Ang Papel sa Balaang Espiritu sa Katumanan sa Katuyoan ni Jehova

“Ang akong pulong nga mogula gikan sa akong baba . . . tinong magpalampos sa butang nga tungod niana kini akong gipadala.”—ISA. 55:11.

1. Iilustrar ang kalainan tali sa plano ug katuyoan.

 HANDURAWA nga dunay duha ka tawo nga nangandam sa pagbiyahe sakay sa ilang awto. Ang usa nagmapa ug espesipiko, detalyadong ruta paingon sa iyang destinasyon. Ang lain nakatultol sa iyang destinasyon, apan daghan usab siyag nahibaloang ruta. Andam siyang mosubayg laing ruta kon gikinahanglan. Sa pipila ka bahin, ang lainlaing paagi nga gigamit niining duha ka tawo nag-ilustrar sa kalainan tali sa plano ug katuyoan. Ang plano mahimong itandi sa pagmapa ug detalyadong ruta, samtang ang katuyoan naglangkit ug pagbatog usa ka tumong nga mahimong kab-oton sa lainlaing paagi.

2, 3. (a) Unsay nalangkit sa katuyoan ni Jehova, ug unsay iyang gibuhat sa dihang nakasala si Adan ug Eva? (b) Nganong kinahanglan kitang molihok nga kaharmonya sa katumanan sa katuyoan ni Jehova?

² Maylabot sa pagtuman sa iyang kabubut-on, si Jehova adunay katuyoan nga anam-anam nga matuman, dili usa ka planong dili mausab. (Efe. 3:11) Naglakip kana sa iyang orihinal nga katuyoan alang sa katawhan ug sa yuta—nga kini mahimong paraisong puy-anan, diin ang hingpit nga mga tawo magkinabuhing malinawon ug malipayon sa walay kataposan. (Gen. 1:28) Sa dihang nakasala si Adan ug Eva, si Jehova mihimog mga kahikayan aron matuman gayod ang iyang katuyoan. (Basaha ang Genesis 3:15.) Gitino ni  Jehova nga ang iyang simbolikong babaye magpatunghag usa ka “binhi,” o Anak, kinsa sa ulahi maglaglag sa usa nga naghulhog sa tawo sa pagpakasala, si Satanas, ug magwagtang sa tanang kadaot nga iyang gipahinabo.—Heb. 2:14; 1 Juan 3:8.

³ Walay usa sa langit o sa yuta ang makapugong sa Diyos sa pagtuman sa iyang katuyoan. (Isa. 46:9-11) Nganong makaingon man kita niana? Tungod kay nalangkit ang balaang espiritu ni Jehova. Kanang dili-mapugngang puwersa naggarantiya nga ang katuyoan sa Diyos ‘tinong molampos.’ (Isa. 55:10, 11) Maalamon gayod nga kita molihok nga kaharmonya sa katumanan sa katuyoan sa Diyos. Ang atong umaabot nga kinabuhi nagdepende sa katumanan niana. Dugang pa, makapalig-on gayod sa pagtuo nga makita kon sa unsang paagi gigamit ni Jehova ang iyang balaang espiritu. Nan, atong hisgotan ang papel sa espiritu—kaniadto, karon, ug sa umaabot—sa katumanan sa katuyoan ni Jehova.

Ang Papel sa Balaang Espiritu Kaniadto

4. Sa unsang paagi anam-anam nga gipadayag ni Jehova ang iyang katuyoan?

⁴ Sa panahon sa Bibliya, anam-anam nga gipadayag ni Jehova ang iyang katuyoan. Sa sinugdan, ang gisaad nga Binhi maoy usa ka “sagradong tinago.” (1 Cor. 2:7) Mga 2,000 ka tuig pa sa ulahi nga gihisgotan pag-usab ni Jehova ang binhi. (Basaha ang Genesis 12:7; 22:15-18.) Gipadayag ni Jehova kang Abraham ang usa ka saad nga may dakong katumanan sa umaabot. Ang ekspresyong “pinaagi sa imong binhi” tin-awng nagpaila nga ang Binhi motungha ingong tawo, usa ka kaliwat ni Abraham. Seguradong gipanid-an pag-ayo ni Satanas ang anam-anam nga pagbutyag sa maong detalye. Sa walay duhaduha, gusto gayod sa maong Kaaway nga laglagon o daoton ang linya sa kaliwat ni Abraham ug sa ingon mapakyas ang katuyoan sa Diyos. Apan dili gayod kana mahitabo tungod kay nagalihok ang dili-makitang espiritu sa Diyos. Sa unsang mga paagi?

