Mga Pangatarongan—Unsay Hunahuna ni Jehova Niana?

“ANG babaye nga imong gihatag aron makauban nako, siya ang naghatag kanako sa bunga gikan sa kahoy ug busa ako mikaon,” miingon ang lalaki. “Ang halas—kini naglimbong kanako ug busa ako mikaon,” mitubag ang babaye. Ang maong mga pulong nga gisulti ni Adan ug Eva sa Diyos mao ang unang pangatarongan nga gihimo sa tawo.—Gen. 3:12, 13.

Ang paghukom ni Jehova kang Adan ug Eva tungod sa ilang tinuyong pagsupak nagpakita nga ang ilang mga pangatarongan dili dalawaton kaniya. (Gen. 3:16-19) Nan, buot bang ipasabot nga ang tanang pangatarongan dili dalawaton kang Jehova? O duna bay mga pangatarongan nga dalawaton kaniya? Kon mao, unsaon nato pagkahibalo kon kana dalawaton ba o dili? Sa pagtubag, ato unang hisgotan ang kahulogan sa pangatarongan.

Ang pangatarongan maoy rason nga ihatag aron isaysay kon nganong ang usa ka butang gihimo, wala himoa, o dili himoon. Kana mahimong magtumong sa balidong rason sa pagkapakyas sa pagbuhat sa usa ka butang ug mahimong maglakip ug tiunay nga pagpangayog pasaylo. Tungod niana, ang usa mahimong hatagag konsiderasyon o kapasayloan. Apan, sama sa kahimtang ni Adan ug Eva, ang pangatarongan mahimong usa usab ka pasumangil, usa ka sayop nga rason aron tabonan ang tinuod nga hinungdan. Sanglit ang mga pangatarongan subsob ingon niana, sagad isipon kana nga kadudahan.

Sa dihang mohimog mga pangatarongan—ilabina maylabot sa atong pag-alagad sa Diyos—angay natong likayan nga ‘malimbongan ang atong kaugalingon pinaagi sa bakak nga pangatarongan.’ (Sant. 1:22) Busa, atong hisgotan ang pipila ka pananglitan ug prinsipyo sa Bibliya nga motabang kanato sa ‘pagpadayon sa pagtino kon unsa ang dalawaton sa Ginoo.’—Efe. 5:10.

Kon Unsay Gidahom sa Diyos Kanato

Diha sa Pulong sa Diyos, adunay espesipikong mga sugo nga kinahanglan natong sundon. Pananglitan, ang sugo ni Kristo nga ‘manglakaw ug maghimog mga tinun-an sa katawhan sa tanang kanasoran’ angay gihapong tumanon sa tanang matuod nga mga sumusunod ni Kristo. (Mat. 28:19, 20) Gani, hinungdanon kaayo ang pagtuman niana nga si apostol Pablo miingon: “Alaot ako kon dili ko ipahayag ang maayong balita!”—1 Cor. 9:16.

Bisan pa niana, ang pipila nga dugay nang nagtuon sa Bibliya uban kanato magpanuko gihapon sa pagsangyaw sa maayong balita sa Gingharian sa Diyos. (Mat. 24:14) Ang uban nga nagasangyaw kaniadto mihunong na sa pagsangyaw. Unsay mga pangatarongan niadtong wala makigbahin sa buluhatong pagsangyaw? Unsay gibuhat ni Jehova niadtong nagpanuko sa pagsunod sa iyang espesipikong mga sugo kaniadto?

