Ang Espesyal nga Kampanya sa Bulgaria Nagmalamposon

“Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.”—MAT. 9:37, 38.

HAOM kaayo ang maong mga pulong ni Jesus sa kahimtang sa Bulgaria, usa ka nindot nga Balkan nga nasod sa habagatan-sidlakang Uropa! Gikinahanglan gayod ang dugang mamumuo sa pagdala sa maayong balita ngadto sa kapig pito ka milyong molupyo. Dunay mga 1,700 ka magmamantala sa Bulgaria, apan dili nila makobrehan ang tanan nilang teritoryo. Busa, giaprobahan sa Nagamandong Lawas nga dapiton ang mga Saksi nga nagsultig Bulgarian gikan sa lainlaing nasod sa Uropa aron sa pagtabang sa espesyal nga kampanya niadtong 2009. Ang kampanya gieskedyul sulod sa pito ka semana atol sa ting-init, ug natapos panahon sa “Padayon sa Pagbantay!” nga Distritong Kombensiyon sa Sofia, niadtong Agosto 14-16, 2009.

Daghan Kaayo ang Misanong

Ang mga igsoon sa sangang buhatan sa Sofia naghunahuna kon pila kahay mosanong gikan sa Alemanya, Espanya, Gresya, Italya, Polandia, ug sa Pransiya. Sa ato pa, moadto sila sa Bulgaria sa kaugalingon nilang gasto ug kinahanglan silang mobakasyon. Makalilipay kay matag semana nagkadaghan ang nangaplay, hangtod nga miabot silag 292. Tungod kay daghan ang misanong, puwede silang iasayn sa tulo ka siyudad sa Bulgaria: Kazanlak, Sandanski, ug Silistra. Ang mga magtatan-aw sa sirkito sa Bulgaria nagdapit usab sa lokal nga mga payunir ug magmamantala sa pagsuportar sa maong kampanya. Sa ngadtongadto, 382 ka boluntaryo ang masibotong nagsangyaw sa mga teritoryo nga panagsa rang maadtoan.

Ang mga igsoon sa dug-ol nga kongregasyon gipapangitag kasak-an. Sila nag-abang ug mga apartment ug nagpareserba diha sa dili-mahalong mga hotel. Kining mga igsoona naghago pag-ayo aron mapahiluna ang mga boluntaryo ug maatiman ang ilang panginahanglan. Sa tulo ka siyudad, sila nag-abang ug katigoman. Ilang gihikay nga ang miduawng mga igsoon maoy modumala sa mga tigom. Makalilipay gayod nga diha sa mga lugar nga walay bisag usa ka Saksi nga nagpuyo, 50 ka magmamantala ang nagtigom aron sa pagdayeg kang Jehova.

Talagsaon gayod ang kasibot nga gipakita sa mga igsoon gikan sa laing mga nasod. Panahon sa ting-init, ang temperatura sa Bulgaria mahimong moabot ug kapin sa 40 grado Celsius. Apan, wala gayoy makapugong niining masibotong mga igsoon. Ang Silistra, usa ka siyudad duol sa Danube River nga may kapin sa 50,000 ka molupyo, nakobrehan sulod lang sa tulo ka semana. Busa, miadto usab sila sa sikbit nga mga dapit, nga nakaabot pa gani sa Tutrakan, nga 55 kilometros sa kasadpang bahin sa Silistra. Kasagaran, magsugod sila sa alas 9:30 sa buntag. Human sa paniudto, mopadayon sila pagsangyaw nga sagad maabtag alas 7:00 sa gabii o lapas pa niana. Tungod sa talagsaong kasibot niining mga igsoona, gihimo usab nila ang kampanya sa ubang mga baryo ug siyudad.

 Unsay Nalampos?