5, 6. Sa unsang paagi gigamit ni Jehova ang iyang espiritu sa pagpanalipod sa mga indibiduwal diha sa linya sa kaliwat nga motultol ngadto sa Binhi?

⁵ Gigamit ni Jehova ang iyang espiritu sa pagpanalipod sa mga indibiduwal diha sa linya sa kaliwat nga motultol ngadto sa Binhi. Si Jehova misaad kang Abram (Abraham): “Ako usa ka taming alang kanimo.” (Gen. 15:1) Kasaligan kanang saara. Tagda pananglitan ang nahitabo sa mga 1919 W.K.P., sa dihang si Abraham ug Sara temporaryong nagpuyo sa Gerar. Kay wala mahibalo nga si Sara asawa ni Abraham, si Abimelek, nga hari sa Gerar, nagkuha kang Sara aron himoon niyang asawa. Gimaniobra ba ni Satanas ang maong situwasyon aron mapugngan si Sara sa pagpatungha sa binhi ni Abraham? Ang Bibliya wala maghisgot niana, apan kini nag-ingon nga si Jehova nangilabot. Pinaagig damgo, iyang gipasidan-an si Abimelek nga dili hilabtan si Sara.—Gen. 20:1-18.

⁶ Dili lamang kana ang higayon nga gipanalipdan sila ni Jehova. Daghang higayon nga giluwas ni Jehova si Abraham ug ang iyang pamilya. (Gen. 12:14-20; 14:13-20; 26:26-29) Busa ang salmista nakaingon mahitungod kang Abraham ug sa iyang kaliwat: “Wala siya [si Jehova] motugot nga may bisan kinsang tawo nga manikas kanila, apan tungod kanila iyang gibadlong ang mga hari, nga nagaingon: ‘Ayaw ninyo hilabti ang akong mga dinihogan, ug ayaw buhatig daotan ang akong mga manalagna.’”—Sal. 105:14, 15.

7. Sa unsang mga paagi gipanalipdan ni Jehova ang nasod sa Israel?

⁷ Gigamit ni Jehova ang iyang espiritu sa pagpanalipod sa karaang nasod sa Israel, diin matawo ang gisaad nga Binhi. Pinaagi sa espiritu, gihatag ni Jehova ang iyang Balaod sa Israel, nga nagpreserbar sa matuod nga pagsimba ug nanalipod sa mga Hudiyo batok sa espirituwal, moral, ug pisikal nga kahugawan. (Ex. 31:18; 2 Cor. 3:3) Sa panahon sa mga Maghuhukom, ang espiritu ni Jehova naghatag ug gahom sa pipila ka lalaki aron sa pagluwas sa Israel gikan sa mga kaaway niini. (Maghu. 3:9, 10) Sulod sa kasiglohan una matawo si Jesus, ang pangunang bahin sa binhi ni Abraham, hayan nalangkit ang balaang espiritu  sa pagpanalipod sa Jerusalem, sa Betlehem, ug sa templo—nga ang tanan adunay bahin sa katumanan sa mga tagna labot kang Jesus.

8. Unsay nagpakita nga ang balaang espiritu direktang nalangkit sa kinabuhi ug ministeryo sa Anak sa Diyos?

⁸ Ang balaang espiritu direktang nalangkit sa kinabuhi ug ministeryo ni Jesus. Diha sa tagoangkan sa ulayng si Maria, ang balaang espiritu nakahimog usa ka butang nga wala pa sukad mahitabo. Gipahinabo niini nga ang usa ka dili-hingpit nga babaye manamkon ug manganak ug usa ka hingpit nga Anak, nga wala mailalom sa silot sa kamatayon. (Luc. 1:26-31, 34, 35) Sa ulahi, gipanalipdan sa maong espiritu ang masusong si Jesus batok sa ahat nga kamatayon. (Mat. 2:7, 8, 12, 13) Sa dihang si Jesus nag-edad ug mga 30 anyos, ang Diyos nagdihog kaniya sa balaang espiritu, nga nagtudlo kaniya ingong manununod sa trono ni David ug nagsugo kaniya sa pagsangyaw. (Luc. 1:32, 33; 4:16-21) Ang balaang espiritu naghatag kang Jesus ug gahom sa paghimog mga milagro, lakip na sa pag-ayo sa mga masakiton, pagpakaon sa panon sa katawhan, ug pagbanhaw sa mga patay. Ang maong gamhanang mga buhat maoy pasiuna sa mga panalangin nga atong madahom ilalom sa pagmando ni Jesus.