Mga Pangatarongan nga Dili Dalawaton sa Diyos

“Lisod kaayo na.” Ilabina niadtong maulawon, ang pagsangyaw daw lisod kaayo. Apan, tagda kon unsay atong makat-onan kang Jonas. Siya gihatagag asaynment nga para niya lisod kaayo—gisugo siya ni Jehova nga ipahayag ang nagsingabot nga kalaglagan sa Nineve. Makasabot ta kon nganong nahadlok si Jonas sa pagbuhat niana. Ang Nineve mao ang kaulohan sa Asirya, ug ang mga Asiryanhon gibantog  sa ilang hilabihang kabangis. Tingali naghunahuna si Jonas: ‘Unsa kahay mahitabo nako didto? Unsa kahay ilang buhaton nako?’ Wala madugay, siya miadto sa laing dapit. Apan, wala dawata ni Jehova ang pangatarongan ni Jonas. Hinunoa, gisugo siya pag-usab ni Jehova sa pagsangyaw sa Nineve. Nianang higayona, maisogon kanang gituman ni Jonas, ug si Jehova nagpanalangin sa iyang buluhaton.—Jon. 1:1-3; 3:3, 4, 10.

Kon naghunahuna ka nga lisod kaayo ang pagsangyaw sa maayong balita, hinumdomi nga “ang tanang butang posible sa Diyos.” (Mar. 10:27) Makaseguro ka nga si Jehova magpalig-on kanimo kon padayon kang mangayog tabang kaniya ug siya magpanalangin kanimo kon ikaw maningkamot nga makabatog kaisog sa pagtuman sa imong ministeryo.—Luc. 11:9-13.

“Dili ko ganahang mosangyaw.” Unsa may imong buhaton kon dili ka ganahang mosangyaw? Hinumdomi nga si Jehova mahimong magpalihok kanimo ug magbag-o sa imong tinamdan. Si Pablo miingon: “Ang Diyos mao ang usa nga, alang sa iyang ikahimuot, nagalihok sa sulod ninyo aron kamo magtinguha ug ingon man mobuhat.” (Filip. 2:13) Busa, makahangyo ka kang Jehova nga unta maugmad nimo ang tinguha sa pagbuhat sa iyang kabubut-on. Mao kanay gihimo ni Haring David. Siya nangaliyupo kang Jehova: “Palakta ako diha sa imong kamatuoran.” (Sal. 25:4, 5) Mahimo usab nimo kana pinaagi sa tim-os nga pag-ampo nga unta palihokon ka ni Jehova sa pagbuhat kon unsay makapahimuot kaniya.

Tinuod, kon kita naluya o nahigawad, usahay kinahanglan natong pugson ang atong kaugalingon nga motambong sa tigom o mosangyaw sa kanataran. Kon mao, makaingon ba kita nga dili tinuod ang atong gugma kang Jehova? Dili sa ingon niana. Ang matinumanong mga alagad sa Diyos kaniadto nanlimbasog usab sa pagbuhat sa kabubut-on sa Diyos. Pananglitan, si Pablo miingon nga iyang ‘gimakmak ang iyang lawas’ aron iyang matuman ang mga sugo sa Diyos. (1 Cor. 9:26, 27) Busa, bisag kinahanglan natong pugson ang atong kaugalingon nga mosangyaw, makaseguro kita nga si Jehova magpanalangin kanato. Ngano? Kay ato mang gipugos ang atong kaugalingon sa pagbuhat sa kabubut-on sa Diyos tungod sa hustong rason—ang gugma kang Jehova. Kon ato kanang buhaton, atong matubag ang pangangkon ni Satanas nga ang mga alagad sa Diyos mobiya Kaniya kon sila pagasulayan.—Job 2:4.

“Puliki kaayo ko.” Kon dili ka mosangyaw kay imong gibati nga puliki kaayo ka, importante gayod nga imong konsiderahon pag-usab ang imong prioridad. “Nan, magpadayon sa pagpangita pag-una sa gingharian,” miingon si Jesus. (Mat. 6:33) Aron masunod ang maong prinsipyo, kinahanglan nimong payanohon ang imong kinabuhi o menosan ang panahon sa paglingawlingaw ug gamiton kana sa pagsangyaw. Siyempre, importante usab ang paglingawlingaw ug ang ubang personal nga kalihokan, apan dili kana balidong katarongan nga magpabaya sa  pagsangyaw. Angayng unahon sa usa ka alagad sa Diyos ang intereses sa Gingharian.

