Nakigbahin Ka ba sa Paghimo sa mga Tigom nga Makapalig-on?
Nakigbahin Ka ba sa Paghimo sa mga Tigom nga Makapalig-on?
“Sa dihang magtigom kamo, . . . himoa ang tanang butang alang sa pagpalig-on.”—1 COR. 14:26.
1. Sumala sa 1 Corinto kapitulo 14, unsa ang hinungdanong tumong sa mga tigom?
‘NAPALIG-ON kaayo ko sa tigom!’ Sa walay duhaduha, nakaingon ka sab niana human makatambong ug tigom sa Kingdom Hall. Makapalig-on gayod ang mga tigom sa kongregasyon, apan dili kana ikatingala. Sama sa unang siglo, ang hinungdanong tumong sa atong mga tigom mao ang pagpalig-on sa tanang nanambong. Matikdi kon sa unsang paagi kana gipasiugda ni apostol Pablo sa iyang unang sulat sa mga taga-Corinto. Sa kapitulo 14, balikbalik niyang gihisgotan nga angayng ingon niana ang tumong sa matag bahin nga ihatag diha sa mga tigom—‘ang pagpalig-on sa kongregasyon.’—Basaha ang 1 Corinto 14:3, 12, 26. a
2. (a) Nganong makapalig-on ang atong mga tigom? (b) Unsang pangutana ang atong pagatagdon?
2 Kita nahibalo nga sa panguna nahimong makapalig-on ang mga tigom tungod sa giya sa espiritu sa Diyos. Busa, atong sugdan ang matag tigom pinaagig kinasingkasing nga pag-ampo diin atong hangyoon ang atong langitnong Amahan nga panalanginan ang atong panagkatigom pinaagi sa iyang balaang espiritu. Bisan pa niana, kita nahibalo nga ang tanang membro sa kongregasyon mahimong makatampo sa paghimo sa tigom nga makapalig-on. Nan, unsay atong mahimo ingong indibiduwal aron maseguro nga ang senemanang mga tigom sa Kingdom Hall kanunayng makapalagsik ug makapadasig sa espirituwal?
3. Nganong hinungdanon ang mga tigom?
3 Sa pagtubag, atong susihon ang pipila ka bahin sa atong mga tigom nga angayng hinumdoman sa magdumala niana. Atong hisgotan usab kon sa unsang paagi ang kongregasyon sa katibuk-an makaamot sa paghimo sa mga tigom nga makapalig-on. Interesado gayod kita niini tungod kay sagrado ang atong mga tigom. Sa pagkatinuod, ang pagtambong ug pagkomento maoy hinungdanong bahin sa atong pagsimba kang Jehova.—Sal. 26:12; 111:1; Isa. 66:22, 23.
Tigom Alang sa Pagtuon sa Bibliya
4, 5. Unsay tumong sa Pagtuon sa Bantayanang Torre?
4 Buot natong tanan nga bug-os makabenepisyo sa atong senemanang Pagtuon sa Bantayanang Torre. Busa, aron tin-awng masabtan ang pangunang tumong niana, atong sublion ang pipila ka kausaban sa Bantayanang Torre ug sa tun-anang mga artikulo.
5 Sugod sa unang tun-anang edisyon sa Bantayanang Torre—ang gula sa Enero 15, 2008—usa ka hinungdanong detalye ang gilakip diha sa hapin. Namatikdan ba nimo kana? Tan-awa pag-ayo ang hapin sa magasin nga imong gikuptan. Sa ubos sa torre, imong makita ang gibuksan nga Bibliya. Gidugang kana aron ipasiugda ang tumong sa Pagtuon sa Bantayanang Torre. Ang tumong niana mao ang pagtuon sa Bibliya uban sa tabang niining magasina. Oo, sa atong senemanang Pagtuon sa Bantayanang Torre, ang Pulong sa Diyos “gipatin-aw,” ug sama sa adlaw ni Nehemias, “gihatag ang kahulogan niini.”—Neh. 8:8; Isa. 54:13.
6. (a) Unsang kausaban ang gihimo diha sa Pagtuon sa Bantayanang Torre? (b) Unsay angayng hinumdoman maylabot sa mga teksto nga gimarkahag “basaha”?
