“Magmakugihon . . . sa Pagpanudlo”

“KAMO nagtawag kanako, ‘Magtutudlo,’ ug ‘Ginoo,’ ug husto ang inyong gisulti, kay mao man ako.” (Juan 13:13) Nianang mga pulonga, gipasiugda ni Jesus ang iyang papel ingong magtutudlo. Dayon, sa hapit na siyang mosaka sa langit, gisugo niya ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.” (Mat. 28:19, 20) Sa ulahi, gipasiugda usab ni apostol Pablo ang kahinungdanon sa pagkahimong mga magtutudlo sa Pulong sa Diyos. Iyang giawhag ang ansiyano nga si Timoteo: “Magmakugihon diha sa publikong pagbasa, sa pagpanambag, sa pagpanudlo. . . . Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.”—1 Tim. 4:13-15.

Karong adlawa, ang pagpanudlo usa usab ka hinungdanong bahin sa atong ministeryo ug sa atong mga tigom. Sa unsang paagi kita makapadayon sa pagpanudlo nga makugihon, ug sa unsang mga paagi kini motabang kanato nga mouswag ingong mga magtutudlo sa Pulong sa Diyos?

Sundoga ang Dakong Magtutudlo

Daghan ang nadani sa paagi ni Jesus sa pagpanudlo. Matikdi ang epekto sa iyang gipamulong didto sa sinagoga sa Nasaret. Ang magsusulat sa ebanghelyo nga si Lucas miingon: “Silang tanan naghatag ug maayong pamatuod bahin kaniya ug nahibulong sa madanihong mga pulong nga nanggula gikan sa iyang baba.” (Luc. 4:22) Gisundog sa mga tinun-an ni Jesus ang ehemplo sa ilang Agalon sa pagsangyaw. Gani, gidasig ni apostol Pablo ang iyang mga isigka-Kristohanon: “Mahimong mga tigsundog kanako, ingon nga ako nagsundog kang Kristo.” (1 Cor. 11:1) Kay gisundog ni Pablo ang mga paagi ni Jesus sa pagpanudlo, siya nahimong epektibo kaayo diha sa ‘pagtudlo sa publiko ug sa balay ug balay.’—Buh. 20:20.

Pagpanudlo “Diha sa Tiyanggihan”

Ang usa ka maayo kaayong pananglitan sa katakos ni Pablo sa pagpanudlo sa publiko makita diha sa Buhat kapitulo 17. Diha atong mabasa ang mahitungod sa iyang pagduaw sa Atenas, Gresya. Bisag asa motan-aw si Pablo—sa kadalanan, sa publikong mga dapit—dihay mga idolo. Bantog ra nga naglagot siya pag-ayo! Bisan pa niana, gipugngan niya ang iyang gibati. Siya “misugod sa pagpangatarongan diha sa sinagoga . . . ug sa matag adlaw diha sa tiyanggihan ngadto kanilang atua didto.” (Buh. 17:16, 17) Pagkamaayong ehemplo alang kanato! Kon atong duolon ang tanang matang sa tawo, nga dili maghukom kondili magpakitag pagtahod kanila, mahimong mamati sila kanato ug sa ngadtongadto mahigawas sa pagkaulipon sa bakak nga relihiyon.—Buh. 10:34, 35; Pin. 18:4.

Kadaghanan sa mga tawo nga gisangyawan ni Pablo sa tiyanggihan dili madinawaton. Lakip sa iyang mamiminaw ang mga pilosopo kansang panglantaw sukwahi sa kamatuoran nga iyang gisangyaw. Sa dihang ang iyang mamiminaw misupak kaniya, namati si Pablo sa ilang gisulti. Ang pipila nagtawag kaniyag “witwitan” (sa literal, “tigpunit ug binhi”). Ang uban miingon: “Siya daw usa ka magmamantala sa langyawng mga bathala.”—Buh. 17:18.

Apan wala maluya si Pablo sa pagbiaybiay kaniya. Gani, sa dihang gipasaysay siya sa iyang gitudlo, gipahimuslan niya ang higayon sa paghatag ug pakigpulong nga haom sa mamiminaw ug nagpasundayag sa iyang kahanas sa pagpanudlo. (Buh. 17:19-22; 1 Ped. 3:15) Atong repasohon ang iyang pakigpulong ug tan-awon kon sa unsang paagi kini makapauswag sa atong katakos sa pagpanudlo.

