Ang Atong Aktibo nga Pangulo Karon

‘Siya miasdang aron sa pagpangdaog ug sa pagtapos sa iyang pagpangdaog.’—PIN. 6:2.

1, 2. (a) Sa unsang paagi gihubit sa Bibliya ang paglihok ni Kristo ingong hari niadtong 1914? (b) Unsay iyang gibuhat sukad sa iyang pagkaentrono?

 NIADTONG 1914, si Kristo naentrono ingong Hari sa Mesiyanikong Gingharian ni Jehova. Unsay atong pag-isip kaniya karon? Giisip ba nato siya ingong hari nga namalandong samtang naglingkod sa iyang trono, nga nagalantaw matag karon ug unya sa kahimtang sa iyang kongregasyon? Kon mao, angay natong usbon ang atong opinyon. Ang Salmo ug Pinadayag naghubit kaniya ingong aktibong hari nga nagsakay sa kabayo, kinsa miasdang aron sa ‘pagpangdaog ug sa pagtapos sa iyang pagpangdaog,’ hangtod nga siya “magmalamposon.”—Pin. 6:2; Sal. 2:6-9; 45:1-4.

² Ang unang gibuhat ni Kristo human sa iyang pagkaentrono mao ang pagpildi sa ‘dragon ug sa mga manulonda niini.’ Ingong Miguel arkanghel nga pangulo sa iyang mga manulonda, gitambog ni Kristo si Satanas ug ang mga demonyo dinhi sa yuta. (Pin. 12:7-9) Dayon, ingong “mensahero [ni Jehova] sa pakigsaad,” si Jesus uban sa iyang Amahan nagsusi sa espirituwal nga templo. (Mal. 3:1) Iyang gihukman ang Kakristiyanohan, ang labing daotang bahin sa “Dakong Babilonya,” kay sad-an kini sa pag-ulag dugo ug sa espirituwal nga pagpanapaw uban sa politikal nga sistema sa kalibotan.—Pin. 18:2, 3, 24.

Paghinlo sa Iyang Ulipon sa Yuta

3, 4. (a) Unsay gibuhat ni Kristo ingong “mensahero” ni Jehova? (b) Unsay nakita sa pagsusi sa templo? (c) Ingong Ulo sa kongregasyon, unsang responsibilidad ang gihatag ni Jesus sa iyang ulipon?

³ Ang pagsusi nga gihimo ni Jehova ug sa iyang “mensahero” nagpakita usab nga diha  sa yutan-ong sawang nianang espirituwal nga templo, adunay grupo sa matuod nga mga Kristohanon nga dili bahin sa Kakristiyanohan. Apan, bisan kining dinihogang mga Kristohanon, o “mga anak ni Levi,” kinahanglang hinloan usab. Nahiuyon kini sa gitagna ni Malaquias: “[Si Jehova] molingkod ingong usa ka tigdalisay ug tighinlo sa plata ug hinloan ang mga anak ni Levi; ug iyang ulayon sila sama sa bulawan ug sama sa plata, ug ngadto kang Jehova sila gayod mahimong katawhan nga magahalad ug halad nga gasa diha sa pagkamatarong.” (Mal. 3:3) Gigamit ni Jehova ang iyang “mensahero sa pakigsaad,” si Kristo Jesus, sa paghinlo niining espirituwal nga mga Israelinhon.

⁴ Bisan pa niana, nakaplagan ni Kristo kining matinumanong mga dinihogan nga naghimo sa ilang maarangan sa pagtaganag tukma-sa-panahong espirituwal nga pagkaon alang sa panimalay sa pagtuo. Sukad niadtong 1879, ilang gimantala ang mga kamatuoran sa Bibliya bahin sa Gingharian sa Diyos pinaagi niining magasina, bisag unsa pay kahimtang. Si Jesus nagtagna nga sa iyang “pag-abot” aron sa pagsusi sa iyang mga sulugoon sa panimalay panahon sa “kataposan sa sistema sa mga butang,” iyang makaplagan ang ulipon nga nagtagana kanilag “pagkaon sa hustong panahon.” Siya moingon nga malipayon ang maong ulipon ug “igatudlo niya siya ibabaw sa tanan niyang mga kabtangan” dinhi sa yuta. (Mat. 24:3, 45-47) Ingong Ulo sa Kristohanong kongregasyon, gigamit ni Kristo kining “matinumanon ug maalamong ulipon” sa pagdumala sa intereses sa Iyang Gingharian dinhi sa yuta. Siya naghatag ug instruksiyon sa dinihogang “mga sulugoon sa panimalay” ug sa “ubang mga karnero” pinaagi sa Nagamandong Lawas.—Juan 10:16.

