“Ayaw Kahadlok. Ako Magatabang Kanimo”

SI Jesus nagpasidaan sa iyang mga sumusunod: “Ang Yawa padayong magabalhog sa pipila kaninyo sa bilanggoan aron kamo bug-os mabutang sa pagsulay.” Apan, una niya ihatag ang maong pasidaan, siya miingon: “Ayaw kahadlok sa mga butang nga hapit na nimong antoson.” Sanglit gigamit gihapon ni Satanas ang hulga sa pagbilanggo aron pahunongon ang pagsangyaw sa Gingharian, posible gayod nga lutoson sa pipila ka gobyerno ang matuod nga mga Kristohanon. (Pin. 2:10; 12:17) Busa, unsay makatabang kanato nga magmaandam sa pag-atubang sa mga laraw ni Satanas ug ‘dili mahadlok,’ ingon sa gitambag ni Jesus?

Siyempre, kadaghanan kanato mibati nag kahadlok. Bisan pa niana, ang Pulong sa Diyos nagpasalig kanato nga sa tabang ni Jehova, dili kita madaog sa kahadlok. Sa unsang paagi? Ang usa ka paagi nga si Jehova motabang kanato nga magmaandam sa pag-atubang sa mga pagsupak mao ang pagpahibalo kanato sa mga taktika nga gigamit ni Satanas ug sa iyang ginsakpan. (2 Cor. 2:11) Sa pag-ilustrar niana, atong hisgotan ang usa ka hitabo sa panahon sa Bibliya. Susihon usab nato ang pipila ka modernong-adlaw nga panig-ingnan sa matinumanong mga isigkamagtutuo kinsa ‘mibarog nga malig-on batok sa mga malipatlipatong kaugdahan sa Yawa.’—Efe. 6:11-13.

Ang Mahinadlokon-sa-Diyos nga Hari Miatubang sa Daotang Magmamando

Sa ikawalong siglo W.K.P., ang daotang hari sa Asirya nga si Senakerib sunodsunod nga nagpukan sa pipila ka nasod. Kay masaligon kaayo sa iyang mga kadaogan, gusto niyang sakopon ang katawhan ni Jehova ug ang ilang kaulohan, ang Jerusalem, diin naghari ang mahinadlokon-sa-Diyos nga si Ezequias. (2 Hari 18:1-3, 13) Sa walay duhaduha, gipahimuslan ni Satanas ang situwasyon, nga naghulhog kang Senakerib sa pagtuman sa iyang laraw, aron mahanaw ang matuod nga pagsimba.—Gen. 3:15.

Si Senakerib nagpadalag mga tawo sa Jerusalem aron pasurenderon ang maong siyudad. Apil kanila si Rabsake, nga mao ang pangunang tigpamaba sa hari. a (2 Hari 18:17) Tuyo ni Rabsake nga paluyahon ug hadlokon ang mga Hudiyo aron mosurender sila nga walay pakiggubat. Unsang mga paagi ang gigamit ni Rabsake aron hadlokon ang mga Hudiyo?

Matinumanon Bisag Nahimulag sa Uban

Si Rabsake namulong sa mga hawas ni Ezequias: “Mao kini ang giingon sa dakong hari, ang hari sa Asirya: ‘Unsa kining pagsaliga nga imong gilaoman? . . . Tan-awa! ikaw misalig sa tukod niining gupok nga tangbo, sa Ehipto,  nga, kon ang usa ka tawo manukod niana, tinong modulot sa iyang palad ug motusok niini.’” (2 Hari 18:19, 21) Bakak ang akusasyon ni Rabsake, kay si Ezequias wala makig-alyansa sa Ehipto. Pero, gipakita niana kon unsay gusto ni Rabsake nga hunahunaon sa mga Hudiyo: ‘Walay motabang ninyo. Kamo nag-inusara.’

