Bug-os nga Makig-ambit sa Dakong Espirituwal nga Pagpangani

‘Magmapuliki sa buluhaton sa Ginoo.’—1 COR. 15:58.

1. Unsang pagdapit ang gipaabot ni Jesus sa iyang mga tinun-an?

 SAMTANG nagpanaw latas sa Samaria sa hinapos sa 30 K.P., si Jesus mipahulay duol sa atabay nga dili layo sa lungsod sa Sikar. Didto iyang giingnan ang iyang mga tinun-an: “Iyahat ang inyong mga mata ug lantawa ang kaumahan, nga kini puti na aron anihon.” (Juan 4:35) Si Jesus wala magtumong sa literal nga pagpangani kondili sa espirituwal nga pagpanigom sa matarong-ug-kasingkasing nga mga tawo nga mahimo niyang mga tinun-an. Sa pagkatinuod, iyang gidapit ang iyang mga tinun-an nga makigbahin sa pagpangani. Dako pa ang buluhaton ug mubo na lang ang panahon!

2, 3. (a) Unsay nagpaila nga nagkinabuhi na kita sa panahon sa pagpangani? (b) Unsay hisgotan niining artikuloha?

² Ang gipamulong ni Jesus bahin sa pagpangani adunay linaing kahulogan sa atong adlaw. Nagkinabuhi kita sa panahon nga ang umahan sa kalibotan sa katawhan “puti na aron anihon.” Matag tuig, milyonmilyon ang gidapit nga mokat-on sa nagahatag-ug-kinabuhi nga kamatuoran, ug libolibo ang nabawtismohan. Atong pribilehiyo nga makigbahin sa kinadak-ang buluhaton nga pagpangani ilalom sa pagdumala sa Agalon sa pagpangani, si Jehova nga Diyos. “Puliki” ka ba niining buluhatona?—1 Cor. 15:58.

³ Sulod sa tulo ka tuig ug tunga nga ministeryo ni Jesus, giandam niya ang iyang mga tinun-an alang sa buluhatong pagpangani. Hisgotan niining artikuloha ang tulo sa daghang hinungdanong pagtulon-an nga gitudlo ni Jesus. Ang matag usa niana nagpasiugda ug usa ka hiyas nga hinungdanon kaayo kanato samtang kita naningkamot sa pagbuhat sa atong maarangan niining modernong-adlaw nga pagpanigom ug mga tinun-an. Atong tagsatagsaon paghisgot ang maong mga hiyas.

Gikinahanglan ang Pagkamapainubsanon

4. Sa unsang paagi giilustrar ni Jesus ang kahinungdanon sa pagkamapainubsanon?

⁴ Handurawa ang esena: Ang mga tinun-an bag-o pang naglalis kon kinsa ang labing dako kanila. Lagmit makita pa sa ilang panagway ang kawalay-pagsalig ug kayugot. Busa mitawag si Jesus ug usa ka bata ug gipatindog kini sa ilang taliwala. Samtang nagtan-aw sa bata, siya miingon: “Bisan kinsa nga magapaubos sa iyang kaugalingon [o, “maghimo sa iyang kaugalingon nga gamay,” Byington] sama niining bataa mao ang labing dako sa gingharian sa mga langit.” (Basaha ang Mateo 18:1-4.) Imbes maghunahuna ang mga tinun-an sama sa kalibotan, nga magtan-aw sa tawo pinasukad sa iyang gahom, bahandi, ug posisyon, kinahanglang makasabot sila nga ang ilang pagkadako nagdepende sa ‘paghimo nila sa ilang kaugalingon nga gamay’ sa panglantaw sa uban. Si Jehova magpanalangin ug maghatag kanilag pribilehiyo kon tinuod silang magpaubos.

5, 6. Nganong kinahanglan kang magpaubos aron bug-os nga makapakig-ambit sa buluhatong pagpangani? Iilustrar.

