Ang Panaghiusa Timailhan sa Matuod nga Pagsimba
Ang Panaghiusa Timailhan sa Matuod nga Pagsimba
“Hiusahon ko sila, sama sa usa ka panon sa mga karnero diha sa toril.”—MIQ. 2:12.
1. Sa unsang paagi ang kalalangan nagpamatuod sa kaalam sa Diyos?
ANG usa ka salmista miingon: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat.” (Sal. 104:24) Ang kaalam sa Diyos makita diha sa pagsaliganay sa milyonmilyong matang sa tanom, insekto, mananap, ug bakterya diha sa komplikado kaayong gambalay sa kinabuhi. Dugang pa, diha sa imong lawas, ang libolibo ka lainlaing mekanismo—gikan sa dagkong organo hangtod sa gagmayng bahin sa mga selula—nagtinabangay aron mahimo kang himsog nga indibiduwal.
2. Ingon sa gipakita sa panid 13, nganong talagsaon ang panaghiusa sa mga Kristohanon?
2 Si Jehova naglalang sa katawhan nga magsinaligay sa usag usa. Ang mga tawo lainlaig panagway, kinaiya, ug kahanas. Dugang pa, iyang gihatagan si Adan ug Eva ug mga hiyas nga sama sa iyaha aron sila magtinabangay ug magsinaligay sa usag usa. (Gen. 1:27; 2:18) Apan, kadaghanan sa mga tawo karon nahimulag sa Diyos ug wala gayod magkahiusa. (1 Juan 5:19) Sanglit ang Kristohanong kongregasyon sa unang siglo gilangkoban man sa lainlaing matang sa tawo sama sa mga ulipon nga taga-Efeso, prominenteng mga Gregong babaye, edukadong mga Hudiyong lalaki, ug kanhing mga magsisimbag idolo, ang ilang panaghiusa talagsaon gayod.—Buh. 13:1; 17:4; 1 Tes. 1:9; 1 Tim. 6:1.
3. Unsay giingon sa Bibliya bahin sa panaghiusa sa mga Kristohanon, ug unsay atong hisgotan niining artikuloha?
3 Ang matuod nga pagsimba nagpalihok sa mga tawo sa pagtinabangay samag mga sangkap sa lawas. (Basaha ang 1 Corinto 12:12, 13.) Niining artikuloha atong susihon ang mosunod: Sa unsang paagi ang matuod nga pagsimba naghiusa sa mga tawo? Nganong si Jehova lamang ang makahiusa sa minilyong tawo gikan sa tanang kanasoran? Unsang mga babag sa panaghiusa ang atong mabuntog sa tabang ni Jehova? Maylabot sa panaghiusa, unsay kalainan tali sa matuod nga Kristiyanidad ug sa Kakristiyanohan?
Sa Unsang Paagi ang Matuod nga Pagsimba Naghiusa sa mga Tawo?
4. Sa unsang paagi ang matuod nga pagsimba naghiusa sa mga tawo?
4 Ang mga tawo nga anaa sa matuod nga pagsimba miila kang Jehova ingong bugtong Soberano sa uniberso tungod kay iyang gilalang ang tanang butang. (Pin. 4:11) Busa, bisag ang matuod nga mga Kristohanon nagpuyo sa lainlaing komunidad ug managlahig kahimtang, silang tanan nagsunod sa samang mga balaod sa Diyos ug nagkinabuhi sa samang mga prinsipyo. Ang tanang matuod nga magsisimba haom nga nagtawag kang Jehova ingong “Amahan.” (Isa. 64:8; Mat. 6:9) Busa, silang tanan maoy managsoon sa pagtuo ug makatagamtam sa maanindot nga panaghiusa nga gihubit sa salmista: “Tan-awa! Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!”—Sal. 133:1.
5. Unsang hiyas ang nakaamot sa panaghiusa sa matuod nga mga magsisimba?
5 Bisan tuod ang matuod nga mga Kristohanon dili-hingpit, sila nagkahiusa sa pagsimba tungod kay sila nakakat-on sa paghigugma sa usag usa. Si Jehova ang nagtudlo kanila sa paghigugma. (Basaha ang 1 Juan 4:7, 8.) Ang iyang Pulong nag-ingon: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.” (Col. 3:12-14) Kining hingpit nga bugkos sa panaghiusa—ang gugma—mao ang pangunang timailhan sa matuod nga mga Kristohanon. Sa imong kasinatian, nakita ba nimo nga ang panaghiusa maoy timailhan sa matuod nga pagsimba?—Juan 13:35.
