Buot ni Jehova nga Ikaw Mahimong “Luwas ug Maayo ang Kahimtang”

SA DIHANG magsugod na ang labing peligrosong hitabo sa kasaysayan, tinoon sa Labing Gamhanang Diyos nga ang tanan niyang giuyonan “maluwas.” (Joel 2:32) Apan sa pagkatinuod, sukad pa kaniadto nga si Jehova nagpanalipod sa iyang katawhan. Sanglit ‘siya ang tuboran sa kinabuhi,’ giisip niya ang tanang tawo nga bililhon ug takos panalipdan.—Sal. 36:9.

Ingon usab niana ang panglantaw sa matinumanong mga alagad sa Diyos sa karaang panahon. Sumala sa Genesis 33:18, si Jacob ug ang iyang pamilya miabot gikan sa usa ka peligrosong panaw nga “luwas ug maayo ang kahimtang.” Misalig si Jacob kang Jehova, apan duna usab siyay gihimo aron mapanalipdan ang tanang mipanaw uban kaniya. (Gen. 32:7, 8; 33:14, 15) Kon imong sundon ang mga prinsipyo sa Bibliya, mas layo ka sa peligro maingon man usab ang uban. Atong tan-awon kon sa unsang paagi kini mapadapat niadtong nagtukod ug mga Kingdom Hall ug susamang mga proyekto ug niadtong nagtabang sa mga naapektohan sa katalagman.

Kahilwas Ilalom sa Balaod ni Moises

Ang Balaod ni Moises adunay mga lagda labot sa kahilwas. Pananglitan, ang usa ka Israelinhon nga magtukod ug balay gisugo sa pagbutang ug ali, o barandilya, palibot sa atop. Sanglit ang mga tawo sagad mangadto sa patag nga atop sa ilang balay, ang mga ali magsilbing proteksiyon. (1 Sam. 9:26; Mat. 24:17) Kon dunay mahulog kay wala sunda kining balaora, manubag ang tagbalay kang Jehova.—Deut. 22:8.

Ang mga silot nga gilatid sa Balaod mapadapat usab sa kadaot nga gipahinabo sa binuhing mga hayop. Kon ang usa ka torong baka makapatayg tawo, kinahanglang patyon sa tag-iya ang baka aron dili na kini makapanungay sa uban. Sanglit dili man niya makaon o mabaligya ang karne, dako ang mawala kaniya. Apan unsa na man kon human manungay ang baka, wala gihapon kini bantayi sa tag-iya? Kon makapatay kini sa ulahi, ang baka ug ang tag-iya niini pagapatyon. Kini nga balaod mag-aghat sa usa nga mag-amping sa iyang binuhing hayop.—Ex. 21:28, 29.

Gilatid usab sa Balaod ang hustong paggamit sa mga himan. Daghang Israelinhon ang mogamit ug atsa sa pagbughag kahoy. Kon mahuso ang ulo sa atsa ug dunay maigo ug mamatay, ang nakapatay kinahanglang mokalagiw ngadto sa siyudad nga dalangpanan. Kinahanglang magpabilin siya didto hangtod mamatay ang hataas nga saserdote, nga magpasabot nga ang dili-tinuyong nakapatay mahimulag sa iyang pamilya sulod sa daghang katuigan. Ang maong kahikayan nagtudlo sa nasod nga sagrado ang kinabuhi alang kang Jehova. Ang tawo nga susamag panglantaw sa Diyos kinahanglang mag-amping sa paggamit sa iyang mga galamiton ug  paneguroon niya nga anaa kini sa maayong kondisyon.—Num. 35:25; Deut. 19:4-6.

Pinaagi sa maong mga balaod, gipakita ni Jehova nga buot niyang mag-amping ang iyang katawhan sa sulod ug gawas sa balay. Kadtong nakapatay ug nakapahinabog kadaot sa uban, bisag wala tuyoa, kinahanglang manubag kaniya. Wala mausab ang panglantaw ni Jehova maylabot sa kahilwas. (Mal. 3:6) Buot gihapon niya nga mag-amping ang mga tawo aron dili makapahinabog kadaot sa ilang kaugalingon ug sa uban. Tinuod kini ilabina sa dihang kita magtukod ug magmentinar ug mga pasilidad alang sa matuod nga pagsimba.

