Ayaw Paguola ang Balaang Espiritu
Ayaw Paguola ang Balaang Espiritu
“Ayaw paguola ang balaang espiritu sa Diyos, nga pinaagi niini kamo gitimbrehan.”—EFE. 4:30.
1. Unsay gihimo ni Jehova alang sa minilyong katawhan, ug unsay ilang obligasyon?
SI Jehova mihimog talagsaong butang alang sa minilyong katawhan nga nagkinabuhi niining gubot nga kalibotan. Gihimo niyang posible nga sila makaduol kaniya pinaagi sa iyang bugtong Anak, si Jesu-Kristo. (Juan 6:44) Usa ka sa maong mga indibiduwal kon ikaw nagpahinungod na sa Diyos ug nagtuman niana. Kay nabawtismohan sa ngalan sa balaang espiritu, imong obligasyon nga mogawi nga kaharmonya niana.—Mat. 28:19.
2. Unsang mga pangutana ang atong tubagon?
2 Kita nga ‘nagpugas alang sa espiritu’ nagsul-ob ug bag-ong pagkatawo. (Gal. 6:8; Efe. 4:17-24) Apan si apostol Pablo nagtambag ug nagpasidaan nga dili nato angayng paguolon ang balaang espiritu. (Basaha ang Efeso 4:25-32.) Atong susihon pag-ayo kining tekstoha. Unsay gipasabot ni Pablo sa dihang miingon siya nga dili paguolon ang espiritu sa Diyos? Sa unsang paagi mahitabo kana sa usa ka alagad ni Jehova? Sa unsang paagi nato malikayan nga mapaguol ang espiritu?
Kon Unsay Gipasabot ni Pablo
3. Unsay buot ipasabot sa Efeso 4:30?
3 Una sa tanan, matikdi ang giingon ni Pablo sa Efeso 4:30: “Ayaw paguola ang balaang espiritu sa Diyos, nga pinaagi niini kamo gitimbrehan alang sa usa ka adlaw sa pagpagawas pinaagi sa lukat.” Dili buot ni Pablo nga mameligro ang espirituwalidad sa iyang minahal nga mga igsoon. Sila “gitimbrehan [sa espiritu ni Jehova] alang sa usa ka adlaw sa pagpagawas pinaagi sa lukat.” Ang balaang espiritu usa gihapon ka timbre, o pasiunang “timaan sa kon unsay moabot” alang sa dinihogang mga maghuhupot sa integridad. (2 Cor. 1:22) Ang timbre nagpasabot nga sila iya sa Diyos ug sila makadawat ug langitnong kinabuhi. Ang matimbrehan sa ulahi may gidaghanon nga 144,000.—Pin. 7:2-4.
4. Nganong likayan gayod nato nga maguol ang espiritu?
4 Ang pagpaguol sa espiritu mahimong mosangpot sa bug-os nga pagkawala sa impluwensiya sa aktibong puwersa sa Diyos diha sa kinabuhi sa usa ka Kristohanon. Ang usa ka pamatuod nga posible kining mahitabo makita sa giingon ni David human sila makasala ni Batseba. Siya mahinulsolong mihangyo kang Jehova: “Ayaw ako isalikway gikan sa imong atubangan; ug ayaw kuhaa ang imong balaang espiritu gikan kanako.” (Sal. 51:11) Ang mga dinihogan lamang nga ‘nagmatinumanon hangtod sa kamatayon’ ang makadawat sa “purongpurong” sa imortal nga kinabuhi sa langit. (Pin. 2:10; 1 Cor. 15:53) Ang balaang espiritu gikinahanglan usab sa mga Kristohanon nga adunay yutan-ong paglaom aron mahuptan nila ang ilang integridad sa Diyos ug madawat ang iyang gasa nga kinabuhi pinasukad sa pagpasundayag ug pagtuo sa halad lukat ni Kristo. (Juan 3:36; Roma 5:8; 6:23) Busa, likayan gayod nato nga maguol ang balaang espiritu.
Sa Unsang Paagi Mapaguol ang Espiritu?
5, 6. Sa unsang paagi mapaguol ang espiritu?
5 Ingong mga Kristohanon, atong malikayan nga maguol ang espiritu. Mahimo nato kini kon ‘magpadayon kita sa paglakaw ug sa pagkinabuhi pinaagi sa espiritu,’ kay niining paagiha kita dili madaog sa sayop nga unodnong mga tinguha ug dili magpakitag daotang mga taras. (Gal. 5:16, 25, 26) Apan mahimong mausab kana. Mapaguol nato ang espiritu sa Diyos kon atong tugotan ang atong kaugalingon nga inanayng makiling sa panggawi nga supak sa inspirado-sa-espiritu nga Pulong sa Diyos.
