Padayong Lig-ona ang Kongregasyon
Padayong Lig-ona ang Kongregasyon
“Magpadayon sa paghupay sa usag usa ug sa paglinig-onay sa usag usa.”—1 TES. 5:11.
1. Unsang mga panalangin ang atong matagamtam kon sakop kita sa Kristohanong kongregasyon, apan unsang mga suliran ang mahimo natong sagubangon?
USA gayod ka dakong panalangin nga mahimong sakop sa Kristohanong kongregasyon. Ikaw adunay maayong relasyon kang Jehova. Ang imong pagsalig sa iyang Pulong ingong giya manalipod kanimo batok sa daotang mga sangpotanan sa dili-Kristohanong pagkinabuhi. Ikaw adunay daghang tinuod nga mga higala nga nagtinguha sa imong kaayohan. Oo, daghan kaayo ang panalangin. Hinunoa, kadaghanan sa mga Kristohanon nag-antos ug lainlaing suliran. Ang pipila kanila nagkinahanglan tingalig tabang sa pagsabot sa lawom nga mga butang sa Pulong sa Diyos. Ang uban nagmasakiton o nagmagul-anon, o tingali nag-antos sa sangpotanan sa ilang dili-maalamong desisyon. Gawas pa niana, kitang tanan nagkinabuhi sa dili-diyosnong kalibotan.
2. Unsay angay natong buhaton sa dihang makaagom ug kalisdanan ang atong mga igsoon, ug ngano?
2 Walay usa kanato ang gustong magtan-aw sa atong mga isigka-Kristohanon nga mag-antos o magkalisod. Si apostol Pablo nagpakasama sa kongregasyon sa usa ka lawas ug siya miingon nga “kon ang usa ka sangkap nagaantos, ang tanang ubang mga sangkap magaantos uban niini.” (1 Cor. 12:12, 26) Sa maong mga kahimtang, kinahanglang maningkamot kita sa pagtabang sa atong mga igsoon. Adunay daghang asoy sa Kasulatan diin ang mga membro sa kongregasyon mitabang sa uban sa pagsagubang sa mga suliran. Samtang atong konsiderahon ang maong mga asoy, palandonga kon sa unsang paagi makatabang ka sa samang paagi. Unsay imong mahimo aron makatabang ka sa imong mga igsoon nga makapadayon sa pag-alagad kang Jehova ug sa ingon maglig-on sa kongregasyon?
“Ilang Giuban Siya Kanila”
3, 4. Sa unsang paagi gitabangan ni Aquila ug Priscila si Apolos?
3 Sa dihang mipuyo si Apolos sa Efeso, usa na siya ka masibotong tig-ebanghelyo. “Sanglit siya mainiton sa espiritu,” nag-ingon ang asoy sa Buhat, “siya nagsulti ug nanudlo sa hustong paagi sa mga butang bahin kang Jesus, apan nasinati lamang sa bawtismong iya ni Juan.” Ang pagkawalay-kasayoran ni Apolos sa bawtismo “sa ngalan sa Amahan ug sa Anak ug sa balaang espiritu” lagmit nagpasabot nga siya nasangyawan sa mga tinun-an ni Juan Bawtista o kaha sa mga sumusunod ni Jesus sa wala pa ang Pentekostes 33 K.P. Bisan tuod masiboton si Apolos, dihay pipila ka hinungdanong butang nga wala niya masabti. Sa unsang paagi nakatabang kaniya ang pagpakig-uban sa mga isigkamagtutuo?—Buh. 1:4, 5; 18:25; Mat. 28:19.
4 Ang magtiayon nga si Aquila ug Priscila nakadungog kang Apolos nga maisogong nanudlo diha sa sinagoga. Ilang giuban siya ug gitudloan pa ug dugang. (Basaha ang Buhat 18:24-26.) Ang ilang gihimo maoy pagpakitag gugma. Siyempre, si Aquila ug Priscila nagtudlo kang Apolos sa mataktikanhon ug matinabangong paagi, sa ingon, dili siya mobati nga gisaway siya. Kon buot hunahunaon, kulang lamang siyag kahibalo sa kasaysayan sa unang Kristohanong kongregasyon. Sa walay duhaduha mapasalamaton si Apolos nga gipaambit nila kaniya kining hinungdanong impormasyon. Tungod sa maong kahibalo, si Apolos “nakatabang ug dako” sa mga igsoon sa Acaya ug nakahatag ug epektibong pamatuod.—Buh. 18:27, 28.
