Mga Batan-on—Unsay Buhaton Ninyo sa Inyong Kinabuhi?

“Ang akong pagpanuntok dili ingon sa pagsuntok sa hangin.”—1 COR. 9:26.

1, 2. Aron magmalamposon ka samtang nagakahingkod, unsay kinahanglan nimong mabatonan?

 KON mobiyahe ka sa usa ka dili sinating lugar, tingali magdala kag mapa ug kompas. Ang mapa makatabang nimo sa pagkahibalo kon hain ka na ug sa pagplano sa dalan nga imong subayon. Ang kompas makatabang nimo nga magpabilin sa hustong direksiyon. Apan, ang mapa ug kompas mahimong way pulos kon wala ka mahibalo sa imong adtoan. Aron dili masaag, kinahanglan nga duna kay eksaktong destinasyon.

² Kaamgid niana ang kahimtang samtang nagkahingkod ka. Ikaw may magamit nga kasaligang mapa ug kompas. Ang Bibliya maoy mapa nga makatabang nimo sa pagpili sa hustong dalan sa kinabuhi. (Prov. 3:5, 6) Kon ang imong konsensiya nabansay sa tukmang paagi, makatabang kini kanimo nga makapabilin sa hustong dalan. (Roma 2:15) Kini magsilbing kompas. Apan aron magmalamposon ang imong kinabuhi, kinahanglan usab nga mahibalo ka kon asa ka paingon. Nagkinahanglan kag espesipikong mga tumong.

3. Sumala sa gipahayag ni Pablo sa 1 Corinto 9:26, unsay mga benepisyo sa pagbatog mga tumong?

³ Sa mubo, gipahayag ni apostol Pablo ang mga benepisyo sa pagbatog mga tumong ug sa pagkab-ot niana, sa dihang siya misulat: “Ang akong pagdagan dili kay walay-katinoan; ang akong pagpanuntok dili ingon sa pagsuntok sa hangin.” (1 Cor. 9:26) Kon duna kay mga tumong, makadagan ka nga may direksiyon. Sa ngadtongadto, kinahanglan kang mohimog pipila ka dagkong desisyon maylabot sa pagsimba, panarbaho, kaminyoon, ug pamilya. Usahay, basin maglibog ka kay daghan kag kapilian. Apan kon abante kang magplano sa buhaton nimo sa imong kinabuhi, nga magbase sa imong mga desisyon diha sa mga kamatuoran ug prinsipyo sa Pulong sa Diyos, dili ka matental sa pagsubay sa sayop nga dalan.—2 Tim. 4:4, 5.

4, 5. (a) Unsay mahimong mahitabo kon dili ka magbaton ug mga tumong? (b) Nganong ang imong mga desisyon angayng magbanaag sa imong tinguha nga pahimut-an ang Diyos?

⁴ Kon dili ka magbatog mga tumong, ang imong mga isigkaingon ug mga magtutudlo lagmit mag-impluwensiya kanimo sa pagbuhat kon unsay ilang gihunahuna nga maayo para nimo. Siyempre, bisan pag duna kay tinong mga tumong, ang pipila tingali mohatag gihapon sa ilang opinyon. Sa dihang maminaw ka sa ilang mga sugyot, pangutan-a ang imong kaugalingon, ‘Ang mga tumong ba nga ilang gisugyot makatabang kanako sa paghinumdom sa akong Maglalalang samtang ako batan-on o makababag kanako sa pagbuhat niana?’—Basaha ang Ecclesiastes 12:1.

⁵ Nganong ang imong mga desisyon kinahanglang magbanaag sa imong tinguha nga pahimut-an ang Diyos? Ang usa ka rason mao nga si Jehova naghatag kanato sa tanang maayong butang. (Sant. 1:17) Sa pagkatinuod, kitang tanan angayng magmapasalamaton kang Jehova. (Pin. 4:11) Ang usa ka maayong paagi nga imong ikapakita ang imong apresasyon kang Jehova mao ang paghinumdom kaniya sa dihang maghimog mga tumong. Atong hisgotan kon unsang mga tumong ang takos kab-oton ug kon unsay kinahanglan nimong himoon aron makab-ot kana.