6 Sanglit ang Bibliya mao man ang atong pangunang teksbok, adunay gihimong kausaban sa Pagtuon sa Bantayanang Torre. Ang pipila sa gisitar nga mga teksto sa tun-anang mga artikulo gimarkahag “basaha.” Kitang tanan gidasig sa pag-abli sa atong Bibliya samtang ginabasa ang maong mga teksto diha sa tigom. (Buh. 17:11) Ngano? Sa dihang atong mabasa ang tambag sa Diyos sa ato mismong Bibliya, mas dako ang epekto niini kanato. (Heb. 4:12) Busa, sa dili pa basahon ang maong mga teksto, ang konduktor angayng mohatag sa nanambong ug igong panahon nga makita kana sa ilang Bibliya ug masundan ang pagbasa niana.
Mas Dakong Panahon sa Pagpahayag sa Atong Pagtuo
7. Unsay atong mahimo panahon sa Pagtuon sa Bantayanang Torre?
7 Ang lain pang kausaban may kalabotan sa tun-anang mga artikulo mao ang gitas-on niini. Di pa dugay, mas mugbo na kini. Busa diha sa Pagtuon sa Bantayanang Torre, mas mubo na ang panahon sa pagbasa sa mga parapo ug mas dako na ang panahon alang sa pagkomento. Mas daghan na karon ang makapahayag sa ilang pagtuo pinaagi sa pagtubag sa gipatik nga mga pangutana, paghatag ug kapadapatan sa usa ka teksto, o kaha sa pag-asoy ug mubo nga eksperyensiya nga magpakita sa pagkamaalamon sa pagsunod sa mga prinsipyo sa Bibliya. Angayng gahinan usab ug panahon ang paghisgot sa mga hulagway.—Basaha ang Salmo 22:22; 35:18; 40:9.
8, 9. Unsay papel sa konduktor sa Pagtuon sa Bantayanang Torre?
8 Apan, mabatonan lamang kanang dugang panahon kon mugbo lang ang komento sa mga igsoon ug likayan sa konduktor nga magsigeg komento. Nan, sa unsang paagi mabalanse sa konduktor ang iyang mga komento ug ang komento sa mga igsoon, ug sa ingon mapalig-on ang tanan?
9 Sa pagtubag niana, tagda ang usa ka ilustrasyon. Ang maayong-pagkadumala nga Pagtuon sa Bantayanang Torre maoy sama sa usa ka pungpong sa mga bulak nga nindot tan-awon. Maingon nga ang usa ka dakong pungpong gilangkoban ug klase-klaseng bulak, ang Pagtuon sa Bantayanang Torre gilangkoban usab ug lainlaing komento. Ug maingon nga lainlaig gidak-on ug kolor ang mga bulak diha sa pungpong, ang mga komento lainlain usab ug gitas-on ug paagi sa pagpahayag. Unsa may papel sa konduktor? Ang iyang popanagsang mga komento nahisama sa pipila ka dahon nga haom pagkabutang diha sa pungpong sa mga bulak. Kini nga mga dahon dili daghan; hinunoa, kini mokompleto ug makapanindot sa pungpong. Sa susama, angayng hinumdoman sa konduktor nga ang iyang papel, dili ang pagsigeg komento, kondili ang pagkompleto sa mga pahayag sa pagdayeg gikan sa mga igsoon sa kongregasyon. Oo, kon tapoon ang lainlaing komento sa mga igsoon ug ang haom nga mga komento sa konduktor, mahimo kining matahom nga hugpong sa mga pulong nga makapalipay sa mga nanambong.
“Itanyag Nato Kanunay sa Diyos ang Halad sa Pagdayeg”
10. Unsay pag-isip sa unang-siglong mga Kristohanon sa mga tigom?
10 Ang paghubit ni Pablo sa mga tigom diha sa 1 Corinto 14:26-33 motabang kanato sa pagsabot kon sa unsang paagi kana gidumala sa unang siglo. Ang usa ka eskolar sa Bibliya misulat nga ang nakapatalagsaon kaayo sa Kristohanong mga tigom kaniadto lagmit “mao nga halos tanan sa nanambong mibati nga iyang pribilehiyo ug obligasyon nga makatampo niana. Ang usa mitambong dili lang aron sa pagpaminaw; siya mitambong dili lamang aron sa pagdawat kondili sa paghatag usab.” Sa pagkatinuod, ang mga Kristohanon sa unang siglo nag-isip sa mga tigom ingong kahigayonan sa pagpahayag sa ilang pagtuo.—Roma 10:10.
