Nanguna Ka ba sa Pagpakitag Pasidungog?

“Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.”—ROMA 12:10.

1, 2. (a) Unsay gitambag ni Pablo diha sa iyang sulat sa mga taga-Roma? (b) Unsang mga pangutana ang atong pagatagdon?

 SA SULAT ni apostol Pablo sa mga taga-Roma, iyang gipasiugda kon unsa kahinungdanon alang kanatong mga Kristohanon nga magpakitag gugma sulod sa kongregasyon. Iya kitang gipahinumdoman nga ang atong gugma angay nga “walay pagkasalingkapaw.” Iyang gihisgotan usab ang “inigsoong gugma” ug nga angay kanang ipakita uban ang “malumong pagmahal.”—Roma 12:9, 10a.

² Siyempre, ang pagbaton ug inigsoong gugma naglangkit ug labaw pa kay sa pagpakitag mainitong pagbati ngadto sa uban. Ang maong gugma kinahanglang ipakita sa mga buhat. Kon buot hunahunaon, walay mahibalo nga kita dunay gugma ug pagmahal gawas kon ato kanang ipakita. Busa, midugang si Pablo: “Manguna sa pagpakitag pasidungog sa usag usa.” (Roma 12:10b) Unsay nalangkit sa pagpakitag pasidungog? Nganong hinungdanon nga manguna kita sa pagpakitag pasidungog sa mga isigkamagtutuo? Sa unsang paagi nato kana mahimo?

Pagtahod ug Pasidungog

3. Unsay kahulogan sa pulong “pasidungog” diha sa orihinal nga mga pinulongan sa Bibliya?

³ Ang Hebreohanong pulong alang sa “pasidungog” sa literal nagkahulogan ug “pagkadako.” Ang tawo nga gipasidunggan giisip nga dako o importante. Ang mao gihapong Hebreohanong pulong sagad usab gihubad diha sa Kasulatan ingong “himaya,” nga nagpasabot ug hataas nga pagtamod sa usa nga gipasidunggan. (Gen. 45:13) Ang Gregong pulong nga gihubad ug “pasidungog” diha sa Bibliya adunay diwa sa pagkatinamod ug pagkabililhon. (Luc. 14:10) Oo, kadtong atong gipasidunggan maoy bililhon para kanato.

4, 5. Nganong ang pagpakitag pasidungog nalambigit sa pagtahod? Iilustrar.

⁴ Unsay nalangkit sa pagpasidungog sa uban? Kini gipasukad sa pagtahod. Gani, ang mga pulong nga “pasidungog” ug “pagtahod” sagad gigamit nga magkauban tungod kay kini nalambigit sa usag usa. Ang pasidungog maoy timailhan nga kita nagpakitag pagtahod. Sa ato pa, ang pagtahod pangunang nagtumong sa atong paglantaw sa atong igsoon samtang ang pasidungog nagtumong sa atong pagtratar kaniya.

⁵ Sa unsang paagi ang usa ka Kristohanon makapakitag tim-os nga pasidungog sa mga isigkamagtutuo kon wala siyay kinasingkasing nga pagtahod kanila? (3 Juan 9, 10) Maingon nga ang usa ka tanom molambo ug mabuhig dugay kon kini anaa sa maayong yuta, ang pasidungog mahimo lamang tim-os ug malungtaron kon kini gipasukad sa kinasingkasing nga pagtahod. Sanglit ang dili-sinserong pasidungog wala man magsumikad sa tim-os nga pagtahod, sa madugay o madali kini mahanaw. Busa, dili ikatingala nga sa wala pa magtambag si Pablo bahin sa pagpakitag pasidungog, siya miingon: “Himoa nga walay pagkasalingkapaw ang inyong gugma.”—Roma 12:9; basaha ang 1 Pedro 1:22.

Pasidunggi Kadtong Gilalang “sa Dagway sa Diyos”

6, 7. Nganong angay natong tahoron ang uban?

⁶ Sanglit ang kinasingkasing nga pagtahod maoy yawi sa pagpakitag pasidungog, dili gayod nato kalimtan ang Kasulatanhong mga rason  kon nganong angay natong tahoron ang tanan natong mga igsoon. Busa, atong hisgotan ang duha niining mga rasona.

