Gihatagag Gahom sa Pagbuntog sa mga Pagsulay

“Sa tanang butang ako adunay kusog pinaagi kaniya nga naghatag ug gahom kanako.”—FILIP. 4:13.

1. Nganong ang katawhan ni Jehova nag-atubang ug daghang pagsulay?

ANG katawhan ni Jehova makasinatig lainlaing pagsulay. Ang pipila niini maoy tungod sa atong pagkadili-hingpit o gipahinabo niining sistema sa mga butang. Ang uban maoy tungod sa panag-away tali niadtong nag-alagad sa Diyos ug niadtong wala. (Gen. 3:15) Sukad kaniadto, ang Diyos nagtabang sa iyang matinumanong mga alagad sa pagsagubang sa paglutos, pagsukol sa pagpamit-os sa isigkaingon, ug pag-antos sa tanang matang sa kalisdanan. Ang iyang balaang espiritu makatabang kanato sa pagbuhat niana.

Pagsagubang sa Paglutos

2. Unsay tuyo sa relihiyosong paglutos, ug unsa ang duha ka matang niini?

² Ang relihiyosong paglutos maoy paghasi o tinuyo nga pagdaot sa mga tawo tungod sa ilang pagtuo. Ang tuyo niini mao ang pagwagtang sa ilang tinuohan, pagpugong sa pagkaylap niini, o pagbungkag sa integridad sa mga magtutuo. Ang paglutos mahimong direkta o dili direkta. Sa Bibliya, ang mga pag-atake ni Satanas gitandi nianang sa nating leyon ug kobra.—Basaha ang Salmo 91:13.

3. Ipatin-aw ang samag-leyon ug samag-kobra nga paglutos.

³ Sama sa bangis nga leyon, si Satanas sagad  moatake sa dayag ug direktang paagi sama sa kapintasan, pagbilanggo, o pagbando. (Sal. 94:20) Ang Tinuig nga Basahon sa mga Saksi ni Jehova adunay daghang asoy bahin sa maong mga taktika. Sa daghang dapit, ang magubtanong mga grupo—nga ang lider sa pipila maoy mga klerigo o panatikong politiko—nagdagmal sa katawhan sa Diyos. Tungod niining samag-leyon nga mga pag-atake, ang pipila mihunong sa pag-alagad. Sama sa kobra, ang Yawa kalit manuklo gikan sa natagong dapit aron hiloan ang hunahuna sa mga tawo ug linglahon sila sa pagtuman sa iyang kabubut-on. Ang tumong niining matanga sa pag-atake mao ang pagpahuyang o pagkompromiso sa atong pagtuo. Apan pinaagi sa balaang espiritu sa Diyos, kita makabuntog niining duha ka matang sa paglutos.

4, 5. Unsa ang labing maayong paagi sa pagpangandam sa paglutos, ug ngano? Paghatag ug pananglitan.

⁴ Ang paghanduraw sa posibleng mahitabo panahon sa paglutos dili ang labing maayong paagi sa pagpangandam niana. Sa pagkatinuod, dili nato mahibaloan kon unsang paglutos ang atong maatubang, busa way kapuslanan nga mabalaka sa mga butang nga basin dili mahitabo. Apan, duna kitay mahimo. Ang kadaghanan nakasagubang sa paglutos pinaagi sa pagpamalandong sa panig-ingnan sa matinumanong mga alagad diha sa Kasulatan ug sa mga pagtulon-an ug ehemplo ni Jesus. Kana nakapalalom sa ilang gugma kang Jehova. Ug ang maong gugma nakatabang kanila sa pagbuntog sa mga pagsulay.

⁵ Tagda ang panig-ingnan sa duha ka sister sa Malawi. Aron pugson sila sa pagpalit ug kard sa politikal nga partido, sila gidagmalan, gihuboan, ug gihulga nga lugoson sa usa ka mapintasong grupo. Gibakakan sila sa grupo nga ang mga membro sa pamilyang Bethel nakapalit nag mga kard. Unsay tubag sa mga sister? “Si Jehova nga Diyos lamang ang among alagaran. Busa kon mipalit ug kard ang mga igsoon sa sangang buhatan, bahala na sila. Di mi mokompromiso, bisag patyon mi ninyo!” Human sa maisogong tubag, sila gibuhian.

6, 7. Sa unsang paagi si Jehova nagtabang sa iyang mga alagad sa pagsagubang sa paglutos?

