Magpabiling Lig-on sa Espirituwal Samtang Nag-atiman sa Masakitong Kabanay

HUMAN makita ang tumor duol sa iyang taludtod, si Kim, nga usa ka Saksi, nadayagnos nga dunay kanser.⁠ * “Sa dihang nakuha na ang tumor,” matod sa iyang bana nga si Steve, “si Kim nailalom sa radiotherapy ug chemotherapy. Ingong side effect sa maong pagtambal, siya naluya pag-ayo. Dili na siya makalihoklihok.”

Mahanduraw ba nimo ang kaguol nga gibati ni Steve nga magtan-aw sa iyang minahal nga asawa nga nakigbisog niining grabeng balatian? Tingali duna kay kabanay nga nag-antos sa nagkagrabeng sakit o sa mga epekto sa katigulangon. (Eccl. 12:1-7) Kon mao, nahibalo ka nga aron maatiman pag-ayo ang imong minahal, kinahanglan sab nimong atimanon ang imong kaugalingon. Kon maluya ka sa espirituwal, maapektohan ka usab sa emosyonal ug pisikal ug dili ka na makatabang kaniya. Sa unsang paagi ka makapabiling timbang sa espirituwal samtang nag-atiman sa masakiton o tigulang nga kabanay? Unsa may mahimo sa ubang mga igsoon sa kongregasyon sa pagpakitag konsiderasyon sa mga masakiton?

Kon Unsaon sa Pagpabiling Timbang

Aron magpabiling timbang sa espirituwal ug pisikal samtang nag-atiman sa masakiton, kinahanglang makamao kang mopailin-ilin ug mobahinbahin sa imong panahon ug kusog. “Ang kaalam anaa sa mga makasaranganon,” nag-ingon ang Proverbio 11:2. Niini nga konteksto, ang pulong “makasaranganon” nagpasabot nga ang usa nahibalo sa iyang mga limitasyon. Aron maseguro nga dili ka mohimog labaw sa imong maarangan, kinahanglan tingali nimong susihon ang imong eskedyul ug mga responsibilidad.

Si Steve nagpakitag kaalam ug pagkamakasaranganon pinaagi sa pagtimbangtimbang sa iyang mga buluhaton. Gawas sa iyang sekular nga trabaho, nag-alagad siya ingong  koordinetor sa lawas sa mga ansiyano ug magtatan-aw sa pag-alagad sa ilang kongregasyon sa Irlandia. Membro usab siya sa Hospital Liaison Committee sa ilang dapit. “Wala gayod magreklamo si Kim nga ako siyang napasagdan tungod sa akong paggugol ug dakong panahon niining maong mga responsibilidad,” miingon si Steve. “Apan nahibalo ko nga dili nako maatiman kining tanan.” Unsay gihimo ni Steve? “Human mamalandong uban ang pag-ampo,” siya miingon, “nakadesisyon ko nga mohunong sa pag-alagad ingong koordinetor. Nagpadayon gihapon ko sa pag-alagad ingong ansiyano, apan pinaagi sa pagtugyan sa pipila nako ka responsibilidad ngadto sa uban, nahatag nako kang Kim ang panahon ug pag-atiman nga iyang gikinahanglan.”

Sa ngadtongadto, miarang-arang ang panglawas ni Kim. Gisusi pag-usab ni Steve ug Kim ang ilang situwasyon, ug sa tabang sa iyang asawa, naatiman na usab ni Steve ang kanhi niyang mga responsibilidad sa kongregasyon. “Nakakat-on kami sa paghimo sa mga butang kutob sa itugot sa among kahimtang,” matod ni Steve. “Mapasalamaton kaayo ko sa tabang ni Jehova ug sa kinasingkasing nga pagpaluyo sa akong asawa bisan pa sa iyang balatian.”

Tagda usab ang eksperyensiya ni Jerry, nga usa ka nagapanawng magtatan-aw, ug sa iyang asawa nga si Maria. Kinahanglan nilang usbon  ang ilang mga tumong aron maatiman ang tigulang nilang mga ginikanan. “Gusto namong mag-alagad ingong misyonaryo sa langyawng teritoryo,” miingon si Maria. “Apan bugtong anak si Jerry, ug kinahanglan nang atimanon ang iyang ginikanan. Busa, nakadesisyon mi sa pagpabilin sa Irlandia. Tungod niana, among naatiman ang amahan ni Jerry sa ospital una siya mamatay. Karon kada adlaw namong maestorya ang inahan ni Jerry, ug dali ra ming makaadto niya kon nagkinahanglan siyag tabang. Ang kongregasyon sa inahan ni Jerry matinabangon kaayo, mao nga nakapabilin kami sa nagapanawng buluhaton.”

