Si Jehova Mao ang Atong Soberanong Ginoo!
Si Jehova Mao ang Atong Soberanong Ginoo!
“Ang Soberanong Ginoong Jehova gihimo ko nga akong dalangpanan.”—SAL. 73:28.
1. Sa mga pulong ni Pablo sa 1 Corinto 7:31, sa unsa niya gitandi ang kalibotan?
“ANG talan-awon niining kalibotana nagakausab,” miingon si apostol Pablo. (1 Cor. 7:31) Daw iyang gitandi ang kalibotan ngadto sa usa ka entablado, nga may bida ug kontrabidang mga magdudula hangtod nga mausab ang mga esena o talan-awon.
2, 3. (a) Sa unsa ikatandi ang hagit sa pagkasoberano ni Jehova? (b) Unsang mga pangutana ang atong hisgotan?
2 Karong adlawa, nagakahitabo ang labing hinungdanong drama—ug nalangkit ka niini! Kini ilabinang naglangkit sa pagbindikar sa pagkasoberano ni Jehova. Ang maong drama ikailustrar sa kahimtang sa usa ka nasod. Kining nasora adunay gobyerno nga naghupot sa kahusay. Apan, adunay laing kriminal nga organisasyon nga nagmando pinaagig panikas, kapintasan, ug pagpatay. Kining ilegal nga organisasyon naghagit sa soberanong pagmando ug nagsulay sa pagkamaunongon sa tanang molupyo ngadto sa ilang gobyerno.
3 Ang susamang kahimtang naglungtad sa tibuok uniberso. Anaa ang legal nga gobyerno sa “Soberanong Ginoong Jehova.” (Sal. 71:5) Apan ang katawhan karon nameligro tungod sa usa ka kriminal nga organisasyon nga gimandoan sa “usa nga daotan.” (1 Juan 5:19) Kini naghagit sa tinudlong gobyerno sa Diyos ug nagsulay sa pagkamaunongon sa tanang tawo ngadto sa iyang soberanong pagmando. Unsay nakaingon niining kahimtanga? Nganong gitugotan kini sa Diyos? Ingong indibiduwal, unsay atong mahimo bahin niini?
Mga Isyu nga Nalangkit sa Drama
4. Unsa ang duha ka isyu nga nalangkit sa tibuok-kalibotang drama?
4 May duha ka isyu nga nalangkit niining tibuok-kalibotang drama: ang pagkasoberano ni Jehova ug ang integridad sa tawo. Diha sa Kasulatan, si Jehova subsob gitawag “ang Soberanong Ginoo.” Pananglitan, uban ang bug-os nga pagsalig kaniya, ang salmista miawit: “Ang Soberanong Ginoong Jehova gihimo ko nga akong dalangpanan.” (Sal. 73:28) Ang “pagkasoberano” mao ang pagkalabaw sa gahom o pagmando. Ang usa ka soberano nagbaton ug kinalabwang awtoridad. Adunay daghang rason nga isipon si Jehova nga Diyos ingong Supremong Usa.—Dan. 7:22.
5. Nganong angay kitang matukmod sa pagsuportar sa pagkasoberano ni Jehova?
5 Isip Maglalalang, si Jehova nga Diyos mao ang Soberano sa yuta ug sa tibuok uniberso. (Basaha ang Pinadayag 4:11.) Si Jehova usab ang atong Maghuhukom, Maghahatag-Lagda, ug Hari. (Isa. 33:22) Sanglit utang nato sa Diyos ang atong kinabuhi ug nagdepende kita kaniya, angay nato siyang isipon ingong atong Soberanong Ginoo. Matukmod kita sa pagsuportar sa iyang hataas nga posisyon kon ibutang nato kanunay sa hunahuna nga “si Jehova lig-ong nagtukod sa iyang trono didto sa kalangitan; ug ang iyang gingharian nagagahom ibabaw sa tanang butang.”—Sal. 103:19; Buh. 4:24.