5. Unsang mahigugmaong tabang ang gihatag sa libolibong magmamantala sa Gingharian, ug unsay resulta niana?
5 Daghan sa kongregasyon karon ang mapasalamaton kaayo niadtong mitabang kanila sa pagsabot sa Bibliya. Ang malungtarong panaghigalaay naugmad tali sa mga ginatun-an ug sa ilang mga magtutudlo. Kasagaran, gikinahanglan ang regular nga pagpakigsulti sa mga ginatun-an sulod sa ubay-ubayng mga bulan aron matabangan sila sa pagsabot sa kamatuoran. Bisan pa niana, ang mga magmamantala sa Gingharian andam mohimo sa maong sakripisyo tungod kay nasabtan nila nga nagkahulogan kinig kinabuhi o kamatayon. (Juan 17:3) Ug makalilipay gayod nga makita ang mga tawo nga makasabot sa kamatuoran, magkinabuhi uyon niana, ug maggamit sa ilang kinabuhi sa pagbuhat sa kabubut-on ni Jehova!
“May Maayong Panghimatuod Kaniya”
6, 7. (a) Nganong gipili ni Pablo si Timoteo ingong kauban sa panaw? (b) Unsang pag-uswag ang nahimo ni Timoteo sa tabang ni Pablo?
6 Sa dihang si apostol Pablo ug Silas miduaw sa Listra sa ilang ikaduhang misyonaryong panaw, ilang nakaila didto ang usa ka batan-on nga ginganlag Timoteo, nga tingali nag-edad ug mga 20 anyos o kapin pa. “Ang mga igsoon sa Listra ug Iconio may maayong panghimatuod kaniya.” Ang inahan ni Timoteo nga si Eunice ug apohan nga si Loida maoy dedikadong mga Kristohanon, apan ang iyang amahan dili-magtutuo. (2 Tim. 1:5) Tingali nahimamat ni Pablo kining pamilyaha sa iyang unang pagduaw nianang dapita mga duha ka tuig ang miagi. Apan niining tungora ang apostol nagpakitag linaing interes kang Timoteo tungod sa iyang talagsaong kadasig. Busa, uban sa pag-uyon sa lawas sa mga ansiyano sa ilang kongregasyon, si Timoteo nahimong kaabag ni Pablo sa iyang misyonaryong buluhaton.—Basaha ang Buhat 16:1-3.
7 Daghag nakat-onan si Timoteo sa iyang edaran nga kauban. Ug siya miuswag pag-ayo, mao nga sa ulahi gisaligan siya ni Pablo sa pagduaw ug mga kongregasyon ug sa paghawas kaniya. Sa mga 15 ka tuig nga magkauban sila ni Pablo, ang kulag-kasinatian ug tingali maulawong batan-on miuswag pag-ayo ug nahimong maayong magtatan-aw.—Filip. 2:19-22; 1 Tim. 1:3.
8, 9. Unsay mahimo sa mga igsoon sa kongregasyon aron madasig ang mga batan-on? Paghatag ug pananglitan.
8 Daghang batan-on karon sa kongregasyon ang dunay mga katakos nga mahimong mapuslanon sa umaabot. Kon dasigon ug atimanon sa mahunahunaon-sa-espirituwal nga mga igsoon, kini nga mga batan-on mahimong mokab-ot ug dugang mga responsibilidad. Panid-i ang inyong kongregasyon! Duna bay mga batan-on nga mahimong modawat ug pribilehiyo sa umaabot, sama kang Timoteo? Pinaagi sa imong tabang ug pagdasig, hayan nga sila mahimong mga payunir, Bethelite, misyonaryo, o nagapanawng mga magtatan-aw. Unsay imong mahimo sa pagtabang kanila sa pagkab-ot sa maong mga tumong?
9 Si Martin, nga membro sa pamilyang Bethel sulod sa 20 ka tuig, mapasalamatong nahinumdom sa interes nga gipakita kaniya sa usa ka magtatan-aw sa sirkito 30 ka tuig kanhi sa dihang nagkauban sila sa pagsangyaw. Ang magtatan-aw madasigong naghisgot bahin sa pag-alagad niya sa Bethel sa batan-on pa siya. Iyang gidasig si Martin sa pagkonsiderar sa posibilidad nga modawat usab ug mga pribilehiyo. Gibati ni Martin nga kining halandomong kabildohay dakog epekto sa desisyon nga iyang gihimo sa ulahi. Kinsay nasayod kon unsay mga kaayohan sa imong pagpakig-estorya sa mga batan-on bahin sa teokratikanhong mga tumong.
“Hupaya ang Magul-anong mga Kalag”
10. Unsay gibati ni Epafrodito, ug ngano?
10 Si Epafrodito mihimog layo ug kapoy nga panaw gikan sa Filipos ngadto sa Roma aron sa pagduaw kang apostol Pablo, kinsa nabilanggo tungod sa iyang pagtuo. Nagsilbi siyang hawas sa mga taga-Filipos. Wala lamang siya magdala sa ilang regalo alang sa apostol kondili nagplano usab siya nga magpabilin didto aron makatabang kang Pablo sa iyang malisod nga kahimtang. Apan samtang didto si Epafrodito sa Roma, siya nasakit “nga nag-ungaw sa kamatayon.” Kay mibati nga napakyas siya sa gipabuhat kaniya, siya naguol pag-ayo.—Filip. 2:25-27.
