Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Aw, sulayi kon makatubag ka ba sa mosunod nga mga pangutana:

• Nganong kinahanglang mamatay ang Mesiyas?

Ang kamatayon ni Jesus nagpamatuod nga ang usa ka hingpit nga tawo mahimong maghupot ug diyosnong debosyon bisan pa sa kinagrabehang mga pagsulay. Dugang pa, iyang gibayran ang silot sa sala nga napanunod sa kaliwat ni Adan, nga nagbukas sa dalan ngadto sa kinabuhing walay kataposan.—12/15, panid 22-23.

• Unsay makatabang sa usa nga dili maghinobra sa pag-inom ug alkoholikong mga ilimnon?

Makatabang ang pag-ampo ug pagtuon sa Bibliya. Hinungdanon usab ang pag-ugmad ug pagpugong-sa-kaugalingon, determinasyon nga dili maghinobra, ug pagpilig maayong mga kauban. Kon buot moinom ang usa, angay siyang magtakdag limitasyon ug mobalibad kon gikinahanglan.—1/1, panid 7-9.

• Unsay nalakip sa mapuslanong komunikasyon uban sa mga anak?

Dili lamang kini pagpakig-estorya kanila kondili naglakip kini sa pagpangutana ug sa mapailobong pagpamati sa ilang mga tubag. Nakita sa daghang ginikanan nga ang pagpangaon maoy maayong kahigayonan sa pagpakig-estorya sa ilang mga anak.—1/15, panid 18-19.

• Si Jehova hingpit, busa nganong nagbasol man siya?

Usahay, mausab ang pagbati sa Diyos sa mga tawo. Pananglitan, dili lang usa ka beses nga ang mga Israelinhon mibiya kang Jehova ug nagsimbag laing mga diyos. Mao nga si Jehova wala na manalipod kanila. Apan, sa dihang naghinulsol sila sa ilang sala ug nangayog tabang sa Diyos, nausab ang iyang pagbati kanila, o ‘nagbasol’ siya. (Maghu. 2:18)—2/1, panid 21.

• Sa unsang mga kahimtang nga ang usa mahimong magpabawtismo pag-usab?

Mahimo kanang konsiderahon kon panahon sa bawtismo, ang usa sekretong nagabuhat gihapog sala nga mosangpot unta sa pagpalagpot kaniya kon siya bawtismado pa.—2/15, panid 22.

• Unsa ang tulo ka sayop nga pangatarongan nga dili-magmatinud-anon?

Ang pipila naghunahuna nga puwede silang mangawat tungod sa kakabos. Ang uban mangatarongan, “Ang tanan nagbuhat niini.” Ug kadtong nakakitag mahalong mga butang moingon, “iya na sa nakakita.” Ang Bibliya wala mouyon niini nga mga pangatarongan.—3/1, panid 12-14.

• Sa sambingay ni Jesus bahin sa mga trigo ug mga bunglayon, unsay gihulagwayan sa pagpugas, o pagtanom, sa maayong binhi?

Panahon sa iyang yutan-ong ministeryo, giandam sa Anak sa tawo nga si Jesus ang uma. Sukad sa Pentekostes 33 K.P., ang maayong binhi gipugas sa dihang gidihogan ang mga Kristohanon ingong mga anak sa Diyos, ang mga anak sa Gingharian.—3/15, panid 20.

• Sa unsang paagi ang simbolikong trigo sa sambingay ni Jesus gitigom diha sa balay-tipiganan ni Jehova? (Mat. 13:30)

Ang katumanan niana nagpadayon hangtod sa kataposan sa sistema sa mga butang. Ang dinihogang mga anak sa Gingharian, ang simbolikong trigo, gitigom diha sa balay-tipiganan ni Jehova sa dihang gidala sila ngadto sa Kristohanong kongregasyon o sa dihang nadawat nila ang ilang langitnong ganti.—3/15, panid 22.

• Kinsay nagtakda kon unsang mga basahona ang angayng ilakip sa Kristohanon Gregong Kasulatan?

Dili ang usa ka konsilyo sa simbahan o lider sa relihiyon. Hinunoa, ilalom sa giya sa balaang espiritu, naila sa matuod nga mga Kristohanon kon unsang mga basahona ang inspirado sa Diyos. Nahiuyon kini sa kamatuoran nga ang usa sa milagrosong mga gasa sa espiritu nga gihatag sa unang-siglong kongregasyon mao ang “katakos sa pag-ila sa inspiradong mga pulong.” (1 Cor. 12:4, 10)—4/1, panid 28.