Mga Pangutana Gikan sa mga Magbabasa

Sa Genesis 6:3 atong mabasa: “Ang akong espiritu dili molihok nganha sa tawo hangtod sa panahong walay tino sa pagkaagi nga siya usab unod. Busa ang iyang mga adlaw mokabat ug usa ka gatos ug kawhaan ka tuig.” Si Jehova ba naglimite sa gitas-on sa kinabuhi sa tawo ngadto sa 120 ka tuig lamang, ug si Noe ba nagsangyaw bahin sa umaabot nga Lunop sa ingon niana nga gitas-on?

Ang tubag sa duha ka bahin sa maong pangutana maoy wala.

Sa wala pa ang Lunop, daghang tawo ang nag-edad ug ginatos ka tuig. Si Noe nag-edad ug 600 sa pagkahitabo sa Lunop, ug siya nabuhi hangtod sa edad nga 950. (Gen. 7:6; 9:29) Ang uban nga natawo human sa Lunop, nabuhi usab ug kapin sa 120 ka tuig. Si Arpaksad namatay sa edad nga 438 ug si Sela sa edad nga 433. (Gen. 11:10-15) Apan sa panahon ni Moises, ang sagad nga gitas-on sa edad maoy 70 o 80 na lamang. (Sal. 90:10) Busa, wala itakda diha sa Genesis 6:3 nga ang 120 ka tuig maoy kinatas-an o normal nga gitas-on sa edad sa tawo.

Nan, kana bang bersikuloha nagpasabot nga ang Diyos nagsulti kang Noe nga pasidan-an ang uban nga ang kalaglagan moabot sa 120 ka tuig? Wala. Tinuod nga sa daghang higayon ang Diyos nakigsulti kang Noe. Sa bersikulo 13, atong mabasa: “Ang Diyos miingon kang Noe: ‘Ang kataposan sa tanang unod miabot sa akong atubangan, tungod kay ang yuta napuno sa kapintasan.’” Sa misunod nga katuigan, natapos ni Noe ang dakong buluhaton sa pagtukod ug arka, ug nianang higayona “si Jehova miingon kang Noe: ‘Sumulod ka sa arka, ikaw ug ang tibuok mo nga panimalay.’” (Gen. 6:13; 7:1) Ug dihay laing mga higayon nga si Jehova nagpahibalo kang Noe bahin sa pipila ka butang.—Gen. 8:15; 9:1, 8, 17.

 Apan lahi ang atong mabasa sa Genesis 6:3; wala kana maghisgot kang Noe, ni mag-ingon nga ang Diyos nakigsulti kaniya. Mahimo kanang sabton nga usa ka simpleng pagpahayag sa Diyos bahin sa iyang katuyoan o determinasyon. (Itandi ang Genesis 8:21.) Matikdi nga sa rekord sa kasaysayan bahin sa mga panghitabo sa wala pa maglungtad si Adan, atong mabasa ang mga ekspresyon sama sa: “Miingon ang Diyos.” (Gen. 1:6, 9, 14, 20, 24) Tataw nga si Jehova wala makigsulti sa usa ka tawo dinhi sa yuta, sanglit wala pa malalang ang tawo niadtong panahona.

Busa, makataronganon ang paghinapos nga ang Genesis 6:3 nagpahayag sa desisyon sa Diyos nga taposon ang daotang sistema sa mga butang sa yuta. Gipahayag ni Jehova ang usa ka hudisyal nga hukom nga pagatumanon sa 120 ka tuig, bisag si Noe wala pa mahibalo niana. Apan nganong gitakda man ang maong limitadong panahon? Nganong maghulat pa man?

Si apostol Pedro naghatag ug mga rason: “Ang pailob sa Diyos nagpaabot sa mga adlaw ni Noe, samtang ang arka gibuhat, diin pipila ka tawo, nga mao, walo ka kalag, ang giluwas latas sa tubig.” (1 Ped. 3:20) Oo, sa dihang gipahayag sa Diyos ang iyang determinasyon mahitungod sa 120 ka tuig, may mga butang nga kinahanglan pang himoon. Mga 20 ka tuig sa ulahi, si Noe ug ang iyang asawa nagsugod pagbatog mga anak. (Gen. 5:32; 7:6) Ang ilang tulo ka anak nga lalaki nanagko ug nanagminyo, mao nga ang membro sa pamilya mikabat ug “walo ka kalag.” Dayon sila nagtukod sa arka, nga dili sayon nga trabaho tungod sa gidak-on niini ug sa gidak-on sa pamilya ni Noe. Oo, tungod sa pagpailob sa Diyos sulod sa 120 ka tuig, ang maong mga butang nalampos, ug naposible ang padayong paglungtad sa kinabuhi, sanglit ang walo ka matinumanong tawo ‘naluwas latas sa tubig.’

Ang Bibliya wala maghisgot nga si Jehova nagpahibalo kang Noe kon unsang tuiga moabot ang Lunop. Sanglit ang iyang mga anak nga lalaki nangatawo, nanagko, ug nangaminyo, lagmit mga 40 o 50 ka tuig na lang ang nahibilin una pa ang Lunop. Dayon si Jehova miingon kang Noe: “Ang kataposan sa tanang unod miabot sa akong atubangan.” Siya midugang nga si Noe kinahanglang magtukod ug dakong arka ug siya ug ang iyang pamilya mosulod niana. (Gen. 6:13-18) Sulod sa nahibiling mga dekada, si Noe dili lamang usa ka panig-ingnan sa pagkamatarong pinaagi sa iyang pagkinabuhi. Siya nag-alagad ingong “magwawali sa pagkamatarong” kinsa nagpahayag ug tin-awng mensahe sa pasidaan—nga laglagon gayod sa Diyos ang tanang dili-diyosnon niadtong panahona. Si Noe wala mahibalo nga abante kon unsang tuiga kana moabot, apan nahibalo siya nga kana moabot gayod. Ug ikaw nahibalo nga kana nahitabo gayod.—2 Ped. 2:5.