11. (a) Nganong dili kita matingala kon magmagul-anon ang pipila diha sa kongregasyon? (b) Unsay gisugyot ni Pablo sa kahimtang ni Epafrodito?
11 Tungod sa lainlaing kapit-os, ang mga tawo karon nag-antos sa depresyon. Sumala sa taho sa World Health Organization, 1 sa 5 ka tawo ang mahimong makaagom niana sa usa ka yugto sa ilang kinabuhi. Ang katawhan ni Jehova makasinati usab niana. Ang mga suliran maylabot sa pagtagana sa panginahanglan sa pamilya, dili-maayong panglawas, kahigawad tungod sa mga kapakyasan, o uban pa maoy pipila sa mga hinungdan nga magmagul-anon ang usa. Unsay mahimo sa mga taga-Filipos sa pagtabang kang Epafrodito? Si Pablo misulat: “Ihatag kaniya ang naandang pagdawat diha sa Ginoo uban ang bug-os nga kalipay; ug mahala kanunay ang ingon nianang matanga sa mga tawo, tungod kay sa buluhaton sa Ginoo siya nag-ungaw sa kamatayon, nga nagladlad sa iyang kalag sa kapeligrohan, aron bug-os niyang mahulipan ang inyong pagkawala-diri sa pag-alagad kanako.”—Filip. 2:29, 30.
12. Unsay makahupay sa mga nagmagul-anon?
12 Angay usab natong dasigon ang mga igsoon nga nahigawad o nagmagul-anon. Sa walay duhaduha aduna kitay ikasulti nga positibong mga butang bahin sa ilang pag-alagad kang Jehova. Hayan nakahimo silag dagkong kausaban sa ilang kinabuhi aron mahimong mga Kristohanon o mag-alagad nga bug-os-panahon. Atong pabilhan ang ilang mga paningkamot, ug ato silang pasaligan nga gipabilhan usab kana ni Jehova. Kon ang katigulangon o dili-maayong panglawas makapugong sa pipila ka matinumanong alagad sa pagbuhat ug sama sa ilang mahimo kaniadto, angay gihapon nato silang pabilhan tungod sa ilang pag-alagad sa dugayng panahon. Bisan unsa pay ilang kahimtang, si Jehova nag-awhag sa tanang matinumanon kaniya: “Hupaya ang magul-anong mga kalag, buligi ang mga maluya, magmataas-ug-pailob sa tanan.”—1 Tes. 5:14.
“Malulotong Magpasaylo ug Maghupay Kaniya”
13, 14. (a) Unsay kinahanglang buhaton sa kongregasyon sa Corinto, ug ngano? (b) Unsay epekto sa pagpalagpot sa maong tawo?
13 Sa unang-siglong kongregasyon sa Corinto dihay tawong makihilawason nga wala maghinulsol sa iyang gibuhat. Kini nakaapektar sa kaputli sa kongregasyon ug dili gani madawat bisan sa mga dili-magtutuo. Busa, haom lamang nga nagsugo si Pablo nga ipalagpot ang maong tawo gikan sa kongregasyon.—1 Cor. 5:1, 7, 11-13.
14 Ang maong disiplina adunay maayong epekto. Ang kongregasyon napanalipdan batok sa makadaot nga impluwensiya, ug ang makasasala nakaamgo sa iyang sayop ug kinasingkasing nga naghinulsol. Tungod sa binuhatan sa maong tawo nga nagpakitag paghinulsol, gihisgotan ni Pablo sa iyang ikaduhang sulat sa kongregasyon nga ipasig-uli siya. Apan, dili kay kana ray angay nilang buhaton. Nagsugo usab si Pablo nga ang kongregasyon ‘angay nga malulotong magpasaylo ug maghupay sa mahinulsolong makasasala, aron ang maong tawo dili lamyon sa iyang tumang kasubo.’—Basaha ang 2 Corinto 2:5-8.
15. Unsay angay natong panglantaw sa mahinulsolong mga makasasala nga napasig-uli sa kongregasyon?
15 Unsay atong makat-onan niining hitaboa? Masubo kita kon dunay mapalagpot. Hayan nakahatag silag pasipala sa ngalan sa Diyos ug kaulawan sa kongregasyon. Basin nakasala pa gani sila kanato. Bisan pa niana, sa dihang ang mga ansiyano nga gitudlo sa pag-atiman sa maong kaso modesisyon, sumala sa pagtultol ni Jehova, nga ang mahinulsolong makasasala kinahanglan nang ipasig-uli, nagpakita kana nga gipasaylo na siya ni Jehova. (Mat. 18:17-20) Dili ba nga angay usab nato Siyang sundogon niining bahina? Sa pagkatinuod, kon kita dili-magmaluloton ug dili-magmapinasayloon, sama ra nga atong gisupak si Jehova. Aron makatampo sa kalinaw ug panaghiusa sa kongregasyon sa Diyos ug aron mabatonan ang iyang pag-uyon, dili ba nga angay natong ‘pamatud-an ang atong gugma’ alang sa mga makasasala nga tinuorayng naghinulsol ug napasig-uli?—Mat. 6:14, 15; Luc. 15:7.