6 Kon kanunay natong supakon ang pagtultol sa balaang espiritu, mapaguol nato kana ug si Jehova, ang Tuboran niana. Sa atong pagsusi sa Efeso 4:25-32 atong masayran kon sa unsang paagi kita mogawi, ug matabangan kita nga dili mapaguol ang espiritu sa Diyos.
Kon sa Unsang Paagi Malikayan nga Maguol ang Espiritu
7, 8. Ipatin-aw kon nganong kinahanglan kitang magmatinud-anon.
7 Kinahanglang magmatinud-anon. Sa Efeso 4:25, si Pablo misulat: “Karon nga gisalikway na ninyo ang kabakakan, magsulti sa tinuod ang matag usa kaninyo sa iyang silingan, tungod kay kita mga sangkap nga iya sa usag usa.” Sanglit nahiusa man kita ingong “mga sangkap nga iya sa usag usa,” dili gayod nato limbongan ang atong mga igsoon, kay sama rag namakak kita kanila. Si bisan kinsa nga padayong magbuhat niana mawad-an sa iyang maayong relasyon sa Diyos.—Basaha ang Proverbio 3:32.
8 Ang malimbongong mga pulong ug buhat makabungkag sa kongregasyon. Busa, sundogon nato ang kasaligang manalagna nga si Daniel, nga kaniya walay daotang butang nga nakaplagan. (Dan. 6:4) Angay usab natong hinumdoman ang tambag ni Pablo niadtong dunay langitnong paglaom. Siya miingon nga ang matag sangkap sa “lawas ni Kristo” iya sa usag usa ug kinahanglan silang magpabiling nahiusa sa matinud-anon nga dinihogang mga sumusunod ni Jesus. (Efe. 4:11, 12) Kon naglaom kita nga mabuhi sa walay kataposan sa Paraisong yuta, angay usab kitang magmatinud-anon, sa ingon makatampo kita sa panaghiusa sa tibuok-kalibotang panag-igsoonay.
9. Nganong angay natong sundon ang gitambag sa Efeso 4:26, 27?
9 Kinahanglang suklan ang Yawa, nga dili hatagag higayon nga modaot sa atong espirituwalidad. (Sant. 4:8) Ang balaang espiritu motabang kanato sa pagsukol kang Satanas. Pananglitan, mahimo nato kana kon pugngan nato ang atong kasuko. Si Pablo misulat: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efe. 4:26, 27) Kon may katarongan kitang masuko, ang pag-ampo dayon nga hilom makatabang kanato nga ‘magmabugnaw sa espiritu,’ nga magpasundayag ug pagpugong-sa-kaugalingon inay molihok sa paagi nga makapaguol sa espiritu. (Prov. 17:27) Busa angay natong wad-on ang kasuko ug dili hatagag higayon si Satanas sa paghaylo kanato nga mobuhat ug daotan. (Sal. 37:8, 9) Ang usa ka paagi nga masuklan siya mao ang pagsunod sa tambag ni Jesus nga husayon dayon ang mga kabingkilan.—Mat. 5:23, 24; 18:15-17.
10, 11. Nganong dili kita angayng mangawat o manglimbong?
10 Kinahanglang dili kita magpadala sa panghaylo nga mangawat o manglimbong. Mahitungod sa pagpangawat, si Pablo misulat: “Ang kawatan kinahanglan nga dili na mangawat, hinuon maghago siya, nga magbuhat pinaagi sa iyang mga kamot sa maayong buluhaton, aron siya adunay ikahatag sa nanginahanglan.” (Efe. 4:28) Kon mangawat ang usa ka Kristohanon, iyang ‘gipasipalahan ang ngalan sa Diyos.’ (Prov. 30:7-9) Bisan ang kakabos dili katarongan nga mangawat ang usa. Kadtong nahigugma sa Diyos ug sa silingan nahibalo nga dili gayod kana angayng buhaton.—Mar. 12:28-31.
11 Si Pablo wala lamang maghisgot kon unsay dili nato angayng buhaton; gipasiugda usab niya kon unsay angay natong buhaton. Kon kita nagkinabuhi ug nagalakaw pinaagi sa espiritu, kita maghago aron atong maatiman ang atong pamilya ug ‘aduna kitay ikahatag sa nanginahanglan.’ (1 Tim. 5:8) Si Jesus ug ang iyang mga apostoles naggahin ug salapi alang sa mga kabos, apan si Judas Iskariote nga hapit nang magbudhi kaniya kanunayng manguha gikan niana. (Juan 12:4-6) Dayag nga wala gayod siya tultoli sa balaang espiritu. Kita nga giniyahan sa espiritu “magmaminatud-on sa tanang butang,” sama kang Pablo. (Heb. 13:18) Sa ingon, atong malikayan nga maguol ang balaang espiritu.
