Nganong Pasidunggan ang mga Tigulang?

SA BAYBAYON sa California, U.⁠S.⁠A., makita ang usa sa labing giletratohang kahoy sa kalibotan. Ginganlan kinig Lone Cypress. Sumala sa taho, kining kahoya kapin nag 250 anyos. Nailhan sa kamalahutayon niini, kining matahom nga kahoy gihatagag dakong pagtagad. Pananglitan, gipalig-on kini pinaagig mga kable ug mga bato.

Ang Lone Cypress mahimong magpahinumdom kanato sa tigulang natong mga igsoon, kinsa nagpakitag talagsaong pagkamalahutayon. Ang usa sa dalayegong paagi nga gipakita nila kini maoy sa pagmantala sa maayong balita. Si Joel nagtagna nga ang “tigulang nga mga lalaki” magmantala sa mensahe sa Bibliya. (Joel 2:28-32; Buh. 2:16-21) Hunahunaa lang ang daghang oras nga gigugol nila sa kinasingkasing nga pagtabang sa uban nga makakat-on bahin sa “maayong balita sa gingharian”! (Mat. 24:14) Ang pipila niining tigulang nga mga magmamantala nakalahutay sa paglutos o sa ubang kalisdanan sulod sa daghang katuigan. Kon ang usa lamang ka kahoyng sipres nahimong ilado tungod sa pagkamalahutayon niini ug gipalig-on pinaagig mga bato ug kable, ang tigulang natong mga igsoon mas takos gayod nga pakitaag dignidad ug pasidungog!

Si Jehova nga Diyos nagsugo sa iyang katawhan: “Atubangan sa buhok nga ubanon motindog ka, ug magpakita ka ug pagtamod sa tawong tigulang.” (Lev. 19:32) Taliwala sa mga alagad ni Jehova karon, makakaplag kitag maayong mga ehemplo sa pagkamatinumanon kinsa ‘nagalakaw uban sa Diyos’ sulod sa daghang  katuigan. (Miq. 6:8) Samtang nagpadayon sila sa pagpadapat sa mga prinsipyo sa Bibliya, ang ilang pagkaubanon mao gayoy “purongpurong sa katahom.”​—⁠Prov. 16:31.

Si apostol Pablo nagpahimangno sa batan-ong si Timoteo: “Ayaw kasab-i ang usa ka tigulang nga lalaki.” Hinunoa, angay niyang ‘maymayan siya ingon sa usa ka amahan’ ug “ang tigulang nga mga babaye ingong mga inahan.” (1 Tim. 5:​1, 2) Sa diwa, angayng “motindog” si Timoteo atubangan sa buhok nga ubanon. Nan, tin-aw nga gidahom ni Jehova nga ang atong sinultihan magpakitag pasidungog.

“Manguna sa pagpakitag pasidungog sa usag usa,” nag-ingon ang Roma 12:10. Ang mga magtatan-aw magpakita gayod ug pasidungog sa tigulang nga mga Kristohanon. Apan kitang tanan angayng manguna sa pagpakitag pasidungog sa usag usa.

Siyempre, ang mga membro sa pamilya adunay linaing responsibilidad ngadto sa ilang mga ginikanan ug mga apohan. Sa kahimtang sa Lone Cypress, ang mga tawo nangitag paagi aron mapreserbar kini, ug padayon nila kanang ginabuhat. Nan, angay gayod kitang mangitag mga paagi nga mapreserbar ang dignidad sa atong tigulang nga mga ginikanan ug mga apohan. Pananglitan, ang pagpamati kanila mopugong kanato sa pagbuhat sa mga butang sa atong kaugalingong paagi nga dili magpakabana sa ilang pagbati.​—⁠Prov. 23:22; 1 Tim. 5:4.

Ang tigulang natong mga igsoon bililhon kaayo kang Jehova. Dili niya sila talikdan. (Sal. 71:18) Sa pagkatinuod, ang matuod nga Diyos nagpalig-on kanila aron makapadayon sila sa pag-alagad kaniya nga matinumanon. Hinaot nga padayon natong palig-onon ug pasidunggan ang mga tigulang.

[Mga hulagway sa panid 7]

Maingon nga ang Lone Cypress kinahanglang palig-onon, ang mga tigulang usab kinahanglang pakitaag dignidad ug pasidungog

[Credit Line]

American Spirit Images/age fotostock