 Kahilwas Diha sa Pagpanukod

Atong giisip nga dakong pribilehiyo ang pagtukod ug pagmentinar sa mga Kingdom Hall, Assembly Hall, ug sa mga sangang buhatan. Mao man usab ang buluhaton sa paghatag ug hinabang sa mga naapektohan sa katalagman. Sa tanang panahon, buot natong himoon ang atong buluhaton sa hanas nga paagi, bisan sa ginagmayng trabaho, kay kon dili, mahimong makapahinabo kinig kadaot kanato ug sa uban. (Eccl. 10:9) Sa pagkatinuod, kon atong batasanon ang pagtrabaho sa luwas nga paagi, malikayan nato ang kadaot.

Ang Bibliya nag-ingon: “Ang katahom sa batan-ong mga lalaki mao ang ilang kusog, ug ang kahalangdon sa mga tigulang mao ang ilang pagkaubanon.” (Prov. 20:29) Gikinahanglan ang kusog sa mga batan-on alang sa bug-at nga mga trabaho. Apan ang tigulang nang mga trabahador—kadtong eksperyensiyado na sa pagpanukod— nagahimo sa makuting mga trabaho sama sa pagmolding ug uban pa. Ug niadtong batan-on pa sila, gigamit nila ang ilang kusog sa paghimog bug-at nga mga trabaho. Kon bag-ohan ka pa nga boluntaryo, panid-i ang pamaagi sa eksperyensiyadong mga igsoon, ug sunda ang ilang instruksiyon. Kon buot kang mokat-on, daghan silag ikatudlo nimo. Apil niana ang luwas nga paggamit sa peligrosong materyales ug ang pag-alsag bug-at nga mga butang. Sa ingon, daghan kag  malampos, ug makatrabaho ka nga luwas ug malipayon.

Kinahanglang alisto kanunay ang magtrabaho sa konstruksiyon kay dali rang mausab ang kahimtang. Basin duna nay gikalot nga lungag o kaha gibalhin sa ubang mga trabahador ang hagdan, tabla, o balde sa pintura. Kon wala ka kabantay, basin madisgrasya ka. Sagad nga ilatid diha sa mga lagda sa kahilwas nga ang mga trabahador magsul-ob ug mga gamit alang sa kahilwas. Ang mga antipara, helmet, ug haom nga sapatos makapanalipod kanimo. Apan mapanalipdan ka lang kon imo kanang gamiton ug kon maayo kanag kondisyon.

Bisan tuod daghang himan ang morag sayon gamiton, kinahanglan ka unang magbansay ug magpraktis aron magamit kana sa luwas ug hanas nga paagi. Kon wala ka pa kasulayg gamit sa usa ka himan, pahibaloa ang nagdumala sa konstruksiyon. Iyang hikayon nga mabansay ka niana. Ang pagkamakasaranganon, o pag-ila sa imong mga limitasyon, maoy dalayegong hiyas. Sa pagkatinuod, gikinahanglan kini aron dili ka makapahinabog kadaot sa imong kaugalingon ug sa uban.—Prov. 11:2.

Ang pagkahulog maoy usa sa pangunang mga disgrasya diha sa konstruksiyon. Sa dili pa mosakag hagdan o damba, paneguroa nga kini luwas gamiton ug maayog kondisyon. Kon magtrabaho ka diha sa damba o sa atop, mahimong ilatid sa mga lagda sa kahilwas nga kinahanglan kang magsul-ob ug harness o magbutang ug ali. Duola ang nagdumala sa konstruksiyon kon duna kay pangutana bahin sa pagtrabaho diha sa habog nga mga dapit. a

Samtang nag-uswag ang gidaghanon sa mga Saksi ni Jehova sa tibuok kalibotan, mao man usab ang panginahanglan sa pagtukod ug mga Kingdom Hall ug ubang pasilidad alang sa putling pagsimba. Kadtong nagdumala sa maong mga proyekto adunay responsibilidad nga protektahan ang bililhong mga karnero ni Jehova nga nagboluntaryo sa maong buluhaton. (Isa. 32:1, 2) Kon gihatagan kag pribilehiyo nga magdumala sa maong mga proyekto, ayaw gayod kalimti nga hinungdanon kaayo ang kahilwas. Paneguroa nga hinlo ug hapsay ang dapit sa konstruksiyon. Sultii sa maluloton ug tin-aw nga paagi kadtong nagkinahanglag pahinumdom bahin sa hilwas nga pagtrabaho. Ayawg tugoti ang dili pa eksperyensiyadong mga trabahador sa pag-adto sa peligroso kaayong mga dapit sa konstruksiyon. Hunahunaang daan ang posibleng mga kapeligrohan nga atubangon sa mga trabahador, ug hatagi silag instruksiyon kon unsaon pagtrabaho nga luwas. Hinumdomi nga ang atong tumong mao ang pagtapos sa proyekto nga walay disgrasyang mahitabo.