6. Sa unsang paagi ang paglaom sa Gingharian motabang kanato nga matagamtam ang panaghiusa?
6 Ang matuod nga mga magsisimba nagkahiusa usab tungod kay ilang gilantaw ang Gingharian sa Diyos ingong bugtong paglaom sa katawhan. Nahibalo sila nga sa dili madugay ang Gingharian sa Diyos mopuli sa kagamhanan sa tawo ug ang masinugtanong katawhan panalanginan ug tinuod, dumalayong kalinaw. (Isa. 11:4-9; Dan. 2:44) Busa, ang mga Kristohanon namati sa giingon ni Jesus bahin sa iyang mga sumusunod: “Sila dili bahin sa kalibotan, ingon nga ako dili bahin sa kalibotan.” (Juan 17:16) Ang matuod nga mga Kristohanon nagpabiling neyutral sa panagbangi sa kalibotan; busa sila nagkahiusa gihapon bisag ang uban naggubatay.
Ang Bugtong Tinubdan sa Espirituwal nga Instruksiyon
7, 8. Sa unsang paagi ang binase-sa-Bibliya nga instruksiyon nakaamot sa atong panaghiusa?
7 Natagamtam sa unang-siglong mga Kristohanon ang panaghiusa tungod kay ilang nadawat ang instruksiyon gikan sa samang tinubdan. Ilang giila nga si Jesus nagatudlo ug nagatultol sa kongregasyon pinaagi sa usa ka nagamandong lawas, nga gilangkoban sa mga apostoles ug ansiyano sa Jerusalem. Kining matinumanong mga lalaki nagbase sa ilang desisyon sa Pulong sa Diyos ug ilang gipahibalo sa mga kongregasyon ang ilang mga instruksiyon pinaagi sa nagapanawng mga magtatan-aw. Bahin sa pipila niini nga mga magtatan-aw, ang Bibliya nag-ingon: “Samtang sila mipanaw agi sa mga siyudad ilang ipanghatod ang mga sugo nga gidesisyonan sa mga apostoles ug mga ansiyano nga didto sa Jerusalem aron sundon sa mga atua didto.”—Buh. 15:6, 19-22; 16:4.
8 Sa susama, ang Nagamandong Lawas karon nga gilangkoban sa dinihogan-sa-espiritu nga mga Kristohanon nakaamot sa panaghiusa sa mga kongregasyon sa tibuok kalibotan. Sila nagapatik ug makapalig-on sa espirituwal nga mga literatura sa daghang pinulongan. Ang maong espirituwal nga pagkaon gibase sa Pulong sa Diyos. Busa, ang ilang gitudlo dili gikan sa tawo kondili kang Jehova.—Isa. 54:13.
9. Sa unsang paagi ang atong hinatag-sa-Diyos nga buluhaton nakaamot sa atong panaghiusa?
9 Ang Kristohanong mga magtatan-aw nakaamot usab sa panaghiusa pinaagi sa pagpanguna diha sa pagsangyaw. Ang suod nga relasyon tali niadtong nag-alagad sa Diyos mas lig-on kay sa relasyon sa mga tawo sa kalibotan nga nakigsandurot lamang. Ang Kristohanong kongregasyon natukod dili lamang alang sa panag-ubanay kondili aron sa pagpasidungog kang Jehova ug sa pagtapos sa buluhaton—ang pagsangyaw sa maayong balita, paghimog mga tinun-an, ug pagpalig-on sa kongregasyon. (Roma 1:11, 12; 1 Tes. 5:11; Heb. 10:24, 25) Busa, si apostol Pablo nakaingon bahin sa mga Kristohanon: “Kamo nagabarog nga malig-on sa usa ka espiritu, uban ang usa ka kalag nga naningkamot kiliran sa kiliran alang sa pagtuo sa maayong balita.”—Filip. 1:27.
10. Unsa ang pipila ka paagi diin kita nahiusa ingong katawhan sa Diyos?
10 Busa, ingong katawhan ni Jehova, kita nahiusa tungod kay kita midawat sa pagkasoberano ni Jehova, nahigugma sa mga igsoon, naglaom sa Gingharian, ug nagtahod niadtong gigamit sa Diyos nga manguna kanato. Si Jehova nagtabang kanato nga mabuntog ang mga tinamdan nga makabungkag sa atong panaghiusa.—Roma 12:2.
