‘Ang mga Butang nga Iyang Gibuhat Nahiuban Kaniya’

NIADTONG Hunyo 9, 2010, sa Miyerkoles sa buntag, natapos ang yutan-ong kinabuhi ni Theodore Jaracz, nga membro sa Nagamandong Lawas sa mga Saksi ni Jehova. Siya 84 anyos ug nag-uban sila sa iyang asawa nga si Melita sulod sa 53 ka tuig. Buhi pa usab ang iyang magulang nga babaye ug tulo ka pag-umangkon, usa ka lalaki ug duha ka babaye.

Si Brader Jaracz natawo niadtong Septiyembre 28, 1925, sa Pike County, Kentucky, U.S.A., ug nabawtismohan sa edad nga 15 niadtong Agosto 10, 1941. Duha ka tuig sa ulahi, siya nagregular payunir sa edad nga 17, diin nagsugod ang iyang duolag 67 ka tuig nga pag-alagad sa bug-os panahon.

Sa 1946, sa edad nga 20, si Brader Jaracz mitungha sa ikapitong klase sa Watchtower Bible School of Gilead. Human sa graduwasyon, si Brader Jaracz giasayn ingong nagapanawng magtatan-aw sa Cleveland, Ohio, sa United States. Sa 1951, siya giasayn sa sanga sa Australia, diin siya nagdumala ingong alagad sa sanga. Ang 1983 Yearbook of Jehovah’s Witnesses nagtaho nga si Brader Jaracz “nakadasig pag-ayo sa mga igsoon sa tibuok nasod tungod sa iyang kasibot sa teokratikanhong kahapsay ug sa maayong pagpanguna sa kanataran.”

Sa pagbalik ni Brader Jaracz sa United States, iyang giminyoan si Melita Lasko niadtong Disyembre 10, 1956. Ingong magtiayon, sila nag-alagad diha sa nagapanawng buluhaton, nga makugihong nag-alagad sa mga sirkito ug distrito nga nagkobre sa dakong bahin sa United States. Sa hinapos sa 1974, si Brader Jaracz gidapit nga mahimong membro sa Nagamandong Lawas sa mga Saksi ni Jehova.

Si Brader Jaracz mahinumdoman ingong usa ka dedikado ug maunongong alagad ni Jehova, nga tibuok-kasingkasing nga nanguna sa teokratikanhong mga buluhaton. Siya usa ka mahigugmaong bana ug espirituwal nga tawo nga nag-una sa kaayohan sa uban inay sa iyang kaugalingon. (1 Cor. 13:4, 5) Ang iyang sinserong interes sa uban makita diha sa iyang lalom nga tinguha nga ang tanan trataron sa makiangayon ug maluluy-ong paagi. Dugang pa, ang iyang dakong gugma ug kahangawa sa katawhan madayag diha sa iyang kasibot sa ministeryo.

Bisag nasubo kita pag-ayo sa pagpanaw sa usa ka kugihan, hinigugmang membro sa pamilyang Bethel ug sa tibuok-kapunongan sa mga igsoon, kita malipay sa maunongong pag-alagad ni Brader Jaracz kang Jehova sulod sa daghang katuigan. Kita masaligon nga iyang ‘napamatud-an ang iyang kaugalingon nga matinumanon bisan hangtod sa kamatayon ug nakadawat sa purongpurong sa kinabuhi.’ (Pin. 2:10) Makatino usab kita nga ‘ang mga butang nga iyang gibuhat nahiuban kaniya.’—Pin. 14:13.