“Nakatabang Kini nga Maabot ang Kasingkasing sa mga Tawo”

SA Porto Alegre, usa ka siyudad sa habagatang Brazil, dihay gipahigayon nga internasyonal nga komperensiya bahin sa katilingbanong mga isyu. Libolibo ka tawo gikan sa 135 ka nasod ang mitambong niana. Panahon sa intermisyon, dihay grupo sa mga Saksi gikan sa usa ka kongregasyon sa Porto Alegre nga nakig-estorya sa mga delegado aron ipaambit kanila ang mensahe sa Gingharian. Sa unsang paagi nila kana gihimo?

“Among gigamit ang pulyetong Good News for People of All Nations,” miingon si Elizabete nga usa ka payunir. Siya midugang: “Daghan sa mga delegado ang wala pa gyod makadungog sa maayong balita sa Gingharian, apan ilang gidawat ang among mensahe. Nakigsulti kami sa mga tawong gikan sa Bolivia, India, Israel, Nigeria, Pransiya, ug Tsina. May gidala ming mga basahon sa pinulongan sa pipila ka delegado, ug ila kining gidawat.”

Sa Mexico, usa ka payunir nga ginganlag Raúl naggamit usab niining pulyetoha nga may maayong mga resulta. Di pa dugay, nakig-estorya siya sa usa ka 80-anyos nga Arabo nga bag-o lang nabiyudo. Human mabasa sa maong tawo ang panid sa pulyeto nga naghisgot sa mensahe sa Gingharian sa pinulongang Arabic, siya nakahilak sa kalipay. Ngano? Natandog kaayo siya sa dihang nabasa niya sa iyang pinulongan ang saad sa Diyos sa Pinadayag 21:3, 4 nga wad-on na ang kamatayon. Sa laing higayon, samtang nakigbahin si Raúl sa di-pormal nga pagsangyaw, nakahibalag siyag lalaki nga nagsultig Portuguese. Ang maong tawo namatyag anak. Gipabasa ni Raúl kaniya ang pulyeto diha sa panid sa pinulongang Portuguese. Human kana mabasa, gipaila sa maong tawo nga gusto niyang magtuon sa Bibliya.

Nagamit na ni Raúl ang Good News for People of All Nations sa pagsangyaw niadtong nagsultig Armenian, Chinese, English, French, German, Hindi, Korean, Mixe, Persian, Russian, ug Zapotec. Siya miingon: “Akong nakita kon unsa kahinungdanon ang paggamit niining pulyetoha sa akong ministeryo. Nakatabang kini nga maabot ang kasingkasing sa mga tawo bisag dili nako sila parehog pinulongan.”

Samtang nagkadaghan ang nagabiyahe ug namuyo sa laing nasod, mas daghan kitag kahigayonan nga makahibalag niadtong nagsultig laing pinulongan. Mahimo natong ipaambit kanila ang mensahe sa Gingharian gamit ang Good News for People of All Nations. Kanunay ka bang magdaladala niana?

[Mga hulagway sa panid 32]

Si Raúl nagkupot sa pulyeto nga nakatabang kaniya nga maabot ang kasingkasing sa mga tawo