⁵ Hangtod sa atong panahon, daghan sa kalibotan ang naggugol sa ilang kinabuhi sa pagpangagpas ug gahom, bahandi, ug posisyon. Ingong resulta, halos wala na o wala na gyod silay panahon alang sa espirituwal nga mga butang. (Mat. 13:22) Sa kasukwahi, ang katawhan ni Jehova malipay sa ‘paghimo sa ilang kaugalingon nga gamay’ sa panglantaw sa uban aron maangkon ang panalangin ug pag-uyon sa Agalon sa pagpangani.—Mat. 6:24; 2 Cor. 11:7; Filip. 3:8.

 ⁶ Tagda si Francisco, nga usa ka ansiyano sa Amerika del Sur. Sa batan-on pa, siya miundang pagtungha sa unibersidad aron magpayunir. “Sa dihang hapit na kong magminyo,” siya nahinumdom, “makakita unta kog trabaho nga makahatag namo sa akong asawa ug hamugaway nga kahimtang. Pero nakadesisyon mi sa pagpasimple sa among kinabuhi ug sa pagpadayon sa bug-os-panahong pag-alagad. Sa ulahi nakabaton mig mga anak, ug misamot kalisod ang among kahimtang. Apan gitabangan mi ni Jehova nga makapabilin sa among desisyon.” Mihinapos si Francisco: “Sulod sa kapig 30 ka tuig, ako nag-alagad ingong ansiyano, gawas pa sa ubang pribilehiyo nga akong nadawat. Wala gyod mi magmahay nga gipasimple namo ang among kinabuhi.”

7. Sa unsang paagi nimo gipadapat ang tambag sa Roma 12:16?

⁷ Kon imong dumilian ang “tugbaw [o, tag-as] nga mga butang” niining kalibotana ug ‘molakaw uban sa ubos nga mga butang,’ makadahom ka usab ug dugang mga panalangin ug pribilehiyo diha sa buluhatong pagpangani.—Roma 12:16; Mat. 4:19, 20; Luc. 18:28-30.

Ang Pagkamakugihon Magdalag mga Panalangin

8, 9. (a) Sumaryoha ang sambingay ni Jesus bahin sa mga talanton. (b) Kinsa ang ilabinang madasig sa maong sambingay?

⁸ Ang pagkamakugihon maoy laing hiyas nga atong gikinahanglan aron bug-os nga makapakig-ambit sa buluhatong pagpangani. Giilustrar kini ni Jesus diha sa sambingay sa mga talanton. a Ang maong ilustrasyon maoy bahin sa usa ka tawo kinsa, sa wala pa molangyaw, nagpiyal sa iyang katigayonan sa tulo niya ka ulipon. Ang unang ulipon nakadawat ug lima ka talanton, ang ikaduha nakadawat ug duha ka talanton, ug ang ikatulo, usa ka talanton. Sa dihang nakalakaw na ang agalon, ang unang duha ka ulipon nagmakugihon ug “nagpatigayon” sa ilang mga talanton. Sa kasukwahi, ang ikatulong ulipon “tapolan.” Gilubong niya sa yuta ang iyang talanton. Pag-uli sa agalon, iyang gigantihan ang duha ka ulipon pinaagi sa pagtudlo kanila “ibabaw sa daghang butang.” Apan gikuha niya ang talanton nga iyang gihatag sa ikatulong ulipon ug gipapahawa kini sa iyang panimalay.—Mat. 25:14-30.

⁹ Sa walay duhaduha gusto nimong sundogon ang kugihang mga ulipon sa sambingay ni Jesus ug bug-os nga makig-ambit sa buluhaton nga paghimog mga tinun-an. Apan unsa na man kon nalimitahan pag-ayo ang imong mahimo tungod sa imong kahimtang? Tingali tungod sa kalisod sa ekonomiya, mapugos ka sa paggugol ug daghang oras sa pagtrabaho aron sa pagsuportar sa imong pamilya. O basin tungod sa pangedaron, luya na ang imong lawas ug masakiton ka na. Kon mao, ang sambingay sa mga talanton adunay makapadasig nga mensahe alang kanimo.

10. Sa unsang paagi nagpakitag pagkamakataronganon ang agalon diha sa sambingay sa mga talanton, ug nganong makapadasig kini kanimo?

