Mga Batan-on—Palig-ona ang Inyong Tinguha nga Moalagad Kang Jehova
Mga Batan-on—Palig-ona ang Inyong Tinguha nga Moalagad Kang Jehova
“Hinumdomi, karon, ang imong Dakong Maglalalang sa mga adlaw sa imong pagkabatan-on.”—ECCL. 12:1.
1. Unsang pagdapit ang gipaabot ngadto sa mga bata sa Israel?
MGA 3,500 ka tuig kanhi, ang manalagna ni Jehova nga si Moises nagsugo sa mga saserdote ug ansiyano sa Israel: “Tigoma ang katawhan, ang mga lalaki ug ang mga babaye ug ang mga bata . . . , aron sila mamati ug aron sila makakat-on, sanglit angay silang mahadlok kang Jehova nga inyong Diyos ug magmatngon sa pagtuman sa tanang pulong niini nga balaod.” (Deut. 31:12) Matikdi kon kinsay gisugo sa pagtambong sa mga tigom sa pagsimba: mga lalaki, babaye, ug mga bata. Oo, bisan ang mga bata nalakip niadtong giingnan nga mamati, mokat-on, ug mosunod sa mga sugo ni Jehova.
2. Sa unsang paagi gipakita ni Jehova ang iyang kahangawa sa mga batan-on sa unang Kristohanong kongregasyon?
2 Sa unang siglo, si Jehova padayong nagpakitag kahangawa sa Kristohanong mga batan-on. Pananglitan, iyang giinspirar si apostol Pablo nga ilakip ang mga instruksiyon para sa mga batan-on diha sa pipila niya ka sulat ngadto sa mga kongregasyon. (Basaha ang Efeso 6:1; Colosas 3:20.) Ang mga batan-on nga nagpadapat sa maong tambag nahimong mas mapabilhon sa ilang mahigugmaon nga langitnong Amahan ug nakadawat sa iyang panalangin.
3. Sa unsang paagi gipakita sa mga batan-on karon ang ilang tinguha nga moalagad sa Diyos?
3 Gidapit ba usab ang mga batan-on karon sa pagtigom aron sa pagsimba kang Jehova? Oo! Busa, kalipay gayod sa tanang katawhan ni Jehova nga makita nga daghan kaayong batan-ong mga alagad sa Diyos sa tibuok kalibotan ang nagpatalinghog sa awhag ni Pablo: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.” (Heb. 10:24, 25) Dugang pa, daghang mga bata ang nakig-ambit sa pagsangyaw sa maayong balita sa Gingharian sa Diyos uban sa ilang mga ginikanan. (Mat. 24:14) Ug ingong pamatuod sa ilang tiunayng gugma kang Jehova, linibo ka batan-on matag tuig ang nagpabawtismo ug nakatagamtam ug mga panalangin tungod sa pagkahimong tinun-an ni Kristo.—Mat. 16:24; Mar. 10:29, 30.
Dawata Na Karon ang Pagdapit
4. Kanus-a angayng dawaton sa mga batan-on ang pagdapit sa Diyos nga moalagad kaniya?
4 Ang Ecclesiastes 12:1 nag-ingon: “Hinumdomi, karon, ang imong Dakong Maglalalang sa mga adlaw sa imong pagkabatan-on.” Mga batan-on, kanus-a ninyo dawaton ang pagdapit nga simbahon ug alagaron si Jehova? Walay espesipikong edad nga giingon sa Bibliya. Busa, ayaw pagpanuko kay inyong gihunahuna nga bata pa kaayo kamo nga mamati kang Jehova ug moalagad kaniya. Bisan unsay inyong edad, gidasig kamo nga dawaton na karon ang maong pagdapit.