Ang Papel sa Gugma

Ang pagpanukod ug Kingdom Hall ug ubang pasilidad alang sa matuod nga pagsimba hayan maglangkit ug peligrosong mga trabaho. Busa, kinahanglang mag-amping ang moboluntaryo sa maong mga proyekto. Pinaagi sa pagsunod sa mga prinsipyo sa Bibliya, pagtuman sa mga lagda nga gilatid alang sa trabaho, ug paggamit ug maayong panghukom, imong malikayan ang disgrasya ug mapanalipdan usab ang imong mga isigka-trabahador.

Unsa ang pangunang motibo nga magtukmod kanato sa pagpabili sa kahilwas? Ang gugma. Oo, ang atong gugma kang Jehova magtukmod kanato nga pabilhan ang kinabuhi, sama sa iyang panglantaw niana. Ug ang atong gugma sa mga tawo magpalihok kanato nga mag-amping aron dili makapahinabog kadaot kanila. (Mat. 22:37-39) Busa, buhaton nato ang atong maarangan aron kadtong nagtrabaho diha sa mga proyekto mahimong “luwas ug maayo ang kahimtang.”

[Footnote]

[Kahon/Hulagway sa panid 30]

Kon Unsaon Paggamit ang Hagdan sa Luwas nga Paagi

Di pa dugay sa United States, kapig 160,000 ka trabahador ang nasamdan o napiang gumikan sa pagkahulog sa hagdan. Gawas pa niana, mga 150 ang namatay. Bisan asa ka nagpuyo o nagtrabaho, aniay pipila ka giya nga makatabang kanimo aron malikayan ang pagkahulog sa hagdan.

◇ Ayaw paggamit ug nagkango-kango o gubaon nga hagdan, ug ayaw na kanag ayoha. Gub-a na lang kana.

◇ Ang tanang hagdan dunay limite sa madaog niini. Paneguroa nga ang imong timbang lakip na ang gibug-aton sa mga himan ug materyales nga imong dad-on dili molapas sa gibug-aton nga madaog sa hagdan.

◇ Ibutang ang hagdan diha sa patag, dili matarog nga puwesto. Ayaw kanag ibutang sa mairog-irog nga tungtonganan, sama sa damba, balde, o kahon.

◇ Mag-atubang kanunay sa hagdan sa dihang mosaka o manaog.

◇ Ayawg tindog o lingkod sa kinaibabwang duha ka ang-ang.

◇ Kon mogamit ug hagdan aron mosaka, pananglitan, sa atop, kinahanglang molapas kini sa atop ug labing menos usa ka metros. Aron dili matumba ang hagdan, ihigot ang tiil niini o lansangig tabla ang atubangan niini. Kon dili nimo kana mahimo, pakupti kini. Ihigot pag-ayo ang ibabaw sa hagdan aron dili kini motakilid.

◇ Ayawg himoa ang hagdan nga tukod sa damba.

◇ Ayaw pagkab-ot ug pagtikang nga layo sa hagdan samtang nagtrabaho sa habog nga lugar, kay basig matumba kini. Ibalhin ang hagdan duol sa imong gitrabaho.

◇ Kon kinahanglan nimong ibutang ang hagdan atubangan sa sirado nga pultahan, pagbutang ug pahibalo diha sa pultahan ug kandadohi kana. Kon dili kana makandadohan, paneguroa nga dunay magbantay aron sa pagpasidaan niadtong buot moagi.

◇ Kinahanglang usa ray mosaka sa hagdan gawas kon gidisenyo kana para sa duha. b

[Footnote]

[Hulagway sa panid 29]

Gilatid diha sa Balaod ni Moises nga butangag ali ang mga atop