⁷ Dili sama sa ubang mga linalang sa yuta, ang tawo gilalang “sa dagway sa Diyos.” (Sant. 3:9) Busa, atong nabatonan ang diyosnong mga hiyas sama sa gugma, kaalam, ug hustisya. Matikdi kon unsa pay atong nadawat gikan sa atong Maglalalang. Ang salmista miingon: “Oh Jehova . . . , ikaw kansang dignidad ginasaysay sa ibabaw sa kalangitan! . . . Gihimo mo usab [ang tawo] nga ubos ug diyutay kay sa mga samag-diyos, ug sa himaya ug kahalangdon [“pasidungog,” King James Version] gipurongpurongan mo siya.” (Sal. 8:1, 4, 5; 104:1) a Ang mga tawo sa katibuk-an gipurongpurongan, o gidayandayanan, sa Diyos ug dignidad, himaya, ug pasidungog sa usa ka sukod. Busa, sa dihang atong hatagag dignidad ang usa ka tawo, sama ra nga atong giila ang Tinubdan sa tawhanong dignidad, si Jehova. Nan, kon duna kitay maayong rason sa pagpakitag pagtahod sa mga tawo sa katibuk-an, labi na gayod nga angay natong ipakita kana sa atong mga isigkamagtutuo!—Juan 3:16; Gal. 6:10.

Sakop sa Usa ka Pamilya

8, 9. Sumala kang Pablo, nganong tahoron nato ang atong mga isigkamagtutuo?

⁸ Gihisgotan ni Pablo ang laing rason kon nganong tahoron nato ang usag usa. Sa wala pa niya ihatag ang tambag sa pagpakitag pasidungog, siya miingon: “Sa inigsoong gugma batoni ang malumong pagmahal alang sa usag usa.” Ang Gregong ekspresyon nga gihubad ug “malumong pagmahal” nagtumong sa lig-ong bugkos nga naghiusa sa pamilya nga nahigugma sa usag usa ug nagtinabangay. Busa, sa paggamit ni Pablo sa maong ekspresyon, iyang gipasiugda nga ang mga relasyon sulod sa kongregasyon angay nga mahimong lig-on ug mahigugmaon sama nianang sa suod kaayo nga pamilya. (Roma 12:5) Dugang pa, hinumdomi nga gisulat kana ni Pablo alang sa dinihogang mga Kristohanon, kinsa gisagop ingong mga anak sa usa ra ka Amahan, si Jehova. Nan, sa hinungdanon kaayong diwa, sila maoy suod nga pamilya. Busa, ang dinihogang mga Kristohanon sa adlaw ni Pablo duna gayoy lig-ong rason sa pagtahod sa usag usa. Ingon usab niana ang mga dinihogan karon.

⁹ Komosta kadtong sakop sa “ubang mga karnero”? (Juan 10:16) Bisag wala pa sila sagopa ingong mga anak sa Diyos, ilang matawag ang usag usa nga brader ug sister tungod kay sila sakop sa nahiusa nga tibuok-kalibotang Kristohanong pamilya. (1 Ped. 2:17; 5:9) Busa, kon kadtong sakop sa ubang mga karnero bug-os nga nakasabot sa ilang paggamit sa mga terminong “brader” o “sister,” duna usab silay lig-ong rason sa pagpakitag kinasingkasing nga pagtahod sa ilang mga isigkamagtutuo.—Basaha ang 1 Pedro 3:8.

Kon Nganong Hinungdanon Kaayo

10, 11. Nganong hinungdanon kaayo ang pagpakitag pagtahod ug pasidungog?

¹⁰ Nganong hinungdanon kaayo ang pagpakitag pagtahod ug pasidungog? Tungod niini: Kon kita naghatag ug pasidungog sa atong mga igsoon, kita nakaamot ug dako sa kaayohan ug panaghiusa sa tibuok kongregasyon.

¹¹ Siyempre, atong naamgohan nga ang pagbaton ug suod nga relasyon kang Jehova ug pagdawat sa tabang sa iyang espiritu mao ang atong labing kusganong tinubdan sa kusog ingong matuod nga mga Kristohanon. (Sal. 36:7; Juan 14:26) Sa samang paagi, kita madasig sa dihang pabilhan kita sa atong mga isigkamagtutuo. (Prov. 25:11) Kita mapalig-on sa sinserong ekspresyon sa apresasyon ug pagtahod. Kana maghatag kanatog dugang kalig-on sa pagpadayon sa paglakaw uban ang kalipay ug determinasyon diha sa dalan sa kinabuhi. Sa walay duhaduha, imo na kanang nasinati.

12. Sa unsang paagi ang matag usa kanato makaamot sa mainiton ug mahigugmaong relasyon sulod sa kongregasyon?

¹² Sanglit nahibalo si Jehova nga kita sa kinaiyanhon gustong tahoron, siya nag-awhag  kanato pinaagi sa iyang Pulong nga “magmaikagon sa pagpakitag pagtahod sa usag usa.” (Roma 12:10, Today’s English Version; basaha ang Mateo 7:12.) Kon sundon kana sa tanang Kristohanon, makaamot kana sa mainiton ug mahigugmaong relasyon sulod sa kongregasyon. Busa, maayong suknaon nato ang atong kaugalingon, ‘Kanus-a ko ulahing nagpakitag pagtahod sa usa ka igsoon sa kongregasyon, diha sa pulong ug sa buhat?’—Roma 13:8.