Sa modernong panahon, ang mga magsusupak migamit usab sa susamang taktika aron hadlokon ang matuod nga mga Kristohanon. Usa ka sister, kinsa napriso tungod sa iyang pagtuo ug nahimulag sa mga isigkamagtutuo sulod sa daghang katuigan, miasoy sa ulahi kon unsay nakatabang kaniya nga dili madaog sa kahadlok. Siya miingon: “Ang pag-ampo nakatabang kanako nga masuod kang Jehova . . . Akong nahinumdoman ang pasalig sa Isaias 66:2, nga ang Diyos nakakita ‘sa usa nga sinakit ug mabasolon sa espiritu.’ Kini nakapalig-on ug nakapahupay gayod kanako.” Sa susama, usa ka brader nga gibartolina sulod sa daghang katuigan miingon: “Bisag ako gibartolina, wala ko mobating nag-inusara tungod sa akong suod nga relasyon sa Diyos.” Oo, ang ilang suod nga relasyon kang Jehova nakatabang kanila sa paglahutay. (Sal. 9:9, 10) Tungod sa paglutos, ang nabilanggong mga Saksi mahimong nahimulag sa ilang mga pamilya, higala, ug mga isigkamagtutuo, apan nahibalo sila nga dili gayod sila mahimulag kang Jehova.—Roma 8:35-39.

Nan, hinungdanon gayod nga atong gamiton ang tanang kahigayonan sa pagpalig-on sa atong relasyon kang Jehova. (Sant. 4:8) Angay natong suknaon kanunay ang atong kaugalingon: ‘Unsa ka tinuod si Jehova alang kanako? Ang iya bang pulong adunay dakong impluwensiya sa akong mga desisyon, gagmay man o dagko?’ (Luc. 16:10) Kon manglimbasog kita sa pagpabiling suod sa Diyos, dili kita angayng mahadlok. Si manalagnang Jeremias, nga naghawas sa sinakit nga mga Hudiyo, miingon: “Gitawag ko ang imong ngalan, Oh Jehova, gikan sa kinahiladman nga gahong . . . Miduol ka sa adlaw nga ako nagpadayon sa pagtawag kanimo. Ikaw miingon: ‘Ayaw kahadlok.’”—Lam. 3:55-57.

Napakyas ang Pagtisok ug Pagduhaduha

Si Rabsake migamit ug malinglahong pangatarongan aron magtisok ug pagduhaduha. Siya miingon: “Dili ba [si Jehova] ang usa kansang hatag-as nga mga dapit ug kansang mga halaran giwagtang ni Ezequias? . . . Si Jehova miingon kanako, ‘Tungas batok niining yutaa, ug laglagon mo gayod kini.’” (2 Hari 18:22, 25) Busa gustong palutawon ni Rabsake nga si Jehova dili motabang sa iyang katawhan tungod kay nasuko Siya kanila. Apan dili kana tinuod. Si Jehova nahimuot kang Ezequias ug sa mga Hudiyo kinsa mibalik sa matuod nga pagsimba.—2 Hari 18:3-7.

Karong adlawa, ang malinglahong mga maglulutos mahimong mosultig pipila ka tinuod nga impormasyon aron mosalig kita kanila, apan ila kanang sambogag kabakakan aron kita magduhaduha. Pananglitan, ang nabilanggong mga igsoon sultihan usahay nga mikompromiso na ang usa sa mga brader nga nagdumala sa buluhaton, busa mahimo usab nila kanang buhaton. Apan, ang maong pangatarongan wala makapatunghag pagduhaduha diha sa maalamong mga Kristohanon.

Tagda ang nahitabo sa usa ka sister panahon sa Gubat sa Kalibotan II. Samtang nabilanggo, gipakitaan siyag sinulat nga testimonya nga gitalikdan sa usa ka brader nga nagdumala sa buluhaton ang iyang pagtuo. Ang imbestigador nangutana kaniya kon may pagsalig ba siya sa maong Saksi. Ang sister mitubag, “Tawo ra siya  nga dili hingpit.” Siya midugang nga kon ang maong tawo padayong nagsunod sa mga prinsipyo sa Bibliya, gamiton siya sa Diyos. “Apan kay ang iyang gipamulong sukwahi man sa Bibliya, dili na nako siya igsoon.” Ang maong matinumanong sister maalamong nagsunod sa tambag sa Bibliya: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan.”—Sal. 146:3.