Ubang mga Paagi nga Malikayang Maguol ang Espiritu
12, 13. (a) Ingon sa gipakita sa Efeso 4:29, unsang matanga sa sinultihan ang angay natong likayan? (b) Unsay angay natong sinultihan?
12 Kinahanglang bantayan nato ang atong sinultihan. Si Pablo miingon: “Kinahanglang walay mangil-ad nga mga sulti nga mogula gikan sa inyong baba, kondili kanang bisan unsang sulti nga maayo nga makapalig-on sumala sa gikinahanglan, aron makahatag kinig kaayohan sa mga magapatalinghog.” (Efe. 4:29) Sa makausa pa, ang apostol wala lamang mosulti kon unsay dili nato angayng buhaton; gisulti sab niya kon unsay angay natong buhaton. Ilalom sa impluwensiya sa espiritu sa Diyos, kita matukmod sa ‘pagsultig makapalig-on aron makahatag kinig kaayohan sa mga magapatalinghog.’ Dugang pa, dili nato tugotan nga mogula sa atong baba ang ‘mangil-ad nga mga pulong.’ Ang Gregong pulong nga gihubad ug “mangil-ad” nagtumong sa nadunot nga prutas, isda, o karne. Maingon nga lud-on kita sa maong pagkaon, dumtan sab nato ang sinultihan nga giisip ni Jehova nga daotan.
13 Ang atong sinultihan kinahanglang dili-law-ay, maluloton, ug ‘tinimplahag asin.’ (Col. 3:8-10; 4:6) Angayng maila sa mga tawo nga lahi kita sa dihang madungog nila ang atong sinultihan. Busa tabangan nato ang uban pinaagi sa pagsultig “makapalig-on” nga mga pulong. Ug hinaot nga bation nato ang susama sa gibati sa salmista kinsa miawit: “Hinaot nga ang mga pulong sa akong baba ug ang pagpamalandong sa akong kasingkasing mahimong kahimut-anan sa imong atubangan, Oh Jehova nga Bato ko ug Manunubos ko.”—Sal. 19:14.
14. Sumala sa Efeso 4:30, 31, unsay angay natong isalikway?
14 Kinahanglang isalikway nato ang kayugot, kasuko, mapasipalahong sinultihan, ug ang tanang pagkadaotan. Human magpasidaan nga dili paguolon ang espiritu, si Pablo misulat: “Isalikway ninyo ang tanang mapangdaot nga kayugot ug kasuko ug kapungot ug sininggitay ug mapasipalahong sinultihan uban sa tanang pagkadaotan.” (Efe. 4:30, 31) Kay dili man hingpit, kitang tanan kinahanglang maningkamot sa pagkontrolar sa atong hunahuna ug lihok. Kon atong paundayonan ang “mapangdaot nga kayugot ug kasuko ug kapungot,” atong mapaguol ang espiritu. Mao man usab kon kita magkuwenta sa mga sayop nga nahimo kanato, mayugot, ug dili makig-uli sa nakapasilo kanato. Kon dili nato panumbalingon ang tambag sa Bibliya, basin maugmad nato ang mga taras nga motultol sa pagpakasala batok sa espiritu ug mahimong mahiagom kita sa kadaot.
15. Unsay atong buhaton kon dunay nakasala kanato?
15 Kinahanglan kitang magmaluloton, magmabination, ug magmapinasayloon. Si Pablo misulat: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.” (Efe. 4:32) Bisan pag nasakitan kita pag-ayo sa uban, pasayloon nato sila, sama sa gibuhat sa Diyos. (Luc. 11:4) Ibutang ta nga ang usa ka igsoon nakasultig dili maayo bahin kanato. Sa tinguha nga makighusay, ato siyang giduol. Nagpakita siyag tinuod nga kasubo ug nangayog pasaylo. Ato siyang gipasaylo, apan kinahanglang mohimo pa kitag labaw niana. “Dili ka manimalos ni maghambin ug kasuko batok sa mga anak sa imong katawhan,” nag-ingon ang Levitico 19:18, “ug higugmaon mo ang imong isigkatawo sama sa imong kaugalingon. Ako mao si Jehova.”