6. Unsa ang integridad?
6 Aron masuportahan ang pagkasoberano ni Jehova, kinahanglan natong huptan ang atong integridad kaniya. Ang “integridad” maoy moral nga pagkamatarong o pagkakompleto. Ang usa nga naghupot ug integridad maoy way-ikasaway ug matul-id. Ingon niana ang patriarkang si Job.—Job 1:1.
Kon sa Unsang Paagi Nagsugod ang Drama
7, 8. Sa unsang paagi gikuwestiyon ni Satanas ang katungod ni Jehova ingong Soberano?
7 Mga 6,000 ka tuig kanhi, gikuwestiyon sa usa ka espiritung linalang ang katungod ni Jehova ingong Soberano. Ang hakog nga tinguha maoy nagtukmod sa maong rebelde sa pagsulti ug sa paglihok nianang paagiha. Iyang gitental ang unang magtiayon, si Adan ug Eva, nga mosupak sa pagkasoberano sa Diyos ug gisulayan pagdaot ang ngalan ni Jehova pinaagi sa pag-ingon nga Siya namakak. (Basaha ang Genesis 3:1-5.) Ang rebelde nahimong dakong Kaaway, Satanas (Magsusupak), Yawa (Tigpasipala), serpente (maglilimbong), ug dragon (manunukob).—Pin. 12:9.
8 Si Satanas naghimo sa iyang kaugalingon nga kaindig nga magmamando. Kay nag-atubang sa maong hagit, unsay buhaton sa Soberanong Ginoong Jehova? Laglagon ba dayon niya ang tulo ka rebelde—si Satanas, Adan, ug Eva? Seguradong may gahom siya sa paghimo niana, ug ang maong paglaglag maghusay unta sa isyu kon kinsay labing gamhanan kanila. Mapamatud-an usab unta niana nga si Jehova nagsulti sa tinuod bahin sa silot kon lapason ang iyang balaod. Nganong wala kana himoa sa Diyos?
9. Unsay gikuwestiyon ni Satanas?
9 Pinaagi sa pagpamakak ug pagpatalikod kang Adan ug Eva gikan sa Diyos, gikuwestiyon ni Satanas ang katungod ni Jehova sa pagbaod sa mga tawo nga magmasinugtanon kaniya. Dugang pa, pinaagi sa pagtental sa unang magtiayon nga mosupak sa Diyos, gikuwestiyon usab ni Satanas ang pagkamaunongon sa tanang intelihenteng linalang. Sumala sa gipakita sa kahimtang ni Job, kinsa nagmaunongon sa pagkasoberano ni Jehova, si Satanas nangangkon nga iyang mapahilayo ang tanang tawo gikan sa Diyos.—Job 2:1-5.
10. Pinaagi sa dili-dayon paglaglag kang Satanas, unsay gitugot sa Diyos?
10 Pinaagi sa dili-dayon paglaglag kang Satanas, si Jehova nagtugot kaniya nga mapamatud-an ang iyang pangangkon. Ang Diyos naghatag usab sa mga tawo ug higayon nga ikapasundayag ang ilang pagkamaunongon sa iyang pagkasoberano. Unsay nahitabo paglabay sa daghang siglo? Si Satanas nagtukod ug gamhanang kriminal nga organisasyon. Sa kataposan si Jehova maglaglag niana ug sa Yawa, nga maghatag ug di-malalis nga pamatuod sa katungod sa Diyos ingong Soberano. Kay nakapaneguro gayod si Jehova nga mahitabo kana, iya kining gitagna sa dihang nahitabo ang pagrebelde sa Eden.—Gen. 3:15.