 Pangitag Ulohan nga Makapainteres sa Mamiminaw

Si Pablo miingon: “Mga taga-Atenas, akong nakita nga sa tanang butang kamo daw mas mahadlokon sa mga bathala kay sa uban. Pananglitan, samtang ako . . . naniid pag-ayo sa mga butang nga inyong ginasimba nakaplagan ko usab ang usa ka halaran nga diha niana gisulat ‘Alang sa Usa ka Diyos nga Wala Mailhi.’ Busa kini nga sa kawalay-kahibalo inyong ginahatagan ug diyosnong pagkamahinalaron, kini ang akong ginamantala kaninyo.”—Buh. 17:22, 23.

Naniid pag-ayo si Pablo sa iyang palibot, mao nga daghan siyag nakat-onan bahin sa iyang mamiminaw. Kita usab adunay makat-onan bahin sa tagbalay kon kita mapaniiron. Pananglitan, ang mga dulaan diha sa nataran o karatula diha sa pultahan maghatag kanatog ideya bahin sa tagbalay. Sa ingon, makapangandam kita kon unsay atong isulti ug kon unsaon nato kana pagsulti.—Col. 4:6.

Si Pablo namulong sa positibong paagi. Apan, iyang nakita nga ang “diyosnong pagkamahinalaron” sa mga taga-Atenas wala ipasukad sa tukmang kahibalo. Tin-awng gihisgotan ni Pablo kon sa unsang paagi nila iliso ang ilang pagsimba ngadto sa matuod nga Diyos. (1 Cor. 14:8) Nan, hinungdanon gayod nga kita mosulti sa tin-aw ug positibong paagi sa dihang magmantala sa maayong balita sa Gingharian!

Magmataktikanhon ug Dili-Magmapihigon

Si Pablo nagpadayon sa pag-ingon: “Ang Diyos nga naghimo sa kalibotan ug sa tanang butang diha niini, si kinsa, maingon nga kini Siya, Ginoo sa langit ug sa yuta, wala magpuyo sa hinimog-kamot nga mga templo, ni siya pagaatimanon sa tawhanong mga kamot nga maorag siya nanginahanglan pa ug bisan unsa, tungod kay siya naghatag ngadto sa tanang tawo ug kinabuhi ug gininhawa ug tanang butang.”—Buh. 17:24, 25.

Dinhi gipunting ni Pablo ang pagtagad ngadto kang Jehova ingong atong Maghahatag-ug-Kinabuhi, nga mataktikanhong naghimo niana pinaagi sa pagtawag kaniya nga “Ginoo sa langit ug sa yuta.” Pagkadakong pribilehiyo ang pagtabang sa matinud-anog-kasingkasing nga mga tawo gikan sa lainlaing relihiyon ug kagikan sa pagsabot nga ang tanang kinabuhi naggikan kang Jehova nga Diyos!—Sal. 36:9.

Dayon, si Pablo miingon: “Ug iyang gihimo gikan sa usa ka tawo ang tanang nasod sa katawhan, . . . ug iyang gilatid ang tinudlong mga panahon ug ang tinong mga utlanan sa mga puloy-anan sa mga tawo, aron sila mangita sa Diyos, kon sila man ugaling mangapkap man kaniya ug makakaplag gayod kaniya, bisan ug, sa pagkatinuod, siya dili halayo gikan sa matag usa kanato.”—Buh. 17:26, 27.

Ang atong paagi sa pagpanudlo magpakita kon unsang matanga sa Diyos ang atong gisimba. Kay dili mapihigon, gitugotan ni Jehova ang mga tawo sa tanang kanasoran nga mangita kaniya ug “makakaplag gayod kaniya.” Busa, dili usab kita magmapihigon sa mga tawo nga atong sangyawan. Maningkamot kita sa pagtabang niadtong nagtuo sa usa ka Maglalalang aron sila masuod kaniya ug makabatog walay-kataposang mga panalangin. (Sant. 4:8) Apan sa unsang paagi nato matabangan kadtong nagduhaduha sa paglungtad sa Diyos? Atong sundogon ang ehemplo ni Pablo. Matikdi kon unsay sunod niyang gisulti.