5. Sa unsang paagi matabangan sa mga ginikanan ang ilang mga anak nga mouswag sa espirituwal?
5 Daghan kaninyo ang natabangan sa inyong mga ginikanan nga mouswag sa espirituwal. Niining bahina, nahisama kamo kang Timoteo. Bisan sa masuso pa siya, gitudloan na siya sa iyang inahan nga si Eunice, ug sa iyang apohan nga si Loida sa balaang mga sinulat. (2 Tim. 3:14, 15) Lagmit nga ang inyong mga ginikanan nagbansay usab kaninyo pinaagi sa pagdumala kaninyog pagtuon sa Bibliya, pag-ampo uban kaninyo, pagdala kaninyo sa mga tigom, mga asembliya, ug sa kanataran. Sa pagkatinuod, ang pagtudlo kaninyo sa mga paagi sa Diyos maoy hinungdanon kaayong responsibilidad nga gisangon ni Jehova sa inyong mga ginikanan. Gipabilhan ba ninyo ang ilang gugma ug kahangawa kaninyo?—Prov. 23:22.
6. (a) Sumala sa Salmo 110:3, unsang matanga sa pagsimba ang makapahimuot kang Jehova? (b) Unsay atong hisgotan karon?
6 Hinunoa, samtang magkahingkod kamo, gusto ni Jehova nga inyong ‘pamatud-an sa inyong kaugalingon ang maayo ug dalawaton ug hingpit nga kabubut-on sa Diyos,’ sama sa gibuhat ni Timoteo. (Roma 12:2) Kon himoon ninyo kana, kamo makig-ambit sa mga buluhaton sa kongregasyon, dili tungod kay mao nay gusto sa inyong mga ginikanan, kondili tungod kay gusto ninyong buhaton ang kabubut-on sa Diyos. Kon kamo kinabubut-ong mag-alagad kang Jehova, kana makapahimuot kaniya. (Sal. 110:3) Nan, sa unsang paagi ninyo ikapakita nga buot ninyong palig-onon ang inyong tinguha nga mamati kang Jehova ug mosunod sa iyang mga sugo? Atong hisgotan ang tulo ka hinungdanong paagi nga mahimo ninyo kana. Kini mao ang pagtuon, pag-ampo, ug panggawi. Atong susihon ang matag usa niini.
Ilha si Jehova Ingong Persona
7. Sa unsang paagi si Jesus nagpakitag maayong panig-ingnan ingong estudyante sa Kasulatan, ug unsay nakatabang kaniya?
7 Ang unang paagi nga ikapakita ninyo nga gusto ninyong palig-onon ang inyong tinguha nga moalagad kang Jehova mao ang pagbasa sa Bibliya sa adlaw-adlaw. Kon regular ninyong basahon ang Pulong sa Diyos, inyong matagbaw ang inyong espirituwal nga panginahanglan ug mabatonan ang bililhong kahibalo sa Bibliya. (Mat. 5:3) Si Jesus naghatag ug maayong panig-ingnan nianang bahina. Sa nag-edad siyag 12 anyos, dihay higayon nga nakaplagan siya sa iyang ginikanan didto sa templo, “nga naglingkod taliwala sa mga magtutudlo ug nagpatalinghog kanila ug nangutana kanila.” (Luc. 2:44-46) Bisag bata pa si Jesus, duna na siyay dulot nga interes ug pagsabot sa Kasulatan. Unsay nakatabang kaniya? Sa walay duhaduha ang iyang inahan nga si Maria ug ang iyang amaama nga si Jose adunay hinungdanong papel nianang bahina. Sila maoy mga alagad ni Jehova kinsa nagtudlo kang Jesus sa mga sugo sa Diyos sukad sa iyang pagkamasuso.—Mat. 1:18-20; Luc. 2:41, 51.
8. (a) Kanus-a angayng sugdan sa mga ginikanan ang pagsilsil sa gugma sa Pulong sa Diyos diha sa ilang mga anak? (b) Pag-asoy ug usa ka eksperyensiya nga nagpamatuod nga hinungdanon ang pagbansay sa mga anak sukad sa pagkamasuso.