Ang pagbaton ug tukmang kahibalo sa Pulong sa Diyos ug ang pagpadapat sa tambag niini makatabang kanato nga dili malingla sa bakak nga pangatarongan nga makapahuyang sa atong determinasyon nga molahutay. (Efe. 4:13, 14; Heb. 6:19) Busa, aron mahimo kitang andam panahon sa pagsulay, kinahanglang hatagan natog prioridad ang pagbasa sa Bibliya adlaw-adlaw ug ang personal nga pagtuon. (Heb. 4:12) Oo, karon na ang panahon sa pagpalalom sa atong kahibalo ug pagpalig-on sa atong pagtuo. Usa ka brader nga gibartolina sulod sa daghang katuigan miingon: “Gusto nakong dasigon ang matag usa nga pabilhan gayod ang tanang espirituwal nga pagkaon nga gihatag kanato, sanglit wala kita masayod kon unsa kana ka bililhon sa umaabot.” Sa pagkatinuod, kon maampingon kitang magtuon sa Pulong sa Diyos ug sa mga publikasyon nga gitagana sa ulipong matang, nan, ang balaang espiritu “magpahinumdom [kanato]” sa atong nakat-onan panahon sa kalisdanan.—Juan 14:26.

Gipanalipdan Batok sa Pagpanghulga

Gisulayan ni Rabsake paghadlok ang mga Hudiyo. “Pakigpusta, palihog, sa akong ginoo nga hari sa Asirya,” siya miingon, “ug hatagan ko ikaw ug duha ka libo ka kabayo aron tan-awon kon ikaw ba makahimo, sa imong bahin, sa pagbutang ug mga magsasakay diha kanila. Nan, unsaon man nimo pagpalingiw sa nawong sa usa ka tagdumala sa kinagamyang mga alagad sa akong ginoo?” (2 Hari 18:23, 24) Sa tawhanong panglantaw, si Ezequias ug ang iyang katawhan wala gayoy dag-anan batok sa gamhanang kasundalohan sa Asirya.

Ang mga maglulutos karon daw gamhanan usab kaayo, ilabina kon gipaluyohan sila sa gobyerno. Ingon niana ang mga maglulutos nga Nazi panahon sa Gubat sa Kalibotan II. Gisulayan nila paghadlok ang mga alagad sa Diyos. Usa sa atong mga igsoon, kinsa nabilanggo sulod sa daghang katuigan, nag-asoy sa ulahi kon giunsa siya paghulga. Dihay higayon nga nangutana kaniya ang usa ka opisyal: “Nakita ba nimo kon giunsa pagpatay ang imong manghod? Unsa may imong hunahuna?” Siya mitubag: “Ako magpabiling Saksi ni Jehova.” “Aw, ikaw nay sunod patyon,” mihulga ang opisyal. Bisan pa niana, ang atong igsoon mibarog nga malig-on, ug ang kaaway miundang paghulga kaniya. Unsay nakatabang kaniya sa pagpabiling lig-on? Siya miingon: “Ako misalig kang Jehova.”—Prov. 18:10.

Pinaagi sa pagbaton ug bug-os nga pagtuo kang Jehova, kita adunay dakong taming nga manalipod kanato batok sa tanang paagi nga gigamit ni Satanas sa pagpahuyang sa atong espirituwalidad. (Efe. 6:16) Busa, mas maayo nga atong iampo kang Jehova nga tabangan niya kita sa pagpalig-on sa atong pagtuo. (Luc. 17:5) Kinahanglan usab nga atong pabilhan ang makapalig-on-sa-pagtuo nga mga kahikayan sa matinumanon ug maalamong ulipon. Sa dihang kita hulgaon, kita mapalig-on kon atong hinumdoman ang pasalig ni Jehova kang manalagnang Ezequiel, kinsa nagdalag mensahe sa gahig ulo nga mga tawo. Si Jehova miingon kaniya: “Gihimo ko ang imong nawong nga ingon kagahi sa ilang mga nawong ug ang imong agtang nga ingon kagahi sa ilang mga agtang. Gihimo ko ang imong agtang nga sama sa usa ka diamante, nga magahi pa kay sa santik.” (Ezeq. 3:8, 9) Kon gikinahanglan, tabangan kita ni Jehova nga mahimong lig-on ingon sa usa ka diamante, sama kang Ezequiel.