Usa ka talagsaong pamatuod ang nahatag sulod sa pito ka semana. Ingon sa gipamulong panahon sa mga apostoles, ang mga molupyo sa maong mga siyudad makaingon, ‘Inyong gipuno ang among siyudad sa inyong pagtulon-an.’ (Buh. 5:28) Ang mga Saksi nga miapil sa kampanya nakapahimutang ug mga 50,000 ka magasin ug nakasugod ug 482 ka pagtuon sa Bibliya. Ikalipay nga sugod niadtong Septiyembre 1, 2009, duna nay kongregasyon sa Silistra, ug may mga grupo na usab sa Kazanlak ug sa Sandanski. Makapadasig gayod nga makita ang mga tawo nga misanong dayon bisag mao pay ilang pagkadungog sa maayong balita.

Sa unang semana sa kampanya, usa ka espesyal payunir nga sister gikan sa Espanya nga Bulgarian ug sinultihan ang nagsangyaw kang Karina, usa ka babaye sa Silistra nga namaligyag mantalaan diha sa kadalanan. Si Karina nainteres ug mitambong sa tigom. Misugot dayon siya nga magtuon sa Bibliya. Ang iyang bana usa ka ateyista, busa mihangyo siya nga didto sila magtuon sa parke. Kauban niya ang iyang duha ka anak nga babaye sa iyang pagtuon. Ang magulang nga si Daniela nagpakitag talagsaong pagpabili sa kamatuoran sa Bibliya. Iyang nahuman ug basa ang librong Gitudlo sa Bibliya sulod sa usa ka semana ug gipadapat dayon ang giingon sa Bibliya bahin sa dili paggamit ug mga imahen diha sa pagsimba. Dayon iyang gipaambit ang kamatuoran sa iyang mga higala. Human lamang sa tulo ka semana sukad sa iyang unang pagtambong sa tigom, iyang giingnan ang sister nga nagdumalag pagtuon kaniya: “Akong gibati nga pareha na ko ninyo. Unsay akong himoon aron makauban sab ko sa pagsangyaw?” Si Daniela padayong miuswag uban sa iyang inahan ug manghod nga babaye.

Sa Kazanlak, usa ka Bulgarianong brader nga ginganlag Orlin, nga gikan sa Italya, ang naglakaw paingon sa iyang gisak-an human sa pagsangyaw. Sa dihang nakita niya ang duha ka batan-ong lalaki nga nanglingkod diha sa parke, iya kining gisangyawan. Siya nakapahimutang ug librong Gitudlo sa Bibliya ug nagsabot sila nga magkita pagkaugma. Sa maong pagduaw, nasugdan ni Orlin ang pagtuon sa Bibliya uban kang Svetomir, nga gipadayon pagkasunod adlaw. Sulod sa siyam ka adlaw, kawalo silang nagtuon. Si Svetomir miingon: “Duha ka adlaw una ta magkita, ako nag-ampo sa Diyos nga tabangan unta ko niya nga mailhan siya. Ug misaad ko nga kon tabangan ko niya, akong ipahinungod kaniya ang akong kinabuhi.” Sa dihang mibalik na si Orlin sa Italya, ang lokal nga mga igsoon nagpadayon pagtuon kang Svetomir, ug iya nang gipadapat ang iyang nakat-onan.

 Dagayang Gipanalanginan ang Nagsakripisyo

Unsa kahay gibati niadtong mga igsoon nga naggamit sa ilang bakasyon ug salapi aron sa pagsangyaw sa maayong balita sa laing nasod? Usa ka ansiyano sa Espanya misulat: “Ang kampanya nakapasuod sa mga igsoon sa Espanya nga Bulgarian ug sinultihan. Maayo kaayo kinig epekto sa mga igsoon nga nakigbahin niana.” Usa ka magtiayon sa Italya misulat: “Kini ang labing makalilipayng yugto sa among kinabuhi!” Sila midugang: “Ang kampanya nakapausab sa among kinabuhi! Karon nabag-o na ang among mga tumong.” Nagplano sila nga mopuyo sa Bulgaria aron moalagad diin mas dako ang panginahanglan. Si Carina, nga usa ka dalaga nga regular payunir sa Espanya, miduyog sa kampanya sa Silistra. Human niana, siya miresayn sa iyang trabaho sa Espanya ug mibalhin sa Bulgaria aron sa pagtabang sa bag-ong kongregasyon sa maong siyudad. Nakatigom siyag igong salapi alang sa tibuok tuig nga pag-estar sa Bulgaria. Si Carina miingon bahin sa iyang desisyon: “Malipayon kaayo ko nga si Jehova nagtugot kanako nga makaalagad dinhi sa Bulgaria, ug maayo untag magdugay ko dinhi. Lima na ang akong ginatun-an sa Bibliya, ug ang tulo kanila tigtambongan na sa mga tigom.”

