Nganong Angayng Magmauntop sa Panahon?

ANG pag-abot nga untop sa panahon dili kanunayng sayon. Ang pipila ka hinungdan niini mao ang lagyong biyahe, grabeng trapik, ug puliking eskedyul. Bisan pa niana, hinungdanon ang pagkauntop sa panahon. Pananglitan, kon ang usa kanunayng sayo diha sa trabahoan, sagad isipon siya nga kasaligan ug kugihan. Sa laing bahin, ang usa nga kanunayng ma-late makaapektar sa trabaho sa uban ug sa kalidad sa produkto ug serbisyo. Tungod sa pagkalangayan, ang usa ka estudyante makapaltag pipila ka subject ug hayan dili makapasar. Kon ang usa maulahi sa iyang appointment sa doktor o sa dentista, mahimong maapektohan ang kalidad sa serbisyo nga iyang madawat.

Apan sa pipila ka dapit, ang pagkauntop sa panahon wala isipa nga hinungdanon. Sa maong kahimtang, mahimong dali ra natong masundog ang batasan nga kanunayng ma-late. Kon mao, hinungdanon nga atong ugmaron ang pagkauntop sa panahon. Ang pagkahibalo sa kahinungdanon niana motabang kanato sa pag-ugmad niana. Unsa ang pipila ka rason kon nganong angayng magmauntop sa panahon? Sa unsang paagi mahimo nato kana? Ug unsang mga kaayohan ang atong madawat kon kita magmauntop sa panahon?

Si Jehova—Usa ka Diyos nga Untop sa Panahon

Ang pagsundog sa Diyos nga atong gisimba mao ang pangunang rason kon nganong gusto natong magmauntop sa panahon. (Efe. 5:1) Si Jehova ang kinamaayohang ehemplo niana.  Wala gayod siya maulahi. Iya gayong gisunod ang iyang eskedyul sa pagtuman sa iyang katuyoan. Pananglitan, sa dihang mihukom si Jehova nga laglagon ang dili-diyosnong kalibotan pinaagig lunop, siya miingon kang Noe: “Paghimo alang kanimo ug usa ka arka gikan sa kahoyng salongon.” Samtang nagkaduol ang gitakdang panahon, gipasulod ni Jehova si Noe sa arka ug gisultihan kini: “Pito na lamang ka adlaw ako magpaulan diha sa yuta kap-atan ka adlaw ug kap-atan ka gabii; ug paphaon ko gikan sa nawong sa yuta ang tanang nagalungtad nga butang nga akong gibuhat.” Dayon, “pito ka adlaw sa ulahi nahitabo nga ang mga tubig sa lunop midangat sa yuta.” (Gen. 6:14; 7:4, 10) Hunahunaa kon unsa kahay nahitabo kang Noe ug sa iyang pamilya kon naulahi sila pagsulod sa arka. Sama sa Diyos nga ilang gisimba, kinahanglan silang magmauntop sa panahon.

Mga 450 ka tuig human sa Lunop, gisultihan ni Jehova ang patriarkang si Abraham nga makabaton siyag anak nga lalaki nga pinaagi niini moabot ang gisaad nga Binhi. (Gen. 17:15-17) Ang Diyos miingon nga si Isaac matawo “niining tinudlong panahon sa sunod tuig.” Nahitabo ba kana? Ang Kasulatan nag-ingon: “Si  Sara nagmabdos ug unya nanganak ug usa ka anak nga lalaki kang Abraham diha sa iyang katigulangon sa tinudlong panahon nga gisulti sa Diyos kaniya.”—Gen. 17:21; 21:2.

Ang Bibliya adunay daghang pananglitan nga nagpakita nga ang Diyos untop sa panahon. (Jer. 25:11-13; Dan. 4:20-25; 9:25) Kini nag-awhag kanato nga padayong maghulat sa adlaw sa paghukom ni Jehova. Bisan pag daw ‘nalangan’ kini sa panglantaw sa tawo, kita gipasaligan nga “kini dili maulahi.”—Hab. 2:3.

Ang Pagkauntop sa Panahon Hinungdanon Diha sa Pagsimba

Ang tanang Israelinhong lalaki kinahanglang moabot nga untop sa panahon sa dapit diin himoon ang “tinudlong mga pista ni Jehova.” (Lev. 23:2, 4) Ang Diyos nagtakda usab kon kanus-a itanyag ang pipila ka halad. (Ex. 29:38, 39; Lev. 23:37, 38) Wala ba kini magpakita nga gusto sa Diyos nga ang iyang mga alagad magmauntop sa panahon diha sa ilang pagsimba?

Sa unang siglo, sa dihang gihatagan ni apostol Pablo ug instruksiyon ang mga taga-Corinto kon sa unsang paagi dumalahon ang Kristohanong mga tigom, siya nag-awhag kanila: “Himoa ang tanang butang nga may kahapsay ug pinaagig kahikayan.” (1 Cor. 14:40) Busa, ang mga tigom angayng magsugod sa gitakdang oras. Ang panglantaw ni Jehova sa pagkauntop sa panahon wala mausab. (Mal. 3:6) Nan, unsay angay natong himoon aron dili kita ma-late sa mga tigom?