11. (a) Unsay makatampog dako aron ang mga tigom mahimong makapalig-on, ug ngano? (b) Unsang mga sugyot ang atong ipadapat aron mapauswag ang atong pagkomento diha sa mga tigom? (Tan-awa ang potnot.)
11 Ang pagpahayag sa atong pagtuo diha sa mga tigom dakog ikatampo sa “pagpalig-on sa kongregasyon.” Sa walay duhaduha mouyon ka nga bisag dugay na kitang tigtambongan sa mga tigom, malipay gihapon kita sa pagpamati sa komento sa atong mga igsoon. Matandog kita sa kinasingkasing nga tubag sa usa ka edaran nga matinumanong igsoon; madasig kita sa maalamong obserbasyon sa usa ka mahigugmaong ansiyano; ug malipay kita sa dihang mokomento ang usa ka bata sa iyang kaugalingong mga pulong agig pagpahayag sa iyang tim-os nga gugma kang Jehova. Tin-aw nga sa paghatag ug mga komento, kitang tanan makaamot sa paghimo sa mga tigom nga makapalig-on. b
12. (a) Unsay atong makat-onan sa panig-ingnan ni Moises ug Jeremias? (b) Unsay papel sa pag-ampo diha sa paghatag ug mga komento?
12 Apan, malisdan tingali sa pagkomento ang mga maulawon. Kon mao kanay imong kahimtang, makatabang tingali kanimo ang paghinumdom nga wala ka mag-inusara. Gani, bisan ang matinumanong mga alagad sa Diyos nga si Moises ug Jeremias nagpahayag sa ilang kakulag katakos sa pagsulti diha sa publiko. (Ex. 4:10; Jer. 1:6) Apan, maingon nga si Jehova nagtabang sa iyang mga alagad kaniadto sa pagdayeg kaniya diha sa publiko, tabangan ka usab sa Diyos sa pagtanyag ug mga halad sa pagdayeg. (Basaha ang Hebreohanon 13:15.) Sa unsang paagi ka matabangan ni Jehova sa pagbuntog sa imong kahadlok nga mokomento? Una, pangandam pag-ayo alang sa tigom. Dayon, sa dili ka pa moadto sa Kingdom Hall, pag-ampo kang Jehova ug hangyoa siya nga hatagan kag kaisog sa pagkomento. (Filip. 4:6) Ikaw naghangyo ug usa ka butang sumala sa “iyang kabubut-on,” busa makasalig ka nga tubagon ni Jehova ang imong pag-ampo.—1 Juan 5:14; Prov. 15:29.
Mga Tigom nga ‘Makapalig-on, Makapadasig, ug Makapahupay’
13. (a) Unsay angayng epekto sa mga tigom diha sa mga nanambong? (b) Unsang pangutana ang angayng tagdon sa mga ansiyano?
13 Si Pablo nag-ingon nga ang hinungdanong katuyoan sa mga tigom mao ang ‘paglig-on, pagdasig, ug paghupay’ sa mga nanambong. c (1 Cor. 14:3) Sa unsang paagi matino sa mga ansiyano nga ang ilang mga bahin makapadasig ug makapahupay sa mga igsoon? Sa pagtubag niana, atong hisgotan ang tigom nga gidumala ni Jesus human siya mabanhaw.
14. (a) Unsay nahitabo sa wala pa ang tigom nga gihikay ni Jesus? (b) Nganong lagmit nahupayan ang mga apostoles sa dihang “si Jesus miduol ug misulti kanila”?
