Pag-alagad Panahon sa Kusog Kaayo nga Pag-uswag

Sumala sa giasoy ni Harley Harris

Kadto maoy Septiyembre 2, 1950, sa Kennett, Missouri, U.S.A. Mitambong mi sa usa ka sirkitong asembliya, nga gilibotan sa suko kaayong mga tawo. Gipadala sa mayor ang National Guard aron protektahan kami. Ang mga sundalo nga nagdalag riple ug bayoneta naglinya sa karsada. Bisan pa sa panginsulto, kami nanakay sa among sakyanan ug nangadto sa Cape Girardeau, Missouri, alang sa nahibiling sesyon sa asembliya. Didto ko nabawtismohan sa edad nga 14. Apan paasoya ko kon sa unsang paagi ko nahimong alagad ni Jehova niining panahon sa kagubot.

SA UNANG bahin sa katuigan sa 1930, ang akong mga apohan ug ang ilang walo ka anak nakapaminaw ug pipila ka rekording sa mga pakigpulong ni Brader Rutherford ug nakombinsir sila nga ilang nakaplagan ang kamatuoran. Ang akong ginikanan, si Bay ug Mildred Harris, nabawtismohan niadtong 1935 sa kombensiyon sa Washington, D.C. Nalipay kaayo sila sa pagkahibalo nga sila bahin sa “dakong pundok,” o “dakong panon,” nga bag-o pang gipaila sa maong kombensiyon!—Pin. 7:9, 14; King James Version.

Pagkasunod tuig, ako natawo. Usa ka tuig sa ulahi, ang akong ginikanan mibalhin sa usa ka dapit sa Mississippi nga walay Saksi. Samtang nagpuyo didto, walay igsoon nga nakaadto sa amo bisan gani nagapanawng magtatan-aw. Ang among pamilya adunay komunikasyon sa Bethel ug tigtambongag mga asembliya. Mao lamang kadto ang mga higayon nga makauban namo ang mga igsoon.

Paglahutay Ilalom sa Paglutos

Panahon sa Gubat sa Kalibotan II, ang mga Saksi ni Jehova nakaagom ug grabeng paglutos tungod sa ilang neyutral nga baroganan. Nianang panahona, nakabalhin na kami sa Mountain Home, Arkansas. Usa ka adlaw niana, nagsangyaw mi ni Papa sa kadalanan. Dihay lalaki nga miilog sa mga magasin gikan sa akong amahan ug gisunog kana sa among atubangan. Gitawag mi niya ug mga talawan tungod kay wala mi magsundalo. Kay singko anyos pa lang ko niadtong tungora, ako mihilak. Kalmado lang nga gitan-aw sa akong amahan ang lalaki hangtod nga milakaw kini.

Diha usay buotang mga tawo nga midapig namo. Usa ka higayon niana, sa dihang gilibotan ang among sakyanan sa suko kaayong mga tawo, ang piskal miagi. “Unsa may nahitabo dinhi?” siya nangutana. Dihay mitubag, “Kining mga  Saksi ni Jehova dili makig-away alang sa ilang nasod!” Niana ang piskal mitungtong sa tikanganan sa among sakyanan ug misinggit: “Ako nakig-away panahon sa Gubat sa Kalibotan I, ug makig-away sab ko sa gubat karon! Pasagdi ning mga tawhana. Wala silay gihimong daotan!” Ang mga tawo mihinayhinayg pamauli. Mapasalamaton kaayo mi nga dunay buotang mga tawo nga nagpakitag kalulot kanamo!—Buh. 27:3.

Ang mga Kombensiyon Nagpalig-on Kanamo

Ang kombensiyon sa St. Louis, Missouri niadtong 1941 nagpalig-on gayod kanamo. Sumala sa usa ka banabana, kapin sa 115,000 ang nanambong. Ug 3,903 ang nabawtismohan! Dili nako malimtan ang pakigpulong ni Brader Rutherford nga nag-ulohang “Mga Anak sa Hari.” Gitumong niya kanamong mga bata ang iyang pakigpulong, ug kaming tanan gihatagag kopya sa maanindot, asul nga librong Children. Ang maong kombensiyon nagpalig-on kanako sa paglahutay sa nahitabo pagkasunod tuig, sa dihang nagsugod ko pag-eskuyla sa elementarya. Kami sa akong mga ig-agaw gipalagpot sa eskuylahan tungod kay wala mi mosaludar sa bandera. Pero moadto gihapon mi sa eskuylahan kada adlaw kay basig nausab ang hunahuna sa mga direktor. Kadaghan ming nagbalikbalik sa eskuylahan agi sa kakahoyan—unya papaulion ra gihapon mi. Apan akong gibati nga mao kadtoy among paagi sa pagpakita sa among pagkamaunongon sa Gingharian sa Diyos.

