Puliki Diha sa Organisasyon ni Jehova

Sumala sa giasoy ni Vernon Zubko

AKO nagdako sa usa ka uma duol sa Stenen, usa ka baryo sa probinsiya sa Saskatchewan, Canada. Ang akong ginikanan nga si Fred ug Adella, naningkamot pag-ayo nga matagan-an sa espirituwal ug materyal kaming ilang mga anak, nga naglakip sa akong magulang nga si Aurellia, ug sa akong mga manghod nga si Alvin, Allegra, ug Daryl. Hangtod karon, kami mapasalamaton sa among ginikanan nga ila ming gitudloan sa kamatuoran.

Si Papa, nga usa ka dinihogan, maoy maisogong magsasangyaw. Siya naghago aron sa pagsuportar kanamo, apan gitino usab niya nga mahibalo ang tanan nga siya Saksi. Kanunay niyang gipaambit ang kamatuoran. Dili gyod nako malimtan ang iyang kasibot ug kaisog sa pag-alagad. Pirme ko niyang sultihan, “Magmapuliki diha sa organisasyon ni Jehova ug malikayan nimo ang daghang problema.”

Sagad, magsangyaw mi sa kadalanan sa Stenen ug sa dug-ol nga mga dapit. Para nako, dili kadto sayon. Sa matag lungsod, dihay mga bugoy nga moduol ug magbugalbugal kanamong mga bata. Kas-a sa dihang nag-edad kog otso, nagtindog ko sa usa ka eskina nga naggunit ug Bantayanang Torre ug Pagmata! sa dihang gilibotan kog grupo sa mga batan-on. Ilang gikuha ang akong bag-ong kalo ug gipatong kana sa poste nga duol nako. Maayo na lang kay nakita kadto sa brader nga nagbantay nako. Siya miduol ug miingon, “Vern, may problema ba?” Nanagan dayon ang mga batan-on. Bisag dili kadto maayong kasinatian, akong nakat-onan nga sa dihang magsangyaw sa kadalanan, kinahanglan gyong maglakawlakaw ug dili lang magtindog. Ang maong pagbansay samtang ako nagdako naghatag usab kanakog kaisog sa pagsangyaw sa balaybalay.

Kami ni Alvin nabawtismohan niadtong Mayo 1951. Ako 13 anyos niadto. Ako pang mahinumdoman si Brader Jack Nathan nga maoy nagpakigpulong sa bawtismo. Siya nag-awhag kanamo nga dili palabyon ang usa ka bulan nga dili makasulti bahin kang Jehova. a Para sa among pamilya, ang pagpayunir mao ang labing maayong karera. Busa pagka 1958, human sa akong pag-eskuyla, mibalhin ko sa Winnipeg, Manitoba, aron magpayunir. Bisag gusto ni Papa nga makauban ko niya sa panginabuhi sa among pamilya ingong tigsipilyag kahoy, sila ni Mama mipaluyo sa akong desisyon nga mobalhin.

Bag-ong Pinuy-anan ug Bag-ong Kauban

Pagka 1959, ang sangang buhatan nagdapit kang bisan kinsa nga makahimo sa pagbalhin ngadto sa Quebec, diin dako ang panginahanglan alang sa mga magsasangyaw. Busa, mibalhin ko sa Montreal. Pagkadakong kausaban  kadto kay kinahanglan kong magtuon ug Pranses ug mopahiangay sa laing kultura! Ang among magtatan-aw sa sirkito miingon nako, “Ayaw pag-ingon, ‘Sa amo, ingon niini ang among gibuhat.’” Maayo kadto nga tambag.—1 Cor. 9:22, 23.

Pagbalhin nako sa Quebec, wala koy partner. Apan, ang usa ka batan-ong sister nga ginganlag Shirley Turcotte, kinsa akong nahimamat sa Winnipeg, nahimong akong permanenteng partner sa dihang naminyo mi niadtong Pebrero 1961. Siya usab naggikan sa pamilya nga nahigugma kang Jehova. Niadtong panahona, wala pa ko masayod nga mahimo siyang bililhong tuboran sa kalig-on ug kadasig latas sa katuigan.