Kon sa Unsang Paagi Mahimong Untop sa Panahon

Nakita sa pipila nga dakog tabang ang abanteng pagplano. (Prov. 21:5) Pananglitan, kon kinahanglan kitang mobiyaheg layo, maayo bang mogikan nga apeke na sa oras? Dili ba mas maayong mogikan ug sayo aron dili kita ma-late, bisan pag motungha ang “wala damhang panghitabo”? (Eccl. 9:11) “Ang usa ka butang nga makatabang sa usa nga moabot nga untop sa panahon mao ang pagkahibalo kon unsay gidugayon sa biyahe,” miingon ang usa ka batan-ong lalaki, si José, nga kanunayng sayo moabot. a

Alang sa pipila, kinahanglan tingali nga mohimog kahikayan aron sayong makabiya sa trabahoan ug dili ma-late sa tigom. Mao kanay gihimo sa usa ka Saksi sa Etiopia sa dihang iyang nasayran nga ma-late siya sa tigom ug 45 minutos tungod sa kausaban sa eskedyul sa trabaho. Nakigsabot siya sa iyang kauban sa trabaho nga mosayo pagrelibo kaniya panahon sa tigom. Sa baylo, ang Saksi misugot nga motrabahog dugang pito ka oras puli sa iyang kauban.

Kon duna kitay gagmayng bata, dili gayod sayon nga moabot sa mga tigom nga untop sa panahon. Kasagaran, responsibilidad sa inahan nga andamon ang mga bata, apan ang ubang membro sa pamilya kinahanglang motabang usab. Si Esperanza, usa ka inahan nga taga-Mexico, inusarang nag-atiman sa iyang walo ka anak. Sila nagpanuigon karon ug 5 ngadto sa 23 anyos. Misaysay si Esperanza kon sa unsang paagi nahimo sa iyang pamilya nga makaabot sa tigom nga untop sa panahon: “Ang akong dagko nang mga anak nga babaye motabang sa pag-andam sa ilang mga manghod. Sa ingon, mahuman nako ang akong buluhaton sa balay ug makapangandam ko sa akong kaugalingon aron makalakaw mi sa gitakdang oras.” Kini nga pamilya adunay gitakdang oras sa pagbiya sa balay, ug ang tanan nakigkooperar niana.

Kaayohan sa Pagkauntop sa Panahon Diha sa mga Tigom

Ang paghunahuna sa mga panalangin nga atong madawat gumikan sa pag-abot sa tigom nga untop sa panahon makapalig-on sa atong tinguha ug determinasyon nga buhaton ang tanan aron dili ma-late. Usa ka batan-ong babaye nga ginganlag Sandra, kinsa naningkamot nga sayong moabot sa mga tigom, mikomento: “Ganahan kaayo kong mosayo kay mahimamat nako ang mga igsoon, makaestorya sila, ug mas mailhan sila.” Kon sayo tang moabot sa Kingdom Hall, makadungog kitag mga kasinatian bahin sa pagkamalahutayon  ug pagkamatinumanon sa atong mga igsoon. Ang atong pagtambong ug ang makapalig-ong kabildohay aduna usay maayong epekto sa atong mga igsoon, nga ‘magdasig kanila sa paghigugma ug sa pagbuhat ug maayo.’—Heb. 10:24, 25.

Ang pangbukas nga awit ug pag-ampo maoy hinungdanong bahin sa atong pagsimba. (Sal. 149:1) Ang atong mga awit magdayeg kang Jehova, magpahinumdom kanato sa mga hiyas nga angay natong ugmaron, ug magdasig kanato nga malipayong makigbahin sa ministeryo. Ug komosta ang pangbukas nga pag-ampo? Sa karaang panahon, gitawag ni Jehova ang templo ingong iyang “balay nga ampoanan.” (Isa. 56:7) Karong adlawa, kita hiniusang nagaampo sa Diyos diha sa atong mga tigom. Ang pangbukas nga pag-ampo dili lamang maghangyo sa giya ug balaang espiritu ni Jehova kondili mag-andam usab kini sa atong hunahuna ug kasingkasing sa pagdawat sa mga impormasyon nga pagahisgotan. Angay natong paningkamotan nga moabot sa atong mga tigom sa dili pa magsugod ang pangbukas nga awit ug pag-ampo.

Ang 23-anyos nga si Helen misaysay kon nganong sayo siyang moabot sa mga tigom: “Kini maoy usa ka paagi nga akong ikapakita ang akong gugma kang Jehova, sanglit siya maoy nagtagana sa tanang impormasyon nga gipresentar, lakip na sa mga awit ug pangbukas nga pag-ampo.” Dili ba angay nga ingon usab niana ang atong tinamdan? Angay gayod. Busa, atong paningkamotan nga magmauntop sa panahon diha sa tanan natong kalihokan, ilabina may kalabotan sa atong pagsimba sa matuod nga Diyos.

[Footnote]

[Hulagway sa panid 26]

Pangandam ug sayo

[Hulagway sa panid 26]

Pangandam alang sa “wala damhang panghitabo”

[Mga hulagway sa panid 26]

Aniha ang mga kaayohan sa pag-abot ug sayo sa mga tigom