Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Aw, sulayi kon makatubag ka ba sa mosunod nga mga pangutana:

• Unsang mga relihiyon ang nagtuo karon sa predestinasyon?

Ang Calvinismo nagpasiugda sa doktrina sa predestinasyon. Ang gitudlo sa repormador nga si Jean Cauvin (John Calvin) gituohan sa mga denominasyon sama sa Reformed, Presbyteriano, Kongregasyonal, ug Puritano.—9/1, panid 18-21.

• Diin kuhaa ni Cain ang iyang asawa?

Ang asawa ni Cain maoy kaliwat ni Eva, kinsa nanganak ug “mga anak nga lalaki ug mga anak nga babaye.” (Gen. 5:4)—9/1, panid 25.

• Kinsa ang manulonda nga gisugo sa Diyos aron manguna sa Israel sa paggawas sa Ehipto? (Ex. 23:20, 21)

Makataronganon ang pagtuo nga ang manulonda nga ang ‘ngalan ni Jehova anaa kaniya,’ mao ang panganay nga Anak sa Diyos, nga sa ulahi nahimong si Jesus.—9/15, panid 21.

• Nganong ang 1 Corinto naghisgot bahin sa karne nga gihalad sa mga idolo?

Ang mga hayop gihalad diha sa mga templo sa Gresya ug Roma, apan ang karne nga wala makaon panahon sa seremonyas mahimong ibaligya sa tiyanggihan. Ang mga Kristohanon wala makigbahin sa paganong pagsimba; apan dili nila angayng isipon nga hugaw ang hinalad nga karne nga gibaligya sa tiyanggihan. Si apostol Pablo misulat: “Ang tanan nga gibaligya sa tiyanggihan sa karne padayong kaona, nga walay pagpakisayod tungod sa inyong tanlag; kay ‘iya ni Jehova ang yuta ug ang tanan nga anaa niini.’” (1 Cor. 10:25, 26)—10/1, panid 12.

• Bahin sa matuod nga pagsimba, unsay pipila ka pangatarongan nga dili dalawaton sa Diyos?

‘Lisod kaayo. Dili ko ganahang mosangyaw. Puliki kaayo ko. Dili ko takos. Duna koy gikahiubsan.’ Kana maoy mga pasangil sa dili pagsunod sa mga sugo sa Diyos.—10/15, panid 12-15.

• Unsay pipila ka paagi nga makatabang ka nga mahimong makapalig-on ang mga tigom?

Pangandam nga abante. Tambong nga regular. Sayo ug abot. Dad-a ang tanang gikinahanglan. Likayi ang kabaldahan. Pakigbahin. Himoang mubo ang imong mga komento. Pabilhi ang imong mga bahin. Pasalamati ang dunay bahin. Pakigsandurot sa mga igsoon.—10/15, panid 22.

• Ang sanla, nga naglakip sa gitawag karon nga Hansen’s disease, gihisgotan sa unsang asoy sa Bibliya nga naglangkit sa usa ka dalagita?

Ang 2 Hari kapitulo 5 naghisgot sa usa ka dalagitang Israelinhon, nga sulugoon sa balay sa usa ka pangulo sa kasundalohan sa Sirya nga si Naaman. Kay siya may sanla, ang dalagita misugyot nga moadto siya kang propeta Eliseo aron maayo ang iyang sakit.—11/1, panid 22.

• Unsay atong makat-onan sa pagpadaog ni Aaron sa pagpamit-os sa iyang isigkaingon?

Samtang wala si Moises, ang mga Israelinhon nag-awhag kang Aaron nga maghimog usa ka diyos para nila. Siya nagpadaog ug naghimo niana. Kini nagpakita nga ang pagpamit-os dili lamang mahitabo sa mga batan-on. Bisan ang mga edaran nga gustong mobuhat sa matarong maapektohan niini. Kinahanglang suklan nato ang pagpamit-os sa isigkaingon.—11/15, panid 8.

• Hain ang tinuod, ug hain ang tumotumo?

Si Satanas usa ka tinuod nga persona: tinuod. (2 Cor. 11:14) Ang tanang tawo nga mamatay moadto sa dominyo sa mga espiritu: tumotumo. (Eccl. 9:5) Ang matinumanong mga manulonda nahingawa kanato: tinuod. (Sal. 34:7) Si Jesus katumbas sa Diyos: tumotumo. (1 Cor. 11:3)—12/1, panid 8-9.