Buluhatong Pagpangani

5. Sa panan-awon ni apostol Juan, unsay iyang nakita nga pagahimoon sa Hari?

⁵ Sa panan-awon, nakita ni apostol Juan ang lain pang himoon sa Mesiyanikong Hari panahon sa “adlaw sa Ginoo,” human Siya maentrono niadtong 1914. Si Juan misulat: “Nakita ko, ug, tan-awa! usa ka puting panganod, ug diha sa panganod may naglingkod nga sama sa anak sa tawo, nga may koronang bulawan sa iyang ulo ug usa ka mahait nga galab diha sa iyang kamot.” (Pin. 1:10; 14:14) Nadungog ni Juan ang manulonda ni Jehova nga miingon niining Mangangani sa pag-andam sa iyang galab kay “hinog na kaayo ang alanihon sa yuta.”—Pin. 14:15, 16.

6. Unsay giingon ni Jesus nga mahitabo paglabay sa panahon?

⁶ Kining buluhatong ‘pagpangani’ magpahinumdom kanato sa sambingay ni Jesus bahin sa mga trigo ug bunglayon. Gipakasama ni Jesus ang iyang kaugalingon sa usa ka tawo nga nagpugas ug trigo diha sa iyang uma ug naglaom nga makaanig maayong matang sa trigo, nga naghawas sa “mga anak sa gingharian,” ang matuod nga mga Kristohanon nga gidihogan aron magmando uban kaniya sa iyang Gingharian. Apan panahon sa kagabhion, ang kaaway nga mao “ang Yawa” nagpugas usab ug mga bunglayon,  nga naghawas sa “mga anak sa usa nga daotan.” Ang magpupugas miingon sa iyang mga ulipon nga pasagdan ang mga trigo ug bunglayon nga magdungan pagtubo hangtod sa ting-ani, o sa “kataposan sa sistema sa mga butang.” Nianang panahona, ipadala niya ang iyang mga manulonda aron ilain ang mga trigo gikan sa mga bunglayon.—Mat. 13:24-30, 36-41.

7. Sa unsang paagi gihimo ni Kristo ang buluhatong ‘pagpangani’?

⁷ Ingong katumanan sa panan-awon ni Juan, si Jesus nagdumala sa buluhatong pagpangani sa tibuok kalibotan. Ang maong ‘pagpangani’ nagsugod sa pagtigom sa mga nahibilin sa 144,000 nga “mga anak sa gingharian,” “ang trigo” sa sambingay ni Jesus. Ang kalainan tali sa matuod ug bakak nga mga Kristohanon ilabinang nadayag human sa Gubat sa Kalibotan I, nga maoy nakaamot sa pagpanigom sa ikaduhang bahin sa “alanihon sa yuta”—ang ubang mga karnero. Sila dili mao ang “mga anak sa gingharian” kondili ang “dakong panon” sa katawhan nga kinabubut-ong nagpasakop niana nga Gingharian. Sila gitigom gikan sa tanang “katawhan, nasodnong mga pundok ug mga pinulongan.” Sila nagpasakop sa Mesiyanikong Gingharian, nga naglangkob kang Kristo Jesus ug sa 144,000 nga “mga balaan” nga kauban niyang magmando sa langitnong gingharian.—Pin. 7:9, 10; Dan. 7:13, 14, 18.