Unsang mga Tumong ang Mahimo Nimong Batonan?

6. Unsang hinungdanong tumong ang mahimo nimong batonan, ug ngano?

⁶ Sumala sa miaging artikulo, ang usa ka hinungdanong  tumong mao nga imong pamatud-an sa imong kaugalingon nga tinuod ang giingon sa Bibliya. (Roma 12:2; 2 Cor. 13:5) Ang imong mga isigkaingon lagmit nagtuo sa ebolusyon o sa lainlaing bakak nga relihiyosong mga doktrina tungod kay giingnan sila sa uban nga kanay angay nilang tuohan. Apan, dili ka kinahanglang motuo sa usa ka butang tungod lang kay gusto nila nga kanay imong tuohan. Hinumdomi nga buot ni Jehova nga moalagad ka kaniya uban sa tibuok mong kaisipan. (Basaha ang Mateo 22:36, 37.) Gusto sa atong langitnong Amahan nga ang imong pagtuo ipasukad sa ebidensiya.—Heb. 11:1.

7, 8. (a) Unsang daling-makab-ot nga mga tumong ang makapalig-on sa imong pagtuo? (b) Unsay imong bation sa dihang makab-ot nimo ang pipila sa imong daling-makab-ot nga mga tumong?

⁷ Aron mapalig-on ang imong pagtuo, nganong dili ka magbaton ug daling-makab-ot nga mga tumong? Ang usa niana mao ang pag-ampo matag adlaw. Aron espesipiko ug dili balikbalik ang imong pag-ampo, mahimo nimong hunahunaon daan o isulat ang mga hitabo sa tibuok adlaw nga buot nimong ilakip sa imong pag-ampo. Paneguroa nga ilakip dili lang ang mga problema nga imong gisagubang kondili ang mga kalipay usab nga imong natagamtam. (Filip. 4:6) Ang laing tumong mao ang pagbasa sa Bibliya matag adlaw. Nahibalo ka ba nga kon magbasa kag mga upat ka panid sa usa ka adlaw, mahuman nimog basa ang tibuok Bibliya sa usa lang ka tuig? a “Malipayon ang tawo nga . . . ang iyang kalipay anaa sa balaod ni Jehova,” nag-ingon ang Salmo 1:1, 2, “ug sa iyang balaod siya nagabasa sa hinayng tingog sa adlaw ug gabii.”

⁸ Ang ikatulong daling-makab-ot nga tumong mao ang pag-andam ug tubag alang sa matag tigom sa kongregasyon. Sa sinugdan, tingali buot nimong basahon ang imong tubag o ang usa ka teksto. Sa ngadtongadto, himoon na sab nimong tumong ang pagtubag sa imong kaugalingong mga pulong. Sa pagkatinuod, sa  matag higayong motubag ka, nagdayeg ka kang Jehova. (Heb. 13:15) Sa dihang imong makab-ot ang pipila sa maong mga tumong, mouswag ang imong kompiyansa sa kaugalingon ug ang imong apresasyon kang Jehova, ug ikaw andam na sa pagbatog dugay-makab-ot nga mga tumong.

9. Kon dili ka pa usa ka magmamantala, unsang dugay-makab-ot nga mga tumong ang mahimo nimong batonan?

⁹ Unsang dugay-makab-ot nga mga tumong ang mahimo nimong batonan? Kon wala ka pa makasugod sa pagsangyaw sa maayong balita sa kanataran, himoon tingali nimong tumong nga mahimong magmamantala sa Gingharian. Sa dihang imong makab-ot kining dalayegong tumong, buot nimong mahimong epektibo ug regular sa pagsangyaw matag bulan. Buot usab nimong makat-onan ang paggamit sa Bibliya diha sa pagsangyaw. Sa pagbuhat niini, lagmit mamatikdan nimo nga mas malipayon ka sa pagsangyaw. Dayon makagugol kag mas daghang oras sa pagpamalaybalay o maningkamot pa gani nga makadumalag pagtuon sa Bibliya. Ingong di-bawtismadong magmamantala, usa gayod ka maayong tumong nga ikaw makuwalipikado alang sa bawtismo ug mahimong dedikado ug bawtismadong Saksi ni Jehova.