Angayng Buhaton sa Tanan

13. (a) Kinsay angayng manguna sa pagpakitag pasidungog? (b) Unsay gipaila sa mga pulong ni Pablo sa Roma 1:7?

¹³ Kinsay angayng manguna sa pagpakitag pasidungog? Sa sulat ni Pablo sa mga Hebreohanon, iyang gihubit ang mga ansiyano ingong “mga nagapanguna kaninyo.” (Heb. 13:17) Tinuod, ang mga ansiyano maoy manguna sa daghang buluhaton. Bisan pa niana, ingong mga magbalantay sa panon, kinahanglan gayod silang manguna sa pagpasidungog sa mga isigkamagtutuo—lakip na sa mga isigkaansiyano. Pananglitan, sa dihang magmiting sila aron hisgotan ang espirituwal nga mga panginahanglan sa kongregasyon, sila magpasidungog sa usag usa pinaagi sa pagpamati sa mga komento sa ilang isigkaansiyano. Dugang pa, sila magpakitag pasidungog pinaagi sa pagkonsiderar sa opinyon sa tanang ansiyano sa dihang maghimog desisyon. (Buh. 15:6-15) Apan, angay natong hinumdoman nga ang sulat ni Pablo sa mga taga-Roma wala lamang magtumong sa mga ansiyano kondili sa tibuok kongregasyon. (Roma 1:7) Busa, ang tambag nga manguna sa pagpakitag pasidungog mapadapat usab kanato karon.

14. (a) Iilustrar ang kalainan tali sa pagpakitag pasidungog ug sa pagpanguna sa pagpakita niana. (b) Unsang pangutana ang mahimo natong isukna sa atong kaugalingon?

¹⁴ Matikdi usab kining bahina sa tambag ni Pablo. Iyang giawhag ang iyang mga isigkamagtutuo sa Roma nga dili lamang magpakitag pasidungog kondili manguna sa pagpakita niana. Unsa may kalainan niana? Hunahunaa kini. Awhagon ba sa usa ka magtutudlo ang mga estudyanteng makamao nang mobasa nga magtuon sa pagbasa? Dili, kay makamao na sila. Hinunoa, tabangan sa magtutudlo ang maong mga estudyante nga mahimong mas maayong mobasa. Sa susama, ang pagbaton ug gugma sa usag usa, nga magtukmod kanato sa pagpakitag pasidungog, maoy timailhan sa matuod nga mga Kristohanon. (Juan 13:35) Apan, maingon nga ang mga estudyanteng makamao nang mobasa mahimo pang mouswag, kita usab mahimong mouswag pinaagi sa pagpanguna sa pagpakitag pasidungog. (1 Tes. 4:9, 10) Ang matag  usa kanato gisugo sa pagbuhat niana. Mahimong pangutan-on nato ang atong kaugalingon, ‘Ako ba kanang ginabuhat—nga nanguna sa pagpasidungog sa uban diha sa kongregasyon?’

Pasidunggi ang “mga Mapainubsanon”

15, 16. (a) Sa dihang magpakitag pasidungog, kinsay dili nato kalimtan, ug ngano? (b) Unsay mahimong magpadayag sa giladmon sa atong pagtahod sa atong mga igsoon?

¹⁵ Sa dihang magpakitag pasidungog, kinsa diha sa kongregasyon ang dili nato kalimtan? Ang Pulong sa Diyos nag-ingon: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” (Prov. 19:17) Unsay angayng epekto niana kanato samtang maningkamot kita sa pagpanguna sa pagpakitag pasidungog?

¹⁶ Kadaghanan sa mga tawo mohatag ug pasidungog niadtong labaw nila, apan lagmit nga dili sila mopakitag pagtahod niadtong giisip nilang ubos. Hinunoa, dili ingon niana si Jehova. Siya miingon: “Silang nagpasidungog kanako akong pasidunggan.” (1 Sam. 2:30; Sal. 113:5-7) Si Jehova nagpasidungog sa tanang nag-alagad ug nagpasidungog kaniya. Wala niya ibalewala ang “mga mapainubsanon.” (Basaha ang Isaias 57:15; 2 Cron. 16:9) Siyempre, buot natong sundogon si Jehova. Busa, aron atong mahibaloan kon kita ba nagpakitag sinserong pasidungog sa uban, maayong pangutan-on nato ang atong kaugalingon, ‘Unsay akong pagtratar niadtong walay katungdanan sa kongregasyon?’ (Juan 13:14, 15) Ang tubag sa maong pangutana magpadayag kon unsa ka lalom ang atong pagtahod sa uban.—Basaha ang Filipos 2:3, 4.