Pagbuntog sa Garbo ug Pangabugho
11. Nganong ang garbo makapatunghag pagkabahinbahin, ug sa unsang paagi si Jehova nagtabang kanato sa pagbuntog niana?
11 Ang garbo makapatunghag pagkabahinbahin. Ang tawong garboso maghunahuna nga siya labaw sa uban ug sagad malipay siya nga makapanghambog. Apan makababag kini sa panaghiusa; mahimong masina kadtong makadungog sa pagpanghambog. Ang disipulong si Santiago prangkang miingon: “Ang tanang pagpasigarbo nga ingon niana daotan.” (Sant. 4:16) Kon atong lantawon ang uban nga ubos kay kanato, wala kita magpakitag gugma. Apan matikdi nga si Jehova maoy panig-ingnan sa pagkamapainubsanon kay siya nakiglabot sa dili-hingpit nga mga tawo sama kanato. Si David miingon sa Diyos: “Ang imong pagpaubos mao ang nagpadako kanako.” (2 Sam. 22:36) Ang Pulong sa Diyos nagtabang kanato sa pagbuntog sa garbo pinaagi sa pagtudlo kanato sa pagpangatarongan sa hustong paagi. Si Pablo giinspirar sa pagpangutana: “Kinsa bay naghimo kanimo nga lahi sa uban? Sa pagkatinuod, unsay anaa kanimo nga wala nimo madawat? Kon, karon, tinuod man nga nadawat nimo kini, nganong ikaw manghambog nga daw wala nimo kini madawat?”—1 Cor. 4:7.
12, 13. (a) Nganong dali ra kitang masina? (b) Unsay moresulta kon sundogon nato ang panglantaw ni Jehova sa atong mga igsoon?
12 Ang kasina maoy laing babag sa panaghiusa. Tungod sa napanunod nga pagkadili-hingpit, kitang tanan adunay “kiling sa pagkamasinahon,” ug bisan ang dugay nang mga Kristohanon masina usahay sa kahimtang, kabtangan, pribilehiyo, o katakos sa uban. (Sant. 4:5) Pananglitan, ang usa ka brader nga pamilyado masina tingali sa mga pribilehiyo sa usa ka bug-os-panahong ministro. Apan, wala siya mahibalo nga ang maong igsoon basin nasina usab kaniya tungod kay pamilyado siya. Unsay atong himoon aron dili mabungkag ang panaghiusa tungod sa maong kasina?
13 Aron dili masina, angay natong hinumdoman nga diha sa Bibliya ang dinihogang mga membro sa Kristohanong kongregasyon gitandi sa mga sangkap sa lawas. (Basaha ang 1 Corinto 12:14-18.) Pananglitan, bisan tuod ang imong mata maoy daling makita kon itandi sa imong kasingkasing, dili ba pareho man kining bililhon kanimo? Sa susama, gipabilhan ni Jehova ang tanang membro sa kongregasyon bisag usahay ang pipila tingali mas ilado kay sa uban. Busa, sundogon nato ang panglantaw ni Jehova sa atong mga igsoon. Inay masina sa uban, mahimong pakitaan nato silag kahingawa ug personal nga interes. Sa pagbuhat niana, atong ikapakita nga lahi gayod ang matuod nga mga Kristohanon sa mga relihiyon sa Kakristiyanohan.
Pagkabahinbahin—Timailhan sa Kakristiyanohan
14, 15. Sa unsang paagi nabahinbahin ang apostatang Kristiyanidad?
14 Tataw kaayo ang panaghiusa sa matuod nga mga Kristohanon kon itandi sa kasamok nga naglungtad diha sa mga relihiyon sa Kakristiyanohan. Sa ikaupat nga siglo, kaylap kaayo ang apostatang Kristiyanidad nga ang usa ka emperador sa Roma misagop niana, ug nakaamot kadto sa paglambo sa Kakristiyanohan. Dayon, sa sunodsunod nga pagkabahinbahin, daghang gingharian ang mibulag sa Roma ug nagtukod ug kaugalingong relihiyon.
15 Kadaghanan sa maong mga gingharian naggubatay sulod sa daghang siglo. Sa ika-17 ug ika-18ng siglo, gipasiugda sa mga tawo sa Britanya, Pransiya, ug sa United States ang pagpakitag debosyon sa nasod, mao nga ang nasyonalismo nahimong samag relihiyon. Sa ika-19 ug ika-20ng siglo, nagamhan sa nasyonalismo ang hunahuna sa kadaghanan. Sa ngadtongadto, ang mga relihiyon sa Kakristiyanohan nabahinbahin ngadto sa daghang sekta, diin ang kadaghanan niana nagtugot sa nasyonalismo. Bisan gani ang mga membro niini nakiggubat sa ilang isigkamagtutuo sa laing nasod. Sa atong panahon, ang Kakristiyanohan nabahinbahin tungod sa ilang mga pagtulon-an ug sa nasyonalismo.
