Pagsagubang sa Pagluib sa Kapikas

SI Margarita ug ang iyang bana nga si Raul nag-alagad kang Jehova ingong bug-os panahong mga ministro sulod sa daghang katuigan. a Apan wala madugay human matawo ang ilang unang anak, si Raul misugod pagpalayo kang Jehova. Sa ngadtongadto, si Raul nakapanapaw ug napalagpot sa kongregasyon. “Sa dihang nahitabo kini,” si Margarita miingon, “mora kog mamatay. Nasakitan kaayo ko, ug wala ko mahibalo kon unsay akong buhaton.”

Wala madugay human maminyo si Jane, ang iyang bana nagluib kaniya sa laing paagi. Siya gidagmalan niini. “Sa unang higayon nga gisumbag ko niya,” miingon si Jane, “ako nakalitan ug naulawan. Nabatasan niya ang pagdagmal nako ug dayon mangayo siyag pasaylo. Abi nakog akong obligasyon ingong Kristohanon ang kanunayng pagpasaylo kaniya ug pagkalimot sa iyang gibuhat. Nagtuo sab ko nga sama rag nagbudhi ko niya kon akong itug-an ang among problema sa uban—bisan sa mga ansiyano sa among kongregasyon. Ang iyang pagdagmal ug pagpangayog pasaylo nagpadayon sa daghang katuigan. Nianang panahona, naghunahuna ko nga duna pa gyod koy mahimo aron higugmaon ko sa akong bana. Sa dihang mibiya siya nako ug sa among anak nga babaye, akong gibati nga napakyas ko, nga duna pa unta koy dugang gihimo o gisulti aron dili mabungkag ang among kaminyoon.”

 Sama kang Margarita ug Jane, nag-antos ka tingali sa emosyonal, pinansiyal, ug espirituwal nga kadaot tungod sa pagluib sa imong bana. O tingali ikaw usa ka bana nga nag-antos sa kaguol ug kalisdanan tungod sa pagbudhi sa imong asawa. Dili ikalimod nga kita nagkinabuhi na sa “makuyaw nga mga panahong lisod sagubangon,” ingon sa gitagna sa Bibliya. Ang maong tagna nagpakita nga sa “kataposang mga adlaw,” ang pamilya makaagom ug mga problema ug kasagaran walay kinaiyanhong pagbati. Ang pipila magpanghimakak sa ilang pangangkon nga sila nag-alagad sa Diyos. (2 Tim. 3:1-5) Ang matuod nga mga Kristohanon makasinati usab niini; busa, unsay makatabang kanimo sa pagsagubang kon ikaw giluiban?

Tan-awa ang Imong Kaugalingon Sama sa Panglantaw ni Jehova Kanimo

Sa sinugdan, basin dili ka makatuo nga pasakitan ka pag-ayo sa usa nga imong gihigugma. Tingali basolon pa gani nimo ang imong kaugalingon sa iyang gihimo.

Apan, hinumdomi nga bisan ang hingpit nga tawong si Jesus gibudhian sa usa nga iyang gisaligan ug gihigugma. Una pilia ni Jesus ang iyang suod kaayong mga kauban, ang mga apostoles, siya migahin ug panahon sa pagpamalandong ug pag-ampo bahin niana. Ang 12 ka apostoles pulos kasaligang mga alagad ni Jehova. Busa, sa walay duhaduha naguol pag-ayo si Jesus sa dihang si Judas “nahimong maluibon.” (Luc. 6:12-16) Hinunoa, wala pakasad-a ni Jehova si Jesus sa gibuhat ni Judas.

Tinuod nga sa pagkakaron walay hingpit nga kapikas. Ang magtiayon parehong masayop. Ang salmista misulat: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Sal. 130:3) Ingong pagsundog kang Jehova, ang magtiayon angayng magpasaylo sa kasaypanan sa usag-usa.—1 Ped. 4:8.

Hinunoa, “ang matag usa kanato manubag alang sa iyang kaugalingon ngadto sa Diyos.” (Roma 14:12) Kon naandan na sa usa ka bana o asawa ang pagsultig masakit nga pulong o pagdagmal sa iyang kapikas, ang sad-an maoy manubag kang Jehova. Gidumtan ni Jehova ang kapintasan ug mapasipalahong sinultihan, busa wala gayoy rason nga trataron ang usa ka kapikas sa paagi nga walay gugma ug pagtahod. (Sal. 11:5; Efe. 5:33; Col. 3:6-8) Sa pagkatinuod, kon ang usa ka Kristohanon sublisubling magpadaog sa iyang kasuko ug dili mag-usab, kinahanglan siyang ipalagpot sa kongregasyon. (Gal. 5:19-21; 2 Juan 9, 10) Dili angayng bation sa usa ka kapikas nga nakasala siya kon itug-an niya kini sa mga ansiyano. Sa pagkatinuod, si Jehova maluoy sa mga biktima sa maong pagdaogdaog.