10, 11. Unsang dugay-makab-ot nga mga tumong ang mahimong batonan sa bawtismadong mga batan-on?

¹⁰ Kon ikaw bawtismado na nga alagad ni Jehova, adunay pipila ka dugay-makab-ot nga mga tumong nga imong mabatonan. Buot tingali nimong motabang sa mga kongregasyon diha sa pagsangyaw sa teritoryo nga talagsa rang masangyawan. Magamit usab nimo ang imong kusog ug kahimsog sa pag-oksilyare o pagregular payunir. Libolibo ka malipayong payunir ang mopahayag nga ang bug-os-panahong pag-alagad maoy magantihong paagi sa paghinumdom sa imong Maglalalang samtang ikaw batan-on. Kini maoy mga tumong nga imong makab-ot samtang naa ka pa sa poder sa imong ginikanan. Ang inyong kongregasyon makabenepisyo usab sa imong pagkab-ot niini.

¹¹ Ang ubang dugay-makab-ot nga mga tumong mahimong makahatag ug benepisyo dili lamang sa imong kongregasyon. Pananglitan, mahimo kang magplano sa pag-alagad sa laing dapit o nasod diin dako ang panginahanglan. Basin gusto nimong motabang sa pagtukod ug mga Kingdom Hall ug mga pasilidad sa sanga sa laing mga nasod. Gani, basin makaalagad ka sa Bethel o mahimong misyonaryo. Siyempre, sa dili ka pa magbaton ug dugay-makab-ot nga mga tumong, kinahanglan ka unang magpabawtismo. Kon dili ka pa bawtismado, tagda kon unsay nalangkit sa pagkab-ot niini.

Pagkab-ot sa Tumong nga Mabawtismohan

12. Unsay mga rason nga ang pipila nagpabawtismo, ug nganong dili kana makataronganon?

¹² Sa imong hunahuna, unsa ang katuyoan sa bawtismo? Ang pipila nag-isip niini ingong proteksiyon aron dili makasala. Ang uban naghunahuna sa pagpabawtismo kay nagpabawtismo na ang ilang mga higala. Ang uban sab gusto nga pahimut-an ang ilang mga ginikanan. Hinunoa, ang bawtismo dili usa ka kontrata nga magpugong kanimo sa pagbuhat sa mga butang nga gusto nimong himoon sa tago; ni magpabawtismo tungod kay napugos sa uban. Angay kang magpabawtismo sa dihang bug-os na nimong masabtan kon unsay nalangkit sa pagkahimong Saksi ni Jehova ug kon segurado ka na nga ikaw andam nang modawat sa maong responsibilidad.—Eccl. 5:4, 5.

13. Nganong angay kang magpabawtismo?

¹³ Ang usa ka rason sa pagpabawtismo mao nga si Jesus nagsugo sa iyang mga sumusunod sa “paghimog mga tinun-an . . . , nga magabawtismo kanila.” Siya usab naghatag ug panig-ingnan pinaagi sa pagpabawtismo. (Basaha ang Mateo 28:19, 20; Marcos 1:9.) Dugang pa, ang bawtismo maoy hinungdanong lakang alang niadtong gustong maluwas. Human hisgoti nga si Noe naghimog arka diin siya ug ang iyang pamilya naluwas panahon sa Lunop, si apostol Pedro miingon: “Kana nga motumbas niini karon nagaluwas usab kaninyo, nga  mao, ang bawtismo, . . . pinaagi sa pagkabanhaw ni Jesu-Kristo.” (1 Ped. 3:20, 21) Apan, wala kini magpasabot nga ikaw magpabawtismo aron makabatog proteksiyon. Hinunoa, ikaw magpabawtismo tungod kay imong gihigugma si Jehova ug gusto kang moalagad kaniya uban sa tibuok mong kasingkasing, kalag, kaisipan, ug kusog.—Mar. 12:29, 30.

