Nagbunga ang Pagkaalisto

ALISTO ka bang mangitag mga kahigayonan nga makasangyaw diha sa inyong teritoryo? Ingon niana ang atong mga igsoon sa makasaysayanhon nga dunggoanang siyudad sa Turku, Finland, ug ang ilang pagkaalisto nagpatunghag maayong resulta.

Di pa dugay, namatikdan sa mga igsoon sa Turku ang usa ka grupo sa mga lalaki gikan sa Asia nga nangabot sa ilang siyudad aron humanon ang usa ka dakong barkong pangturista nga gigama diha sa baraderohan. Sa ulahi, nasayran sa usa ka brader kon asa nga mga hotel sila nag-estar. Nahibaloan usab niya nga sayo sa buntag kuhaon ug mga bus ang mga trabahante ug ihatod sa pantalan. Iya dayon kining gipahibalo sa English Congregation sa Turku.

Naamgohan sa mga ansiyano sa maong kongregasyon nga usa kini ka maayong kahigayonan nga ipaambit ang mensahe sa Gingharian, busa mihimo dayon silag linaing kahikayan sa pagsangyaw. Pagka-Dominggo nianang semanaha, sa alas siyete sa buntag, napulo ka igsoon ang nangadto sa hunonganan sa bus. Sa sinugdan, walay nangabot nga trabahante. ‘Naulahi na kaha ta?’ miingon ang mga igsoon. ‘Nakabiya na kaha sila sa Turku?’ Dayon, dihay miabot nga usa ka trabahante nga nagsul-ob ug pangtrabaho. Misunod ang lain pang trabahante, ug daghan pa ang nangabot. Wala madugay, daghan na kaayo ang nagtapok duol sa hunonganan sa bus. Ang mga igsoon misugod dayon pagsangyaw, nga nagtanyag ug Iningles nga mga publikasyon. Maayo na lang kay naabtag mga usa ka oras una makasakay ang tanang trabahante, nga naghatag ug higayon sa mga igsoon nga maestorya ang kadaghanan kanila. Paglarga sa bus, ang mga trabahante napahimutangan ug 126 ka brosyur ug 329 ka magasin!

Tungod sa maayong resulta, nadasig ang mga igsoon nga himoon kana pag-usab pagkasunod semana, atol sa duaw sa magtatan-aw sa sirkito. Bisag nag-ulan, pagka 6:30 sa buntag, ang magtatan-aw sa sirkito nagdumala sa tigom sa dayon nang pagsangyaw, ug 24 ka magmamantala ang nangadto sa hunonganan sa bus. Niining higayona, nagdala usab silag Tagalog nga mga basahon kay ilang nasayran nga kadaghanan sa mga langyaw naggikan sa Pilipinas. Sa dihang nakalarga na ang mga bus, napahimutangan ang mga trabahante ug 7 ka libro, 69 ka brosyur, ug 479 ka magasin. Nalipay kaayo ang mga igsoon nga miapil niining maong kampanya!

Una pa mamauli ang mga trabahante sa ilang nasod, ang mga igsoon nakaduaw sa kadaghanan kanila diha sa mga hotel nga ilang gisak-an aron isaysay ug dugang ang mensahe sa Gingharian. Ang pipila ka trabahante miingon nga naestorya na silag mga Saksi sa laing nasod. Mapasalamaton sila sa mga igsoon nga naningkamot sa pagpakig-estorya kanila panahon sa ilang pag-estar sa Finland.

Alisto ka bang mangitag mga kahigayonan nga makasangyaw diha sa inyong teritoryo? Nangita ka bag paagi nga masangyawan ang mga langyaw? Kon mao, lagmit nasinati usab nimo ang naeksperyensiyahan sa mga igsoon sa Turku.

[Mapa/Hulagway sa panid 32]

(Alang sa aktuwal nga pagkahan-ay, tan-awa ang publikasyon)

FINLAND

HELSINKI

Turku

[Credit Line]

STX Europe