14 Una, matikdi ang mga panghitabo sa wala pa ang maong tigom. Sa hapit nang patyon si Jesus, ang mga apostoles “mibiya kaniya ug nangalagiw,” ug ingon sa gitagna, sila ‘nagkatibulaag ug ang matag usa nangadto sa iyang kaugalingong balay.’ (Mar. 14:50; Juan 16:32) Dayon, human mabanhaw si Jesus, iyang gidapit ang naguol niyang mga apostoles sa pagtambong sa usa ka linain nga tigom. d Ingong sanong, “ang napulog-usa ka tinun-an nangadto sa Galilea ngadto sa bukid nga gitudlo kanila ni Jesus.” Pag-abot nila didto, “si Jesus miduol ug misulti kanila.” (Mat. 28:10, 16, 18) Lagmit nga nahupayan gayod ang mga apostoles sa dihang gibuhat kana ni Jesus. Unsa may gihisgotan ni Jesus?
15. (a) Unsay gihisgotan ni Jesus, apan unsay wala niya hisgoti? (b) Unsay epekto sa maong tigom nganha sa mga apostoles?
15 Si Jesus nagsugod pinaagi sa pag-ingon: “Ang tanang awtoridad gihatag na kanako.” Dayon siya nagsugo kanila: “Panglakaw kamo ug paghimog mga tinun-an.” Sa kataposan, siya mahigugmaong nagpasalig kanila: “Ako magauban kaninyo sa tanang adlaw.” (Mat. 28:18-20) Apan namatikdan ba nimo kon unsay wala buhata ni Jesus? Wala niya kasab-i ang iyang mga apostoles; ni gigamit niya ang maong tigom sa pagkuwestiyon sa ilang mga motibo o sa pagsudya kanila sa ilang makadiyot nga paghuyang sa pagtuo aron tulisokon sila pag-ayo sa ilang konsensiya. Hinunoa, gihatagan silag hinungdanong buluhaton nga nagpamatuod sa gugma ni Jesus ug sa iyang Amahan kanila. Unsay epekto niana sa mga apostoles? Sila napalig-on, nadasig, ug nahupayan pag-ayo nga wala madugay human niana, sila ‘nanudlo ug nagpahayag na usab sa maayong balita.’—Buh. 5:42.
16. Sa unsang paagi masundog sa mga ansiyano ang panig-ingnan ni Jesus sa pagdumalag makapalagsik nga mga tigom?
16 Sa pagsundog kang Jesus, giisip sa mga ansiyano ang mga tigom ingong kahigayonan sa pagpasalig sa mga isigkamagtutuo sa walay-paglubad nga gugma ni Jehova alang sa iyang katawhan. (Roma 8:38, 39) Busa, sa dihang maghatag sa ilang mga bahin, angay nilang isentro ang ilang pagtagad sa maayong mga hiyas sa mga igsoon, dili sa ilang kahuyangan. Dili nila kuwestiyonon ang motibo sa ilang mga igsoon. Hinunoa, ang ilang isulti magpakita nga ilang giisip ang ilang mga isigkamagtutuo ingong mga indibiduwal nga nahigugma kang Jehova ug buot mobuhat kon unsay matarong. (1 Tes. 4:1, 9-12) Usahay, ang mga ansiyano kinahanglang mohatag ug tambag sa kongregasyon, apan kon pipila lamang ang kinahanglang tambagan, mas maayo nga isulti kana sa pribado. (Gal. 6:1; 2 Tim. 2:24-26) Sa dihang duna silay isulti para sa tibuok kongregasyon, ang mga ansiyano angayng maghatag ug komendasyon kon nahiangay. (Isa. 32:2) Maningkamot sila nga mapalagsik ug madasig ang tanang nanambong.—Mat. 11:28; Buh. 15:32.
Usa ka Luwas nga Dapit
17. (a) Nganong mas hinungdanon karon nga mahimong luwas nga dapit ang atong mga tigom? (b) Unsay imong buhaton aron mahimong makapalig-on ang mga tigom? (Tan-awa ang kahong “Napulo ka Paagi Aron Mahimong Makapalig-on ang mga Tigom.”)