⁶ Si apostol Pablo miingon nga gidawat sa mga Kristohanon sa Tesalonica ang mensahe sa kamatuoran “ilalom sa daghang kasakitan” apan sila “may kalipay sa balaang espiritu.” (1 Tes. 1:6) Sa pagkatinuod, daghang Kristohanon, kaniadto ug karon, ang nakalahutay sa paglutos. Sila miingon nga sa kinalisdang bahin sa ilang mga pagsulay, ilang nasinati ang kalinaw sa hunahuna—usa ka bahin sa bunga sa balaang espiritu sa Diyos. (Gal. 5:22) Ang maong kalinaw nakatabang sa pagpanalipod sa ilang kasingkasing ug hunahuna. Oo, gamiton ni Jehova ang iyang aktibong puwersa aron ang iyang mga alagad makasagubang sa mga pagsulay ug molihok nga maalamon. *

⁷ Kadtong nakapaniid sa katawhan sa Diyos nahingangha sa ilang determinasyon nga magmatinumanon bisan sa grabeng paglutos. Ang mga Saksi daw nakabaton ug labaw-tawhanong gahom, ug tinuod gayod kana. Si apostol Pedro nagpasalig: “Kon kamo gipakaulawan tungod sa ngalan ni Kristo, kamo malipayon, tungod kay ang espiritu sa himaya, bisan ang espiritu sa Diyos, anaa kaninyo.” (1 Ped. 4:14) Ang paglutos kanato tungod sa pagsunod sa matarong nga mga sukdanan nagpaila nga kita giuyonan sa Diyos. (Mat. 5:10-12; Juan 15:20) Ang maong pamatuod sa panalangin ni Jehova maghatag kanatog dakong kalipay.

Dili Magpadaog sa Pagpamit-os sa Isigkaingon

8. (a) Unsay nakatabang kang Josue ug Caleb sa dili pagpadaog sa pagpamit-os sa isigkaingon? (b) Unsay atong makat-onan sa ilang panig-ingnan?

⁸ Ang di-daling mamatikdan nga matang sa pagsupak nga nasinati sa mga Kristohanon  mao ang pagpamit-os sa isigkaingon. Apan ang espiritu ni Jehova mas gamhanan kay sa espiritu sa kalibotan, busa makabarog kita batok sa pagbiaybiay sa mga tawo, kinsa nagpakaylap ug kabakakan bahin kanato, o naningkamot sa pagpasunod kanato sa ilang mga sukdanan. Pananglitan, unsay nakatabang kang Josue ug Caleb sa pagsupak sa opinyon sa napulo ka ubang espiya nga gipadala sa Canaan? Ang balaang espiritu nagpukaw diha kanila ug lahi nga “espiritu,” o panghunahuna.—Basaha ang Numeros 13:30; 14:6-10, 24.

9. Nganong ang mga Kristohanon andam nga malahi sa kadaghanan?

⁹ Ang balaang espiritu nagtabang usab sa mga apostoles ni Jesus sa pagsunod sa Diyos inay sa mga magtutudlo sa relihiyon nga tinamod sa kadaghanan. (Buh. 4:21, 31; 5:29, 32) Daghang tawo ang mosunod kon unsay ginabuhat sa kadaghanan aron malikayan ang komprontasyon o panagbangi. Apan, ang matuod nga mga Kristohanon kinahanglang mobarog kon unsay matarong. Bisan pa niana, sila dili mahadlok nga malahi tungod sa gahom nga gihatag sa aktibong puwersa sa Diyos. (2 Tim. 1:7) Tagda ang usa ka kahimtang diin dili kita angayng magpadaog sa pagpamit-os.

10. Unsang problema ang lagmit maatubang sa pipila ka Kristohanon?

¹⁰ Ang pipila ka batan-on maproblema tingali kon ilang masayran nga ang usa ka higala nakasala. Mahimong bation sa usa nga kon isumbong niya sa mga ansiyano ang iyang higala, siya dili na saligan; busa iya na lang kanang isekreto aron dili maulawan ang iyang higala. Ang nakasala mahimong magpasidaan pa sa iyang mga higala nga dili ibutyag ang iyang sala. Siyempre, dili lamang mga batan-on ang makaatubang niini. Ang pipila ka hingkod mahimong malisdan usab nga mosumbong sa mga ansiyano sa sala sa usa ka higala o membro sa pamilya. Apan unsay angayng reaksiyon sa matuod nga mga Kristohanon sa maong pagpamit-os?

11, 12. Unsay labing maayong buhaton kon may igsoon sa kongregasyon nga magpasidaan kanimo nga dili ibutyag ang iyang sala, ug ngano?

