Mga Pangutana Gikan sa mga Magbabasa

Sanglit gidili man ni Jehova ang idolatriya, nganong wala man niya siloti si Aaron sa iyang paghimog bulawan nga nating baka?

Sa dihang gihimo ni Aaron ang nating baka, ingon sa nasulat sa Exodo kapitulo 32, iyang gilapas ang balaod sa Diyos mahitungod sa idolatriya. (Ex. 20:3-5) Tungod niana, “si Jehova nasuko pag-ayo [kang Aaron] hangtod nga laglagon na unta siya; apan [si Moises] nangamuyo usab . . . alang kang Aaron niadtong higayona.” (Deut. 9:​19, 20) Sa kahimtang ni Aaron, aduna bay “dakong puwersa” ang pangamuyo sa matarong nga tawong si Moises? (Sant. 5:16) Oo. Tungod sa maong pangamuyo ug sa labing menos duha pa ka rason, mopatim-aw nga gitubag ni Jehova ang pag-ampo ni Moises ug wala siloti si Aaron.

Ang usa niana dayag nga may kalabotan sa rekord ni Aaron sa pagkamatinumanon. Sa dihang gisugo si Moises sa pag-atubang kang Paraon ug sa pagpagawas sa mga Israelinhon gikan sa Ehipto, gitudlo ni Jehova si Aaron ingong kauban ni Moises ug tigpamaba. (Ex. 4:10-16) Silang duha miatubang sa hari sa Ehipto sa daghang higayon, nga nag-antos sa pagkatig-ag kasingkasing ni Paraon. Busa, samtang didto pa si Aaron sa Ehipto, nagmaunongon na siya kang Jehova.​—⁠Ex. 4:21.

Tagda usab kon nganong naaghat si Aaron sa paghimog bulawan nga nating baka. Si Moises didto sa Bukid sa Sinai sulod sa 40 ka adlaw. Sa dihang “nakita sa katawhan nga nadugay si Moises paglugsong gikan sa bukid,” ilang giawhag si Aaron sa paghimog bulawan nga nating baka. Misugot si Aaron. (Ex. 32:1-6) Apan, ang sunod nga gibuhat ni Aaron nagpakita nga wala gayod siya mouyon niining idolatrosong buhat. Dayag nga napugos lamang siya. Pananglitan, sa dihang gitapos ni Moises sa makapahinganghang paagi ang maong idolatriya, ang tanang anak ni Levi​—⁠lakip na si Aaron​—⁠lig-ong mibarog dapig kang Jehova. Ang tulo ka libo ka Israelinhon nga nanguna niining idolatrosong buhat gipamatay.​—⁠Ex. 32:25-29.

Human niana giingnan ni Moises ang katawhan: “Kamo nakasala sa usa ka dakong sala.” (Ex. 32:30) Busa, dili lang kay si Aaron ra ang sad-an. Siya ug ang katawhan nakabenepisyo gikan sa dakong kaluoy ni Jehova.

Human sa hitabo labot sa bulawan nga nating baka, si Jehova nagsugo kang Moises nga itudlo si Aaron ingong hataas nga saserdote. “Bestihan mo si Aaron sa balaang mga besti ug dihogan siya ug balaanon siya, ug sa ingon siya mag-alagad ingong saserdote kanako.” (Ex. 40:​12, 13) Dayag nga gipasaylo ni Jehova si Aaron. Sa pagkatinuod, si Aaron maoy maunongong tigpaluyo sa matuod nga pagsimba, dili idolatrosong rebelde.