14. Nganong ang pipila nagpanuko sa pagpabawtismo, apan unsay gipasalig kanimo?

¹⁴ Ang pipila nagpanuko sa pagpabawtismo kay nahadlok nga basin mapalagpot sa ulahi. Mibati ka ba niana? Hinuon, dili man sayop ang maong kahadlok. Kana nagpasabot nga nahibalo ka nga may seryosong responsibilidad nga nalangkit sa pagkahimong Saksi ni Jehova. Aduna pa bay laing rason? Tingali dili ka pa kombinsido nga ang pagkinabuhi uyon sa mga sukdanan sa Diyos mao ang labing maayong paagi sa pagkinabuhi. Sa maong kahimtang, ang paghunahuna bahin sa dangatan niadtong nagsalikway sa mga sukdanan sa Bibliya makatabang kanimo sa pagdesisyon. Sa laing bahin, mahimong nahigugma ka sa mga sukdanan sa Diyos apan wala kay pagsalig nga imo kanang matuman. Sa tinuoray, maayo kana nga timailhan sa imong pagkamapainubsanon. Gani, ang Bibliya nag-ingon nga ang kasingkasing sa tanang dili-hingpit nga tawo maoy malimbongon. (Jer. 17:9) Apan magmalamposon ka kon ‘magpadayon ka sa pagbantay subay sa pulong sa Diyos.’ (Basaha ang Salmo 119:9.) Bisag unsay imong rason sa pagpanuko sa pagpabawtismo, kinahanglan nimo kanang sulbaron. b

15, 16. Unsaon nimo pagkahibalo nga ikaw andam nang magpabawtismo?

¹⁵ Apan, unsaon nimo pagkahibalo nga andam ka nang magpabawtismo? Ang usa ka paagi mao ang pagpangutana sa imong kaugalingon: ‘Makapatin-aw na ba ko sa pangunang mga pagtulon-an sa Bibliya ngadto sa uban? Mosangyaw ba ko bisag wala ang akong ginikanan? Maningkamot ba ko nga makatambong sa tanang tigom? Makahinumdom ba kog mga higayon nga wala ko magpadala sa pagpamit-os sa isigkaingon? Mopadayon ba ko sa pag-alagad kang Jehova bisag mohunong sa pag-alagad ang akong mga ginikanan ug mga higala ? Nasulti na ba nako kang Jehova diha sa pag-ampo kon unsa ka hinungdanon ang akong relasyon kaniya? Ug kinasingkasing na ba kong nagapahinungod kang Jehova diha sa pag-ampo?’

¹⁶ Ang bawtismo makapausab sa kinabuhi, ug seryoso kini nga desisyon. Hamtong ka na ba aron isipon kini nga seryoso? Ang pagkahamtong wala lang magpasabot nga maayo kang mohatag ug pakigpulong o mga tubag panahon sa tigom. Nagkinahanglan kini nga ang usa may katakos na sa paghimog mga desisyon pinasukad sa mga prinsipyo sa Bibliya. (Basaha ang Hebreohanon 5:14.) Kon andam ka na sa pagbuhat  niana, nan anaa na sa imong atubangan ang kinadak-ang pribilehiyo—ang pag-alagad kang Jehova sa bug-os kasingkasing ug pagkinabuhi uyon sa imong dedikasyon.