¹¹ Handurawa kini. Ibutang ta nga si Alex, usa ka batan-ong brader, nahibalo nga ang iyang higalang si Steve tigtan-awg pornograpiya. Gisultihan ni Alex si Steve nga siya nabalaka sa iyang ginabuhat. Apan, wala tagda ni Steve ang iyang gisulti. Sa dihang giawhag ni Alex si Steve nga moduol sa mga ansiyano, si Steve miingon nga kon tinuod silang managhigala, dili siya isumbong. Angay bang mahadlok si Alex nga mawad-ag higala? Maghunahuna tingali siya kon kinsay tuohan sa mga ansiyano kon ilimod kana ni Steve. Apan, dili masulbad ang problema kon magpakahilom si Alex. Sa pagkatinuod, moresulta kini nga si Steve mawad-an sa iyang relasyon kang Jehova. Angayng hinumdoman ni Alex nga “ang pagpangurog tungod sa mga tawo nagadala ug usa ka lit-ag, apan siya nga nagasalig kang  Jehova pagapanalipdan.” (Prov. 29:25) Unsa pay mahimo ni Alex? Mahimong moduol na sab siya kang Steve ug hisgotan ang problema. Nagkinahanglan kanag kaisog. Lagmit sa maong higayon, makigsulti na si Steve bahin sa iyang problema. Angayng dasigon na usab ni Alex si Steve nga moduol sa mga ansiyano ug hatagan siyag igong panahon sa paghimo niana, apan kon dili niya kana buhaton, si Alex na ang mosulti sa mga ansiyano.—Lev. 5:1.

¹² Kon nakasinati kag susamang kahimtang, sa sinugdan ang imong higala tingali dili malipay sa imong pagtabang. Apan basin makaamgo siya sa ulahi nga alang kadto sa iyang kaayohan. Kon magpatabang ang nakasala, basin siya magmapasalamaton sa imong kaisog ug kamaunongon. Sa laing bahin, kon siya padayong masuko kanimo, kana bang matanga sa higala ang imong gusto? Ang pagpahimuot sa atong kinalabwang Higala, si Jehova, mao ang hustong buhaton sa tanang panahon. Kon ato siyang unahon, ang ubang nahigugma kaniya motahod kanato tungod sa atong pagkamaunongon ug mahimong tinuod nga mga higala. Dili gayod nato hatagag luna ang Yawa diha sa kongregasyon aron dili nato mapaguol ang balaang espiritu ni Jehova. Hinunoa, pinaagi sa pagpaningkamot nga mahuptang hinlo ang kongregasyon, kita nagalihok nga kaharmonya sa balaang espiritu.—Efe. 4:27, 30.

Pagsagubang sa Tanang Matang sa Kalisdanan

13. Unsang mga kalisdanan ang giatubang sa katawhan ni Jehova, ug nganong kaylap kaayo kana?

¹³ Daghag matang ang kalisdanan—pinansiyal nga problema, kawalay trabaho, kalamidad, kamatayon sa usa ka minahal, sakit, ug uban pa. Sanglit nagkinabuhi kita sa ‘makuyaw nga mga panahon,’ atong madahom nga kitang tanan makasinatig kalisdanan. (2 Tim. 3:1) Kon mahitabo kana, dili kita angayng matarantar. Ang balaang espiritu makatabang kanato sa pagsagubang sa mga kalisdanan.

14. Unsay nakatabang kang Job sa pagsagubang sa mga kalisdanan?

¹⁴ Si Job nakaagom ug lainlaing kalisdanan. Siya nawad-ag panginabuhian, mga anak, mga higala, ug maayong panglawas, ug ang iyang asawa nawad-ag pagsalig kang Jehova. (Job 1:13-19; 2:7-9) Apan si Job nakabatog tinuod nga maghuhupay, si Elihu. Ang iyang mensahe, ug ang diwa sa tanang gipamulong ni Jehova kang Job, mao kini: “Hunong ug magmatinagdanon sa katingalahang mga buhat sa Diyos.” (Job 37:14) Unsay nakatabang kang Job sa pagsagubang sa mga pagsulay? Ug unsa usab ang makatabang kanato? Ang paghinumdom ug pagpamalandong sa lainlaing pasundayag sa balaang espiritu ug gahom ni Jehova. (Job 38:1-41; 42:1, 2) Lagmit makahinumdom kitag mga higayon nga ang Diyos nagpakitag interes kanato. Siya interesado gihapon kanato karon.