 ¹⁰ Matikdi nga ang agalon sa sambingay nahibalo nga lainlaig katakos ang iyang mga ulipon. Gipaila niya kini sa dihang naghatag siyag talanton “sa matag usa sumala sa iyang katakos.” (Mat. 25:15) Ingon sa gidahom, ang unang ulipon mas dakog ganansiya kay sa ikaduha. Hinunoa, giila sa agalon ang pagkamakugihon niining duha ka ulipon pinaagi sa pagtawag kanila nga “maayo ug kasaligan” ug sa paghatag kanilag parehong ganti. (Mat. 25:21, 23) Sa susama, ang Agalon sa pagpangani nga si Jehova nahibalo nga ang imong kahimtang makaapektar sa imong mahimo sa pag-alagad kaniya. Iya gayong ilhon ang imong bug-os-kalag nga paningkamot sa pag-alagad kaniya ug gantihan ka usab.—Mar. 14:3-9; basaha ang Lucas 21:1-4.

11. Iilustrar kon sa unsang paagi ang pagkamakugihon bisan sa lisod nga kahimtang moresulta sa dagayang panalangin.

¹¹ Ang panig-ingnan ni Selmira, nga usa ka sister sa Brazil, nagpakita nga ang pagkamakugihon sa pag-alagad sa Diyos wala magdepende sa hamugaway nga kahimtang sa usa. Bayente ka tuig kanhi, ang bana ni Selmira gipatay sa mga tulisan, ug nabinlan siyag tulo ka gagmayng bata. Kay nagtrabaho man siya ingong katabang, dugay siyang makauli ug kanunay siyang mobiyahe diha sa puno kaayong mga sakyanan nga depasahero. Bisan pa niana, gieskedyul niya ang iyang mga buluhaton aron makaregular payunir. Duha sa iyang mga anak ang nagpayunir usab sa ulahi. “Latas sa katuigan, ako nakadumalag pagtuon sa Bibliya uban sa kapig 20 ka tawo, ug sila nahimong membro sa akong espirituwal nga pamilya,” siya miingon. “Hangtod karon, akong natagamtam ang ilang gugma ug pagmahal. Bahandi kini nga dili mabayrag salapi.” Ang Agalon sa pagpangani nagpanalangin gayod kang Selmira tungod sa iyang pagkamakugihon!

12. Sa unsang paagi atong ikapakita ang pagkamakugihon diha sa buluhatong pagsangyaw?

¹² Kon ang imong kahimtang naglimite sa imong mahimo diha sa ministeryo, imo gihapong mapauswag ang imong pagpakig-ambit sa buluhatong pagpangani pinaagi sa paghimo sa imong ministeryo nga mas mabungahon. Kon imong ipadapat ang praktikal nga mga sugyot nga gipresentar diha sa senemanang Tigom sa Pag-alagad, mahanas ka pag-ayo sa pagsangyaw ug masulayan nimo ang bag-ong mga paagi sa pagpamatuod. (2 Tim. 2:15) Dugang pa, kon posible, mahimo nimong buhaton sa laing adlaw o isakripisyo ang dili kaayo importanteng mga buluhaton aron regular kang makasangyaw uban sa kongregasyon.—Col. 4:5.

13. Sa unsang paagi atong maugmad ug mahuptan ang pagkamakugihon?

¹³ Hinumdomi nga ang pagkamakugihon maoy resulta sa atong gugma ug pagkamapasalamaton sa Diyos. (Sal. 40:8) Ang ikatulong ulipon nga gihisgotan sa sambingay ni Jesus nahadlok sa iyang agalon, kay giisip niya kining estrikto ug dili makataronganon. Busa, iyang gilubong sa yuta ang iyang talanton imbes ipatigayon kana. Aron malikayan kanang mapinasagdanong tinamdan, kinahanglan nga atong ugmaron ug huptan ang suod nga relasyon uban sa Agalon sa pagpangani, si Jehova. Paggahin ug panahon sa pagtuon ug pagpamalandong sa iyang mga hiyas—ang gugma, pailob, ug kaluoy. Nianang paagiha, palihokon ka sa imong kasingkasing sa pagbuhat sa imong maarangan sa pag-alagad kaniya.—Luc. 6:45; Filip. 1:9-11.