17 Samtang nag-anam kapintas ang kalibotan ni Satanas, angay natong paneguroon nga ang atong panagkatigom maoy luwas nga dapit—tuboran sa kahupayan alang sa tanan. (1 Tes. 5:11) Usa ka sister, kinsa uban sa iyang bana nakasagubang ug grabeng pagsulay pipila ka tuig kanhi, nahinumdom: “Kon naa mi sa Kingdom Hall sama rag gisapnay kami sa mahigugmaong kamot ni Jehova. Sa mga oras nga tua mi didto kauban sa mga igsoon, among gibati nga natugyan namo ang among palas-anon kang Jehova, ug among nabatonan ang kalinaw sa hunahuna.” (Sal. 55:22) Hinaot nga ang tanang nanambong sa atong mga tigom madasig ug mahupayan usab. Aron maseguro kana, padayon natong buhaton ang atong maarangan aron mahimong makapalig-on ang mga tigom.
[Mga footnote]
a Gitagna nang daan nga hunongon ang pipila ka bahin sa unang-siglong mga tigom. Pananglitan, wala na kita ‘magsultig lainlaing pinulongan’ o ‘managna.’ (1 Cor. 13:8; 14:5) Bisan pa niana, ang mga instruksiyon ni Pablo motabang kanato nga mas masabtan kon sa unsang paagi dumalahon ang mga tigom karon.
b Alang sa mga sugyot sa pagpauswag sa atong pagkomento diha sa mga tigom, tan-awa Ang Bantayanang Torre sa Septiyembre 1, 2003, panid 19-22.
c Bahin sa kalainan tali sa “pagdasig” ug “paghupay,” ang Vine’s Expository Dictionary of Old and New Testament Words nagsaysay nga ang Gregong pulong nga gihubad ug “paghupay” nagpasabot ug “labaw pa nga pagbati kay sa [pagdasig].”—Itandi ang Juan 11:19.
d Tingali, kini ang okasyon nga gitumong ni Pablo sa ulahi sa dihang siya miingon nga si Jesus “nagpakita sa kapin sa lima ka gatos ka igsoon.”—1 Cor. 15:6.
Unsay Imong Tubag?
• Unsa ka hinungdanon ang mga tigom?
• Nganong ang pagkomento panahon sa tigom ‘makapalig-on sa kongregasyon’?
• Unsay atong makat-onan sa tigom nga gihimo ni Jesus uban sa iyang mga sumusunod?
[Mga Pangutana sa Pagtuon]
[Kahon/Mga hulagway sa panid 22, 23]
NAPULO KA PAAGI ARON MAHIMONG MAKAPALIG-ON ANG MGA TIGOM
Pangandam nga abante. Kon abante nimong tun-an ang materyal nga hisgotan sa Kingdom Hall, interesado ka kaayong maminaw, ug mas motuhop kana sa imong hunahuna ug kasingkasing.
Tambong nga regular. Sanglit madasig ang tanan kon daghan ang manambong, hinungdanon ang imong presensiya.
Sayo ug abot. Kon nakalingkod ka na sa dili pa magsugod ang tigom, makaapil ka sa pangbukas nga awit ug pag-ampo, nga maoy bahin sa atong pagsimba kang Jehova.
Dad-a ang tanang gikinahanglan. Dad-a ang imong Bibliya ug ang mga publikasyon nga gamiton sa tigom aron imong masundan ang ginahisgotan ug mas masabtan kana.
Likayi ang kabaldahan. Pananglitan, likayi ang pagbasag text sa cellphone panahon sa tigom. Nianang paagiha, imong gibutang sa hustong dapit ang personal nga kalihokan.
Pakigbahin. Kon mas daghan ang mokomento, mas daghan ang madasig ug mapalig-on.
Himoang mubo ang imong mga komento. Kon buhaton nimo kini, mas daghan ang makakomento.
Pabilhi ang imong mga bahin. Kon naa kay bahin sa Teokratikanhong Tunghaan sa Ministeryo o sa Tigom sa Pag-alagad, pangandam pag-ayo, ensayoha kana nga abante, ug paningkamoti nga mahatag kana.
Pasalamati ang dunay bahin. Sultihi kadtong dunay bahin o kadtong mikomento nga giapresyar nimo ang ilang paningkamot.
Pakigsandurot sa mga igsoon. Ang malulotong pagtimbaya ug makapalig-ong panag-estoryahay una pa ug inigkahuman sa tigom makadugang sa kalipay ug kaayohan nga makuha gumikan sa pagtambong niana.