Pagpanguna sa mga Kongregasyon

8, 9. (a) Unsay nagpamatuod nga nakita ni Kristo dili lamang ang panggawi sa kongregasyon kondili ang paagi usab sa pagkinabuhi sa tagsatagsa ka membro niini? (b) Ingon sa gipakita sa panid 26, unsang “lawom nga mga butang ni Satanas” ang angay natong likayan?

⁸ Sa nag-unang artikulo, atong nasayran nga si Kristo interesado gayod sa espirituwal nga kahimtang sa tagsatagsa ka kongregasyon sa unang siglo K.P. Sa atong adlaw, ingong nagamandong Hari nga gihatagan sa “tanang awtoridad . . . sa langit ug sa yuta,” si Kristo nga atong Pangulo aktibong nanguna sa mga kongregasyon sa tibuok yuta ug sa mga magtatan-aw niini. (Mat. 28:18; Col. 1:18) Si Jehova ‘naghimo kaniya nga ulo ibabaw sa tanang butang nganha sa kongregasyon’ sa mga dinihogan. (Efe. 1:22) Busa, iyang makita ang tanang nagakahitabo diha sa kapin sa 100,000 ka kongregasyon sa mga Saksi ni Jehova.

⁹ Sa karaang kongregasyon sa Tiatira, si Jesus nagpadala niini nga mensahe: “Mao kini ang mga butang nga ginaingon sa Anak sa Diyos, kansang mga mata samag nagdilaab nga kalayo, . . . ‘Nahibalo ako sa imong mga buhat.’” (Pin. 2:18, 19) Iyang gibadlong ang mga membro sa kongregasyon tungod sa ilang imoral, ug mapatuyangong pagkinabuhi: “Ako mao ang usa nga nagasusi sa mga rinyon ug mga kasingkasing, ug ako magabalos sa tagsatagsa kaninyo sumala sa inyong mga buhat.” (Pin. 2:23) Kana nagpasabot nga nakita ni Kristo dili lamang ang panggawi sa matag kongregasyon kondili ang paagi sa pagkinabuhi sa tagsatagsa ka membro niini. Gidayeg ni Jesus ang mga Kristohanon sa Tiatira nga “wala mahibalo sa ‘lawom nga mga butang ni Satanas.’” (Pin. 2:24) Karong adlawa, giuyonan usab niya ang mga bata o tigulang nga wala mag-usisa sa “lawom nga mga butang ni Satanas” pinaagi sa Internet o sa pintas nga mga dula sa video o pagpaminaw sa matinugotong mga pangatarongan sa tawo. Siya malipayon gayod nga makita ang mga paningkamot ug sakripisyo sa daghang Kristohanon karon nga naghimo sa ilang maarangan sa pagsunod sa iyang pagpanguna diha sa tanang bahin sa ilang kinabuhi!

10. Sa unsang paagi gihulagway ang paggiya ni Kristo sa mga ansiyano sa kongregasyon, apan unsay kinahanglan nilang ilhon?

¹⁰ Si Kristo mahigugmaong nagdumala sa iyang mga kongregasyon pinaagi sa tinudlong mga ansiyano. (Efe. 4:8, 11, 12) Sa unang siglo, ang tanang magtatan-aw maoy inanak sa espiritu. Sila gihulagway sa Pinadayag ingong mga bituon diha sa tuong kamot ni Kristo. (Pin. 1:16, 20) Karong adlawa, kadaghanan sa mga ansiyano maoy sakop sa ubang mga karnero. Sila gitudlo human sa pag-ampo ug ilalom sa paggiya sa balaang espiritu, busa mahimo usab silang isipon nga nailalom sa pagtultol o paggiya ni Kristo. (Buh. 20:28) Hinunoa, ilang giila nga si  Kristo naggamit ug usa ka grupo sa dinihogang mga lalaki ingong Nagamandong Lawas nga maggiya ug magtultol sa iyang mga tinun-an sa yuta.—Basaha ang Buhat 15:6, 28-30.