8 Sa susama, ang mahinadlokon-sa-Diyos nga mga ginikanan karon nasayod nga hinungdanong masilsil sa kasingkasing sa ilang mga anak ang dulot nga interes sa kamatuoran sa Bibliya sukad sa pagkamasuso. (Deut. 6:6-9) Mao kanay gihimo sa usa ka sister nga ginganlag Rubi human sa pagkatawo sa iyang unang anak nga si Joseph. Kada adlaw, basahan niya ang iyang anak sa Akong Basahon sa mga Estorya sa Bibliya. Samtang nagdako si Joseph, gitabangan niya kini sa pagmemoryag pipila ka teksto. Nakabenepisyo ba si Joseph sa maong pagbansay? Sa dihang makamao na siyang mosulti, makaasoy na siyag daghang estorya sa Bibliya. Ug sa nag-edad siyag singko anyos, gihatag niya ang iyang unang bahin sa Teokratikanhong Tunghaan sa Ministeryo.
9. Nganong hinungdanon ang pagbasa sa Bibliya ug pagpamalandong sa inyong nabasa?
9 Aron mouswag pa sa espirituwal, angayng batasanon ninyong mga batan-on ang pagbasa sa Bibliya sa adlaw-adlaw ug padayona kini bisag hamtong na kamo. (Sal. 71:17) Nganong ang pagbasa sa Bibliya makatabang kaninyo nga mouswag? Matikdi kon unsay giingon ni Jesus sa iyang Amahan diha sa pag-ampo: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos.” (Juan 17:3) Sa pagkatinuod, samtang nagkadako ang inyong kahibalo bahin kang Jehova, mas tin-aw ninyong masabtan nga siya usa ka tinuod nga Persona ug mas molalom ang inyong gugma kaniya. (Heb. 11:27) Busa, sa dihang magbasa kamo sa Bibliya, paningkamoti nga makakat-on ug dugang pa bahin kang Jehova. Pangutan-a ang inyong kaugalingon: ‘Unsay gitudlo niini kanako bahin kang Jehova ingong Persona? Sa unsang paagi kini nagpakita sa gugma ug kahangawa sa Diyos kanako?’ Ang paggahig panahon sa pagpamalandong sa maong mga pangutana motabang kaninyo sa pagkasayod sa hunahuna ug pagbati ni Jehova ug sa iyang mga sugo. (Basaha ang Proverbio 2:1-5.) Sama kang Timoteo, kamo ‘makombinsir sa pagtuo’ sa inyong nakat-onan gikan sa Kasulatan, ug matukmod sa pag-alagad kang Jehova nga kinabubut-on.—2 Tim. 3:14.
Ang Pag-ampo Makapalalom sa Inyong Gugma Kang Jehova
10, 11. Sa unsang paagi ang pag-ampo makatabang kaninyo sa pagpalig-on sa inyong tinguha nga moalagad sa Diyos?
10 Ang ikaduhang paagi nga mapalig-on ninyo ang inyong tinguha nga moalagad kang Jehova nga kinasingkasing mao ang pag-ampo. Sa Salmo 65:2, atong mabasa: “Oh Tigpatalinghog sa pag-ampo, nganha kanimo moduol ang tanang matang sa katawhan.” Bisan sa panahon nga ang Israel maoy katawhan nga gipakigsaaran sa Diyos, ang mga langyaw nga moadto sa templo ni Jehova makaduol kaniya pinaagi sa pag-ampo. (1 Hari 8:41, 42) Ang Diyos walay pinalabi. Kadtong nagtuman sa iyang mga sugo makalaom nga siya magpatalinghog kanila. (Prov. 15:8) “Ang tanang matang sa katawhan” seguradong naglakip kaninyong mga batan-on.
11 Nahibalo kamo nga ang pundasyon sa tinuod nga panaghigalaay mao ang maayong komunikasyon. Lagmit, ganahan mong moestorya sa inyong suod nga higala kon unsay inyong gihunahuna, gikabalak-an, ug gibati. Sa susama, pinaagi sa kinasingkasing nga pag-ampo, kamo nakigkomunikar sa inyong Dakong Maglalalang. (Filip. 4:6, 7) Isulti kang Jehova ang inyong kinasulorang pagbati sama sa inyong pagpahayag niana sa usa ka mahigugmaong ginikanan o suod nga higala. Sa pagkatinuod, dunay dakong kalambigitan tali sa inyong pag-ampo ug sa inyong pagbati kang Jehova. Inyong mamatikdan nga samtang mas masuod kamo kang Jehova, mahimong mas makahuloganon ang inyong mga pag-ampo.