Wala madugay, ang Korte Suprema sa United States nagmando nga dili na ipugos ang pagsaludar sa bandera. Busa, nakapadayon mi sa pag-eskuyla. Buotan kaayo ang among maestro kay gitabangan mi niya nga makaapas sa among leksiyon. Gitahod sab mi sa among mga eskolmet.

Nahinumdom sab ko sa kombensiyon sa Cleveland, Ohio, niadtong 1942 diin si Brader Nathan H. Knorr nagdiskurso sa ulohang “Kalinaw—Molungtad Kaha Kini?” Ang maong pagtuki sa Pinadayag kapitulo 17 nagpakita nga dunay usa ka yugto sa kalinaw human sa Gubat sa Kalibotan II. Busa, gidahom ang dugang pag-uswag. Aron sa pagpangandam niana, ang Tunghaang Gilead gibuksan niadtong 1943. Wala ko magdahom nga ang maong tunghaan dunay epekto sa akong kinabuhi sa ulahi. Tuod man, human sa gubat mitungha ang kalinaw ug mihunong ang paglutos. Apan, sa dihang ang Gubat sa Korea nagsugod niadtong 1950, mitungha na usab ang pagsupak sa atong buluhaton, ingon sa gihisgotan sa sinugdanan.

Mas Bug-os nga Pagpakigbahin sa Pag-uswag

Pagka 1954, ako migraduwar sa hayskul, ug pagkasunod bulan ako nagpayunir. Human mag-alagad sa Kennett, Missouri, diin kami gilibotan sa suko kaayo nga mga tawo niadtong 1950, ako gidapit nga moalagad sa Bethel pagka-Marso 1955. Apil sa teritoryo sa kongregasyon diin ako naasayn mao ang Times Square, sa sentro sa New York City. Pagkadakong kausaban kini sa akong kinabuhi sa baryo! Akong nakuha ang pagtagad sa puliking mga tawo sa New York pinaagi sa pagpakita kanila sa makapainteres nga artikulo sa magasin ug sa pag-ingon, “Nakapangutana ka na ba niini sa imong kaugalingon?” Daghan ang midawat sa mga magasin.

Usa sa ganahan kaayo nako sa Bethel mao ang paghisgot sa inadlawng teksto, nga gidumala ni Brader Knorr. Maayo kaayo siyang mopatin-aw sa mga teksto ug ipakita niya kon unsaon kana pagpadapat sa praktikal nga paagi. Siya makigsulti namong mga ulitawo nga samag usa ka amahan, nga sagad magtambag kanamo kon unsaon pagtratar ang mga sister. Pagka 1960, nakadesisyon ko nga magminyo.

Misulat ko nga mogawas sa Bethel paglabay sa 30 ka adlaw apan wala ko balosi. Human sa 30 ka adlaw, bisag maulawon ko, nangisog ko sa pagpangutana kon nadawat ba nila ang akong sulat. Si Brader Robert Wallen ang nakatubag sa telepono ug giadto ko niya sa akong gitrabahoan. Gipangutana ko niya kon gusto ba kong mag-espesyal payunir o mag-alagad sa sirkito. Mitubag ko: “Pero Bob, 24 anyos lang ko, ug wala pa koy kasinatian.”

Pag-alagad sa Sirkito

Nianang gabhiona, dihay dakong sobre sa akong kuwarto. Duna kadtoy aplikasyon para sa espesyal payunir ug sa pag-alagad sa sirkito.  Pwerte nakong kurata! Dako kaayong pribilehiyo nga mag-alagad sa akong mga igsoon sa habagatan-kasadpang Missouri ug sa sidlakan sa Kansas ingong magtatan-aw sa sirkito. Apan sa wala pa ko mobiya sa Bethel, ako mitambong sa miting alang sa nagapanawng mga magtatan-aw. Sa hinapos sa pakigpulong ni Brader Knorr, siya miingon: “Ang inyong pagkahimong mga magtatan-aw sa sirkito ug distrito wala magpasabot nga mas daghan mog nahibaloan kay sa lokal nga mga igsoon. Ang pipila mas daghag kasinatian kay kaninyo. Apan wala itugot sa ilang kahimtang nga mabatonan ang inyong pribilehiyo. Daghan mog makat-onan nila.”

Tinuod gayod kana! Si Brader Fred Molohan uban ang iyang asawa ug igsoong si Charley nga taga-Parsons, Kansas, maoy maayo kaayong panig-ingnan. Sila nakadangat sa kamatuoran sa unang bahin sa katuigan sa 1900. Ganahan kaayo kong mamati sa ilang mga eksperyensiya nga nahitabo sa wala pa gani ko matawo! Ang lain pang igsoon mao si John Wristen, usa ka buotan nga edarang brader sa Joplin, Missouri, nga dugay nang payunir. Kining minahal nga mga igsoon adunay lalom nga pagtahod sa teokratikanhong mga kahikayan. Ila gyod kong gipabilhan ingong magtatan-aw sa sirkito—bisan pa sa akong pagkabatan-on.