11. Unsay nahimo sa daghang tawo kon bahin sa pagkasoberano ni Jehova?
11 Daghang tawo ang nagpakitag pagtuo ug naghupot sa ilang integridad dapig sa pagkasoberano ni Jehova ug sa pagbalaan sa iyang ngalan. Naglakip kana kang Abel, Enoc, Noe, Abraham, Sara, Moises, Ruth, David, Jesus, ug sa unang mga tinun-an ni Kristo, maingon man sa milyonmilyong naghupot sa integridad karon. Sila nakigbahin sa pagpamatuod nga bakakon si Satanas ug sa paghinlo sa ngalan ni Jehova sa pasipala nga gipahamtang sa Yawa pinaagi sa pagpasigarbo nga siya makapatalikod sa tanang tawo gikan sa Diyos.—Prov. 27:11.
Makatino Kita Kon sa Unsang Paagi Matapos ang Drama
12. Nganong makaseguro kita nga ang Diyos dili motugot nga magpadayon hangtod sa hangtod ang pagkadaotan?
12 Makaseguro kita nga si Jehova hapit nang molihok aron sa pagpakita sa iyang pagkasoberano. Dili niya tugotan nga magpadayon ang pagkadaotan hangtod sa hangtod, ug nahibalo kita nga nagkinabuhi na kita sa kataposang mga adlaw. Si Jehova milihok batok sa mga daotan panahon sa Lunop. Iyang gilaglag ang Sodoma ug Gomora ug si Paraon ug ang iyang kasundalohan. Si Sisera ug ang iyang kasundalohan ug si Senakerib ug ang iyang Asiryanhong mga kasundalohan wala makadaog batok sa Labing Hataas. (Gen. 7:1, 23; 19:24, 25; Ex. 14:30, 31; Maghu. 4:15, 16; 2 Hari 19:35, 36) Busa makasalig kita nga si Jehova dili motugot nga pakaulawan ang iyang ngalan ug dagmalan ang iyang mga Saksi hangtod sa hangtod. Dugang pa, atong makita karon ang ebidensiya sa ilhanan sa presensiya ni Jesus ug sa konklusyon niining daotang sistema sa mga butang.—Mat. 24:3.
13. Unsay atong himoon aron dili kita mahilakip sa paglaglag sa mga kaaway ni Jehova?
13 Aron dili kita mahilakip sa paglaglag sa mga kaaway sa Diyos, kinahanglang pamatud-an nato nga kita maunongon sa pagkasoberano ni Jehova. Sa unsang paagi nato mahimo kana? Pinaagi sa pagpabiling bulag sa kriminal nga pagmando ni Satanas ug nga dili mahadlok sa iyang mga ahente. (Isa. 52:11; Juan 17:16; Buh. 5:29) Kon ato kanang buhaton, kita nakigbahin sa pagbayaw sa pagkasoberano sa atong langitnong Amahan ug makalaom nga luwason kita ni Jehova sa dihang hinloan niya ang iyang ngalan ug ipasundayag nga siya mao ang Soberano sa Uniberso.
14. Unsay gipadayag diha sa lainlaing bahin sa Bibliya?
14 Ang mga detalye bahin sa katawhan ug pagkasoberano ni Jehova gisaysay diha sa tibuok Bibliya. Ang unang tulo ka kapitulo naghisgot bahin sa paglalang ug sa pagpakasala sa tawo, samtang ang kataposang tulo ka kapitulo naghisgot sa pagkapasig-uli sa katawhan sa maayong kahimtang. Ang taliwala nga mga panid naghatag ug mga detalye bahin sa gibuhat sa Soberanong Ginoong Jehova aron matuman ang iyang katuyoan alang sa katawhan, sa yuta, ug sa uniberso. Ang Genesis nagpakita kon sa unsang paagi si Satanas ug ang pagkadaotan misulod sa kalibotan, ug ang kataposang bahin sa Pinadayag nagpakita kon sa unsang paagi wagtangon ang pagkadaotan, laglagon ang Yawa, ug matuman ang kabubut-on sa Diyos dinhi sa yuta ingon man sa langit. Sa pagkatinuod, gipadayag sa Bibliya ang hinungdan sa sala ug kamatayon ug gipakita niana kon sa unsang paagi kini wagtangon gikan sa yuta ug pulihan sa di-masukod nga kalipay ug kinabuhing dayon alang sa mga naghupot sa integridad.