“Pinaagi kaniya kita adunay kinabuhi ug naglihok ug naglungtad, ingon usab gayod sa gisulti sa pipila ka magbabalak sa inyong taliwala, ‘Kay kita usab iyang kaliwat.’ Busa, kay kita mga kaliwat man sa Diyos, kita dili angayng maghunahuna nga ang Mao nga Diyos maoy sama ug bulawan o plata o bato.”—Buh. 17:28, 29.

 Aron mainteres ang iyang mamiminaw, mikutlo si Pablo sa mga magbabalak nga giila ug gidawat sa mga taga-Atenas. Sa samang paagi mogamit kitag pangatarongan nga atong nahibaloan nga dawaton sa atong mamiminaw. Pananglitan, ang ilustrasyon ni Pablo sa iyang sulat sa mga Hebreohanon makapakombinsir usab karon: “Ang matag balay adunay nagtukod, apan siya nga nagtukod sa tanang butang mao ang Diyos.” (Heb. 3:4) Kon mapalihok nato ang atong mamiminaw sa pagpangatarongan pinasukad niining simpleng ilustrasyon, matabangan sila sa pag-ila nga tinuod ang atong gisulti. Matikdi diha sa pakigpulong ni Pablo ang laing paagi sa epektibong pagpanudlo—ang pagpalihok sa kasingkasing sa mamiminaw.

Ipasiugda ang Pagkadinalian sa Panahon

Si Pablo miingon: “Matuod, gipalabay sa Diyos ang mga panahon sa maong pagkawalay-alamag, apan karon siya nagsugo sa katawhan nga silang tanan sa bisan diin angayng managhinulsol. Tungod kay siya nakatakda na ug adlaw aron iyang pagahukman ang gipuy-ang yuta subay sa pagkamatarong pinaagi sa usa ka tawo nga iyang gitudlo.”—Buh. 17:30, 31.

Ang pagtugot sa Diyos sa pagkadaotan naghatag kanatog kahigayonan nga ipakita kaniya kon unsay anaa sa atong kasingkasing. Hinungdanon nga atong ipasiugda ang pagkadinalian sa panahon ug isulti sa makapakombinsir nga paagi ang mga panalangin sa pagmando sa Gingharian, nga hapit nang moabot.—2 Tim. 3:1-5.

Lainlaing Reaksiyon

“Buweno, sa dihang sila nakadungog bahin sa pagkabanhaw sa mga patay, ang pipila nagyagayaga, samtang ang uban miingon: ‘Maminaw ra kami kanimo bahin niini sa lain na usab nga panahon.’ Busa si Pablo mipahawa gikan sa ilang taliwala, apan dihay pipila ka tawo nga miduyog kaniya ug nahimong mga magtutuo.”—Buh. 17:32-34.

Ang pipila mosanong dayon sa atong pagpanudlo; ang uban tingali magkinahanglag dugang panahon una makombinsir. Apan sa dihang ang atong tin-aw ug simpleng pagpahayag sa kamatuoran makatabang ug bisan usa lang ka indibiduwal nga makadangat sa tukmang kahibalo bahin kang Jehova, mapasalamaton gayod kita nga ang Diyos naggamit kanato sa pagkabig sa mga tawo ngadto sa iyang Anak!—Juan 6:44.

Leksiyon nga Atong Makat-onan

Samtang atong palandongon ang pakigpulong ni Pablo, daghan kitag makat-onan kon sa unsang paagi ipatin-aw ang mga kamatuoran sa Bibliya. Kon makapribilehiyo kita sa paghatag ug pakigpulong publiko sa kongregasyon, mahimong maningkamot kita sa pagsundog kang Pablo pinaagi sa paggamit ug mataktikanhong mga pulong nga motabang sa mga dili-magtutuo sa pagsabot ug pagdawat sa mga kamatuoran sa Bibliya. Atong isaysay ang kamatuoran sa tin-aw nga paagi, apan magbantay kita nga dili sawayon ang gituohan sa mga dili-magtutuo nga nanambong. Sa samang paagi, diha sa atong buluhatong pagsangyaw, maningkamot kita sa pagsulti sa paagi nga makapakombinsir ug mataktikanhon. Kon ato kanang buhaton, atong gisunod ang tambag ni Pablo nga ‘magmakugihon sa atong pagpanudlo.’

[Hulagway sa panid 30]

Ang pagpanudlo ni Pablo maoy tin-aw, simple, ug mataktikanhon

[Hulagway sa panid 31]

Atong sundogon si Pablo pinaagi sa pagkonsiderar sa pagbati sa atong gisangyawan