Pagka 1962, nagminyo mi ni Cloris Knoche, usa ka bibo, bulagawg-buhok nga payunir. Ako nagpadayon sa pag-alagad ingong magtatan-aw sa sirkito uban ni Cloris. Ang among pag-estar sa balay sa mga igsoon nakatabang kanamo nga masinati sila. Nakadasig mig mga batan-on nga mosulod sa bug-os-panahong pag-alagad. Ang duha kanila mao si Jay Kosinski ug JoAnn Kresyman. Ang among pagpakig-uban kanila diha sa ministeryo ug ang paghisgot sa kalipay nga among gibati tungod sa pagsakripisyo sa kaugalingon nagdasig kanila sa pagkab-ot ug mga tumong. Si JoAnn nahimong espesyal payunir, ug si Jay nag-alagad sa Bethel. Sa ulahi, sila nagminyo, ug karon mga 30 ka tuig na sila sa sirkitong buluhaton.

Pag-alagad Ingong Misyonaryo

Niadtong 1966, gipangutana mi ni Brader Knorr kon interesado ba ming moalagad sa laing nasod. “Malipayon mi sa among pag-alagad dinhi, apan kon dunay panginahanglan sa laing dapit, andam ming moadto,” kami mitubag. Paglabay sa usa ka semana, kami gidapit nga moeskuyla sa Gilead. Malipayon kaayo ko nga nakabalik sa Bethel samtang nagtungha ug nakauban ang daghan niadtong akong gimahal ug gitahod! Nasuod sab namo ang among mga klasmet, nga matinumanong nag-alagad hangtod karon.

Kami ni Cloris gipadala sa Ecuador sa Amerika del Sur, kauban ni Dennis ug Edwina Crist, Ana Rodríguez, ug Delia Sánchez. Ang magtiayong Crist giasayn sa kaulohang siyudad, ang Quito. Kami, uban ni Ana ug Delia giasayn sa Cuenca, ang ikatulo sa kinadak-ang siyudad sa Ecuador. Ang among teritoryo dunay duha ka probinsiya. Ang unang kongregasyon sa Cuenca nagsugod sa among sala ug unom ra ming magtigom. Naghunahuna mi kon makobrehan ba gyod namo ang among teritoryo.

Ang Cuenca daghan kaayog simbahan, ug panahon sa ilang gitawag nga balaang mga adlaw, mapuno ang siyudad sa mga prosesyon. Apan  daghag pangutana ang mga tawo sa Cuenca. Pananglitan, sa unang higayon nga akong nahimamat si Mario Polo, nga usa ka kampeyong siklista sa Cuenca, wala ko magdahom sa iyang pangutana, “Kinsa ang bigaon nga gihisgotan sa Pinadayag?”

Sa laing higayon, si Mario miadto sa among balay panahon sa kagabhion nga mabalak-on. Usa ka pastor sa Protestante ang naghatag niyag basahon nga dunay mga akusasyon batok sa mga Saksi ni Jehova. Akong giingnan si Mario nga angayng hatagag higayon ang akusado nga modepensa sa iyang kaugalingon. Busa pagkaugma, ako ug ang pastor gidapit ni Mario sa iyang balay aron tubagon ang mga akusasyon. Nianang higayona, ako misugyot nga among hisgotan ang bahin sa Trinidad. Sa dihang gibasa sa pastor ang Juan 1:1, gisaysay ni Mario ang kalainan tali sa “Diyos” ug sa “usa ka diyos” diha sa Grego. Ug mao kanay gihimo ni Mario sa matag teksto nga gihisgotan. Siyempre, ang pastor milakaw nga wala mapamatud-i ang Trinidad. Tungod niini, nakombinsir si Mario ug ang iyang asawa nga ang amoa maoy kamatuoran, ug nahimo silang maayong mga tigdepensa sa mga pagtulon-an sa Bibliya. Makalilipay gayong makita nga ang mga kongregasyon sa siyudad sa Cuenca miabot nag 33, ug tanantanan 63 sa tibuok teritoryo nga unang giasaynan kanamo—dako gayod nga pag-uswag!

Pag-alagad Diha sa Sanga

Niadtong 1970, ako gidapit nga moalagad sa sanga sa Guayaquil uban ni Al Schullo. Kaming duha nag-atiman sa pipila ka buluhaton sa sanga. Si Joe Sekerak partaym nga nagtrabaho didto aron sa pag-empake ug mga literatura alang sa 46 ka kongregasyon sa tibuok nasod. Sulod sa pipila ka panahon, si Cloris mogawas sa kanataran samtang ako nagtrabaho sa Bethel. Siya nakatabang ug 55 ka tawo nga makadangat sa bawtismo, sagad tulo ngadto sa lima ang mabawtismohan sa usa ka asembliya.