“Umari Ka, Ginoong Jesus”

11. Nganong maikagon kita nga makita ang atong Pangulo nga moabot sa madali?

¹¹ Sa pinadayag nga gihatag kang apostol Juan, si Jesus makadaghang miingon nga siya moabot sa madali. (Pin. 2:16; 3:11; 22:7, 20) Sa walay duhaduha, siya nagtumong sa iyang pag-anhi aron sa pagpahamtang ug paghukom sa Dakong Babilonya ug sa nahibiling bahin sa daotang sistema sa mga butang ni Satanas. (2 Tes. 1:7, 8) Kay maikagon nga makita ang katumanan sa tanang kahibulongang panghitabo nga gitagna, ang tigulang nga si apostol Juan miingon: “Amen! Umari ka, Ginoong Jesus.” Kita nga nagkinabuhi karon sa kataposan niining daotang sistema sa mga butang naglaom usab nga makita ang atong Pangulo ug Hari nga moabot aron sa pagbalaan sa ngalan sa iyang Amahan ug pagbindikar sa Iyang pagkasoberano.

12. Unsay himoon ni Kristo sa dili pa buhian ang mga hangin sa kalaglagan?

¹² Sa dili pa laglagon ni Jesus ang makitang organisasyon ni Satanas, ang nahibilin sa 144,000 nga membro sa espirituwal nga Israel makadawat sa kataposang pagtimbre. Ang Bibliya tin-awng nag-ingon nga ang mga hangin sa kalaglagan nga ipahamtang sa sistema ni Satanas dili buhian kon dili pa mahuman ang pagtimbre sa 144,000.—Pin. 7:1-4.

13. Sa unsang paagi ipadayag ni Kristo ang iyang presensiya panahon sa unang bahin sa “dakong kasakitan”?

¹³ Ang “presensiya” ni Kristo nga nagsugod niadtong 1914 wala mamatikdi sa kadaghanan sa mga molupyo sa yuta. (2 Ped. 3:3, 4) Apan sa dili madugay, iyang ipadayag ang iyang presensiya pinaagi sa pagpahamtang sa paghukom ni Jehova nganha sa lainlaing bahin sa sistema ni Satanas. Ang paglaglag sa “tawo sa kalapasan,” ang klero sa Kakristiyanohan, mao gayoy “pagpadayag sa iyang presensiya.” (Basaha ang 2 Tesalonica 2:3, 8.) Kini maghatag ug lig-ong pamatuod nga si Kristo milihok ingong tinudlong Maghuhukom ni Jehova. (Basaha ang 2 Timoteo 4:1.) Ang paglaglag sa labing daotang bahin sa Dakong Babilonya maoy sinugdanan sa bug-os nga kalaglagan nianang tibuok-kalibotang imperyo sa bakak nga relihiyon. Ibutang ni Jehova sa kasingkasing sa politikal nga mga lider ang paglaglag niining espirituwal nga bigaon. (Pin. 17:15-18) Kana maoy unang bahin sa “dakong kasakitan.”—Mat. 24:21.

14. (a) Nganong pagapamub-on ang unang bahin sa dakong kasakitan? (b) Unsay kahulogan sa “ilhanan sa Anak sa tawo” alang sa katawhan ni Jehova?

¹⁴ Si Jesus miingon nga ang mga adlaw nianang maong kasakitan pagapamub-on “tungod sa mga pinili,” ang nahibilin sa dinihogang mga Kristohanon dinhi sa yuta. (Mat. 24:22) Dili tugotan ni Jehova nga ang paglaglag sa bakak nga relihiyon magpapha sa dinihogang mga Kristohanon ug sa ubang mga karnero. Si Jesus midugang nga “human sa kasakitan nianang mga adlawa,” aduna unyay mga ilhanan sa adlaw, bulan, ug sa mga bituon, “ug unya ang ilhanan sa Anak sa tawo mopakita sa langit.” Tungod niini, ang mga nasod “magapukpok sa ilang kaugalingon sa pagminatay.” Apan dili kana mahitabo sa mga dinihogan, nga adunay langitnong paglaom, ug sa ilang mga kauban, nga adunay yutan-ong paglaom. Sila ‘motindog nga matul-id ug mohangad sa ilang mga ulo, tungod kay ang ilang kaluwasan nagakaduol na.’—Mat. 24:29, 30; Luc. 21:25-28.