“Siya Mapuslanon Kanako”
16. Nganong nahigawad man si Pablo kang Marcos?
16 Ang laing asoy sa Kasulatan nagpakita nga dili kita angayng maghambin ug kayugot niadtong nakapahigawad kanato. Pananglitan, si Juan Marcos nakapahigawad pag-ayo kang apostol Pablo. Sa unsang paagi? Sa unang misyonaryong panaw ni Pablo ug Bernabe, si Marcos miuban aron sa pagtabang kanila. Apan sa usa ka yugto sa ilang panaw ug sa rason nga wala hisgoti, si Juan Marcos mibiya kanila ug mipauli. Nahigawad kaayo si Pablo sa iyang desisyon, mao nga sa pagplano nila sa ikaduhang panaw, naglalis sila ni Bernabe kon ikuyog ba nila pag-usab si Marcos. Tungod sa nahitabo sa unang panaw, dili gusto ni Pablo nga iuban nila si Marcos.—Basaha ang Buhat 13:1-5, 13; 15:37, 38.
17, 18. Giunsa nato pagkahibalo nga nahusay ang suliran tali kang Pablo ug Marcos, ug unsay atong makat-onan niini?
17 Dayag nga wala tugoti ni Marcos nga mahigawad siya pag-ayo kang Pablo, kay iyang gipadayon ang iyang buluhaton isip misyonaryo diha sa laing teritoryo uban kang Bernabe. (Buh. 15:39) Gipakita diha sa gisulat ni Pablo bahin kaniya pipila ka tuig sa ulahi nga siya matinumanon ug kasaligan. Si Pablo, nga binilanggo niadtong tungora sa Roma, nagsulat kang Timoteo. Sa mao gihapong sulat, si Pablo miingon: “Kuhaa si Marcos ug dad-a siya diri uban kanimo, kay siya mapuslanon kanako sa pag-alagad.” (2 Tim. 4:11) Oo, nagtuo si Pablo nga mihamtong na si Marcos.
18 Duna kitay makat-onan niini. Naugmad ni Marcos ang mga hiyas sa usa ka maayong misyonaryo. Wala siya mapandol kang Pablo. Silang duha ni Pablo maoy espirituwal nga mga tawo, ug nagkauliay ra ang ilang maayong kabubut-on. Nakita ni Pablo sa ulahi nga si Marcos usa ka mapuslanong alagad. Busa, sa dihang mahusay na ang kabingkilan ug molabay na ang problema, ang angayng buhaton mao ang pagpadayon sa pag-alagad ug pagtabang sa uban nga mouswag sa espirituwal. Ang positibong tinamdan magpalig-on sa kongregasyon.
Ang Kongregasyon ug Ikaw
19. Unsang tabang ang ikahatag sa matag membro sa kongregasyon sa usag usa?
19 Niining “makuyaw nga mga panahong lisod sagubangon,” gikinahanglan nimo ang tabang sa mga igsoon sa kongregasyon, ug sila nagkinahanglan usab kanimo. (2 Tim. 3:1) Usahay, ang usa ka Kristohanon wala tingali masayod kon unsay angayng buhaton aron masagubang ang iyang suliran, apan si Jehova nasayod niana. Ug mahimo niyang gamiton ang lainlaing membro sa kongregasyon—lakip na kanimo—sa pagtabang sa uban sa pagsubay sa hustong dalan. (Isa. 30:20, 21; 32:1, 2) Nan, angay gayod nimong ipadapat ang tambag ni apostol Pablo! Magpadayon sa “paghupay sa usag usa ug sa paglinig-onay sa usag usa, ingon gayod sa inyong ginabuhat.”—1 Tes. 5:11.
Unsay Imong Tubag?
• Nganong kinahanglang maglig-onay sulod sa kongregasyon?
• Sa unsang kalisdanan nga makahimo ka sa pagtabang sa uban?
• Nganong nagkinahanglan kitag tabang gikan sa mga igsoon sa kongregasyon?
[Mga Pangutana sa Pagtuon]
[Hulagway sa panid 11]
Sa dihang manginahanglag tabang ang usa ka igsoon, kita makahatag niana
[Hulagway sa panid 12]
Daghang batan-on sa kongregasyon ang dunay katakos nga mahimong mapuslanon sa umaabot