Kinahanglang Magmabinantayon
16. Paghatag ug pananglitan nga nagpakita nga kinahanglan kitang mohimog mga kausaban aron dili maguol ang espiritu.
16 Bisan sa pribado, mahimong matental kita sa pagbuhat ug mga butang nga dili makapahimuot sa Diyos. Pananglitan, ang usa tingali ka igsoon namati ug kuwestiyonableng musika. Sa ngadtongadto, nahasol ang iyang konsensiya tungod kay wala niya panumbalinga ang tambag sa Bibliya nga gihatag diha sa mga publikasyon sa “matinumanon ug maalamong ulipon.” (Mat. 24:45) Tingali nag-ampo siya bahin niini ug nahinumdom sa giingon ni Pablo sa Efeso 4:30. Kay determinadong dili mobuhat ug bisan unsa nga makapaguol sa espiritu sa Diyos, nakadesisyon siya nga dili na mamatig kuwestiyonableng musika. Panalanginan gayod ni Jehova ang tinamdan sa maong igsoon. Busa, magbantay kita kanunay nga dili maguol ang espiritu.
17. Unsay mahitabo kon dili kita magpadayon sa pagbantay ug pag-ampo?
17 Kinahanglang magpadayon kita sa pagbantay ug pag-ampo aron dili mahaylo sa mahugaw o daotang buhat nga makapaguol sa espiritu. Sanglit gigamit sa Amahan ang iyang balaang espiritu nga kaharmonya sa iyang personalidad, mahimo kining maguol—usa ka butang nga dili gayod nato gustong buhaton. (Efe. 4:30) Ang Hudiyong mga eskriba sa unang siglo nakasala tungod kay miingon sila nga gikan kang Satanas ang mga milagro ni Jesus. (Basaha ang Marcos 3:22-30.) Ang maong mga kaaway ni Kristo ‘nagpasipala batok sa balaang espiritu’ ug busa nakahimog sala nga dili mapasaylo. Hinaot nga dili kana mahitabo kanato!
18. Unsaon nato pagtino nga wala kita makahimog sala nga dili mapasaylo?
18 Sanglit dili nato gustong mobuhat ug bisan unsa nga motultol sa paghimog sala nga dili mapasaylo, kinahanglang hinumdoman nato ang giingon ni Pablo bahin sa dili pagpaguol sa espiritu. Apan komosta kon nakahimo kitag grabeng sala? Kon kita naghinulsol ug natabangan sa mga ansiyano, kita makaingon nga ang Diyos nagpasaylo kanato ug nga kita wala makasala batok sa balaang espiritu. Sa tabang sa Diyos, malikayan usab nato nga mapaguol pag-usab ang espiritu.
19, 20. (a) Unsa ang pipila ka butang nga kinahanglan natong likayan? (b) Unsay determinado natong buhaton?
19 Pinaagi sa iyang balaang espiritu, gipalambo sa Diyos ang gugma, kalipay, ug panaghiusa sa iyang katawhan. (Sal. 133:1-3) Busa, likayan gayod nato nga maguol ang espiritu pinaagi sa makadaot nga tabitabi o pagsultig mga butang nga makapawala sa pagtahod sa mga igsoon sa tinudlo-sa-espiritu nga mga magbalantay. (Buh. 20:28; Jud. 8) Hinunoa, angay natong palamboon ang panaghiusa ug pagtahod sa usag usa diha sa kongregasyon. Siyempre, dili gayod nato dasigon nga maggrupo-grupo ang mga igsoon nga mosangpot sa pagkabahinbahin. Si Pablo misulat: “Ako magaawhag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magasulti nga may panagkauyon, ug nga walay pagkabahinbahin diha kaninyo, kondili kamo unta bug-os nga magkahiusa sa samang kaisipan ug sa samang panghunahuna.”—1 Cor. 1:10.
20 Si Jehova andam ug makahimo sa pagtabang kanato nga dili mapaguol ang iyang espiritu. Magpadayon kita sa pag-ampo alang sa balaang espiritu ug magmadeterminado nga dili kana paguolon. Hinaot nga kanunay kitang ‘magpugas alang sa espiritu,’ ug magpagiya niana karon ug hangtod sa walay kataposan.
Unsay Imong Tubag?
• Unsay kahulogan sa dili pagpaguol sa espiritu?
• Sa unsang paagi mapaguol sa usa ka alagad ni Jehova ang espiritu?
• Sa unsang mga paagi malikayan nga maguol ang balaang espiritu?
[Mga Pangutana sa Pagtuon]
[Hulagway sa panid 30]
Husaya dayon ang mga kabingkilan
[Hulagway sa panid 31]
Unsa nga prutas ang naghulagway sa imong sinultihan?