Pagsangyaw sa Gaspé

Duha ka tuig human sa among kasal, kami gitudlo ingong espesyal payunir sa Rimouski, Quebec. Sa misunod nga tinghunlak, gihangyo mi sa sangang buhatan nga mosangyaw sa tibuok Gaspé Peninsula, sa sidlakang baybayon sa Canada. Ang among asaynment mao ang pagpugas ug daghang binhi sa kamatuoran kutob sa among mahimo. (Eccl. 11:6) Among gikargahan ang among sakyanan ug kapin sa 1,000 ka magasin ug mga 400 ka libro, maingon man sa pagkaon ug mga sinina, ug gisugdan ang usa ka bulan nga pagsangyaw. Sistematiko namong gikobrehan ang tanang gagmayng baryo sa Gaspé. Ang lokal nga estasyon sa radyo nagpasidaan nga moabotay ang mga Saksi ug gidid-an ang mga tawo sa pagdawat sa among mga basahon. Apan, kadaghanan sa mga molupyo wala makasabot sa maong pasidaan ug nagtuo sila nga gianunsiyo sa estasyon ang among mga basahon, mao nga ila kining gidawat.

Niadtong panahona, bag-o pa lang gihatag ang kagawasan sa pagsangyaw diha sa pipila ka dapit sa Quebec, ug sagad baldahon mi sa mga polis. Nahitabo kini sa usa ka siyudad diin nakapahimutang kamig mga basahon sa halos tanang balay. Giingnan mi sa usa ka polis nga mouban mi niya sa presinto, ug kami miuban. Akong nasayran nga ang abogado sa siyudad nagmando nga pahunongon mi sa pagsangyaw. Sanglit wala man diha ang hepe sa kapolisan, akong gipakita sa abogado ang usa ka dokumentadong sulat gikan sa sangang buhatan sa Toronto nga naghisgot sa among katungod sa pagsangyaw. Human basaha ang sulat, miingon dayon ang abogado: “Sa tinuoray lang, dili ko gustog samok. Ang pari maoy nagsulti nako nga pahunongon mo.” Aron dili hunahunaon sa mga tawo nga ilegal ang among buluhaton, mibalik dayon mi sa dapit diin kami gipahunong sa mga polis ug mipadayon sa pagsangyaw.

Pagkaugma, sa dihang mibalik mi aron makigkita sa hepe sa kapolisan, wala siya malipay nga gipahunong mi sa among buluhaton. Suko kaayo siyang nakigsulti sa abogado diha sa telepono! Ang hepe miingon kanamo nga kon duna pay magsamoksamok, tawgan lang namo siya ug siya mismo ang moatiman niana. Bisag dili mi taga-didto ug dili mi larino sa Pranses, ang mga tawo buotan kaayo ug maabiabihon. Apan kami naghunahuna, ‘Makadangat kaha sila sa kamatuoran?’ Nasayran namo ang tubag niana sa ulahi, sa dihang namalik mi aron sa pagtukod ug mga Kingdom Hall sa Gaspé. Among nakita nga nanga-Saksi na ang kadaghanan sa among nasangyawan kaniadto. Sa pagkatinuod, si Jehova ang nagapatubo sa binhi sa kamatuoran.—1 Cor. 3:6, 7.

Nakadawat ug Panulondon

Ang among anak nga si Lisa natawo pagka 1970. Ang maong panulondon nga gikan kang Jehova naghatag kanamog dugang kalipay. Si Shirley ug Lisa mikuyog nako diha sa pagpanukod ug Kingdom Hall. Pagkahuman ug eskuyla ni Lisa, siya miingon: “Ma, Pa, kay ako may hinungdan nga nakaundang mog kadiyot sa bug-os-panahong pag-alagad, magpayunir ko para makabawi ko sa inyo.” Kapig 20 ka tuig sa ulahi, si Lisa nag-alagad gihapon ingong payunir, apan kauban na sa iyang bana nga si Sylvain. Nakapribilehiyo sila sa pagboluntaryo diha sa ubay-ubayng proyekto sa lainlaing  nasod. Ang tumong sa among pamilya mao ang paghimo sa among kinabuhi nga simple ug ang pagkaandam modawat ug mga pribilehiyo diha sa pag-alagad kang Jehova. Dili nako malimtan ang gisulti ni Lisa pagsugod niyag payunir. Gani, gidasig ko niya nga mobalik sa bug-os-panahong pag-alagad niadtong 2001, ug nagpayunir ko hangtod karon. Sa akong pagpayunir nakakat-on ko sa pagsalig kang Jehova sa tanan nakong buhaton ug sa pagkinabuhing simple apan malipayon.

