Tabangi ang mga Bata nga Mahimong Pamilyar sa Organisasyon ni Jehova

ANG mga bata gustong mokat-on. Handurawa kon unsay lagmit nga gipangutana sa Israelinhong mga bata didto sa Ehipto sa gabii sa unang Paskuwa: ‘Nganong ihawon man ang karnero?’ ‘Nganong gipahiran man ni Papa ug dugo ang ibabaw sa pultahan?’ ‘Asa man ta paingon?’ Makaingon kita nga namati si Jehova sa maong mga pangutana kon atong susihon ang sugo niya sa Israelinhong mga amahan. Siya miingon kanila maylabot sa umaabot nga mga pagsaulog sa Paskuwa: “Sa dihang ang inyong mga anak moingon kaninyo, ‘Unsay kahulogan niini nga pag-alagad alang kaninyo?’ nan kamo magaingon, ‘Kini ang halad sa paskuwa alang kang Jehova, nga milabay sa mga balay sa mga anak sa Israel didto sa Ehipto sa dihang iyang gihampak ang mga Ehiptohanon, apan iyang giluwas ang among mga balay.’” (Ex. 12:24-27) Sa ulahi, gipahinumdoman ni Jehova ang mga ginikanan sa Israel bahin sa kahinungdanon sa pagtubag sa mga pangutana sa  ilang mga anak maylabot “sa mga regulasyon ug sa hudisyal nga mga hukom” nga gisugo ni Jehova.—Deut. 6:20-25.

Tin-aw nga buot ni Jehova nga ang mga bata makadawat ug makapatagbawng tubag sa ilang mga pangutana bahin sa matuod nga pagsimba—mga tubag nga magpalihok kanila sa paghigugma kang Jehova ingong ilang Diyos ug Manluluwas. Karong adlawa, mao usab kanay gusto ni Jehova alang sa mga bata. Ang usa ka paagi nga masilsil sa mga ginikanan diha sa ilang mga anak ang tim-os nga gugma sa Diyos ug sa iyang katawhan mao ang pagtabang kanila nga mahimong pamilyar sa organisasyon ni Jehova ug makasabot kon sa unsang paagi sila makabenepisyo sa mga kahikayan niana. Busa, atong hisgotan ang pipila ka paagi nga matabangan ang mga bata nga makakat-on ug dugang bahin sa organisasyon sa Diyos.

Ang Lokal nga Kongregasyon

Ang mga bata kinahanglang masinati sa inyong kongregasyon. Aron mahimo kana, dad-a ang inyong mga anak sa tanang Kristohanong mga tigom. Nianang paagiha, inyong gisunod ang sugo ni Jehova sa mga Israelinhon: “Tigoma ang katawhan, ang mga lalaki ug ang mga babaye ug ang mga bata . . . , aron sila mamati ug aron sila makakat-on, sanglit angay silang mahadlok kang Jehova nga inyong Diyos ug magmatngon sa pagtuman sa tanang pulong niini nga balaod. Ug ang ilang mga anak nga wala mahibalo kinahanglang mamati, ug sila kinahanglang makakat-on sa pagkahadlok kang Jehova nga inyong Diyos.”—Deut. 31:12, 13.

Sukad sa pagkamasuso, ang mga bata mahimo nang tudloan sa Pulong ni Jehova. Si apostol Pablo miingon bahin kang Timoteo: “Sukad pa sa pagkamasuso ikaw nahibalo na sa balaang  mga sinulat.” (2 Tim. 3:15) Sa mga tigom sa Kingdom Hall, bisan ang gagmayng bata mahimong makasabot sa impormasyon nga gihisgotan ug masinati sa mga alawiton sa Gingharian. Makakat-on sila sa paggamit ug sa pagpabili sa Bibliya ug sa mga basahong gibase niana. Dugang pa, diha sa mga tigom ilang makita ang hiyas nga nagpaila sa matuod nga mga sumusunod ni Kristo—ang tim-os nga gugma. Si Jesus miingon: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Ang mainitong gugma ug tinuod nga kasegurohan nga dayag diha sa Kingdom Hall makapadani sa mga bata ug motabang kanila nga mahimong bahin sa ilang kinabuhi ang pagtambong sa mga tigom.

