang kanato sa pag-ila sa atong tinuod nga pagkatawo

[Blurb sa panid 5]

Ang kaaghop hinungdanon sa atong pag-uswag

[Hulagway sa panid 5]

Kinahanglang atubangon ni Moises ang mga kausaban nga naghimo kaniyang mas maaghop