Padayong Bansaya ang Imong Gahom sa Pagsabot

PAGKANINDOT tan-awon sa usa ka gymnast nga hawod kaayong nagsirko-sirko! Ang Bibliya nagdasig sa mga Kristohanon sa pagbansay sa ilang katakos sa panghunahuna sama sa pagbansay sa usa ka gymnast.

Sa iyang sulat sa mga Hebreohanon, si apostol Pablo miingon: “Ang gahing pagkaon maoy alang sa mga tawong hamtong, alang kanila nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.” (Heb. 5:14) Nganong gidasig man ni Pablo ang Hebreohanong mga Kristohanon sa pagbansay sa ilang katakos sa panghunahuna sama sa pagbansay sa usa ka gymnast sa iyang kaunoran? Unsaon nato pagbansay ang atong gahom sa pagsabot?

“Kamo Angay na Unta nga Mahimong mga Magtutudlo”

Sa dihang nagpatin-aw sa posisyon ni Jesus ingong “hataas nga saserdote sa paagi nga sama kang Melquisedek,” si Pablo misulat: “Mahitungod kaniya [si Jesus] daghan pa ang among ikasulti ug nga lisod ipatin-aw, sanglit nahabol man kamo sa inyong pandungog. Kay, sa pagkatinuod, bisan tuod kamo angay na unta nga mahimong mga magtutudlo tungod sa panahon, gikinahanglan na usab ninyo nga adunay magatudlo kaninyo gikan sa sinugdan sa paninugdang mga butang sa sagradong mga pahayag sa Diyos; ug nahisama kamo sa nagkinahanglan ug gatas, dili sa gahing pagkaon.”​—⁠Heb. 5:10-12.

Dayag nga ang pipila ka Hudiyong mga Kristohanon sa unang siglo wala mouswag sa ilang kahibalo sa kamatuoran. Pananglitan, nalisdan sila sa pagdawat sa dugang katin-awan bahin sa Balaod ug sa pagtuli. (Buh. 15:​1, 2, 27-29; Gal. 2:11-14; 6:​12, 13) Ang uban nalisdan pagbiya sa naandang mga tulumanon nga nalangkit sa senemanang Igpapahulay ug sa tinuig nga Adlaw sa Pagtabon sa Sala. (Col. 2:​16, 17; Heb. 9:1-14) Busa gidasig sila ni Pablo sa pagbansay sa ilang gahom sa pagsabot aron makaila sila sa maayo ug daotan ug giawhag sila sa ‘pag-uswag ngadto sa pagkahamtong.’ (Heb. 6:​1, 2) Ang iyang tambag lagmit nakapalihok gayod sa pipila sa pagpamalandong kon giunsa nila paggamit ang ilang katakos sa panghunahuna ug hayan nakatabang kini kanila sa pag-uswag sa espirituwal. Komosta man usab kita?

Bansaya ang Imong Gahom sa Pagsabot

Unsaon nato pagbansay ang atong katakos sa panghunahuna aron mohamtong kita sa espirituwal? “Pinaagi sa paggamit,” matod ni Pablo. Sama sa mga gymnast nga nagbansay sa ilang kaunoran ug lawas aron hawod nga makasirko-sirko, angay natong bansayon ang atong katakos sa panghunahuna aron sa pag-ila sa maayo ug daotan.

“Ang pagbansay mao ang kinamaayohang mahimo nimo para sa imong utok,” matod ni John Ratey, usa ka propesor sa psychiatry sa Harvard Medical School. Si Gene Cohen, direktor sa Center on Aging, Health and Humanities sa George Washington University miingon: “Kon atong patrabahoon ug lisod ang atong utok, ang mga selula niini magpatunghag bag-ong mga dendrite, nga magpadaghan sa mga synapses, o mga contact point.”

Nan, maalamon nga bansayon nato ang atong katakos sa panghunahuna ug pauswagon ang atong kahibalo sa Pulong sa Diyos. Pinaagi sa pagbuhat niana, mas mahanas kita sa pagbuhat sa “hingpit nga kabubut-on sa Diyos.”​—⁠Roma 12:​1, 2.

 Ugmara ang Imong Gana Alang sa “Gahing Pagkaon”

Kon gusto natong ‘mouswag sa pagkahamtong,’ kinahanglang pangutan-on nato ang atong kaugalingon: ‘Nag-uswag ba ang akong kahibalo sa kamatuoran? Giisip ba ako sa uban nga hamtong sa espirituwal?’ Ang usa ka inahan malipayng mohatag sa iyang anak ug gatas samtang masuso pa kini. Apan handurawa ang iyang kabalaka kon paglabay sa katuigan, ang iyang anak dili gihapon mokaon ug gahing pagkaon. Sa samang paagi, malipay kita sa pagkakita sa atong gitun-an sa Bibliya nga mouswag sa espirituwal ug magpahinungod ug magpabawtismo. Apan komosta kon dili na siya mouswag human niana? Dili ba makapahigawad kana? (1 Cor. 3:1-4) Nagdahom ang nagtudlo kaniya nga paglabay sa panahon ang bag-ong tinun-an mahimong magtutudlo usab.

Ang paggamit sa atong gahom sa pagsabot sa pagpangatarongan nagkinahanglag pagpamalandong, ug kana naglangkit ug paghago. (Sal. 1:1-3) Ang pagtan-awg TV ug ang mga pasatiempo wala kaayo magkinahanglag konsentrasyon. Kinahanglang dili nato tugotan ang maong kabaldahan nga mobabag kanato sa pagpamalandong sa hinungdanong mga butang. Aron maugmad ang atong katakos sa panghunahuna, kinahanglan natong ugmaron ug tagbawon ang atong gana sa pagtuon sa Bibliya ug sa mga publikasyon sa “matinumanon ug maalamong ulipon.” (Mat. 24:45-47) Gawas pa sa regular nga rutina sa personal nga pagbasa sa Bibliya, hinungdanon usab nga mogahin kitag panahon alang sa Pamilyahanong Pagsimba ug sa matukiong pagtuon sa mga topiko sa Bibliya.

Si Jerónimo, nga usa ka nagapanawng magtatan-aw sa Mexico, nag-ingon nga tun-an dayon niya ang matag gula sa Ang Bantayanang Torre inig-abot niini. Naggahin usab siyag panahon sa pagtuon uban sa iyang asawa. Si Jerónimo miingon, “Among naandan nga basahon ang Bibliya adlaw-adlaw, ug gamiton usab namo ang mga publikasyon sama sa brosyur nga ‘Maayong Yuta.’” Ang usa ka Kristohanon nga ginganlag Ronald miingon nga gisundan niya ang eskedyul sa pagbasa sa Bibliya sa kongregasyon. Mipili usab siyag usa o duha ka ulohan nga iyang tun-an pag-ayo. “Nakapukaw kini sa akong gana alang sa sunod nakong pagtuon,” matod ni Ronald.

Komosta kita? Naggahin ba kitag igong panahon sa pagtuon ug pagpamalandong sa Bibliya? Ginabansay ba nato ang atong katakos sa panghunahuna ug ang paghimog mga desisyon sumala sa mga prinsipyo sa Kasulatan? (Prov. 2:1-7) Hinaot nga maningkamot kita nga mohamtong sa espirituwal, nga mapunog kahibalo ug kaalam tungod sa pagbansay sa atong gahom sa pagsabot sa pag-ila sa maayo ug daotan!

[Hulagway sa panid 23]

Atong mabansay ang atong katakos sa panghunahuna “pinaagi sa paggamit” niini