12. (a) Nganong ang makahuloganong mga pag-ampo wala lamang maglangkit ug mga pulong? (b) Unsay motabang kaninyo sa pagkaamgo nga si Jehova haduol kaninyo?
12 Apan hinumdomi nga ang makahuloganong pag-ampo wala lamang maglangkit ug mga pulong. Naglakip kana sa inyong kinasulorang pagbati. Sa inyong mga pag-ampo, ipahayag ang inyong mainitong gugma, halalom nga pagtahod, ug bug-os nga pagsalig kang Jehova. Samtang inyong makita kon sa unsang paagi gitubag ni Jehova ang inyong mga pag-ampo, inyo gayong maamgohan nga ‘si Jehova haduol niadtong tanan nga nagatawag kaniya.’ (Sal. 145:18) Oo, si Jehova moduol kaninyo, nga magpalig-on kaninyo aron kamo makasukol sa Yawa ug makahimog hustong mga desisyon.—Basaha ang Santiago 4:7, 8.
13. (a) Sa unsang paagi ang pagpakighigala sa Diyos nakatabang sa usa ka sister? (b) Sa unsang paagi ang pagpakighigala sa Diyos makatabang kaninyo sa pagbuntog sa pagpit-os sa isigkaingon?
13 Tagda kon sa unsang paagi si Cherie nakabatog kalig-on gumikan sa iyang suod nga relasyon kang Jehova. Samtang nagtungha pa siya sa hayskul, nakadawat siyag mga pasidungog tungod sa iyang kahawod sa klase ug sa esport. Paggraduwar niya, gitanyagan siyag libreng pagtuon sa kolehiyo. “Makapadani kaayo ang tanyag,” miingon si Cherie, “ug giaghat ko sa mga coach ug sa akong mga isigkaestudyante nga dawaton kana.” Apan iyang naamgohan nga ang pagkab-ot ug dugang edukasyon magpasabot nga gamiton niya ang halos tanan niyang panahon sa pagtuon ug sa pag-ensayo sa mga dula—nga diyutay na lang ang mahibilin sa pag-alagad kang Jehova. Unsay gihimo ni Cherie? Siya miingon, “Human moampo kang Jehova, akong gibalibaran ang tanyag ug ako nagregular payunir.” Sa pagkakaron, lima ka tuig na siyang nagpayunir. “Wala gyod ko magmahay,” siya miingon. “Nalipay ko nga ang akong desisyon nakapahimuot kang Jehova. Sa pagkatinuod, kon unahon nimo ang Gingharian sa Diyos, ang ubang mga butang igadugang ra kanimo.”—Mat. 6:33.
Ang Maayong Panggawi Magpaila nga Kamo “Mahinlo sa Kasingkasing”
14. Nganong hinungdanon man kang Jehova ang inyong maayong panggawi?
14 Ang ikatulong paagi nga inyong ikapakita nga kamo kinabubut-ong nag-alagad kang Jehova maoy pinaagi sa inyong panggawi. Panalanginan ni Jehova ang mga batan-on nga nagpabiling hinlo sa moral. (Basaha ang Salmo 24:3-5.) Wala sundoga sa batan-ong si Samuel ang imoral nga panggawi sa mga anak sa hataas nga saserdoteng si Eli. Daghan ang nakamatikod sa maayong panggawi ni Samuel. Ang Bibliya nag-ingon: “Sa kasamtangan ang batang si Samuel nagkadako ug labaw pang gikahimut-an sa panglantaw ni Jehova ug sa mga tawo.”—1 Sam. 2:26.
15. Unsa ang pipila ka rason kon nganong huptan ninyo ang maayong panggawi?
15 Kita nagkinabuhi sa kalibotan nga puno sa mga tawong mahigugmaon sa kaugalingon, mapagawalon, dili-masinugtanon sa mga ginikanan, dili-mapasalamaton, dili-maunongon, mabangis, mapasigarbohon, mahigugmaon sa kalipayan inay nga mga mahigugmaon sa Diyos—sa paghisgot lag pipila sa mga kinaiya nga gisulat ni Pablo. (2 Tim. 3:1-5) Busa, hayan nga malisdan kamo sa paghupot ug maayong panggawi taliwala niining daotang kalibotan. Apan, sa matag higayon nga kamo mobuhat ug matarong ug molikay sa dili-diyosnong panggawi, inyong gipamatud-an nga kamo dapig kang Jehova sa isyu sa unibersohanong pagkasoberano. (Job 2:3, 4) Malipay usab kamo kay misanong kamo sa mahigugmaong hangyo ni Jehova: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” (Prov. 27:11) Dugang pa, ang pagkahibalo nga kamo giuyonan ni Jehova magpalig-on sa inyong tinguha nga moalagad kaniya.