Pagpakitag Pasidungog Pinaagi sa Paghatag sa Atong Panahon

17. Unsa ang usa ka hinungdanong paagi diin kita makapanguna sa pagpakitag pasidungog, ug ngano?

¹⁷ Unsa ang usa ka hinungdanong paagi diin kita makapanguna sa pagpakitag pasidungog sa tanan diha sa kongregasyon? Pinaagi sa paghatag sa atong panahon. Ngano? Ingong mga Kristohanon, kita puliki, ug kinahanglan kitang mogugol ug daghang panahon alang sa hinungdanong mga buluhaton sa kongregasyon. Busa dili ikatingala nga bililhon kanato ang panahon. Dili usab nato angayng pugson ang atong mga igsoon nga mogahin ug daghan kaayong panahon alang kanato. Sa susama, kita mapasalamaton kon ang uban sa kongregasyon makasabot nga dili sila angayng mamugos nga mogahin kitag panahon kanila.

18. Ingon sa gipakita sa hulagway sa panid 18, sa unsang paagi nato ikapakita nga andam kitang mohatag ug panahon sa atong mga isigkamagtutuo?

¹⁸ Bisan pa niana, giila usab nato (ilabina niadtong nag-alagad ingong mga magbalantay sa kongregasyon) nga ang atong pagkaandam nga mohunong sa atong mga buluhaton aron sa paghatag ug panahon sa mga isigkamagtutuo nagpakita nga duna kitay pagtahod kanila. Sa unsang paagi? Kon mohunong kita sa atong mga buluhaton aron sa paghatag ug panahon sa atong mga igsoon, sama rang miingon kita kanila, ‘Bililhon kaayo ka para nako nga gipalabi nako nga mohunong sa akong gibuhat aron makahatag kog panahon nimo.’ (Mar. 6:30-34) Sa laing bahin, kon magpanuko kita sa paghunong sa atong mga buluhaton aron mahatagag panahon ang atong igsoon, atong gipabati kaniya nga dili kaayo siya hinungdanon kanato. Siyempre, dunay mga higayon nga dili nato mabiyaan ang atong gibuhat. Bisan pa niana, ang atong pagkaandam—o ang atong pagpanuko—sa paghatag sa atong panahon ngadto sa uban magpadayag kon unsa ka lalom ang pagtahod nato sa atong mga igsoon.—1 Cor. 10:24.

 Magmadeterminado sa Pagpanguna

19. Gawas sa paghatag sa atong panahon, sa unsang paagi nato ikapakita ang pasidungog sa atong mga isigkamagtutuo?

¹⁹ Duna pay laing hinungdanong mga paagi diin kita makapakitag pasidungog sa atong mga isigkamagtutuo. Pananglitan, sa dihang ihatag nato ang atong panahon, angay usab natong ihatag kanila ang atong pagtagad. Sa makausa pa, si Jehova maoy atong panig-ingnan niining bahina. Si salmistang David miingon: “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.” (Sal. 34:15) Kita naningkamot sa pagsundog kang Jehova pinaagi sa pagpunting sa atong mga mata ug igdulungog—ang atong bug-os nga pagtagad—sa atong mga igsoon, ilabina niadtong nangayog tabang. Sa pagbuhat niana, kita nagpasidungog kanila.

20. Unsay angay natong hinumdoman bahin sa pagpakitag pasidungog?

²⁰ Sa ato nang nahisgotan, angay natong hinumdoman kon nganong hinungdanon ang pagbaton ug kinasingkasing nga pagtahod sa atong mga isigkamagtutuo. Dugang pa, mangita kitag mga kahigayonan nga manguna sa paghatag ug pasidungog sa tanan, lakip na sa mga mapainubsanon. Kon ato kanang buhaton, atong mapalig-on ang bugkos sa inigsoong gugma ug panaghiusa diha sa kongregasyon. Busa, magpadayon kitang tanan dili lamang sa pagpakitag pasidungog kondili ilabina sa pagpanguna sa pagpakita niana sa usag usa. Determinado ka ba nga buhaton kana?

[Footnote]

Nahinumdom Ka Ba?

• Unsay kalambigitan sa pasidungog ug pagtahod?

• Unsay mga rason kon nganong pasidunggan nato ang atong mga isigkamagtutuo?

• Nganong hinungdanon ang pagpakitag pasidungog sa usag usa?

• Sa unsang mga paagi kita makapakitag pasidungog sa atong mga isigkamagtutuo?

[Mga Pangutana sa Pagtuon]

[Hulagway sa panid 18]

Sa unsang paagi nato mapasidunggan ang mga isigkamagtutuo?