Pagsukol sa mga Pagsulay

Nakita sa mga magsusupak nga kon mapakyas ang tanan nilang paagi, ang paghatag ug makapadani nga ganti makabungkag usahay sa integridad sa usa. Si Rabsake migamit usab niana nga paagi. Siya miingon niadtong tua sa Jerusalem:  “Mao kini ang giingon sa hari sa Asirya: ‘Ampo kanako, ug umari kanako . . . hangtod nga ako moabot ug ako magdala gayod kaninyo ngadto sa usa ka yuta nga sama sa inyong kaugalingong yuta, usa ka yuta sa mga lugas ug bag-ong bino, usa ka yuta sa tinapay ug mga kaparasan, usa ka yuta sa mga kahoyng lana-olibo ug dugos; ug magpadayon nga buhi aron kamo dili mamatay.’” (2 Hari 18:31, 32) Ang posibilidad nga makakaon ug bag-ong luto nga tinapay ug makainom ug bag-ong bino mahimong makapadani niadtong natanggong sa gilikosang siyudad!

Ang maong paagi gigamit usab aron pahuyangon ang determinasyon sa usa ka misyonaryo nga nabilanggo. Siya giingnan nga ibalhin siya sa usa ka “maanindot nga balay” diha sa usa ka “matahom nga tanaman” sulod sa unom ka bulan aron sa paghunahuna sa maong tanyag. Apan, ang brader wala gayod mokompromiso. Unsay nakatabang kaniya? Sa ulahi siya miingon: “Akong gihunahuna kanunay ang Gingharian ingong tinuod nga paglaom. . . . Kay napalig-on sa kahibalo bahin sa Gingharian sa Diyos ug wala gayod magduhaduha niana, ako nakapabiling matinumanon.”

Unsa ka tinuod ang Gingharian alang kanato? Ang patriarkang si Abraham, si apostol Pablo, ug si Jesus nakalahutay sa grabeng mga pagsulay tungod kay tinuod kanila ang Gingharian. (Filip. 3:13, 14; Heb. 11:8-10; 12:2) Kon padayon natong unahon ang Gingharian ug hunahunaon kanunay ang dumalayong mga panalangin niana, masuklan usab nato ang tentasyon nga dawaton ang mga tanyag nga maghatag ug temporaryong kahupayan sa mga pagsulay.—2 Cor. 4:16-18.

Dili Gayod Kita Biyaan ni Jehova

Bisan pa sa mga panghulga ni Rabsake sa mga Hudiyo, si Ezequias ug ang iyang ginsakpan bug-os nga misalig kang Jehova. (2 Hari 19:15, 19; Isa. 37:5-7) Sa baylo, gitubag ni Jehova ang ilang pag-ampo pinaagi sa pagpadalag usa ka manulonda aron patyon ang 185,000 ka manggugubat sa kampo sa mga Asiryano sulod sa usa ka gabii. Naulawan si Senakerib, busa pagkaugma mipauli dayon siya sa iyang kaulohang siyudad, ang Nineve, uban sa pipila na lang ka kasundalohan.—2 Hari 19:35, 36.

Tin-aw nga wala gayod biyai ni Jehova ang nagasalig kaniya. Ang modernong panig-ingnan sa atong mga igsoon nga lig-ong mibarog ilalom sa pagsulay nagpakita nga dili gayod biyaan ni Jehova ang nagasalig kaniya. Nan, ang atong langitnong Amahan makapasalig gayod kanato: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”—Isa. 41:13.

[Footnote]

[Blurb sa panid 13]

Sa iyang Pulong, kapig 30 ka beses nga si Jehova nagpasalig sa iyang mga alagad: “Ayaw kahadlok”

[Hulagway sa panid 12]

Sa unsang paagi ang mga taktika ni Rabsake nahisama nianang gigamit sa mga kaaway sa katawhan sa Diyos karon?

[Mga hulagway sa panid 15]

Ang suod nga relasyon kang Jehova motabang kanato sa paghupot sa atong integridad ilalom sa pagsulay