Ang Pagpanukod Nagkinahanglag Gugma, Pagkamaunongon, ug Pagkamatinumanon

Si Jehova nagtudlo kanako nga kon andam kitang modawat ug mga pribilehiyo, daghan kitag madawat nga mga panalangin. Usa ka dakong pribilehiyo ang pag-alagad sa Regional Building Committee ug pagboluntaryo sa mga proyekto sa pagpanukod kauban sa mga igsoon sa Quebec ug sa ubang dapit.

Bisan tuod ang pipila ka boluntaryo dili tingali maayong mopakigpulong, hanas kaayo sila sa ilang trabaho. Kining minahal nga mga igsoon maayo gayong motrabaho. Ilang natukod ang nindot nga mga pasilidad nga gigamit sa pagsimba kang Jehova.

Sagad may mangutana kanako, “Unsang hiyasa ang kinahanglang anaa sa usa nga nagboluntaryo sa pagtukod ug Kingdom Hall?” Sa akong kasinatian, kinahanglan nga una sa tanan duna siyay gugma kang Jehova ug kang Jesus maingon man sa mga igsoon. (1 Cor. 16:14) Ikaduha, gikinahanglan ang pagkamaunongon ug pagkamatinumanon. Kon dunay mga butang nga gihimo nga dili sumala sa atong gusto—ug mahitabo gayod kana—ang tawong maunongon mosuportar gihapon sa teokratikanhong kahikayan. Ang pagkamatinumanon mopalihok kaniya sa pagboluntaryo sa umaabot nga mga proyekto.

Mapasalamaton Kang Jehova

Bisan tuod namatay ang akong amahan niadtong 1985, dili nako malimtan ang iyang tambag nga magmapuliki diha sa organisasyon ni Jehova. Sama sa uban nga atua na sa langit, walay duhaduha nga siya puliki usab. (Pin. 14:13) Si Mama 97 na karon. Tungod sa estrok, dili na kaayo klaro ang iyang sinultihan; bisan pa niana, hanas gihapon siyang mogamit sa Bibliya. Siya mokutlog mga teksto sa iyang mga sulat ug magdasig kanamo nga magmatinumanon sa pag-alagad kang Jehova. Mapasalamaton kaayo mi nga nakabaton ug mahigugmaong ginikanan!

Mapasalamaton usab ako kang Jehova tungod kang Shirley, ang akong matinumanong asawa. Kanunay niyang gihinumdoman ang tambag sa iyang inahan, “Si Vern kanunay gyong mapuliki diha sa kamatuoran, ug kinahanglan nga dili ka masina sa panahon nga gugolon niya sa uban.” Sa dihang nagminyo mi 49 ka tuig kanhi, kami nanaad sa usag usa nga kauban ming motigulang, nga nag-alagad kang Jehova, ug kon makalabang mi sa kataposan niining sistemaha, kauban ming mobata ug mag-alagad kaniya hangtod sa hangtod. Oo, nahimo kaming “puliki diha sa buluhaton sa Ginoo.” (1 Cor. 15:58) Si Jehova sa iyang bahin nag-atiman gayod kanamo ug wala kami makulangi sa bisan unsang butang nga maayo.

[Footnote]

[Hulagway sa panid 31]

“Ang tumong sa among pamilya mao ang paghimo sa among kinabuhi nga simple ug ang pagkaandam modawat ug mga pribilehiyo diha sa pag-alagad kang Jehova”