Sa dihang ang usa manapaw, siya wala lamang makasala sa iyang kapikas kondili kang Jehova usab. (Mat. 19:4-9; Heb. 13:4) Kon ang inosenteng kapikas naningkamot sa pagkinabuhi sumala sa mga prinsipyo sa Bibliya, dili niya angayng bation nga siyay hinungdan sa pagluib sa iyang kapikas.

Hinumdomi nga nahibalo si Jehova sa imong gibati. Gihubit niya ang iyang kaugalingon ingong bana sa nasod sa Israel, ug ang iyang Pulong adunay daghang makapatandog nga mensahe nga nagpakita sa iyang kaguol tungod sa espirituwal nga pagpanapaw sa maong nasod. (Isa. 54:5, 6; Jer. 3:1, 6-10) Magmasaligon nga nakita ni Jehova ang imong mga luha kon giluiban ka sa imong kapikas. (Mal. 2:13, 14) Siya nasayod nga nagkinahanglan kag paghupay ug pagdasig.

Kon sa Unsang Paagi si Jehova Magtaganag Kahupayan

Ang usa sa mga paagi nga si Jehova magtaganag kahupayan maoy pinaagi sa Kristohanong kongregasyon. Nasinati kana ni Jane. “Naatol ang pagduaw sa magtatan-aw sa sirkito sa panahon nga magul-anon kaayo ko,” nahinumdom si Jane. “Nahibalo siya nga nasakitan kaayo ko nga makigdiborsiyo nako ang akong bana. Migahin siyag panahon sa pagtabang kanako sa pagpangatarongan pinasukad sa mga teksto sama sa 1 Corinto 7:15. Ang maong mga teksto  ug ang iyang malulotong mga komento nakatabang sa paghupay sa akong gibating pagkasad-an ug naghatag kanakog kalinaw sa hunahuna.” b

Si Margarita, nga gihisgotan ganina, nakakat-on usab nga si Jehova nagtaganag praktikal nga tabang pinaagi sa kongregasyon. “Sa dihang akong nakita nga dili-mahinulsolon ang akong bana,” miingon si Margarita, “kami sa akong mga anak namalhin sa laing siyudad. Pag-abot namo, nakakita kog duha ka kuwarto nga kaabangan. Pagkaugma, magul-anon kong nagpahimutang sa among mga gamit sa dihang may nanuktok sa pultahan. Abi nakog ang tag-iya kadto sa balay nga nagpuyo tapad namo. Dili ko makatuo nga ang sister diay kadto nga nagdumalag pagtuon sa Bibliya uban sa akong inahan ug nagtabang sa among pamilya nga makadangat sa kamatuoran. Wala siya magdahom nga ako ang iyang makita kay ang tuyo niya mao ang tag-iya sa balay nga iyang ginatun-an sa Bibliya. Nahupayan kaayo ko ug wala ko makapugong sa akong gibati. Akong giestorya ang akong kahimtang, ug nanghilak ming duha. Gihikay dayon niya nga makatambong mi sa tigom nianang adlawa. Giabiabi mi sa mga igsoon, ug naghimog kahikayan ang mga ansiyano sa pagtabang kanako sa pag-atiman sa espirituwal nga panginahanglan sa akong pamilya.”

Kon sa Unsang Paagi Makatabang ang Uban

Sa pagkatinuod, ang mga igsoon sa kongregasyon makahatag ug praktikal nga tabang sa daghang paagi. Pananglitan, si Margarita kinahanglan nang mangitag trabaho. Ang usa ka pamilya diha sa kongregasyon mitanyag nga motabang sila pag-atiman sa iyang mga anak human sa klase kon gikinahanglan.

Si Margarita miasoy: “Mapasalamaton kaayo ko sa dihang ubanan mi sa mga igsoon sa pagsangyaw sa kanataran.” Pinaagi niana, ang mga igsoon sa kongregasyon makatabang sa ‘pagpas-an sa mga kabug-at sa usag usa,’ ug sa ingon nagtuman “sa balaod ni Kristo.”—Gal. 6:2.

Kadtong nag-antos tungod sa sala sa uban nagpabili gayod niining matanga sa tabang. Si Monique, nga gibiyaag bana ug gibinlag upat ka anak ug utang sa credit card nga $15,000, miingon: “Mahigugmaon kaayo ang mga igsoon sa kongregasyon. Ambot kon makalahutay ba ko kon wala ko nila tabangi. Akong gibati nga gitagana ni Jehova ang labing mahigugmaong mga igsoon, kinsa nagsakripisyo alang sa akong mga anak. Nalipay ko nga nakita ang akong mga anak nga mihamtong sa  espirituwal tungod sa ilang tabang. Kon magkinahanglan kog tambag, ang mga ansiyano motabang nako. Kon magkinahanglan kog kaestorya, sila mamati.”—Mar. 10:29, 30.