“Kinahanglan Kamong Magmabalaan”

14. Unsang kinahanglanon ang angayng kab-oton niadtong gusto nga mahimong mangangani?

¹⁴ Si apostol Pedro mikutlo sa Hebreohanong Kasulatan sa dihang naghisgot siya bahin sa kabubut-on sa Diyos alang sa Iyang mga alagad sa yuta: “Sumala sa Balaang Usa nga nagtawag kaninyo, magmabalaan usab kamo sa tanan ninyong panggawi, tungod kay kini nahisulat: ‘Kinahanglan kamong magmabalaan, tungod kay ako balaan.’” (1 Ped. 1:15, 16; Lev. 19:2; Deut. 18:13) Kini nagpasiugda nga ang mga mangangani kinahanglang hinlo sa moral ug espirituwal. Atong makab-ot ang maong kinahanglanon pinaagi sa paghimog mga lakang nga mahugasan, sa simbolikal nga paagi. Sa unsang paagi kana mahimo? Pinaagi sa tabang sa pulong sa Diyos sa kamatuoran.

15. Unsay mahimo sa kamatuoran sa pulong sa Diyos alang kanato?

 ¹⁵ Ang pulong sa Diyos sa kamatuoran gipakasama sa tubig nga makahinlo. Pananglitan, si apostol Pablo misulat nga ang kongregasyon sa dinihogang mga Kristohanon maoy hinlo sa panan-aw sa Diyos, samag putli nga pangasaw-onon ni Kristo, kinsa gihinloan “pinaagi sa paghugas ug tubig pinaagi sa pulong, aron . . . mahimong balaan ug walay lama.” (Efe. 5:25-27) Una pa niana, si Jesus naghisgot usab bahin sa makahinlong gahom sa pulong sa Diyos, nga iyang gimantala. Sa pagpakigsulti sa iyang mga tinun-an, si Jesus miingon: “Kamo mahinlo na tungod sa pulong nga akong gisulti kaninyo.” (Juan 15:3) Busa, ang kamatuoran sa pulong sa Diyos adunay gahom sa paghinlo kanato sa moral ug espirituwal. Kon atong tugotan ang kamatuoran sa Diyos nga maghinlo kanato niining paagiha, ang atong pagsimba mahimong dalawaton kaniya.

16. Unsay atong himoon aron mahuptan ang espirituwal ug moral nga kahinlo?

¹⁶ Busa, aron mahimong mangangani sa Diyos, kinahanglan una natong talikdan ang tanang mahugaw nga binuhatan. Oo, aron padayong mahuptan ang pribilehiyo ingong mangangani, kinahanglan nga atong sundon ang hataas nga mga sukdanan ni Jehova sa moral ug espirituwal. (Basaha ang 1 Pedro 1:14-16.) Maingon nga kanunay natong hatagag pagtagad ang atong pisikal nga kahinlo, kinahanglan usab nga regular kitang magpailalom sa makapahinlong impluwensiya sa pulong sa kamatuoran. Naglangkit kini sa pagbasa sa Bibliya ug pagtambong sa mga tigom. Nagpasabot usab kini sa paghimog sinserong paningkamot nga mapadapat ang mga pahinumdom sa Diyos. Ang pagbuhat niini motabang kanato sa pagsukol sa atong makasasalang mga kiling ug sa makapahugaw nga impluwensiya niining kalibotana. (Sal. 119:9; Sant. 1:21-25) Oo, makapahupay gayod ang pagkahibalo nga sa tabang sa pulong sa Diyos sa kamatuoran, kita ‘mahugasan’ bisan sa atong grabeng sala!—1 Cor. 6:9-11.