“Dili ko takos.” Tingali bation nimo nga dili ka takos mosangyaw sa maayong balita. Ang pipila ka alagad ni Jehova kaniadto mibati nga dili sila takos motuman sa gisugo ni Jehova kanila. Tagda pananglitan si Moises. Sa dihang gisugo siya ni Jehova, si Moises miingon: “Pasayloa ako, Jehova, apan dili ako larinong mamumulong, ni sukad kaniadto ni sukad sa una pa niana ni sukad nga ikaw misulti sa imong alagad, kay ako mahinay sa baba ug mahinay sa dila.” Bisan tuod si Jehova nagpalig-on kaniya, si Moises miingon: “Pasayloa ako, Jehova, apan ipadala, palihog, pinaagi sa kamot sa usa nga imong ipadala.” (Ex. 4:10-13) Unsay reaksiyon ni Jehova?

Wala dawata ni Jehova ang pamalibad ni Moises. Apan, gitudlo ni Jehova si Aaron sa pagtabang kaniya. (Ex. 4:14-17) Dugang pa, sa misunod nga mga katuigan, si Jehova nag-uban kang Moises ug nagtagana sa tanan niyang gikinahanglan aron magmalamposon siya sa pagtuman sa iyang mga asaynment. Karon, makasalig ka usab nga palihokon ni Jehova ang eksperyensiyadong mga isigkamagtutuo sa pagtabang kanimo sa pagtuman sa imong ministeryo. Labaw sa tanan, ang Pulong sa Diyos nagpasalig kanato nga si Jehova maghimo kanatong takos sa buluhaton nga iyang gisugo kanato.—2 Cor. 3:5; tan-awa ang kahong  “Ang Labing Malipayong mga Tuig sa Akong Kinabuhi.”

“Duna koy gikahiubsan.” Ang pipila miundang sa pagsangyaw o pagtambong sa mga tigom tungod kay duna silay gikahiubsan, nga naghunahuna nga dawaton ni Jehova ang maong pangatarongan. Tinuod, mahiubos kita  kon dunay makapasakit kanato, apan balido ba kana nga pangatarongan nga dili na makigbahin sa Kristohanong mga buluhaton? Si Pablo ug Bernabe lagmit mibatig kahiubos human sa ilang panaglalis nga misangpot sa “pagsilaob sa kasuko.” (Buh. 15:39) Apan mihunong ba sila sa ilang ministeryo? Wala gayod!

Sa susama, sa dihang dunay isigkamagtutuo nga makapahiubos kanimo, hinumdomi nga ang imong kaaway dili ang imong igsoon kondili si Satanas, kinsa gustong motukob nimo. Apan, ang Yawa dili molampos kon ‘ikaw mobarog batok kaniya, nga lig-on ang pagtuo.’ (1 Ped. 5:8, 9; Gal. 5:15) Kon duna kay pagtuo nga sama niana, ikaw dili gayod “mahigawad.”—Roma 9:33.

Kon Limitado ra ang Atong Mahimo

Sa nahisgotan nga mga pananglitan, atong makita nga walay balido, Kasulatanhong katarongan nga dili tumanon ang espesipikong mga sugo ni Jehova, lakip na ang pagsangyaw sa maayong balita. Bisan pa niana, duna tingali kitay balidong mga rason kon nganong limitado ra ang atong mahimo diha sa ministeryo. Ang ubang Kasulatanhong mga responsibilidad mahimong makapamenos sa atong panahon para sa pagsangyaw. Lain pa, may mga panahon nga kita tinuod nga gikapoy o nasakit mao nga limitado ra ang atong mahimo diha sa pag-alagad kang Jehova. Apan, ang Pulong sa Diyos nagpasalig kanato nga si Jehova nahibalo kon unsay naa sa atong kasingkasing ug nakasabot sa atong mga limitasyon.—Sal. 103:14; 2 Cor. 8:12.