16. Sa unsang paagi napalipay sa usa ka sister ang kasingkasing ni Jehova?
16 Sa tin-edyer pa, ang usa ka sister nga ginganlag Carol nangupot sa mga prinsipyo sa Bibliya samtang nag-eskuyla, ug namatikdan sa uban ang iyang maayong panggawi. Unsay nahitabo? Gibugalbugalan si Carol sa iyang mga klasmet tungod kay dili motugot ang iyang nabansay-sa-Bibliya nga konsensiya nga moapil siya sa mga selebrasyon ug patriotikong mga seremonyas. Nianang mga panahona, makahigayon siya usahay sa pagpatin-aw sa iyang baroganan. Mga katuigan sa ulahi, nakadawat si Carol ug kard gikan sa iyang klasmet kaniadto, kinsa misulat: “Dugay na kong gustong magpasalamat nimo. Akong namatikdan ang imong maayong panggawi ug ehemplo ingong Kristohanong batan-on, lakip na ang imong lig-ong baroganan maylabot sa mga selebrasyon. Ikaw ang unang Saksi ni Jehova nga akong nakaila.” Nakadayeg kaayo ang klasmet ni Carol sa iyang maayong ehemplo mao nga sa ulahi nagtuon kini sa Bibliya. Diha sa iyang kard, iyang giingnan si Carol nga kapig 40 ka tuig na siyang Saksi! Sama kang Carol, kamong mga batan-on nga lig-ong nangupot sa mga prinsipyo sa Bibliya mahimong magpalihok sa matinud-anog-kasingkasing nga mga indibiduwal nga ilhon si Jehova.
Mga Batan-ong Nagdayeg Kang Jehova
17, 18. (a) Unsay imong pagbati sa mga batan-on sa inyong kongregasyon? (b) Unsay malaoman sa mahinadlokon-sa-Diyos nga mga batan-on?
17 Kitang tanan nga sakop sa tibuok-kalibotang organisasyon ni Jehova malipay gayod nga makita ang libolibong masibotong mga batan-on nga nakigbahin sa matuod nga pagsimba! Kini nga mga batan-on nagpalig-on sa ilang tinguha nga mosimba kang Jehova pinaagi sa pagbasa sa Bibliya sa adlaw-adlaw, pag-ampo, ug sa paggawi nga kaharmonya sa kabubut-on sa Diyos. Ang maong sulondang mga batan-on makapadasig sa ilang mga ginikanan ug sa tanang katawhan ni Jehova.—Prov. 23:24, 25.
18 Sa umaabot, ang matinumanong mga batan-on mahilakip niadtong makalabang buhi sa gisaad sa Diyos nga bag-ong kalibotan. (Pin. 7:9, 14) Didto, ilang matagamtam ang dili-matukib nga mga panalangin samtang mouswag ang ilang pagpabili kang Jehova, ug sila makadayeg kaniya hangtod sa panahong walay tino.—Sal. 148:12, 13.
Makapatin-aw Ka Ba?
• Sa unsang paagi ang mga batan-on makapakig-ambit sa matuod nga pagsimba karon?
• Aron makabenepisyo sa pagbasa sa Bibliya, nganong hinungdanon ang pagpamalandong?
• Sa unsang paagi ang pag-ampo motabang kaninyo nga masuod kang Jehova?
• Unsay epekto sa maayong panggawi sa usa ka Kristohanon?
[Mga Pangutana sa Pagtuon]
[Hulagway sa panid 5]
Nabatasan ba ninyo ang pagbasa sa Bibliya sa adlaw-adlaw?