Usa ka Italyanang sister ang gustong moapil sa kampanya, apan kay bag-o pa lang siya sa iyang trabaho, wala pa siyay bakasyon. Kay determinado, siya mihangyo ug usa ka bulan nga bakasyon nga walay suweldo ug andam siyang moresayn sa trabaho kon dili siya tugtan. Sa iyang katingala, ang iyang amo miingon: “OK, apan ubos sa usa ka kondisyon: Kinahanglang padad-an ko nimog postcard gikan sa Bulgaria.” Tino gayod nga gibati sa maong sister nga gitubag ni Jehova ang iyang mga pag-ampo.

Si Stanislava, usa ka batan-ong sister sa siyudad sa Varna, Bulgaria nga dunay full-time ug maayog-suweldo nga trabaho, mibakasyon aron moapil sa kampanya sa Silistra. Sa dihang iyang nakita nga malipayon kaayo ang mga payunir gikan sa laing nasod nga nagsangyaw sa ilang dapit, siya nakahilak. Nakahunahuna siya sa iyang kahimtang, nga nangagpas sa sekular nga karera. Sa dihang mipauli siya human sa duha ka semana, siya miresayn sa trabaho ug nagregular payunir. Karon malipayon kaayo siya, nga naghinumdom sa iyang Maglalalang panahon sa iyang pagkabatan-on.—Eccl. 12:1.

Usa gayod ka dakong panalangin nga mahimong aktibo sa pag-alagad kang Jehova. Wala nay laing mas maayo pang buhaton kay sa paggamit sa imong panahon ug kusog diha sa labing hinungdanong buluhaton, ang pagpanudlo ug pagsangyaw sa maayong balita. Aduna bay mga paagi nga mapauswag nimo ang imong pagpakigbahin niining nagaluwas-ug-kinabuhi nga ministeryo? Tingali dunay mga lugar sa inyong nasod nga mas dako ang panginahanglan. Makabalhin ka ba didto? O basin makahimo ka sa pagtuon ug bag-ong pinulongan aron matabangan ang mga tawo sa inyong dapit nga uhaw sa kamatuoran. Bisan unsang kausaban ang imong himoon aron mapauswag ang imong ministeryo, makaseguro ka nga si Jehova dagayang magpanalangin kanimo.—Prov. 10:22.

[Kahon/Hulagway sa panid 32]

Halandomong Adlaw

Daghan niadtong gikan sa ubang mga nasod sa Uropa nga misuportar sa espesyal nga kampanya sa Bulgaria ang mitambong sa “Padayon sa Pagbantay!” nga Distritong Kombensiyon sa Sofia. Nadasig kaayo ang lokal nga mga igsoon nga nahimamat ang daghang bisita gikan sa lainlaing nasod. Dako kaayo ang kalipay sa 2,039 nga nanambong sa dihang giluwatan ni Brader Geoffrey Jackson sa Nagamandong Lawas ang kompletong New World Translation of the Holy Scriptures sa Bulgarian nga pinulongan! Ang tanang nanambong sa adlawng Biyernes nagpahayag sa ilang kinasingkasing nga apresasyon pinaagi sa madasigon ug dugayng pagpamalakpak. Daghan pa gani ang nanghilak sa kalipay. Kining tukma ug sayon-sabton nga hubad makatabang sa sinserong mga tawo sa Bulgaria nga makaila kang Jehova.

[Mapa sa panid 30, 31]

(Alang sa aktuwal nga pagkahan-ay, tan-awa ang publikasyon)

BULGARIA

SOFIA

Sandanski

Silistra

Kazanlak

[Mga hulagway sa panid 31]

Usa ka talagsaong pamatuod ang nahatag sulod sa pito ka semana