15. Unsay himoon ni Kristo sa iyang pag-abot?

¹⁵ Sa dili pa matapos ang iyang pagpangdaog, ang Anak sa tawo moabot sa lain pang paagi. Siya mitagna: “Inig-abot sa Anak sa tawo diha sa iyang  himaya, ug ang tanang manulonda uban kaniya, nan siya molingkod sa iyang mahimayaong trono. Ug ang tanang kanasoran pagatigomon sa iyang atubangan, ug iyang pagalainon ang katawhan gikan sa usag usa, ingon sa usa ka magbalantay nga magalain sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala.” (Mat. 25:31-33) Kini nagtumong sa pag-abot ni Kristo ingong Maghuhukom nga magbahin sa katawhan sa “tanang kanasoran” ngadto sa duha ka matang: ang “mga karnero,” kadtong nagpaluyo sa iyang espirituwal nga mga igsoon (dinihogang mga Kristohanon sa yuta) ug ang “mga kanding,” kadtong “wala magsunod sa maayong balita bahin sa atong Ginoong Jesus.” (2 Tes. 1:7, 8) Ang mga karnero, nga gihubit ingong “mga matarong,” makadawat ug “kinabuhing walay kataposan” sa yuta, samtang ang mga kanding “mamahawa ngadto sa walay kataposang kalaglagan.”—Mat. 25:34, 40, 41, 45, 46.

Taposon ni Jesus ang Iyang Pagpangdaog

16. Sa unsang paagi taposon ni Kristo nga atong Pangulo ang iyang pagpangdaog?

¹⁶ Sa dihang matimbrehan na ang tanang hari-ug-saserdote nga kauban ni Kristo ug maanaa na sa iyang tuong kamot ang mga karnero, iya nang ‘taposon ang iyang pagpangdaog.’ (Pin. 5:9, 10; 6:2) Ingong pangulo sa gamhanang mga manulonda ug, sa walay duhaduha, sa iyang binanhawng mga igsoon, iyang pagalaglagon ang tibuok politikal, militaryo, ug komersiyal nga sistema ni Satanas dinhi sa yuta. (Pin. 2:26, 27; 19:11-21) Matapos ni Kristo ang iyang pagpangdaog sa dihang iyang malaglag ang daotang sistema ni Satanas. Dayon iyang itambog sa kahiladman si Satanas ug ang mga demonyo ug sila bilanggoon didto sulod sa usa ka libo ka tuig.—Pin. 20:1-3.

17. Sa unsa tultolan ni Kristo ang ubang mga karnero sulod sa iyang Usa ka Libo ka Tuig nga Pagmando, ug unsay determinado natong buhaton?

¹⁷ Sa paghisgot sa “dakong panon” sa ubang mga karnero, nga maluwas sa dakong kasakitan, si apostol Juan mitagna nga “ang Kordero, nga anaa sa taliwala sa trono, magabantay kanila, ug magatultol kanila ngadto sa mga tuboran sa mga tubig sa kinabuhi.” (Pin. 7:9, 17) Oo, sulod sa Usa ka Libo ka Tuig nga Pagmando ni Kristo, siya padayong manguna sa ubang mga karnero, kinsa namati gayod sa iyang tingog, ug maggiya kanila sa kinabuhing walay kataposan. (Basaha ang Juan 10:16, 26-28.) Hinaot nga padayon natong sundon ang atong harianong Pangulo—karon ug sa bag-ong kalibotan nga gisaad ni Jehova!

Agig Pagsubli

• Unsay gibuhat ni Kristo human siya maentrono?

• Kinsay gigamit ni Kristo sa pagpanguna sa mga kongregasyon?

• Sa unsa pang mga paagi nga si Kristo nga atong Pangulo moabot?

• Sa unsang paagi si Kristo padayong maggiya kanato sa bag-ong kalibotan?

[Mga Pangutana sa Pagtuon]

[Hulagway sa panid 29]

Ang presensiya ni Kristo mapadayag sa dihang laglagon na ang daotang sistema ni Satanas