15. Sa dihang matapos na ang drama nga naglangkit sa pagkasoberano ni Jehova, unsay atong buhaton aron makabenepisyo niana?
15 Sa dili madugay, ang talan-awon niining kalibotana bug-os nga mausab. Matapos na ang drama nga naglangkit sa pagkasoberano sa Diyos. Si Satanas dili na magmando ug sa kataposan siya laglagon, ug ang kabubut-on sa Diyos tinong matuman. Apan aron makabenepisyo niini ug makatagamtam sa daghang panalangin nga gitagna diha sa Pulong sa Diyos, kinahanglang modapig kita sa pagkasoberano ni Jehova karon. Dili kita mahimong magpabiling neyutral. Aron makaingon kita: “Si Jehova dapig kanako,” kinahanglang magpabilin kita sa iyang kiliran.—Sal. 118:6, 7.
Atong Mahuptan ang Integridad!
16. Nganong makaseguro kita nga posibleng mahuptan sa mga tawo ang integridad ngadto sa Diyos?
16 Kita makasuportar sa pagkasoberano ni Jehova ug makahupot sa atong integridad, kay si apostol Pablo misulat: “Walay tentasyon nga midangat kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.” (1 Cor. 10:13) Diin gikan ang tentasyon nga gihisgotan ni Pablo, ug sa unsang paagi ang Diyos magtaganag kalingkawasan alang kanato?
17-19. (a) Unsang tentasyon ang nakapadani sa mga Israelinhon didto sa kamingawan? (b) Nganong posible nga kita makahupot sa atong integridad kang Jehova?
17 Ingon sa gipakita sa mga eksperyensiya sa Israel didto sa kamingawan, ang “tentasyon” naggikan sa mga kahimtang nga mohaylo kanato sa paglapas sa balaod sa Diyos. (Basaha ang 1 Corinto 10:6-10.) Masuklan unta sa mga Israelinhon ang tentasyon, apan gitinguha nila ang “makadaot nga mga butang” sa dihang si Jehova milagrosong naghatag kanilag usa ka bulan nga suplay sa buntog. Bisag ang katawhan wala makakaog karne sa taastaas nga panahon, ang Diyos naghatag kanilag igong mana nga makaon. Apan nagpadaog sila sa tentasyon nga maghinakog sa pagtigom ug mga buntog.—Num. 11:19, 20, 31-35.
18 Sa wala pa kadto mahitabo, samtang gidawat ni Moises ang Balaod didto sa Bukid sa Sinai, ang mga Israelinhon nagsimba sa nating baka ug nagbuhat sa unodnong mga kahilayan. Tungod kay wala ang ilang lider, nadala sila sa tentasyon. (Ex. 32:1, 6) Sa hapit na silang mosulod sa Yutang Saad, libolibo ka Israelinhon ang gidani sa mga Moabihanong babaye sa paghimog seksuwal nga imoralidad. Niadtong higayona, libolibo ka Israelinhon ang namatay tungod sa ilang sala. (Num. 25:1, 9) May mga panahon nga ang mga Israelinhon nagpadaog sa tentasyon sa pagbagulbol, nga usa ka higayon niana sila misulti batok kang Moises ug sa Diyos mismo! (Num. 21:5) Ang katawhan sa Israel nagbagulbol pa gayod human sa pagkalaglag sa daotang si Kore, Datan, Abiram, ug sa ilang mga kauban, nga kono dili makataronganon ang pagpatay sa mga rebelde. Ingong resulta, 14,700 ka Israelinhon ang namatay sa hampak nga gipadala sa Diyos.—Num. 16:41, 49.