17. Unsay motabang kanimo sa pagsagubang sa mga pagsulay human sa bawtismo?

¹⁷ Human sa bawtismo, mahimong madasigon ka kaayo sa pag-alagad sa Diyos. Apan sa ngadtongadto, lagmit masulayan ang imong pagtuo ug pagkamalahutayon. (2 Tim. 3:12) Ayaw batia nga nag-inusara ka. Patambag sa imong mga ginikanan. Patabang sa hamtong nga mga igsoon sa kongregasyon. Pakigsuod sa mga higala nga makapalig-on kanimo. Ayaw kalimti nga si Jehova nagmahal kanimo, ug siya mohatag kanimog kusog sa pagsagubang sa mga pagsulay.—1 Ped. 5:6, 7.

Sa Unsang Paagi Makab-ot Nimo ang Imong mga Tumong?

18, 19. Sa unsang paagi makabenepisyo ka sa pagsusi sa imong mga prioridad?

¹⁸ Bisan pag maayo ang imong mga plano, kulang ba ang imong panahon sa pagbuhat kon unsay imong gusto ug kinahanglang buhaton? Kon mao, susiha ang imong mga prioridad. Ingong ilustrasyon: Pagkuhag balde ug sudli kinig dagkong bato. Dayon pun-ig balas ang balde. Ang imong balde puno nag bato ug balas. Karon, ihuwad ang balde. Niining higayona, ibalik ang sulod sa balde apan unaha pagbutang ang balas, dayon sulayi pagbutang ang mga bato. Dili na ba maigo? Tungod kana kay giuna nimo pagbutang ang balas.

¹⁹ Ingon usab niana kon bahin sa paggamit sa imong panahon. Kon unahon nimo ang mga butang sama sa kalingawan, morag kulang ka nag panahon alang sa mas hinungdanong mga butang—ang espirituwal nga mga kalihokan. Apan kon imong sundon ang tambag sa Bibliya nga ‘tinoon ang mas hinungdanong mga butang,’ makita nimong may panahon ka alang sa pag-alagad sa Diyos ug alang sa diyutayng kalingawan.—Filip. 1:10.

20. Kon mobati kag kabalaka ug pagduhaduha samtang naningkamot sa pagkab-ot sa imong mga tumong, unsay angay nimong buhaton?

²⁰ Samtang naningkamot ka nga makab-ot ang imong mga tumong, lakip ang bawtismo, usahay mobati kag kabalaka ug pagduhaduha. Kon mao, “itugyan ang imong palas-anon kang Jehova, ug siya magasapnay kanimo.” (Sal. 55:22) Sa pagkakaron, may kahigayonan kang makig-ambit sa labing kulbahinam ug hinungdanong buluhaton sa kasaysayan, ang tibuok-kalibotang pagsangyaw ug pagpanudlo. (Buh. 1:8) Mahimong magtan-aw ka lang tingali sa uban nga nagbuhat niini o mahimo kang makigbahin niini. Ayaw pagpanuko sa paggamit sa imong mga abilidad sa pag-alagad sa Diyos ug sa pagsuportar sa iyang Gingharian. Dili ka gayod magbasol nga ikaw nag-alagad sa “imong Dakong Maglalalang sa mga adlaw sa imong pagkabatan-on.”—Eccl. 12:1.

[Mga footnote]

Unsay Imong Tubag?

• Nganong angay kang magbaton ug mga tumong?

• Unsay pipila ka tumong nga angayng kab-oton?

• Unsay nalangkit sa pagkab-ot sa tumong nga magpabawtismo?

• Sa unsang paagi ang pagsusi sa imong mga prioridad makatabang sa pagkab-ot sa imong mga tumong?

[Mga Pangutana sa Pagtuon]

[Hulagway sa panid 13]

Duna ka bay tumong nga magbasag Bibliya matag adlaw?

[Hulagway sa panid 15]

Unsay makatabang kanimo aron makab-ot ang tumong nga magpabawtismo?

[Hulagway sa panid 16]

Unsay imong makat-onan niini nga ilustrasyon?