15. Unsay nakatabang kang apostol Pablo sa pagsagubang sa mga pagsulay?

¹⁵ Daghang higayon nga nameligro ang kinabuhi ni apostol Pablo tungod sa iyang pagtuo. (2 Cor. 11:23-28) Sa unsang paagi siya  nagpabiling timbang ug lig-on sa emosyon panahon sa kalisdanan? Pinaagi sa pagsalig ug pag-ampo kang Jehova. Panahon sa pagsulay nga misangpot sa iyang pagkamartir, si Pablo misulat: “Ang Ginoo mibarog duol kanako ug mihatag kanakog gahom, aron nga pinaagi kanako ang pagwali matuman sa bug-os ug ang tanang kanasoran makadungog niini; ug giluwas ako gikan sa baba sa leyon.” (2 Tim. 4:17) Busa, base sa iyang kasinatian, si Pablo nagpasalig sa mga isigkamagtutuo nga dili angayng ‘mabalaka sa bisan unsang butang.’—Basaha ang Filipos 4:6, 7, 13.

16, 17. Paghatag ug pananglitan kon sa unsang paagi si Jehova nagtabang sa iyang katawhan sa pagsagubang sa mga kalisdanan karon.

¹⁶ Ang payunir nga si Roxana nakasinati mismo kon sa unsang paagi si Jehova nagtagana sa iyang katawhan. Sa mihangyo siya sa iyang amo nga mobakasyon ug pila ka adlaw aron motambong sa kombensiyon, ang iyang amo nasuko ug miingon nga wala na siyay trabaho pagbalik niya. Apan siya mitambong gihapon ug nag-ampo nga dili papahawaon. Human niana, siya nahupayan. Pagka-Lunes human sa kombensiyon, siya gipapahawa sa iyang amo. Siya nabalaka kay iyang gikinahanglan ang maong trabaho bisag gamay rag suweldo aron makatabang sa pagsuportar sa ilang pamilya. Siya miampo na usab ug namalandong nga ang Diyos nagtagana kaniya sa espirituwal panahon sa kombensiyon, busa seguradong Siya motagana usab kaniya sa materyal. Sa iyang pagpauli, si Roxana nakakitag karatula nga nangitag eksperyensiyadong mga mananahi, ug siya miaplay. Bisag ang manedyer nahibalo nga wala siyay eksperyensiya, siya gidawat gihapon ug ang suweldo halos doble kay sa iyang miaging trabaho. Si Roxana nagtuo nga gidungog ang iyang mga pag-ampo. Ug ang labing dakong panalangin mao nga siya nakapaambit sa maayong balita sa mga kauban niya sa trabaho. Lima kanila, apil ang manedyer, midawat sa kamatuoran ug nabawtismohan.

¹⁷ Usahay, ang atong mga pag-ampo daw wala dungga dihadiha o sumala sa atong gidahom. Kon mao, tino nga adunay maayong rason. Si Jehova nahibalo niana, apan mahimong masabtan nato kana sa ulahi pa. Hinuon segurado kita sa usa ka butang—ang Diyos dili gayod mobiya sa mga matinumanon.—Heb. 6:10.

Pagbuntog sa mga Pagsulay ug Tentasyon

18, 19. (a) Nganong atong madahom ang mga pagsulay ug tentasyon? (b) Sa unsang paagi mabuntog nimo ang mga pagsulay?

¹⁸ Ang katawhan ni Jehova dili matingala nga sila makasinatig tentasyon, kaluya, paglutos, ug pagpamit-os sa isigkaingon. Ang kalibotan nagdumot kanato. (Juan 15:17-19) Apan, ang balaang espiritu makatabang kanato sa pagbuntog sa mga kalisdanan nga atong maatubang diha sa pag-alagad sa Diyos. Si Jehova dili motugot nga kita tentalon ug labaw sa atong maantos. (1 Cor. 10:13) Siya dili gayod mobiya o motalikod kanato. (Heb. 13:5) Ang pagkamasinugtanon sa iyang inspiradong Pulong manalipod ug makapalig-on kanato. Dugang pa, ang espiritu sa Diyos mopalihok sa mga isigkamagtutuo sa pagtabang kanato sa panahon nga ato kanang gikinahanglan.

¹⁹ Hinaot kitang tanan padayong mangayo sa balaang espiritu pinaagi sa pag-ampo ug pagtuon sa Kasulatan. Hinaot kita padayong ‘magamhanan sa bug-os sumala sa mahimayaong gahom sa Diyos aron makaantos sa bug-os ug magpakitag hataas-nga-pailob uban ang kalipay.’—Col. 1:11.

[Footnote]

Unsay Imong Tubag?

• Sa unsang paagi makapangandam ka sa paglutos?

• Unsay imong buhaton kon pasidan-an ka nga dili ibutyag ang usa ka sala?

• Unsay gipasalig kanimo panahon sa mga kalisdanan?

[Mga Pangutana sa Pagtuon]

[Hulagway sa panid 28]

Unsay atong makat-onan kang Josue ug Caleb?

[Hulagway sa panid 29]

Sa unsang paagi makatabang ka sa higalang nakasala?