Kon inyong batasanon nga mosayo sa Kingdom Hall ug dili dayon mouli human sa tigom, ang inyong mga anak dunay kahigayonan nga makabatog mga higala. Imbes makig-uban lang sila sa ubang mga bata, nganong dili ninyo sila ipailaila sa mga igsoon nga lainlaig edad? Kon masuod sila sa mga edaran, sila madasig sa mga eksperyensiya ug kaalam niini. Maingon nga si Zacarias nga “magtutudlo diha sa pagkahadlok sa matuod nga Diyos” maoy maayong panig-ingnan sa batan-ong si Uzzias, nga hari sa Juda, busa ang mga Kristohanon nga matinumanong nag-alagad kang Jehova sulod sa daghang katuigan maoy maayong ehemplo usab sa mga bata karon. (2 Cron. 26:1, 4, 5) Diha sa Kingdom Hall, mahimong isulti sab ninyo sa inyong mga anak ang katuyoan sa librarya, information board, ug sa uban pang bahin sa tigomanan.

Ang Tibuok-Kalibotang Organisasyon

Ang mga bata kinahanglang makasabot nga ang lokal nga kongregasyon maoy bahin sa tibuok-kalibotang organisasyon sa kapig 100,000 ka kongregasyon. Ipatin-aw ang mga bahin niining maong organisasyon, kon sa unsang paagi kini nagalihok, ug kon unsay papel sa mga bata sa pagsuportar sa buluhaton niini. Isaysay kanila kon nganong mahinamon kamong nagapaabot sa sirkitong mga asembliya, distritong mga kombensiyon, ug mga duaw sa magtatan-aw sa sirkito.—Tan-awa ang kahong  “Mga Ulohan nga Hisgotan sa Pamilyahanong Pagsimba,” sa panid 28.

Kon dunay kahigayonan, dapita sa inyong balay ang nagapanawng mga magtatan-aw, misyonaryo, Bethelite, ug uban pang bug-os-panahong ministro. Ayawg hunahunaa nga wala silay panahon sa mga bata. Sila naningkamot sa pagsundog kang Jesus, kinsa kanunayng nag-abiabi sa mga bata ug nakigsulti kanila. (Mar. 10:13-16) Kon madungog sa inyong mga anak ang ilang mga eksperyensiya ug kalipay diha sa sagradong pag-alagad, hayan himoon usab nilang tumong ang bug-os-panahong pag-alagad.

Sa unsang paagi pa ninyo matabangan ang inyong mga anak nga mahimong mas pamilyar sa organisasyon ni Jehova? Aniay pipila ka sugyot: Hisgoti ingong pamilya ang librong Mga Saksi ni Jehova—Mga Magmamantala sa Gingharian sa Diyos. Ipasiugda ang debosyon, pagkamapainubsanon, ug pagkamaunongon nga gipasundayag sa mga alagad ni Jehova. Ipakita kon sa unsang paagi sila gigamit ni Jehova sa pagpakaylap sa maayong balita sa tibuok yuta. Gamita ang mga video nga gihimo sa organisasyon ni Jehova aron sa pagtudlog hinungdanong mga leksiyon bahin sa mga alagad sa Diyos kaniadto ug karon. Kon mahimo, duawa ang sangang buhatan ug puy-anang Bethel sa inyong nasod o kaha sa laing mga nasod. Ang maong mga pagduaw magsilsil diha sa inyong mga anak kon sa unsang paagi ang yutan-ong bahin sa organisasyon ni Jehova ilalom sa pagdumala sa matinumanong ulipon giorganisar sa pagtaganag espirituwal nga pagkaon ug giya sa mga igsoon sa tibuok yuta, sama sa unang siglo K.P.—Mat. 24:45-47; Buh. 15:22-31.