Siyempre, ang usa ka mahigugmaong higala nahibalo kon kanus-a dili angayng hisgotan ang mapait nga kasinatian sa usa. (Eccl. 3:7) Si Margarita miingon: “Kasagaran, malipay kong makig-estorya sa mga sister sa akong bag-ong kongregasyon bahin sa pagsangyaw, sa among ginatun-an sa Bibliya, sa among mga anak—bisag unsa gawas lang sa akong mga problema. Mapasalamaton ko nga gitugotan ko nila nga makalimot sa akong kagahapon ug gitabangan ko nila nga makasugod ug bag-ong kinabuhi.”

Pugngi ang Tinguha nga Manimalos

Usahay, inay mobati nga ikaw ang hinungdan nga nakasala ang imong kapikas, basin maglagot ka nga nag-antos ka tungod sa iyang gibuhat. Kon tugotan nimong maugmad kanang pagbatia, mahimong mohuyang ang imong determinasyon nga magpabiling matinumanon kang Jehova. Pananglitan, mangita ka tingalig paagi nga makabalos sa imong mabudhiong kapikas.

Kon imong mamatikdan nga mibati ka niana, mahimo nimong palandongon ang panig-ingnan ni Josue ug Caleb. Kining matinumanong mga lalaki nagpameligro sa ilang kinabuhi aron sa pagpangespiya sa Yutang Saad. Ang ubang mga espiya kulag pagtuo ug nagdani sa mga tawo sa pagsupak kang Jehova. Gusto ganing batoon sa pipila ka Israelinhon si Josue ug Caleb sa dihang giawhag nila ang nasod nga magpabiling matinumanon. (Num. 13:25–14:10) Tungod sa gibuhat sa Israel, si Josue ug Caleb napugos sa paglibotlibot sa kamingawan sulod sa 40 ka tuig, dili tungod sa ilang kasaypanan, kondili nianang sa uban.

Bisan tuod nahigawad tingali si Josue ug Caleb, wala nila tugoti nga mayugot sila sa kasal-anan sa ilang mga igsoon. Gihatagan nilag pangunang pagtagad ang ilang espirituwalidad. Human sa 40 ka tuig nga paglibotlibot sa kamingawan, sila ug ang mga Levihanon lamang sa ilang henerasyon ang gitugotang makasulod sa Yutang Saad.—Num. 14:28-30; Jos. 14:6-12.

Tingali dugay ka nang nag-antos tungod sa gibuhat sa imong mabudhiong kapikas. Mahimong matapos ang inyong kaminyoon, apan basin mag-antos ka sa emosyonal ug pinansiyal nga kalisdanan human niana. Hinunoa, imbes magpadaog ka sa imong kaguol, hinumdomi nga si Jehova nahibalo gayod kon unsay iyang buhaton niadtong tinuyong nagsalikway sa iyang mga sukdanan, sama sa nahitabo sa dili-matinumanong mga Israelinhon sa kamingawan.—Heb. 10:30, 31; 13:4.

Makasagubang Ka!

Imbes magpadaog sa negatibong mga hunahuna, pun-a ang imong kaisipan sa mga hunahuna ni Jehova. “Ang pagpamati nako sa mga rekording sa The Watchtower ug Awake! nakatabang kanako sa pagsagubang,” miingon si Jane. “Ang mga tigom nakapalig-on usab kanako. Ang akong kanunayng pagkomento sa mga tigom nakatabang kanako nga dili maghunahuna sa akong mga problema. Ang pagsangyaw nakatabang usab. Pinaagi sa pagtabang sa uban nga makabatog pagtuo kang Jehova, napalig-on ang akong pagtuo. Ug ang pag-atiman sa mga ginatun-an sa Bibliya nakatabang nga masentro ang akong hunahuna sa mas hinungdanong mga butang.”

Si Monique, nga gihisgotan ganina, miingon: “Pinaagi sa regular nga pagtambong sa mga tigom ug pagsangyaw sa kanataran kutob sa akong mahimo, ako nakalahutay. Mas nasuod ang akong pamilya sa usag usa ug sa kongregasyon. Tungod sa akong mapait nga kasinatian, nakita nako ang akong mga kahuyangan. Ako nasulayan, apan sa tabang ni Jehova ako nakasagubang.”

Makasagubang ka usab sa susamang mga pagsulay. Bisan pa sa kaguol nga imong gibati tungod sa pagluib sa imong kapikas, paningkamoti nga mapadapat ang tambag ni Pablo: “Dili kita mohunong sa pagbuhat ug maayo, kay sa takdang panahon kita moani kon kita dili molunga.”—Gal. 6:9.

[Footnote]

[Hulagway sa panid 31]

Ang giabandonar nga mga kapikas mapasalamaton niadtong mitabang kanila diha sa pagsangyaw sa kanataran