9, 10. (a) Unsay pamatuod nga ang balaang espiritu nag-uban sa mga tinun-an ni Jesus sa unang siglo? (b) Unsang kaugmaran diha sa katumanan sa katuyoan ni Jehova ang gipadayag sa unang siglo K.P.?

⁹ Sukad sa Pentekostes 33 K.P., gigamit ni Jehova ang iyang espiritu sa pagdihog sa ikaduhang bahin sa binhi ni Abraham, nga daghan kanila dili kaliwat ni Abraham. (Roma 8:15-17; Gal. 3:29) Ang balaang espiritu dayag nga nag-uban sa mga tinun-an ni Jesus sa unang siglo, nga nagtabang kanila sa pagsangyaw nga masiboton ug naghatag kanilag gahom sa paghimog gamhanang mga buhat. (Buh. 1:8; 2:1-4; 1 Cor. 12:7-11) Pinaagi nianang milagrosong mga gasa, ang balaang espiritu nagpadayag ug talagsaong kaugmaran diha sa katumanan sa katuyoan ni Jehova. Dili na buot ni Jehova nga ipadayon ang karaang kahikayan sa pagsimba nga nasentro sa templo sa Jerusalem. Iyang gibalhin ang iyang pag-uyon sa bag-ong natukod nga Kristohanong kongregasyon. Sukad niadto, si Jehova padayong naggamit nianang dinihogang kongregasyon sa pagtuman sa iyang katuyoan.

¹⁰ Ang pagpanalipod, paghatag ug gahom, ug pagdihog maoy pipila lamang sa mga paagi diin gigamit ni Jehova ang balaang espiritu kaniadto aron sa pagtino nga matuman gayod ang iyang katuyoan. Apan, komosta sa atong adlaw? Sa unsang paagi si Jehova naggamit sa iyang espiritu sa pagtuman sa iyang katuyoan? Kinahanglang masayod kita niini, tungod kay buot natong molihok nga kaharmonya sa espiritu. Busa, atong hisgotan ang upat ka paagi diin gigamit ni Jehova ang iyang espiritu karon.

Ang Papel sa Balaang Espiritu Karon

11. Unsay nagpakita nga ang balaang espiritu nagatabang sa katawhan sa Diyos nga magmahinlo, ug sa unsang paagi nimo ikapakita nga nagpagiya ka sa maong espiritu?

¹¹ Una, ang balaang espiritu nagatabang sa katawhan sa Diyos nga magmahinlo. Kadtong adunay bahin sa katuyoan ni Jehova kinahanglang hinlo sa moral. (Basaha ang 1 Corinto 6:9-11.) Ang pipila nga nahimong matuod nga mga Kristohanon nalangkit kaniadto sa imoral nga mga buhat sama sa pakighilawas, panapaw, ug homoseksuwalidad. Ang mga tinguha nga moresulta sa makasasalang mga buhat mahimong nakagamot na pag-ayo. (Sant. 1:14, 15) Bisan pa niana, ang maong mga indibiduwal “nahugasan na,” nga nagpaila nga sila nakahimo nag mga kausaban sa ilang kinabuhi aron pahimut-an ang Diyos. Unsay makatabang sa usa nga nahigugma sa Diyos sa pagsukol sa tinguha nga mobuhat ug daotan? Ang “espiritu sa atong Diyos,” sumala sa 1 Corinto 6:11. Pinaagi sa pagpabiling hinlo sa moral, imong gipakita nga ikaw nagpagiya sa maong espiritu.

12. (a) Sumala sa panan-awon ni Ezequiel, sa unsang paagi gitultolan ni Jehova ang iyang organisasyon? (b) Sa unsang paagi nimo ikapakita nga milihok ka nga kaharmonya sa espiritu?

¹² Ikaduha, si Jehova naggamit sa iyang espiritu sa pagtultol sa iyang organisasyon sa direksiyon nga buot niyang subayon niini. Sa panan-awon ni Ezequiel, ang langitnong bahin sa organisasyon ni Jehova gihulagway ingong usa ka karo nga kanunayng nagaabante aron sa  pagtuman sa iyang katuyoan. Unsay nagpalihok sa karo sa pagsubay ug usa ka direksiyon? Ang balaang espiritu. (Ezeq. 1:20, 21) Atong hinumdoman nga ang organisasyon ni Jehova gilangkoban sa duha ka bahin, ang usa sa langit ug ang lain sa yuta. Kon ang langitnong bahin gitultolan sa balaang espiritu, mao man usab ang yutan-ong bahin. Pinaagi sa imong pagkamasinugtanon ug pagkamatinumanon sa pagtultol nga nadawat gikan sa yutan-ong bahin sa organisasyon sa Diyos, imong gipakita nga ikaw minunot sa langitnong karo ni Jehova ug milihok nga kaharmonya sa iyang balaang espiritu.—Heb. 13:17.