Ipahaom ang Impormasyon sa Matag Bata

Sa pagtudlo sa inyong mga anak, hinumdomi ang paagi ni Jesus sa paghatag ug instruksiyon sa iyang mga apostoles. Kas-a siya miingon kanila: “Duna pa akoy daghang butang nga isulti  kaninyo, apan dili pa kamo makadaog sa pagdala niini sa pagkakaron.” (Juan 16:12) Wala paulani ni Jesus ug daghang impormasyon ang iyang mga tinun-an. Hinunoa, anam-anam niyang gitudloan sila sa hinungdanong mga kamatuoran aron masabtan nila kana. Sa susama, ayaw paulanig impormasyon ang inyong mga anak. Pinaagi sa regular ug anam-anam nga pagtudlo kanila bahin sa organisasyon ni Jehova, padayon ninyong mapukaw ang ilang interes ug malingaw sila sa pagkat-on bahin sa Kristohanong kongregasyon. Depende sa panginahanglan sa inyong mga anak, mahimong sublion o palapdon ninyo ang mga butang nga ila nang nakat-onan.

Ang Kristohanong kongregasyon maoy tuboran sa espirituwal nga kalig-on, ug ang mga bata nga masibotong nakigbahin sa mga buluhaton niana mas makasukol sa impluwensiya sa kalibotan ni Satanas. (Roma 12:2) Masaligon kami nga makakaplag kamog dakong kalipay sa pagtabang sa inyong mga anak nga mahimong pamilyar sa organisasyon ni Jehova. Uban sa iyang mga panalangin, hinaot nga sila magpabiling maunongon niana ug sa mahigugmaong Diyos nga atong gialagaran.

[Kahon/​Hulagway sa panid 28]

 Mga Ulohan nga Hisgotan sa Pamilyahanong Pagsimba

Aniay pipila ka ulohan maylabot sa organisasyon ni Jehova nga mahimo ninyong hisgotan sa gabii sa Pamilyahanong Pagsimba.

▪ Hisgoti ang kasaysayan sa lokal nga kongregasyon. Kanus-a ug sa unsang paagi kini nagsugod? Diin sila nagtigom kaniadto? Alang niini, maayong dapiton ninyo ang dugay nang membro sa kongregasyon aron sa pagtubag sa mga pangutana sa inyong mga anak.

▪ Ipatin-aw ang katuyoan sa lainlaing tigom sa kongregasyon ug sa dagkong panagkatigom ug kon sa unsang paagi makabenepisyo niana ang mga bata.

▪ Hisgoti ang katuyoan sa lainlaing tunghaan nga gihikay sa organisasyon ni Jehova. Ipaambit ang mga eksperyensiya nga nagpakita sa maayong mga resulta nga nahimo niadtong migraduwar niini nga mga tunghaan.

▪ Tabangi ang mga bata nga makita ang kahinungdanon sa pagkahimong regular nga mga magmamantala. Ipakita kon sa unsang paagi sila makatampo sa tibuok-kalibotang taho diha sa Tinuig nga Basahon sa mga Saksi ni Jehova.

▪ Hisgoti ang lainlaing matang sa bug-os-panahong pag-alagad nga bukas alang sa mga batan-on. Ang kapitulo 10 sa librong Organisado Aron Buhaton ang Kabubut-on ni Jehova maoy maayong tuboran sa impormasyon.

▪ Tabangi ang mga bata nga makasabot kon nganong ginasunod sa kongregasyon ang pipila ka kahikayan. Isaysay kon nganong dili sila angayng molihok nga independente sa organisasyon ni Jehova, bisan sa gagmayng paagi. Ipakita kon sa unsang paagi sila makatampo sa kahapsay sa kongregasyon pinaagi sa pagsunod sa direksiyon sa mga ansiyano.

[Hulagway]

Ang inyong mga anak makabenepisyo sa pagpakighigala sa dugay nang mga alagad ni Jehova

[Mga hulagway sa panid 26]

Sama sa karaang Israel, ang mga ginikanan karon maningkamot sa paghatag ug makapatagbawng tubag kon pangutan-on sila bahin sa organisasyon ni Jehova