Busa, magbantay kita nga dili nato hukman ang atong kaugalingon o ang uban niining bahina. Si apostol Pablo misulat: “Kinsa man ikaw nga mohukom sa sulugoon sa balay nga iya sa lain? Ngadto sa iyang kaugalingong agalon siya mobarog o mapukan.” (Roma 14:4) Imbes itandi ang atong kaugalingon sa uban, angay natong hinumdoman nga “ang matag usa kanato manubag alang sa iyang kaugalingon ngadto sa Diyos.” (Roma 14:12; Gal. 6:4, 5) Sa dihang mag-ampo kita kang Jehova ug mosulti kaniya sa atong mga pangatarongan, buhaton nato kana uban ang “maminatud-ong tanlag.”—Heb. 13:18.

Kon Nganong Makapalipay ang Pag-alagad Kang Jehova

Kitang tanan makaalagad kang Jehova nga malipayon tungod kay ang iyang mga sugo—bisan unsa pay atong kahimtang—kanunayng rasonable ug praktikal. Nganong makaingon man kita niana?

Ang Pulong sa Diyos nag-ingon: “Ayaw ihikaw ang maayo gikan kanila nga takos niini, sa dihang anaa sa gahom sa imong kamot ang pagbuhat niini.” (Prov. 3:27) Unsay imong namatikdan sa maong panultihon bahin sa mga sugo sa Diyos? Si Jehova wala magsugo nga imong tupngan ang mahimo sa imong igsoon kondili nga moalagad ka Kaniya segun sa “gahom sa imong kamot.” Oo, ang matag usa kanato—bisag unsa ka luya o lig-on—kinasingkasing nga makaalagad kang Jehova.—Luc. 10:27; Col. 3:23.

[Kahon/​Hulagway sa panid 14]

 “Ang Labing Malipayong mga Tuig sa Akong Kinabuhi”

Bisan pag duna kitay seryosong limitasyon sa pisikal ug emosyonal, dili kita angayng moingon dayon nga babag kini sa atong bug-os nga pagpakigbahin sa ministeryo. Sa pag-ilustrar, tagda ang kasinatian ni Ernest, nga usa ka igsoon sa Canada.

Si Ernest may suliran sa pagsulti ug maulawon kaayo. Human siya makaagom ug grabeng kadaot sa likod, kinahanglan siyang moundang sa iyang trabaho sa konstruksiyon. Bisag baldado, siya nakagugol ug mas daghang panahon sa ministeryo. Siya nadasig sa awhag diha sa mga tigom nga mag-oksilyare payunir. Apan, iyang gibati nga dili siya kuwalipikado sa maong buluhaton.

Aron mapamatud-an kana, nag-oksilyare payunir siya ug usa ka bulan. Sa iyang katingala, milampos siya niana. Dayon, siya naghunahuna, ‘Dili na gyod nako ni mahimo pag-usab.’ Aron mapamatud-an kana, mipadayon siya pagkasunod bulan—ug sa gihapon, milampos siya.

Si Ernest nag-oksilyare payunir sulod sa usa ka tuig, apan siya miingon, “Seguradong dili gyod ko makaregular payunir.” Sa makausa pa, aron mapamatud-an kana, siya nagregular payunir. Wala siya magtuo nga mahuman niya ang usa ka tuig. Siya mipadayon ug malipayong nagregular payunir sulod sa duha ka tuig, hangtod nga siya namatay tungod sa komplikasyon. Apan, sa wala pa siya mamatay, sagad manglugmaw ang iyang mga luha samtang moingon sa iyang mga bisita, “Ang mga tuig nga ako nag-alagad kang Jehova ingong payunir mao ang labing malipayong mga tuig sa akong kinabuhi.”

[Hulagway sa panid 13]

Atong mabuntog ang mga babag nga makapugong kanato sa pagsangyaw

[Hulagway sa panid 15]

Si Jehova malipay kon kita bug-os-kalag nga moalagad kaniya pinaagi sa pagbuhat sa atong maarangan