Pananglitan, si Cloris nagdumalag pagtuon sa usa ka babaye nga ginganlag Lucresia, kansang bana magsusupak. Bisan pa niana, si Lucresia nabawtismohan ra ug nagregular payunir. Gitudloan niya ang iyang mga anak bahin kang Jehova. Ang iyang duha ka anak nga lalaki mga ansiyano na, ug ang usa espesyal payunir; ang iyang anak nga babaye nag-alagad ingong payunir. Ang iyang apo nakabana ug buotan nga brader, ug sila nag-alagad usab ingong mga espesyal payunir. Kining pamilyaha daghag natabangan nga makakat-on sa kamatuoran.

Pagka 1980 diha nay mga 5,000 ka magmamantala sa Ecuador. Busa gikinahanglan usab ang dugang boluntaryo sa sanga. Tungod kay dili na mi maigo sa opisina, usa ka brader ang mitanyag kanamo sa iyang 32 ektaryas nga yuta sa gawas sa Guayaquil. Niadtong 1984 among gisugdan pagtukod dinhi ang bag-ong sangang buhatan ug ang usa ka Assembly Hall, nga parehong gidedikar niadtong 1987.

Dugang Tabang Nakaamot sa Pag-uswag

Latas sa katuigan, makapadasig nga makita ang daghang magmamantala ug payunir gikan sa laing mga nasod nga nanganhi sa Ecuador aron sa pagtabang diin dako ang panginahanglan. Ang usa nga dili nako makalimtan mao si Andy Kidd, usa ka retiradong maestro nga taga-Canada. Siya mibalhin sa Ecuador niadtong 1985 sa edad nga 70 ug matinumanong nag-alagad hangtod sa iyang kamatayon niadtong 2008 sa edad nga 93. Sa unang higayon nga nakita nako siya sa iyang asaynment, siya lang ang ansiyano sa usa ka gamayng kongregasyon. Bisag dili siya larino sa Kinatsila, siya maoy mohatag sa pakigpulong publiko ug modumala sa Pagtuon sa Bantayanang Torre. Siya usab ang modumala sa Teokratikanhong Tunghaan sa Ministeryo ug sa halos tanang bahin sa Tigom sa Pag-alagad! Nianang dapita, aduna na karoy duha ka mauswagong kongregasyon, nga may duolag 200 ka magmamantala ug daghang ansiyano.

Ang laing brader, si Ernesto Diaz, mibalhin gikan sa United States uban sa iyang pamilya. Paglabay sa walo ka bulan, siya miingon: “Ang among tulo ka anak nakakat-og Kinatsila ug nahimong hanas sa pagdumalag pagtuon sa Bibliya sa maong pinulongan. Ingong  usa ka amahan, akong nakab-ot ang tumong nga morag imposible niining sistemaha—ang pagkahimong regular payunir, nga nakigbahin sa bug-os-panahong ministeryo uban sa akong pamilya. Tanantanan, kami nagdumalag 25 ka pagtuon sa Bibliya. Tungod niini, mas nasuod kami sa usag usa ug labaw sa tanan kang Jehova.” Gipabilhan gayod namo kining minahal nga mga igsoon!

Niadtong 1994, nahitabo ang dugang pag-uswag dinhi sa sanga, mao nga nadoble ang gidak-on sa mga pasilidad. Pagka 2005 miabot nag kapin sa 50,000 ang mga magmamantala, ug gikinahanglan ang dugang pasilidad. Kini naglakip sa mas dakong Assembly Hall, usa ka bag-ong residence building, ug mga opisina sa Translation. Kining bag-ong mga pasilidad gidedikar niadtong Oktubre 31, 2009.

Sa dihang gipalagpot ko sa eskuylahan niadtong 1942, dihay mga 60,000 ka Saksi sa United States. Karon duna nay kapin sa usa ka milyon. Pag-abot namo sa Ecuador niadtong 1966, diha pa lamay mga 1,400 ka magmamantala. Karon duna nay kapin sa 68,000. Segurado nga daghan pa ang madugang gikan sa 120,000 ka pagtuon sa Bibliya ug sa kapig 232,000 nga nanambong sa Memoryal niadtong 2009. Sa pagkatinuod, si Jehova nagpanalangin gayod sa iyang katawhan. Makalilipay gayod nga magkinabuhi sa panahon ug dapit diin kusog kaayo ang pag-uswag! a

[Footnote]

[Mga hulagway sa panid 5]

Walay-atop nga asembliyahanan (1981) ug Assembly Hall sa Guayaquil (2009) sa mao gihapong luna