17. Unsang tambag sa Bibliya ang angay natong sundon aron makapabiling hinlo?

¹⁷ Gidawat ba nimo ang makapahinlong impluwensiya sa pulong sa kamatuoran diha sa imong kinabuhi? Pananglitan, unsay imong reaksiyon sa dihang pasidan-an ka bahin sa kapeligrohan sa mahugawng kalingawan sa kalibotan? (Sal. 101:3) Gilikayan ba nimo ang wala-kinahanglanang pagpakig-uban sa mga eskolmet ug kauban sa trabaho nga dili nimo samag pagtuo? (1 Cor. 15:33) Sinsero ba ang imong mga paningkamot sa pagbuntog sa mga kahuyangan nga makapahugaw kanimo sa panan-aw ni Jehova? (Col. 3:5) Gilikayan ba nimo ang mga lantugi bahin sa politika ug ang nasyonalistikong espiritu nga dayag diha sa daghang esports?—Sant. 4:4.

18. Sa unsang paagi ang pagkahinlo sa moral ug espirituwal motabang kanato nga mahimong mabungahong mangangani?

¹⁸ Ang imong pagkamasinugtanon sa maong mga butang magpatunghag maayo kaayong mga resulta. Nagtandi sa iyang dinihogang mga tinun-an sa mga sanga sa paras, si Jesus miingon: ‘Ang tanan kong sanga nga dili mamunga pagaputlon sa akong Amahan, ug ang tanan nga mamunga iyang pagahinloan, aron nga kini mamunga ug daghan pa.’ (Juan 15:2) Samtang nagpaimpluwensiya ka sa makapahinlong tubig sa kamatuoran sa Bibliya, makapatungha kag mas daghang bunga.

Mga Panalangin Karon ug sa Umaabot

19. Sa unsang paagi ang mga tinun-an ni Jesus gipanalanginan sa ilang paghago ingong mga mangangani?

¹⁹ Sa ulahi, ang matinumanong mga tinun-an ni Jesus nga misanong sa iyang pagbansay  gihatagag gahom sa balaang espiritu niadtong Pentekostes 33 K.P. aron mahimong mga saksi “hangtod sa kinalay-ang dapit sa yuta.” (Buh. 1:8) Nag-alagad sila ingong mga membro sa nagamandong lawas, misyonaryo, ug nagapanawng magtatan-aw, ug dako silag nahimo sa pagsangyaw sa maayong balita “sa tibuok kalalangan ilalom sa langit.” (Col. 1:23) Pagkadaghang panalangin ang ilang nadawat, ug pagkadakong kalipay ang ilang nahatag sa uban!

20. (a) Unsang mga panalangin ang imong nadawat tungod sa bug-os nga pagpakig-ambit sa espirituwal nga pagpangani? (b) Unsay imong determinadong buhaton?

²⁰ Oo, pinaagi sa pagpakitag pagkamapainubsanon, pagkamakugihon, ug pagsunod sa hataas nga mga sukdanan sa Pulong sa Diyos, kita bug-os nga makapakigbahin niining dakong espirituwal nga pagpangani. Samtang daghan ang nag-antos sa kasakit ug kahigawad tungod niining materyalistiko ug mahiligon-sa-kalingawan nga kalibotan, kita nakasinatig tinuod nga kalipay ug katagbawan. (Sal. 126:6) Labaw sa tanan, ang atong “paghago dili makawang may kalabotan sa Ginoo.” (1 Cor. 15:58) Ang Agalon sa pagpangani, si Jehova nga Diyos, magaganti kanato sa walay kataposan tungod sa ‘buhat ug gugma nga atong gipakita alang sa iyang ngalan.’—Heb. 6:10-12.

[Footnote]

Nahinumdom Ka Ba?

Samtang naningkamot ka nga bug-os makapakigbahin sa buluhatong pagpangani . . .

• nganong hinungdanon nga magpakitag pagkamapainubsanon?

• sa unsang paagi imong maugmad ug mahuptan ang pagkamakugihon?

• nganong hinungdanon nga magpabiling hinlo sa moral ug espirituwal?

[Mga Pangutana sa Pagtuon]

[Hulagway sa panid 17]

Ang pagkamapainubsanon makatabang kanato sa pagkinabuhing simple ug pag-una sa intereses sa Gingharian