19 Ang gihisgotang mga tentasyon masuklan gayod unta sa mga Israelinhon. Ang katawhan natental tungod kay sila nawad-ag pagtuo ug nalimot kang Jehova, sa iyang mahigugmaong pag-atiman kanila, ug sa pagkamatarong sa iyang mga dalan. Sama sa kahimtang sa mga Israelinhon, ang mga tentasyon nga atong maatubang maoy komon sa mga tawo. Kon maningkamot kita sa pagsukol niana ug mosalig sa Diyos sa paglig-on kanato, mahuptan nato ang atong integridad. Kita makasalig niini tungod kay “ang Diyos matinumanon” ug dili siya motugot nga kita ‘matental nga labaw sa atong maantos.’ Dili gayod kita biyaan ni Jehova sa punto nga dili na nato mabuhat ang iyang kabubut-on.—Sal. 94:14.
20, 21. Sa dihang kita tentalon, sa unsang paagi ang Diyos motaganag “kalingkawasan”?
20 Aron sa paglig-on kanato sa pagsukol sa tentasyon, si Jehova nagtaganag “kalingkawasan.” Pananglitan, ang mga maglulutos mahimong magdagmal kanato sa tinguha nga isalikway nato ang atong pagtuo. Ang maong pagdagmal magtental kanato sa pagkompromiso aron makaikyas sa dugang pagbunal, pagsakit, o kaha sa kamatayon. Apan, pinasukad sa inspiradong pasalig ni Pablo nga nasulat sa 1 Corinto 10:13, kita nahibalo nga temporaryo lamang ang kahimtang nga nagpatunghag tentasyon. Dili itugot ni Jehova nga makaabot kana sa punto nga dili na kita makapabiling maunongon kaniya. Ang Diyos makapalig-on sa atong pagtuo ug makahatag kanatog espirituwal nga kusog aron mahuptan ang atong integridad.
21 Si Jehova nagalig-on kanato pinaagi sa iyang balaang espiritu. Ang maong espiritu magpahinumdom usab kanato sa mga teksto nga makatabang aron dili kita madaog sa tentasyon. (Juan 14:26) Busa, dili kita malimbongan sa pagsunod sa sayop nga dalan. Pananglitan, atong nasabtan ang mga isyu nga nalangkit sa pagkasoberano ni Jehova ug sa integridad sa tawo. Tungod sa maong kahibalo, daghan ang napalig-on sa Diyos aron magpabiling matinumanon hangtod sa kamatayon. Apan ang kamatayon dili mao ang nagtaganag kalingkawasan alang kanila; ang tabang ni Jehova maoy nagpaarang kanila nga makalahutay hangtod sa kataposan. Siya usab makahimo niana alang kanato. Gani, gigamit usab niya ang iyang matinumanong mga manulonda alang sa atong kaayohan ingong publikong mga alagad nga “gipadala aron mag-alagad niadtong magapanunod sa kaluwasan.” (Heb. 1:14) Sumala sa ipakita sa sunod nga artikulo, kadto lamang naghupot sa integridad ang makalaom nga makabaton sa makalilipayng pribilehiyo sa pagdapig sa pagkasoberano sa Diyos hangtod sa kahangtoran. Mahilakip kita kanila kon mounong kita kang Jehova ingong atong Soberanong Ginoo.
Unsay Imong Tubag?
• Nganong angay natong ilhon si Jehova ingong atong Soberanong Ginoo?
• Unsay kahulogan nga atong huptan ang atong integridad ngadto sa Diyos?
• Giunsa nato pagkahibalo nga sa dili madugay si Jehova molihok aron ipakita ang iyang pagkasoberano?
• Sumala sa 1 Corinto 10:13, nganong posible nga mahuptan ang integridad?
[Mga Pangutana sa Pagtuon]
[Hulagway sa panid 24]
Gitental ni Satanas si Adan ug Eva nga mosupak kang Jehova
[Hulagway sa panid 26]
Magmadeterminado nga modapig sa pagkasoberano ni Jehova