16. Unsay mga hinungdan nga nagkabahinbahin ang Kakristiyanohan?
16 Sa ika-20ng siglo, ang pipila sa gatosan ka sekta sa Kakristiyanohan naningkamot nga makab-ot ang panaghiusa. Apan human sa daghang katuigan nga paningkamot, pipila lang ka relihiyon ang nagkahiusa, ug ang mga membro niini lainlain gihapog opinyon bahin sa ebolusyon, aborsiyon, homoseksuwalidad, ug sa pag-ordinar sa mga babaye. Diha sa pipila ka bahin sa Kakristiyanohan, ang mga lider sa relihiyon wala na maghatag ug dakong importansiya sa kanhing nakapabahin nga mga doktrina aron lang mahiusa ang mga membro niini. Apan, nakapahuyang hinuon kana sa pagtuo sa mga tawo ug wala gayod makapahiusa sa mga relihiyon sa Kakristiyanohan.
Ang Nasyonalismo Wala Makabungkag sa Matuod nga Pagsimba
17. Sa unsang paagi gitagna nga ang matuod nga pagsimba maghiusa sa katawhan “sa kaulahiang bahin sa mga adlaw”?
17 Bisan tuod nagkabahinbahin pag-ayo ang katawhan karon, ang panaghiusa mao gihapoy timailhan sa matuod nga mga magsisimba. Ang manalagnang si Miqueas miingon: “Hiusahon ko sila, sama sa usa ka panon sa mga karnero diha sa toril.” (Miq. 2:12) Gitagna ni Miqueas nga ang matuod nga pagsimba igatuboy ibabaw sa ubang matang sa pagsimba, kini man nagtumong sa bakak nga mga diyos o sa nasod nga gipakadiyos. Siya misulat: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang mga katawhan magaganayan. Kay ang tanang mga katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos.”—Miq. 4:1, 5.
18. Unsang mga kausaban ang atong nahimo tungod sa matuod nga pagsimba?
18 Gihubit usab ni Miqueas kon sa unsang paagi ang matuod nga pagsimba maghiusa sa kanhing mga magkaaway. “[Ang mga tawo gikan sa] daghang kanasoran moadto gayod ug moingon: ‘Umari kamo, ug manungas kita ngadto sa bukid ni Jehova ug ngadto sa balay sa Diyos ni Jacob; ug siya magatudlo kanato bahin sa iyang mga dalan, ug kita magalakaw sa iyang mga alagianan.’ . . . Ug ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Dili sila mobakyaw sa espada, nasod batok sa nasod, ni makakat-on pa sila sa gubat.” (Miq. 4:2, 3) Kadtong mobiya sa pagsimbag mga diyosdiyos o sa mga nasod aron mosimba kang Jehova makatagamtam sa tibuok-yutang panaghiusa. Ang Diyos magtudlo kanila sa dalan sa gugma.
19. Unsay gipamatud-an sa paghiusa sa milyonmilyong tawo diha sa matuod nga pagsimba?
19 Ang tibuok-yutang panaghiusa sa matuod nga mga Kristohanon karon maoy talagsaon ug tin-aw nga pamatuod nga si Jehova padayong naggiya sa iyang katawhan pinaagi sa iyang espiritu. Mas daghang tawo gikan sa tanang kanasoran ang nahiusa karon kay sukad masukad. Kini maoy talagsaong katumanan sa Pinadayag 7:9, 14, ug kini nagpaila nga sa dili madugay buhian sa mga manulonda sa Diyos ang ‘mga hangin’ nga maglaglag niining daotang sistema sa mga butang. (Basaha ang Pinadayag 7:1-4, 9, 10, 14.) Dili ba usa ka pribilehiyo nga mahiusa diha sa tibuok-kalibotang panag-igsoonay? Unsay atong buhaton aron makaamot sa maong panaghiusa? Hisgotan kini sa sunod nga artikulo.
Unsay Imong Tubag?
• Sa unsang paagi ang matuod nga pagsimba naghiusa sa mga tawo?
• Unsay atong himoon aron dili mabungkag ang panaghiusa tungod sa kasina?
• Nganong ang nasyonalismo wala makapabahinbahin sa matuod nga mga magsisimba?
[Mga Pangutana sa Pagtuon]
[Hulagway sa panid 13]
Ang mga Kristohanon sa unang siglo lainlaig kagikan
[Mga hulagway sa panid 15]
Sa unsang paagi ang imong pagtabang diha sa mga buluhaton sa Kingdom Hall makaamot sa panaghiusa?