13, 14. (a) Kinsay naglangkob sa ‘kaliwatan’ nga gihisgotan ni Jesus? (b) Paghatag ug pananglitan nga nagpakita nga gigamit ni Jehova ang balaang espiritu sa pagtabang kanato nga masabtan ang kamatuoran. (Tan-awa ang kahong “Mipasignunot Ka ba sa mga Kausaban sa Atong Pagsabot sa Kamatuoran?”)

¹³ Ikatulo, si Jehova naggamit sa balaang espiritu sa pagtabang kanato nga masabtan ang mga kamatuoran sa Bibliya. (Prov. 4:18) Kining magasina dugay nang gigamit sa “matinumanon ug maalamong ulipon” ingong pangunang instrumento sa anam-anam nga pagpadayag sa mga kamatuoran sa Bibliya. (Mat. 24:45) Pananglitan, tagda ang atong pagsabot bahin niadtong naglangkob sa ‘kaliwatan’ nga gihisgotan ni Jesus. (Basaha ang Mateo 24:32-34.) Unsang kaliwatana ang gitumong ni Jesus? Ang artikulong “Ang Presensiya ni Kristo—Unsay Kahulogan Niini Alang Kanimo?” nagpatin-aw nga si Jesus wala magtumong sa mga daotan kondili sa iyang mga tinun-an, nga hapit nang dihogan sa balaang espiritu. a Ang dinihogang mga sumusunod ni Jesus, sa unang siglo ug sa atong adlaw, mao ang makakita sa ilhanan ug makasabot sa kahulogan niana—nga si Jesus “haduol na sa mga pultahan.”

¹⁴ Unsay kahulogan niana kanato? Bisan tuod dili nato masukod ang eksaktong gitas-on niining “kaliwatana,” maayong hinumdoman ang pipila ka butang bahin sa pulong nga “kaliwatan”: Kini kasagarang nagtumong sa mga tawo nga lainlaig pangedaron nga nagkinabuhi sulod sa usa ka yugto sa panahon; kini dili taas kaayo; ug kini dunay kataposan. (Ex. 1:6) Nan, unsaon nato pagsabot ang gipamulong ni Jesus bahin niining “kaliwatana”? Dayag nga iyang gipasabot nga mag-abot ang kinabuhi sa mga dinihogan nga buhi na sa dihang ang ilhanan nagsugod pagkahitabo niadtong 1914 ug ang kinabuhi sa ubang mga dinihogan nga makakita sa pagsugod sa dakong kasakitan. Ang maong kaliwatan adunay sinugdanan, ug tino nga duna kanay kataposan. Ang katumanan sa lainlaing bahin sa ilhanan tin-awng nagpakita nga haduol na gayod  ang kasakitan. Pinaagi sa paghunahuna kanunay sa pagkadinalian sa panahon ug sa pagpadayon sa pagbantay, imong gipakita nga ikaw mipasignunot sa mga kausaban sa atong pagsabot sa kamatuoran ug misunod sa pagtultol sa balaang espiritu.—Mar. 13:37.

15. Unsay nagpakita nga ang balaang espiritu maoy naghatag kanatog kaisog sa pagmantala sa maayong balita?

¹⁵ Ikaupat, ang balaang espiritu naghatag kanatog kaisog sa pagmantala sa maayong balita. (Buh. 1:8) May lain pa bang hinungdan kon nganong ang maayong balita nasangyaw sa tibuok yuta? Hunahunaa kana. Lagmit usa ka niadtong kinsa, tungod tingali sa sobrang kamaulawon o kakulba, naghunahuna, ‘Di gyod ko makahimo sa pagsangyaw sa balay-balay!’ Apan karon masiboton ka na sa maong buluhaton. b Daghang matinumanong mga Saksi ni Jehova ang padayong nagsangyaw bisan pa sa pagsupak o paglutos. Ang balaang espiritu sa Diyos lamang ang makatabang kanato sa pagbuntog sa dagkong kababagan ug sa pagbuhat sa mga butang nga dili nato mahimo sa atong kaugalingong kusog. (Miq. 3:8; Mat. 17:20) Pinaagi sa bug-os nga pagpakigbahin sa buluhatong pagsangyaw, imong gipakita nga nagpagiya ka sa maong espiritu.