Kon sa Unsang Paagi Makatabang ang Uban

Sa dihang naghisgot kon unsang materyal nga tagana ang angayng ihatag sa tigulang nga mga balo sa kongregasyon, si apostol Pablo misulat: “Kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” Gipahinumdoman ni Pablo ang mga isigka-Kristohanon nga aron ang ilang pagsimba mahimong “dalawaton sa panan-aw sa Diyos,” kinahanglang suportahan nila ang ilang tigulang nga mga ginikanan ug apohan. (1 Tim. 5:​4, 8) Apan, ang uban sa kongregasyon angayng motabang usab.

Matikdi ang kahimtang ni Hakan ug Inger, usa ka tigulang nga magtiayon sa Sweden. “Sa dihang nadayagnos ang akong asawa nga dunay kanser,” miingon si Hakan, “nakuratan mi. Himsog ug lagsik man unta si Inger. Apan, niining tungora kinahanglan na ming moadto sa ospital kada adlaw, ug ang mga side effect sa iyang tambal nakapaluya kaniya. Nagpabilin lang sa balay si Inger niining panahona, ug kinahanglan nako siyang atimanon.” Sa unsang paagi nakatabang ang kongregasyon?

Gihikay sa mga ansiyano nga madungog sa magtiayon ang mga tigom pinaagi sa telepono. Dugang pa, ang mga igsoon kanunayng moduaw kanila o kaha motawag sa telepono. Nagpadala usab silag mga sulat ug kard. “Among nasinati ang pagpaluyo sa tanang igsoon ug ang tabang ni Jehova,” miingon si Hakan. “Nakatabang kini kanamo sa pagpabiling lig-on sa espirituwal. Maayo na lang kay naulian ra si Inger, ug nakatambong na usab kami sa mga tigom sa Kingdom Hall.” Sa dihang ang mga igsoon sa kongregasyon mohimo sa tanan nilang maarangan sa pagtabang sa mga masakiton ug tigulang, ilang gipamatud-an nga sila maoy ‘tinuod nga mga higala nga nahigugma sa tanang panahon, ug maoy mga igsoon nga natawo alang sa panahon sa kasakit.’​—⁠Prov. 17:17.

Gipabilhan ni Jehova ang Imong Paghago

Makapaluya ang pag-atiman sa masakitong kabanay. Bisan pa niana, si Haring David misulat: “Malipayon siya nga nagabuhat uban ang pagkamahunahunaon sa timawa,” sama nianang nanginahanglag tabang tungod sa balatian.​—⁠Sal. 41:1.

Nganong magmalipayon man kadtong nag-atiman sa mga masakiton? “Siya nga nagapakitag kaluoy sa timawa nagapahulam kang Jehova,” nag-ingon ang Proverbio 19:​17, “ug Siya magabayad kaniya sa iyang gibuhat.” Ang matuod nga Diyos ilabinang nahingawa sa iyang maunongong mga alagad nga nag-antos sa balatian, ug iyang panalanginan ang nagtabang kanila. Si salmistang David miawit: “Si Jehova magpalig-on [kaniya] sa ibabaw sa higdaanan sa balatian; ang tibuok niyang higdaanan imong bag-ohon gayod sa panahon sa iyang pagkasakit.” (Sal. 41:3) Makaseguro kita nga kon ang usa nga mahigugmaong nag-atiman sa mga masakiton makaagom usab sa kalisdanan o kalamidad, si Jehova motabang gayod kaniya.

Makapadasig gayod ang pagkahibalo nga nakita ug giuyonan ni Jehova nga Diyos ang atong gihimo sa pag-atiman sa masakitong kabanay! Bisan tuod nagkinahanglan kanag paghago, ang Kasulatan nagpasalig kanato nga ang “maong mga halad [o, mga sakripisyo] gikahimut-an sa Diyos.”​—⁠Heb. 13:16.

[Footnote]

[Mga hulagway sa panid 18]

Magpabiling timbang sa espirituwal ug dawata ang tabang sa uban