Ang Papel sa Balaang Espiritu sa Umaabot

16. Nganong makasalig kita nga panalipdan ni Jehova ang iyang katawhan panahon sa dakong kasakitan?

¹⁶ Sa umaabot, gamiton ni Jehova ang iyang balaang espiritu sa talagsaong mga paagi aron matuman ang iyang katuyoan. Tagda una ang bahin sa panalipod. Sa ato nang nasayran, gigamit ni Jehova ang iyang espiritu kaniadto aron sa pagpanalipod sa mga indibiduwal ingon man sa tibuok nasod sa Israel. Busa, makaseguro gayod kita nga gamiton gihapon niya ang iyang balaang espiritu sa pagpanalipod sa iyang katawhan sa nagsingabot nga dakong kasakitan. Dili kinahanglang managhap kon sa unsang paagi kita panalipdan ni Jehova nianang panahona. Hinunoa, masaligon kitang makalantaw sa umaabot, kay nahibalo kita nga walay usa nga nahigugma kang Jehova ang matago sa iyang panan-aw o dili maabot sa iyang balaang espiritu.—2 Cron. 16:9; Sal. 139:7-12.

17. Sa unsang paagi gamiton ni Jehova ang iyang balaang espiritu sa bag-ong kalibotan?

¹⁷ Sa unsang paagi gamiton ni Jehova ang iyang balaang espiritu sa bag-ong kalibotan? Ang maong espiritu malangkit sa pagsulat sa bag-ong mga linukot nga basahon nga pagabuksan nianang panahona. (Pin. 20:12) Unsay sulod niini? Dayag nga naundan kini sa detalyadong mga sugo ni Jehova kanato sulod sa usa ka libo ka tuig. Naghinamhinam ka ba sa pagsusi niining mga linukot nga basahon? Kita mahinamong nagpaabot nianang bag-ong kalibotan. Dili gayod nato bug-os nga mahanduraw kon sama sa unsa ang pagkinabuhi nianang malipayong panahon sa dihang gamiton ni Jehova ang iyang balaang espiritu sa pagtuman sa iyang katuyoan alang sa yuta ug sa katawhan.

18. Unsay determinado nimong buhaton?

¹⁸ Dili gayod nato kalimtan nga tinong molampos ang katuyoan ni Jehova, kay gamiton niya ang iyang balaang espiritu—ang labing gamhanang puwersa sa uniberso—sa pagtuman niana. Ang maong katuyoan naglangkit kanimo. Busa, magmadeterminado gayod sa pagpangayo sa espiritu ni Jehova ug molihok nga kaharmonya sa pagtultol niini. (Luc. 11:13) Sa ingon, makalaom ka nga mabuhing walay kataposan sa Paraiso sa yuta, nga maoy katuyoan ni Jehova alang sa katawhan.

[Mga footnote]

Nahinumdom Ka Ba?

• Sa unsang mga paagi gigamit ni Jehova ang iyang balaang espiritu kaniadto aron anam-anam nga matuman ang iyang katuyoan?

• Sa unsang paagi gigamit ni Jehova karon ang iyang espiritu?

• Sa unsang paagi gamiton ni Jehova ang iyang espiritu sa umaabot aron sa pagtuman sa iyang katuyoan?

[Mga Pangutana sa Pagtuon]

[Kahon sa panid 10]

Mipasignunot Ka ba sa mga Kausaban sa Atong Pagsabot sa Kamatuoran?

Padayong gipatin-aw ni Jehova ang mga kamatuoran sa Bibliya sa iyang katawhan. Unsa ang pipila ka kausaban nga gipatik sa Ang Bantayanang Torre?

▪ Unsang positibong leksiyon maylabot sa espirituwal nga pagtubo ang gihisgotan diha sa ilustrasyon ni Jesus bahin sa lebadura? (Mat. 13:33)—Hulyo 15, 2008, panid 19-20.

▪ Kanus-a matapos ang pagtawag sa mga Kristohanon alang sa langitnong paglaom?—Mayo 1, 2007, panid 30-31.

▪ Unsay kahulogan sa pagsimba kang Jehova “sa espiritu”? (Juan 4:24)—Hulyo 15, 2002, panid 15.

▪ Sa unsa nga sawang nag-alagad ang dakong panon? (Pin. 7:15)—Mayo 1, 2002, panid 30-31.

▪ Kanus-a mahitabo ang paglain sa mga karnero gikan sa mga kanding? (Mat. 25:31-33)—Oktubre 15, 1995, panid 18-28.